ཞབས་བརྟན་སྨོན་ཚིག་བསྐལ་བཟང་གཞོན་ནུའི་དགའ་སྟོན་ཞེས་བྱ་བ་བཞུགས་སོ། །
འཆི་མེད་ཞིང་མགོན་རྒྱལ་བ་ཚེ་མཐའ་ཡས། །
འཆི་མེད་ལྷ་མོ་རྣམ་པར་རྒྱལ་མའི་ཞབས། །
འཆི་མེད་ཚེ་སྦྱིན་ཡིད་བཞིན་འཁོར་ལོ་ཡིས། །
འཆི་མེད་བདུད་རྩིའི་གྲུ་ཆར་དེང་འདིར་སྩོལ། །
རྒྱལ་ཀུན་ཡེ་ཤེས་གཅིག་གྱུར་འཇམ་པའི་དབྱངས། །
ཀུན་དགའི་ལུགས་མཆོག་ལྷ་ལམ་མཛེས་པའི་རྒྱན། །
ཟབ་གསང་ཐུབ་བསྟན་གསུང་ངག་འོད་པོ་ཆེ། །
འཇིགས་མེད་སྨྲ་བའི་ཉི་མ་ཞབས་བརྟན་གསོལ། །
རིགས་རུས་དགེ་མཚན་རྫོགས་པའི་བཀྲ་ཤིས་སྐུ། །
བསླབ་ཁྲིམས་རྣམ་པར་དག་པའི་དྲི་བསུང་གིས། །
ལྷ་མིའི་མཆོད་སྡོང་བསྒྲུབས་ནས་གསན་བསམ་དང་། །
སྒོམ་པས་ཐུགས་རྒྱུད་གྲོལ་མཛད་ཞབས་བརྟན་གསོལ། །
ཕ་རོལ་ཕྱིན་དང་རྒྱུད་སྡེ་རྒྱ་མཚོ་ཡི། །
སོ་བྱང་སྔགས་ཀྱི་སྡོམ་གསུམ་བདུད་རྩིའི་རྒྱུན། །
གཙང་མར་བཟུང་ནས་འགྲོ་བའི་ལས་ཉོན་རིམས། །
ཞི་མཛད་ཆོས་སྨན་ཆེན་པོར་ཞབས་བརྟན་གསོལ། །
མཆོག་གསུམ་བསླུ་བ་མེད་པའི་ཐུགས་རྗེ་དང་། །
ཡི་དམ་ཆོས་སྐྱོང་སྲུང་མའི་ནུས་མཐུ་ཡིས། །
ཡིད་ལ་བརྣག་པའི་འདོད་རྒུ་མ་ལུས་པ། །
གེགས་མེད་ལྷུན་གྱིས་འགྲུབ་པར་བྱིན་གྱིས་རློབས། །
ཞེས་པ་འདིའང་འཁོན་གདུང་བགྲེས་པ་ཨ་བི་ཀྲྀ་ཏ་རིན་པོ་ཆེ་མཆོག་ནས་གང་གི་སྐུའི་གཅུང་པོ་འཁོན་གདུང་འཇམ་དབྱངས་ཀུན་དགའ་ཐུབ་བསྟན་འཇིགས་མེད་རིན་པོ་ཆེར་ཞབས་བརྟན་ཞིག་བྲི་དགོས་ཞེས་རྟེན་དང་བཅས་པ་བསྐུལ་མ་གནང་བ་བཞིན། ས་སྐྱ་ཁྲི་ཆེན་པས་དང་བའི་བློས་སྦྱར་བ་དོན་དང་ལྡན་པར་གྱུར་ཅིག་གུ།། །།
