རྗེས་དྲན་གདུང་འབོད།
རྡུང་ལེན་མཁན། ཁམས་མཐར་ཕྱིན།
སྡུག་བསྔལ་འཁོར་བའི་གྲོང་དུ། །
བསམ་བཞིན་སྐྱེ་བ་བཞེས་པའི། །
ཉམས་ཐག་འགྲོ་བའི་སྐྱབས་མགོན། །
ཕ་གཅིག་ཡིད་བཞིན་ནོར་བུ། །
ཁྱེད་སྐུ་ཉི་མའི་དཀྱིལ་འཁོར། །
གླིང་འདིར་འཆར་བའི་དུས་སུ། །
སྐལ་བཟང་གདུལ་བྱའི་ཚོགས་ལ། །
ཐུགས་རྗེའི་འོད་ཟེར་སྤྲོས་ཡོད། །
རྒྱལ་བསྟན་ཉི་མ་གཞོན་ནུ། །
ནུབ་རིར་གཞུད་ལ་ཉེ་དུས། །
བསྟན་པའི་སྒྲོན་མེ་སྦར་མཁན། །
ཁྱེད་ལས་ལྷག་པ་མི་འདུག །
སྐྱེ་འཆི་རང་དབང་གྲུབ་ཀྱང་། །
རྟག་འཛིན་གདུལ་བྱའི་ངོ་རུ། །
གཟུགས་སྐུའི་བཀོད་པ་བསྡུས་ནས། །
ལོ་ཟླ་རིང་པོ་འགོར་སོང་། །
མགོན་མེད་ཉམས་ཐག་ང་ཚོས། །
བརྗེད་མེད་བཀའ་དྲིན་དྲན་བཞིན། །
གསོལ་འདེབས་མོས་གུས་ཞུས་ན། །
ཐུགས་རྗེ་བྱིན་རླབས་སྩོལ་རོགས། །
མཁན་སྤྲུལ་ཉི་ཟླ་ཟུང་གཅིག །
རེ་ཞིག་ཞིང་གཞན་གཤེགས་ན། །
མགོན་མེད་དྭ་ཕྲུག་ང་ཚོའི། །
སྐྱབས་གནས་རེ་ས་སུ་བྱེད། །
དམ་པའི་མཛད་བཟང་རེ་རེའི། །
བཀའ་དྲིན་ཡིད་ལ་དྲན་བཞིན། །
གསོལ་འདེབས་གདུང་བས་འབོད་ན། །
ཐུགས་རྗེའི་སྤྱན་གྱིས་གཟིགས་རོགས། །
སྐྱེ་བའི་ཕྲེང་བ་རྣམས་སུ། །
དཔལ་ལྡན་བླ་མ་ཁྱེད་ཀྱིས། །
ཐུགས་རྗེའི་བྱིན་རླབས་འཇུག་ནས། །
ལས་ངན་རྒྱུན་ཐག་གཅོད་རོགས། །
གོ་ངུར་སྨྲིག་གིས་བྲིས།
