རྗེ་བླ་མ་ཤར་ཀཿཐོག་པ་དམ་པ་བདེ་བར་གཤེགས་པའི་
རྣམ་ཐར་རྗེས་སུ་དྲན་པའི་གཏམ་རིན་ཆེན་གསེར་
གྱི་ཐང་མ་སྔ་འགྱུར་བསྟན་པ་མཛེས་པའི་
རྒྱན་ཞེས་བྱ་བ་བཞུགས་སོ། །
རྩོམ་པ་པོ- མཁན་ཀུན་བཟང་རྣམ་རྒྱལ།
ན་མོ་མཉྫུ་ཤྲཱི་ཡེ།
རྡུལ་བྲལ་ཆོས་སྐུའི་ངང་ལས་མ་གཡོས་ཀྱང་། །
འགག་མེད་ཆུ་ཟླའི་གཟུགས་བཞིན་མངོན་གསལ་བ། །
ཟུང་འཇུག་མཚན་དཔེའི་སྐུར་སྣང་ཆོས་ཀྱི་རྗེ། །
འདྲེན་མཆོག་དམ་པ་མཆོག་ལ་ཕྱག་༵འཚལ་༵ལོ། ། ༡༽
ལུས་ངག་ཡིད་གསུམ་ཁ་རྗེ་དབང་ཐང་བཅས། །
དངོས་སུ་འབྱོར་དང་ཡིད་ཀྱིས་རྣམ་སྤྲུལ་ཏེ། །
རབ་འབྱམས་ནམ་མཁའི་མཐས་གཏུགས་མཆོད་༵པའི་༵སྤྲིན། །
བསོད་ནམས་ཚོགས་ཆེན་རྫོགས་ཕྱིར་ཁྱེད་ལ་འབུལ། །༢༽
ཐོག་མ་མེད་པའི་དུས་ནས་ད་ལྟའི་བར། །
མ་རིག་གིས་བསླད་སྒོ་གསུམ་བག་མེད་ཀྱི། །
དབང་སོང་ཉམས་ཆག་ཉེས་ལྟུང་ཅི་མཆིས་པ། །
ཐམས་ཅད་དམ་པ་མཆོག་གི་སྤྱན་སྔར་འཆགས༵། །༣༽
ཁྱེད་ཀྱི་སྐུ་ཡི་བཀོད་པ་གསུང་གི་མཛོད། །
མཁྱེན་བརྩེའི་དགོངས་པ་ཕ་མཐའ་མི་མངའ་བས། །
ཞིང་འདིས་མཚོན་པའི་འཇིག་རྟེན་རབ་འབྱམས་ལ། །
འཕྲིན་ལས་སྣང་བས་ཁྱབ་ལ་ཡི་༵རང་༵ངོ་། །༤༽
མཐའ་ཡས་འགྲོ་བའི་འཁྲུལ་རྟོག་མ་ཞིག་བར། །
འོད་སྣང་མཐའ་ཡས་རྒྱལ་དང་གཉིས་སུ་མེད། །
འགྲོ་བ་འདྲེན་མཛད་ཀུན་མཁྱེན་ཀཿ ཐོག་པ། །
རྟག་ཁྱབ་ལྷུན་གྲུབ་མྱ་ངན་མི་འདའ་བཞུགས༵། །༥༽
གདུལ་བྱའི་མོས་ངོར་གང་འདོད་ཆོས་ཆར་དང་། །
ཁྱད་པར་བསྟན་པའི་སྙིང་པོ་ནང་མཛོད་སྡེ། །
མདོ་སྒྱུ་སེམས་གསུམ་ཆོས་སྒྲ་མི་ཉམས་པར། །
འཕྲིན་ལས་སྣང་བའི་ཆོས་༵འཁོར༵་བསྐོར་དུ་གསོལ། །༦༽
ཚོགས་བསགས་ཡན་ལག་བདུན་པའི་མཆོད་པ་དང་། །
རྣམ་དཀར་དགེ་ལ་གཞོལ་བ་དཀར་པོའི་ཆ། །
མ་ལུས་ཅི་མཆིས་མཐའ་ཡས་སྐྱེ་འགྲོ་ཀུན། །
རྣམ་མཁྱེན་རྫོགས་བྱང་འཐོབ་པའི་རྒྱུ་རུ་བསྔོ༵། །༧༽
གང་གི་རྣམ་ཐར་ཟབ་རྒྱས་རྒྱ་མཚོའི་རླབས། །
ཡོངས་རྫོགས་བྱིས་བློས་གཞལ་བར་མི་ནུས་མོད། །
བརྒྱ་ཕྲག་དགུ་ཡི་རྗེས་དྲན་བསུ་བའི་ཆེད། །
བསྟོད་རྩོམ་སྟག་མོའི་འཛུམ་དྲུག་འདི་ན་བཀྲ། །༨༽
རྩོད་པའི་རྗེས་དྲན་སེང་གེའི་གཡུ་རལ་ངོམ། །
འཆད་པའི་རྗེས་དྲན་གཡུ་འབྲུག་སྔོན་མོའི་སྐད། །
རྩོམ་པའི་རྗེས་དྲན་སྟག་མོའི་འཛུམ་དྲུག་བཀྲ། །
འདི་ཡང་དམ་པའི་རྗེས་དྲན་བསུ་སྟངས་ཡིན། །༩༽
སྣང་མཐའི་ཐུགས་དང་པད་མ་འབྱུང་གནས་སྐུ། །
མཚོ་རྒྱལ་འཕྲིན་ལས་ཞི་ལྷའི་ཡོན་ཏན་དང་། །
འཇམ་དབྱངས་གསུང་གི་རྣམ་རོལ་བདེ་བར་གཤེགས། །
ཀུན་མཁྱེན་ཀཿ ཐོག་པ་ཞེས་གྲགས་པ་ཁྱོད། །༡༠༽
སྐལ་བཟང་སྟོང་རྩ་མངོན་སངས་རྒྱ་བའི་གནས། །
བྱང་ཕྱོགས་གངས་ཅན་ཁ་བས་མཛེས་པའི་ལྗོངས། །
མདོ་ཁམས་སྒང་དྲུག་བུ་འབོར་ས་ཡི་ཆར། །
གསེར་ཕྱེ་བྱེ་བ་བརྡལ་བ་འབབ་པའི་འགྲམ། །༡༡༽
ཀྲེ་ཤོད་གངས་ཀྱི་ར་བ་འབལ་མོའི་ཡུལ། །
གནམ་ས་འཁོར་ལོ་པད་མ་ཁ་སྦྱོར་ཞིང་། །
ལོགས་ལ་རང་བྱུང་རིན་ཆེན་བཀྲ་ཤིས་རྫས། །
ངོ་མཚར་བྱེ་བས་ཕྱུག་པའི་ཡུལ་དེ་རུ། །༡༢༽
འཇམ་དཔལ་གཤིན་རྗེའི་སྤྲུལ་པ་གཙང་དཔལ་གྲགས། །
དབྱངས་ཅན་ལྷ་མོའི་རྣམ་སྤྲུལ་རིན་ཆེན་རྒྱན། །
ཆུ་ཕོ་སྟག་ལོར་ཡུམ་གྱི་ལྷུམས་ཞུགས་ནས། །
ངོ་མཚར་དགེ་བའི་མཚན་ལྟས་བཅས་ཏེ་བལྟམས། །༡༣༽
འཁྲུངས་མ་ཐག་ཏུ་དགུན་དུས་གྲང་ངར་ཁྲོད། །
ར་བའི་ནང་ནས་པད་མ་ཁ་བྱེ་ཞིང་། །
བྱ་རོག་དུ་མས་གཟིམ་ཁང་བསྐོར་བ་སོགས། །
ཁྱོད་ཞབས་རྡུལ་གྱིས་ཡུལ་དེར་མཛེས་པར་བྱས། །༡༤༽
ལང་ཚོ་མྱུ་གུའི་འདབ་མ་མ་གྲོལ་ཡང་། །
ནང་དུ་ཤེས་རབ་པད་མའི་འདབ་གཤོག་རྒྱས། །
དགུང་གྲངས་དྲུག་ཐོག་འབྲི་ཀློག་སློབ་པའི་དུས། །
དཀའ་ཚེགས་མེད་པར་ཁོང་དུ་ཆུད་པར་གྲགས། །༡༥༽
བཟོ་དང་གསོ་བ་དཀར་ནག་སྤོར་ཐང་རྩིས། །
སྨྲ་སྒོ་ཐོན་མིའི་སུམ་རྟགས་ཚིག་གི་རྒྱན། །
ཐུན་མོངས་འཇིག་རྟེན་ལུགས་ཀྱི་བསྟན་བཅོས་སོགས། །
མ་ལུས་ཡབ་ཀྱི་དྲུང་ནས་ཁོང་དུ་ཆུད། །༡༦༽
ད་དུང་ཤེར་ཕྱིན་བརྒྱད་སྟོང་ཐུགས་ལ་བཟུང་། །
དེ་ལྟར་ལོ་འཁོར་གསུམ་གྱི་ཡུན་ལ་ཡང་། །
སྣ་མང་ཤེས་བྱ་ཁོང་ཆུད་ལ་བསམས་ཚེ། །
འཇམ་དབྱངས་མི་རུ་བརྫུས་པར་ཐེ་ཅི་ཚོམ། །༡༧༽
རིས་མེད་བསྟན་པའི་གསལ་བྱེད་མཆོག་རྣམས་ལ། །
ཐུན་མིན་ངོ་མཚར་གླེང་དུ་ཡོད་མོད་ཀྱང་། །
ཁྱོད་དང་བསྡུར་ན་ཀུན་གྱི་རྣམ་པར་ཐར། །
མོག་པོར་འགྱུར་བས་མཚུངས་དཔེ་གཞན་ཞིག་དཀོན། །༡༨༽
སྐྱོ་ཤས་ངེས་པར་འབྱུང་བས་ཐུགས་རྒྱུད་བརླན། །
དགུང་ལོ་དགུ་པར་རྗེ་བཙུན་དམ་པའི་དྲུང་། །
རྡོ་རྗེ་གཏུམ་པོའི་རྒྱུད་དང་སྒྲུབ་ཐབས་དང་། །
བདེ་མཆོག་སྙན་བརྒྱུད་སྨིན་གྲོལ་གདམས་ངག་ཞུས། །༡༩༽
བྱང་ཆུབ་སེམས་སྡོམ་མནོས་དང་ལྷན་ཅིག་ཏུ། །
གཞན་ལ་གནོད་པའི་བསམ་སྦྱོར་ལྟ་ཅི་སྨོས། །
སེམས་ཅན་བསད་པའི་ཤ་ཁྲག་མཐོང་ཙམ་གྱིས། །
སྙིང་རྗེས་བཤུམ་པར་མཛད་པའི་སེམས་མཆོག་བསྐྱེད། །༢༠༽
ཁྱོད་ནི་གཞོན་ནུའི་དུས་ནས་ལྷན་སྐྱེས་ཀྱི། །
སྐྱེས་ཐོབ་ཤེས་རབ་མེ་ལྕེ་ལས་རྣོ་ཞིང་། །
དད་དང་སྙིང་རྗེ་སྐྱོ་ཤས་ངེས་པར་འབྱུང་། །
གཞན་དང་མ་འདྲེས་གཞན་ལས་ཁྱད་པར་འཕགས། །༢༡༽
དེང་དུས་གྲགས་སྙན་ཅན་ཚོ་ཕལ་མོ་ཆེ། །
བླང་དོར་གནད་མི་འབྱེད་པའི་བླུན་རྨོངས་པ། །
གོང་མའི་མིང་གི་རྒྱབ་རྟེན་ལ་བཅོལ་ནས། །
མཐོན་པོའི་གྲལ་མགོར་འགྱིང་དང་ཁྱོད་མི་འདྲ། །༢༢༽
ཐོས་པའི་འབྲས་རྟགས་ལུས་ངག་ཞི་ཞིང་དུལ། །
བསམ་པས་ཐེ་ཚོམ་སྒྲོ་འདོགས་ནང་ནས་ཆོད། །
ཐོས་དོན་སྒོམ་པས་རང་རྒྱུད་ཉོན་མོངས་ཞི། །
དམ་པའི་རང་རྟགས་མ་འདྲེས་ལྷང་ངེ་བ། །༢༣༽
ཁྱོད་ཉིད་དགུང་གྲངས་དགུ་ལ་ཕེབས་པའི་དུས། །
འདུལ་ལུང་སྡེ་བཞི་ཤེས་རབ་ཕ་རོལ་ཕྱིན། །
དགོངས་པ་ངེས་འགྲེལ་ཏིང་འཛིན་རྒྱལ་པོའི་མདོ། །
ལང་གཤེགས་བརྒྱད་སྟོང་ལ་སོགས་བཤད་རྒྱུན་གསན། །༢༤༽
གསན་པས་མ་ཚད་བླ་མའི་མདུན་ས་རུ། །
བཤད་རྒྱུགས་ཕུལ་བས་ཐུགས་དགོངས་ཟབ་མོ་དགྱེས། །
ཐུན་མིན་རྣམ་ཐར་འདི་ཚོ་ཐོས་པའི་མོད། །
ངོ་མཚར་མི་སྐྱེ་དཔྱོད་ལྡན་སུ་ཞིག་མཆིས། །༢༥༽
ད་སྐབས་ཐོས་བསམ་མཁན་རྣམས་ལྟ་ཞོག་གི། །
བསྟན་པའི་གསལ་བྱེད་རློམ་པ་རྣམས་ཀྱིས་ཀྱང་། །
རྒྱལ་བཀའ་མདོ་སྡེ་དྲི་མེད་དེ་རྣམས་ལ། །
འཆད་ཉན་མཛད་པའི་རྣམ་ཐར་མཐོང་བའང་དཀོན། །༢༦༽
དེང་དུས་སྐྱེས་ཆེན་མཆོག་ཏུ་གྲགས་རྣམས་ཀྱང་། །
ན་ཚོད་འདི་འདྲར་འདི་འདྲའི་རྣམ་པར་ཐར། །
ལྟ་ཞོག་ཁ་ལག་རང་མགོ་མི་འདྲོངས་ཤིང་། །
གཅིན་སྐྱག་ལག་པས་སྣབ་སྟུག་ཕྱིས་མི་ཤེས །༢༧༽
མི་ཕམ་མཆོག་གི་རྣམ་པར་ཐར་པའི་ནང་། །
དགུང་གྲངས་བདུན་ལ་ངེས་ཤེས་སྒྲོན་མེ་བརྩམས། །
ཁྱོད་ཀྱིས་དགུང་གྲངས་བདུན་ལ་བརྒྱད་སྟོང་པ། །
ཐུགས་ལ་བཟུང་བའི་རྣམ་ཐར་འདི་ཀོ་ནི། །༢༨༽
ཞྭ་དཔེ་ལྷམ་འགེབས་བྱེད་པའི་རྟོག་གེ་པའི། །
བློ་མིག་ཁབ་འདྲའི་ནང་དུ་ཆུད་མིན་པས། །
འཇམ་དབྱངས་མི་རུ་བརྫུ་བ་ཁྱོད་ཉིད་ཀྱི། །
མཁྱེན་དཔྱོད་ནམ་མཁའི་ཕ་མཐའ་སུས་གཞལ་ནུས། །༢༩༽
ཀུན་མཁྱེན་རྒྱལ་བའི་བཀའ་དང་དེའི་དགོངས་འགྲེལ། །
བསྟན་བཅོས་སྣ་ཚོགས་གླེགས་བམ་བརྒྱ་ཕྲག་གཉིས། །
ཇི་བཞིན་གསན་བཞེས་མཛད་པ་འདི་ཁོ་ནས། །
བསྟན་ལ་བྱ་བ་བྱས་མིན་སུ་ཞིག་གླེང་། །༣༠༽
ད་སྐབས་བསྟན་འཛིན་ཆེ་དགུར་རློམ་པ་ཚོས། །
བཀའ་མེད་དབང་མེད་ལུང་མེད་ཕྱོགས་བཅུ་རུ། །
བསྒྲགས་ནས་རང་ཆེ་འབྱིན་པ་དག་མཐོང་ཚེ། །
ཁྱོད་ཀྱི་རྣམ་པར་ཐར་ལ་ལྷག་ཏུ་དད། །༣༡༽
མཁྱེན་དཔྱོད་སྲིན་བུའི་ཁ་འོད་ལས་ཆུང་ཞིང་། །
བསྟན་ལ་བྱས་རྗེས་ལྟ་ཞོག་བསྟན་པ་བཤིག །
ད་དུང་གོང་མའི་མཚན་སྙན་རྒྱབ་བརྟེན་ལ། །
བཅོལ་བའི་ཁེངས་དྲེགས་ཅན་དག་དེང་མཐོང་ཚེ། །༣༢༽
འདི་ལྟར་ཁྱོད་ཀྱི་ཕྱི་ནང་གསང་བ་ཡི། །
རྣམ་ཐར་མཐོང་དུས་ངེས་པར་སེམས་གཏིང་ནས། །
རྒྱལ་སྲས་མིའི་གཟུགས་བྱོན་པ་ཞིག་མཆིས་ན། །
ཁྱོད་ལས་གཞན་དུ་མེད་པའི་ངེས་ཤེས་རྙེད། །༣༣༽
དགུང་གྲངས་བཅུ་པར་རང་བྱུང་རྒྱལ་མོ་ཡི། །
སྲོག་དབང་ཞུས་པས་ལྷ་མོའི་ཞལ་གཟིགས་ཤིང་། །
བསྟན་པའི་དགྲ་ལ་མངོན་སྤྱོད་མ་དགོས་པར། །
རྣམ་ཤེས་དག་པའི་ཞིང་དུ་གནས་པར་མཛད། །༣༤༽
སྤྱན་གཟིགས་གདམས་པ་རྔོག་ལོ་ནས་བརྒྱུད་པའི། །
དོན་ཞགས་སྨིན་གྲོལ་རྣམ་སྣང་མངོན་བྱང་དང་། །
བྱ་རྒྱུད་རིགས་གསུམ་དབང་གདམས་རྒྱུད་བཤད་བཅས། །
དགེ་བཤེས་ཕྱར་བའི་མདུན་ནས་གསན་པར་མཛད། །༣༥༽
སྒྲུབ་པའི་དཀྱིལ་འཁོར་དུ་མ་ཞལ་གཟིགས་ཤིང་། །
ལྷག་པར་ཨོ་རྒྱན་མ་ཧཱ་གུ་རུ་ཡི། །
ཞལ་གཟིགས་བྱིན་རླབས་མན་ངག་སྙན་བརྒྱུད་བསྩལ། །
ཉམས་རྟོགས་འབར་ཞིང་དོན་རྒྱུད་དགོངས་པ་འཕོས། །༣༦༽
པད་མའི་མན་ངག་སྙན་བརྒྱུད་མཆིམས་ཕུ་མ། །
པད་མའི་ཞལ་གསུང་མན་ངག་ལྟ་བའི་ཕྲེང་། །
རིང་བརྒྱུད་བཀའ་ཡི་ཆུ་བོ་མ་ཆད་ལ། །
ཉེ་བརྒྱུད་པད་མའི་ཞབས་ལའང་ཁྱོད་ཉིད་ཐུག །༣༧༽
དམ་པ་འདི་ཡི་བརྒྱུད་འཛིན་རྗེས་འཇུག་ཚོ། །
ཅོལ་ཆུང་རྟོག་གེའི་ཐལ་རྩེད་རྙོག་མའི་ཆུ། །
པད་མའི་དགོངས་བཅུད་འདིའི་ནང་མ་བསྲེ་དང་། །
བརྒྱུད་པའི་བབས་སོ་གཞན་ལས་ཁྱད་པར་འཕགས། །༣༨༽
དགུང་གྲངས་བཅུ་དྲུག་ཀཾ་པོའི་གནས་མཆོག་ན། །
བཤེས་གཉེན་བྱང་སྟོན་བྱམས་པ་རྣམ་དག་མདུན། །
འདུལ་བ་ཕྲན་ཚེགས་ཕ་ཡི་རྣམ་འབྱེད་དང་། །
ཆོས་མངོན་གོང་འོག་དབུ་རྒྱན་རིན་ཆེན་ཕྲེང་། །༣༩༽
ཀ་ཤཱིའི་སྒོམ་རིམ་སྐྱེས་རབས་སོ་བཞི་པ། །
ཤེར་ཕྱིན་བླ་ཆེན་དགོངས་པ་རབ་གསལ་ནས། །
བརྒྱུད་པའི་ཐོགས་མེད་རྣམ་གྲོལ་སེང་བཟང་ལུགས། །
མངོན་རྟོགས་རྒྱན་མདོ་སྦྱར་བའི་བཤད་རྒྱུན་གསན། །༤༠༽
པཎ་ཆེན་སྨྲི་ཏི་ཛྙཱ་ན་ནས་བརྒྱུད་པའི། །
གསང་འདུས་མཚན་བརྗོད་བཤད་རྒྱུན་སྨིན་དབང་ཁྲིད། །
རྫོགས་ཆེན་སེམས་སྡེ་སྔ་འགྱུར་ཕྱི་འགྱུར་དང་། །
ཉི་སེང་གསང་བ་སྙིང་པོའི་བཤད་རྒྱུན་གསན། །༤༡༽
ཁྱད་པར་སློབ་དཔོན་དགའ་རབ་རྡོ་རྗེ་ཡི། །
སྙན་བརྒྱུད་ཉམས་སྒྲོན་འགྲེལ་བཤད་བཅུ་ཕྲག་གཉིས། །
པཎ་ཆེན་རོང་ཟོམ་གསུང་ཡང་བཅུ་ཕྲག་གཉིས། །
ལོ་ཡི་འཁྱུར་འཁོར་གཅིག་ལ་གསན་པར་མཛད། །༤༢༽
དགུང་གྲངས་བཅུ་ཕྲག་གཅིག་དང་ཉག་མ་དགུའི། །
ཐོག་ཏུ་དབུས་གཙང་ཆོས་ཀྱི་གདན་སར་བསྐྱོད། །
དགེ་བཤེས་རྡོ་ཐོག་ཐེལ་པ་རྒྱལ་མཚན་མདུན། །
བྱམས་པའི་ཆོས་ལྔ་པྲ་ཀ་ཎ་སྡེ་བརྒྱད། །༤༣༽
རྒྱལ་བའི་བཀའ་འགྱུར་པོད་ཆེན་བཅོ་ལྔ་དང་། །
བསྟན་བཅོས་འགྱུར་བ་བོད་ན་བཞུགས་སོ་ཅོག །
ས་སྡེ་ལྔ་དང་སྡོམ་གཉིས་བཅས་ཀྱི་གཞུང་། །
བཤད་རྒྱུན་ལུང་རྒྱུན་གང་བཞུགས་གསན་པར་མཛད། །༤༤༽
སྟོད་ལུང་དགེ་བཤེས་རྒྱ་དམར་བའི་མདུན་ནས། །
དབུ་མ་བདེན་གཉིས་བྱམས་ཆོས་རྟོག་གེ་འབར། །
སྤྱོད་འཇུག་བསླབ་བཏུས་མདོ་བཏུས་བཤད་པ་དང་། །
དུས་འཁོར་རྩ་རྒྱུད་དབང་མདོར་བསྟན་པ་དང་། །༤༥༽
འཇམ་དཔལ་མཚན་བརྗོད་རྟ་མཆོག་རོལ་པ་དང་། །
འཇམ་དཔལ་སྒྱུ་འཕྲུལ་ཕྱག་རྡོར་དབང་བསྐུར་རྒྱུད། །
རྡོ་རྗེ་རྣམ་འཇོམས་བཤད་རྒྱུད་ལ་སོགས་པ། །
རྒྱ་དཔེ་ལ་གཏུགས་སྨིན་གྲོལ་བཤད་རྒྱུན་གསན། །༤༦༽
དགུང་གྲངས་ཉེར་གཅིག་ཆོས་འཁོར་རྭ་སྒྲེང་དུ། །
མཁས་དབང་བཤེས་གཉེན་སེང་གེ་བཟང་པོའི་མདུན། །
དབུ་མ་རིགས་ཚོགས་བྷུདྡྷ་པཱ་ལི་ཏ། །
འཇུག་པ་རྣམ་ངེས་ཀུན་བཏུས་ཕར་ཕྱིན་གཞུང་། །༤༧༽
རྒྱུད་དང་སྒྲུབ་སྡེའི་སྨིན་གྲོལ་ཟབ་མོ་དང་། །
བྱང་ཆུབ་ལམ་རིམ་བློ་སྦྱོང་སོགས་ཀྱང་གསན། །
སྐབས་དེར་ཆོས་འཁོར་བཞི་ལ་གྲྭ་སྐོར་མཛད། །
མཁས་པའི་སྙན་གྲགས་ཚོགས་ཀྱི་དབུས་སུ་ཁྱབ། །༤༨༽
གཞན་ཡང་སྐབས་དེར་སྒྲུབ་བརྒྱུད་བསྟན་པའི་བདག །
ཡོངས་གྲགས་མཁས་གྲུབ་སྐྱེས་ཆེན་མཆོག་རྣམས་ཀྱི། །
མདུན་སར་གཏུགས་ནས་བུམ་པ་གང་བྱོའི་ཚུལ། །
སྒྲུབ་བརྒྱུད་བསྟན་པ་ཡོངས་ཀྱི་ཆོས་བཀའ་བབས། །༤༩༽
དགུང་གྲངས་ཉེར་གཉིས་རཏྣ་སེང་གེའི་མདུན། །
བདེ་མཆོག་ཞུས་ནས་ཟླ་བ་དྲུག་སྒོམ་པས། །
དཀྱིལ་འཁོར་ཞལ་མཐོང་གདན་བཞིའི་བཤད་པ་གསན། །
སློབ་དཔོན་མཆོག་གིས་བསྟོད་བསྔགས་མེ་ཏོག་འཐོར། །༥༠༽
ཚིག་ལ་མཁས་ཤིང་དོན་ལ་དོགས་པ་ཆོད། །
བསྙེན་ཅིང་སྒྲུབ་པས་ཡི་དམ་ལྷ་ཞལ་མཐོང་། །
བཅུད་ལེན་ལ་བརྟེན་ཟླ་བཞིར་དཀའ་སྤྱད་མཛད། །
མཁས་དང་གྲུབ་པའི་གོ་འཕང་བརྙེས་མཛད་ཁྱོད། །༥༡༽
དགུང་གྲངས་ཉེར་བཞིར་གནས་མཆོག་འཕན་པོའི་ཡུལ། །
འདུལ་འཛིན་དམ་པ་བྱང་ཆུབ་སེང་གེའི་མདུན། །
རབ་བྱུང་ངུར་སྨྲིག་ཁྲིམས་ཀྱི་རྒྱལ་མཚན་བཞེས། །
སྐབས་དེར་ཁྱོད་ལ་ཤེས་རབ་སེང་གེར་གྲགས། །༥༢༽
དམ་པ་དེའི་དྲུང་སྒྱུ་འཕྲུལ་སྡེ་བརྒྱད་དང་། །
སངས་རྒྱས་མཉམ་སྦྱོར་ཧེ་རུ་ཀ་གལ་པོ། །
ཞབས་ཀྱི་ཞགས་པ་དམ་ཚིག་གསུམ་བཀོད་དང་། །
རྫོགས་ཆེན་སེམས་སྡེ་མ་བུ་བཅོ་བརྒྱད་པོ། །༥༣༽
གླང་ཆེན་རབ་འབོག་ཕུར་པའི་རྒྱུད་ལ་སོགས། །
སྔ་འགྱུར་ཟབ་ཆོས་དུ་མ་གསན་བཞེས་དང་། །
བསྐྱེད་རིམ་རྩ་རླུང་བསྒོམ་པས་རང་ལུས་ཀྱང་། །
སྒྲིབ་མེད་ལྷ་ཡི་སྐུ་རུ་གསལ་ཞེས་གསུངས་། །༥༤༽
དགུང་གྲངས་ཉེར་ལྔ་བལ་ཡུལ་སྐྱིད་གྲོང་ཕེབས། །
ལ་ཕྱིར་རྗེ་བཙུན་རས་ཆུང་པ་ཡི་དྲུང་། །
ལུས་མེད་མཁའ་འགྲོའི་སྙན་བརྒྱུད་ཆོས་བསྐོར་སོགས། །
ཞི་བ་འོད་ལས་གཏུམ་མོའི་མན་ངག་གསན། །༥༥༽
སྣར་ཐང་ཀླུ་མེས་བརྒྱུད་འཛིན་སྨད་འདུལ་བ། །
དབུས་སུ་སྡེ་པ་ནགས་ཀྱི་མཁན་ཆེན་མདུན། །
བསྙེན་པར་རྫོགས་ཤིང་ངུར་སྨྲིག་རྒྱལ་མཚན་འཆང་། །
མཐོང་བརྒྱུད་ལག་ལེན་སྦྱངས་པས་མཁས་པར་གྱུར། །༥༦༽
བསླབ་ཁྲིམས་གསེར་གྱི་རྒྱལ་མཚན་འོད་པོ་ཆེ། །
ཕྲ་རགས་ཉེས་པའི་དྲི་མ་དང་བྲལ་ཞིང་། །
མདོ་ཁམས་གནམ་ས་དམར་སེར་ཚོན་གྱིས་བསྒྱུར། །
སྟོན་པའི་བསྟན་ལ་སྟོན་པ་གཉིས་པ་ཁྱོད། །༥༧༽
རྫོགས་ཆེན་ཛམ་སྟོན་འགྲོ་བའི་མགོན་པོ་དང་། །
རྟ་ནག་པ་དང་བླ་མ་ཞང་འབུམ་ལས། །
སྒྱུ་འཕྲུལ་མན་ངག་ཕྲ་མོ་བཅུ་ཕྲག་དྲུག །
སྤྱི་མདོ་དགོངས་འདུས་རྡོ་རྗེ་བཀོད་པ་དང་། །༥༨༽
ཀུན་འདུས་རིག་པའི་མདོ་སོགས་རྩ་མདོ་བཞི། །
དེ་ཡི་མན་ངག་ཕྲ་མོ་དྲུག་ཅུ་དང་། །
གཞན་ཡང་སེམས་ཀློང་མན་ངག་སྡེ་གསུམ་གྱི། །
སྨིན་གྲོལ་བཤད་རྒྱུན་ལོ་བཞིའི་བར་དུ་གསན། །༥༩༽
ལྟ་བའི་གདིང་ལྡན་སྒོམ་པའི་རྩལ་ཆེན་རྫོགས། །
བླ་མ་ཛམ་སྟོན་དཔལ་ཆེན་དངོས་སུ་མཐོང་། །
ཚོགས་དབུས་སྤར་ཁབ་དམ་བཅས་གྲགས་པ་འབར། །
རྟོགས་འབུལ་བླ་མའི་ཐུགས་མཉེས་དབུགས་དབྱུང་གནང་། །༦༠༽
སྔ་འགྱུར་བསྟན་པ་དང་པོ་གཉགས་ལ་བབས། །
བར་དུ་གནུབས་དང་ཐ་མ་ཟུར་ལ་བབས། །
ཡང་ཐ་རྒྱལ་བ་ཀཿ ཐོག་པ་ལ་བབས། །
ཕ་རྗེས་བུས་ཟིན་ཀུན་མཁྱེན་ཀཿ ཐོག་པ། །༦༡༽
དགུང་གྲངས་ཉེར་དགུར་རྫོགས་ཆེན་ཛམ་སྟོན་པས། །
རྒྱལ་ཚབ་མངའ་གསོལ་དབུགས་དབྱུང་ལུང་བསྟན་ལྟར། །
པད་མས་བྱིན་རླབས་བཻ་རོའི་སྒྲུབ་གནས་མཆོག །
མདོ་ཁམས་ཀཿ ཡི་མཐིལ་དུ་ (དགུང་ལོ་༣༩) ཞབས་སོར་འཁོད། །༦༢༽
གཞན་སྣང་འོད་དུ་དེང་ལ་མ་དགྱེས་པར། །
བླ་མའི་བཀའ་དང་བསྟན་པ་གནས་པའི་ཆེད། །
ས་མོ་ཡོས་ལོར་རང་བྱུང་ཀཿ མཐིལ་དུ། །
སྔ་འགྱུར་བསྟན་པའི་ཆོས་གཞི་དགོན་ཆེན་བཏབ། །༦༣༽
གནས་འདིར་སངས་རྒྱས་གཉིས་པ་ཞག་ཉེར་ལྔ། །
བཞུགས་ནས་རབ་གནས་ཐེངས་མ་བཅུ་གསུམ་དང་། །
བཻ་རོས་སྒྲུབ་ཅིང་ཉི་སེང་རྒྱ་ཆེར་འགྲེལ། །
བསྒྱུར་ཞུས་འཆད་ཉན་སྒྲུབ་གནས་འདི་རུ་མཛད། །༦༤༽
ཀཿ མཐིལ་གཙུག་ལག་ཁང་ཆེན་བཞེངས་པའི་ཚེ། །
མི་མིན་རྡོ་གཉན་རྨད་བུས་ཆོ་འཕྲུལ་གྱིས། །
ཉིན་བརྩིགས་མཚན་བཤིག་བར་ཆད་མཐོ་བརྩམས་ཚེ། །
དགོངས་པས་གཟིར་ནས་བཀའ་བསྒོ་དམ་ལ་བཞག །༦༥༽
རྡོ་གཉན་རྨད་བུ་གནས་སའི་ཕ་བོང་ཡང་། །
དུད་འགྲོ་བཞིན་དུ་སྣ་ཕུག་རི་རྐེད་ནས། །
ཁྲིད་དེ་ཕྱག་གིས་འབྲབ་ནས་ཆུ་འགྲམ་བསྐྱལ། །
དམ་ཚིག་རྡོ་རྗེའི་མནའ་ཆུ་བླུད་ནས་བཀོལ། །༦༦༽
འདི་ནི་འུད་སྒྲོགས་ཙམ་ཞིག་མ་ཡིན་པར། །
ཕ་བོང་ཆེ་ཆུང་གཡག་གཟུགས་ཙམ་གྱི་སྟེང་། །
ཨི་ཁུང་ཕུག་ཅིང་ཕྱག་ལྕག་འབྲབ་ཤུལ་རྗེས། །
ད་སྐབས་དབང་པོའི་ཡུལ་དུའང་བཀྲ་ལམ་མེར། །༦༧༽
དེ་ལྟར་རྟེན་དང་བརྟེན་པའི་གཙུག་ལག་ཁང་། །
གེགས་མེད་གྲུབ་ཅིང་སྐུ་གསུང་ཐུགས་ཀྱི་རྟེན། །
བློ་ཡུལ་ལས་འདས་སྐྱེ་དགུའི་བསོད་ནམས་རྟེན། །
ངོ་མཚར་འགྲན་བྲལ་མཆོད་སྡོང་ཆེན་མོར་གྲུབ། །༦༨༽
མདོ་ཁམས་བདག་མོའི་ཞལ་བསྟན་དབུགས་དབྱུང་ཞིང་། །
ས་ར་ཧ་དང་གྲུབ་པའི་རིག་འཛིན་བརྒྱད། །
ཞལ་གཟིགས་ཕྱུགས་རྫིའི་བྱིས་པ་བཅུ་གསུམ་འཕྲད། །
གདུལ་བྱའི་རྟེན་འབྲེལ་བཅུ་གསུམ་ཕྲག་འདི་བྱུང་། །༦༩༽
བླ་རབས་དྲུང་རབས་མཁན་རབས་རིག་པ་འཛིན། །
གསེར་རིའི་ཕྲེང་ལྟར་བར་མ་ཆད་པར་བྱོན། །
དུས་གཅིག་དགེ་འདུན་འབུམ་ཚོ་བཅོ་བརྒྱད་འདུས། །
བླ་གོས་འོད་ཀྱིས་ནམ་མཁའི་ཁ་དོག་བསྒྱུར། །༧༠༽
རབ་དཀར་གངས་རིས་མཛེས་པའི་ཐ་གྲུ་ཀུན། །
མདོ་སྒྱུ་སེམས་གསུམ་འཕྲིན་ལས་ཉི་མའི་འོད། །
མི་ཉམས་སྲིད་མཐར་ཁྱབ་མཛད་ཀཿ ཐོག་པ། །
འཕྲིན་ལས་ཁྱོད་དང་མཚུངས་པ་སྔར་མ་མཐོང་། །༧༡༽
བསྟན་རྩ་གཞི་གསུམ་ཕྱག་བཞེས་འདི་ནས་སྤེལ། །
བསྟན་སྙིང་མདོ་སྒྱུ་སེམས་གསུམ་འདི་ནས་དར། །
བསྟན་པ་བཤད་སྒྲུབ་ཟུང་འབྲེལ་འདི་རུ་བསྐྱངས། །
བསྟན་འཛིན་མཁས་གྲུབ་ཁྱུ་ཚོགས་འདི་ནས་རྡོལ། །༧༢༽
སྔ་འགྱུར་བཀའ་མའི་དབུགས་རྒྱུན་འདི་ནས་གསོས། །
སྙན་བརྒྱུད་མན་ངག་རྒྱ་མཚོ་འདི་ན་མཆིས། །
དྲི་མེད་ཕྱག་བཞེས་ལག་ལེན་འདི་ནས་གྱེས། །
སྔ་འགྱུར་ཆུ་འོག་འབོད་པ་དོན་དང་ལྡན། །༧༣༽
ཀུན་གསལ་ལྷ་ལམ་ངུར་སྨྲིག་ཚོན་གྱིས་བསྒྱུར། །
འཇའ་ལུས་འབུམ་གྱིས་མངོན་རྟོགས་རབ་ཏུ་ངོམ། །
འབུམ་ཕྲག་བཅོ་བརྒྱད་འདུས་པའི་བརྗེད་བྱང་བཏབ།
།འཕྲིན་ལས་འདི་འདྲ་རྒྱ་བོད་གང་དུ་བྱུང་། །༧༤༽
དགུང་གྲངས་བཞི་བཅུ་ཀཿ ཐོག་རྡོ་རྗེའི་གདན། །
ཉིན་སྲིབས་གཉིས་སུ་བཤད་སྒྲུབ་སྡེ་ཆེན་བཙུགས། །
ཚད་འདུལ་བྱམས་ཆོས་ཤེར་ཕྱིན་འབུམ་པ་སོགས། །
དབྱར་དུས་མདོ་ཆོས་འཆད་ཉན་གཏན་ལ་ཕབ། །༧༥༽
དགུན་དུས་བདེ་མཆོག་དགྱེས་རྒྱུད་བཤད་པ་དང་། །
སྒྱུ་འཕྲུལ་འདུས་པ་མདོ་དང་རྫོགས་པ་ཆེ། །
རྒྱུན་མི་ཆད་པར་ཆོས་འཁོར་རྟག་བསྐོར་བས། །
གནས་མཆོག་ལའང་འོག་མིན་གཉིས་པར་གྲགས། །༧༦༽
ཁྱོད་ནི་དགོན་གནས་ཕལ་དང་མི་འདྲ་ཞིང་། །
རང་ཚུགས་རི་བོ་བཞིན་དུ་བརྟན་གྱུར་ན། །
སྔར་ཡང་སྔ་འགྱུར་གངས་ཀྱི་རི་བོའི་འདབས། །
གཡུ་རལ་ཉི་ལེར་སྡེར་བཞི་བགྲད་བཞིན་གནས། །༧༧༽
ད་ཡང་ད་སྲོལ་གསར་པས་མ་བསླད་དང་། །
སྔར་རྒྱུན་ལམ་སྲོལ་དར་གོས་ཟ་འོག་རིས། །
གཞོན་སྐྱེས་བྱིས་པས་རིན་ཐང་མི་ཤེས་ཀྱང་། །
ལོ་རྒྱུས་རིན་ཐང་རྡོ་རིང་ངོས་ན་གསལ། །༧༨༽
དེ་ལ་གཡོ་ཅན་ཝ་མོའི་ཁྱུ་ཚོགས་ཀྱིས། །
ཕྱོགས་དང་མཚམས་ནས་མི་སྙན་འུར་ན་ཡང་། །
གང་ལ་འཇིགས་མེད་གཅན་གཟན་རྒྱལ་པོའི་རྒྱུད། །
གཞན་རྗེས་འཚོལ་ན་ཁྲེལ་བའི་གཞི་རུ་འགྱུར། །༧༩༽
གདན་ས་འདི་མཐོང་འདི་ཐོས་མ་ལུས་པ། །
ངན་འགྲོའི་སྐྱེ་སྒོ་ཆོད་ཅེས་གླེང་བ་འདི། །
ཅོལ་ཆུང་རྟོག་གེའི་རྣ་བར་མི་འགྲོ་ཡང་། །
གནས་མཆོག་གཞན་ལས་ངོ་མཚར་ཁྱད་དུ་འཕགས། །༨༠༽
མཉམ་མེད་ཆོས་ཀྱི་རྗེ་བོ་དྭགས་པོ་པས། །
ཕྱག་ཆེན་ལྷན་ཅིག་སྐྱེས་སྦྱོར་ལ་སོགས་པའི། །
མན་ངག་གང་བཞུགས་བུམ་པ་གང་བྱོར་བསྩལ། །
སྒྲུབ་པས་བླ་སློབ་ཐུགས་དགོངས་དབྱེར་མེད་གྱུར། །༨༡༽
ཙཱ་རིའི་གནས་སུ་སྒྲུབ་པའི་བྱིན་རླབས་ཀྱིས། །
མ་རྒྱུད་རྡོ་རྗེ་དབྱིངས་ཀྱི་རྣལ་འབྱོར་མའི། །
དཀྱིལ་འཁོར་ཡོངས་རྫོགས་ཞལ་གཟིགས་བྱིན་རླབས་ཀྱིས། །
ཉམས་དང་རྟོགས་པའི་རྩལ་ཆེན་མེ་ལྟར་འབར། །༨༢༽
མདོ་ཁམས་སྲིད་པའི་བདག་མོ་དཔལ་ལྷ་མོ། །
ལེགས་ལྡན་ཚོགས་ཀྱི་བདག་པོ་ལ་སོགས་པ། །
བཀའ་སྲུང་དྲེགས་པའི་ཚོགས་ཀྱིས་སྲོག་སྙིང་ཕུལ། །
བསྟན་པ་སྲུང་བར་ཁང་བླངས་དམ་བཅས་སོ། །༨༣༽
ཁམས་དབུས་གཉིས་སུ་མཁས་གྲུབ་དགེ་བའི་བཤེས། །
བརྒྱ་རྩ་བརྒྱད་བསྟེན་གངས་ཅན་མཐའ་དབུས་ཀུན། །
བཞུགས་པའི་བཀའ་བསྟན་མ་ལུས་ཡོངས་སུ་རྫོགས། །
སྨིན་གྲོལ་གདམས་བཅུད་བཤད་རྒྱུན་གང་བཞུགས་གསན། །༨༤༽
གཟི་བརྗིད་སྐུ་ཡིས་ཉི་ཟླའི་འོད་མདངས་འཕྲོག །
འགག་མེད་གསུང་གིས་ཚངས་དབྱངས་ཟིལ་གྱིས་གནོན། །
འཁྲུལ་མེད་ཐུགས་ཀྱིས་གནས་ལུགས་ཇི་བཞིན་རྟོགས། །
རྒྱལ་བ་མཆོག་དང་ཞལ་མི་གཉིས་པ་ཁྱོད། །༨༥༽
བསྟན་པའི་རྒྱན་དུ་བསྟན་འཛིན་མང་བྱོན་ཡང་། །
རྒྱལ་བསྟན་ཡུན་རིང་བསྐྱངས་པའི་ཐུགས་བསྐྱེད་ལ། །
སུས་ཀྱང་འགྲན་བྲལ་ལོ་རྒྱུས་རིང་མོའི་ངོས། །
གདུགས་༵བཞིན་མངོན་པར་མཐོ་བའི་དམ་པ་ཁྱོད། ། ༨༦༽
རྣམ་པར་དཔྱོད་པའི་ཤེས་རབ་དྲི་མ་མེད། །
གཟུངས་སྤོབས་གཏེར་འཆང་ངག་གི་ལྷ་མཆོག་དངོས། །
མདོ་སྔགས་ཟུང་འབྲེལ་གསེར་༵མིག་༵གཡས་སུ་འཁྱིལ། །
ཤེས་རབ་སེང་གེ་གསེར་གཤོག་ཅན་དེ་ཁྱོད། །༨༧༽
གངས་ལྗོངས་བཀའ་བབས་ཤིང་རྟ་རྣམ་བརྒྱད་ཀྱི། །
གདམས་པའི་ཆུ་བོ་མ་འདྲེས་ཡོངས་སུ་རྫོགས། །
ཁྱོད་ཐུགས་མི་ཤིགས་བུམ་༵པའི་༵བཅུད་དུ་འཁྱིལ། །
མན་ངག་རྒྱ་མཚོའི་འབྱུང་གནས་རིན་པོ་ཆེ། །༨༨༽
རང་རྒྱུད་བསླབ་ཁྲིམས་གཙང་མས་རྒྱུད་བསྡམས་ཤིང་། །
ཚུལ་ཁྲིམས་རྣམ་དག་པད་༵མའི་༵སྦུབས་ལས་གཙང་། །
ཉེས་པའི་དྲི་བྲལ་པད་མའི་འདབ་ལས་མཛེས། །
སྤྱོད་པ་ཞིབ་ཅིང་ཁྲིམས་ཀྱིས་མཛེས་པ་ཁྱོད། །༨༩༽
བཀའ་བསྟན་མདོ་རྒྱུད་དགོངས་འགྲེལ་ལ་སོགས་པ། །
ཤེས་རབ་ཟབ་མོ་ཇི་བཞིན་ཁོང་ཆུད་དེ། །
མཁས་པའི་བྱ་བ་རྣམ་གསུམ་གཡས་༵འཁྱིལ་༵དུང་༵། །
སྙན་དང་གྲགས་པས་ས་ཆེན་ཁྱོད་ཀྱིས་བཅིངས། །༩༠༽
སྐུ་ལ་རྣམ་གསུམ་ངུར་སྨྲིག་གོས་ཀྱིས་མཛེས། །
ངག་ལ་དབང་འབྱོར་སྡེ་སྣོད་རྒྱ་མཚོས་བརྒྱན། །
ཐུགས་ལ་མཁྱེན་བརྩེ་ནུས་པའི་དཔལ་མངའ་བ། །
གསང་གསུམ་དཔལ་༵བེའུའི༵་རི་མོ་ཁྱོད་ལ་བཀྲ། །༩༡༽
མདོ་སྔགས་ཟུང་འབྲེལ་བསྟན་པ་རིན་པོ་ཆེ། །
མི་ནུབ་བཤད་དང་སྒྲུབ་པའི་རྒྱལ་༵མཚན་༵རྩེར། །
ཁྱད་པར་མདོ་སྒྱུ་སེམས་གསུམ་ནོར་བུའི་ཏོག །
མ་ཉམས་གངས་རིའི་དབུ་རྩེ་ཁྱོད་ཀྱིས་བསྒྲེངས། །༩༢༽
རིམ་དགུ་ཐེག་པའི་གསང་མཛོད་རིན་པོ་ཆེ། །
ཇི་སྲིད་གདུལ་བྱའི་འཁྲུལ་རྟོག་མ་ཞིག་བར། །
དེ་སྲིད་ཐེག་དགུའི་གསང་མཛོད་རིན་པོ་ཆེ། །
ཉམས་མེད་ཆོས་༵འཁོར་༵འདི་ཡང་ཁྱོད་ཀྱིས་བྱས། །༩༣༽
དུས་གསུམ་མཁྱེན་པའི་དྲུང་ནས་བདེ་མཆོག་དང་། །
ཕྱག་ཆེན་ན་རོ་ཆོས་དྲུག་ལ་སོགས་གསན། །
ཉམས་རྟོགས་བསྡུར་བས་དགོངས་པ་ཐ་མི་དད། །
ཐུགས་སྲས་སློབ་མའི་ཐུ་བོར་ཁྱོད་ཉིད་བསྔགས། །༩༤༽
བླུན་པོའི་ཐོད་ལ་མཁས་པའི་མིང་བྱང་བཏགས། །
བྱིས་པའི་ལུས་ལ་དར་གོས་དགུ་བརྩེགས་གཡོགས། །
ཆོས་ངོ་མི་ཤེས་ཆོས་རྗེའི་མཚན་བྱང་གསོལ། །
ནག་ནོག་དྲི་མའི་སྲོལ་འདི་ཁྱོད་དུས་མེད། །༩༥༽
སྤྱིར་ན་དམ་པ་ཁྱོད་ཉིད་བྱོན་པའི་དུས། །
རྒྱལ་བསྟན་དབུ་འཕང་དེ་ཙམ་མཐོ་མིན་ཡང་། །
དུས་ཚོད་འདི་ལ་གཞལ་ན་སྐབས་དེ་དུས། །
རྫོགས་ལྡན་དུས་བཟང་ཡིན་པའི་ངེས་ཤེས་རྙེད། །༩༦༽
དགུང་གྲངས་སོ་གསུམ་མི་ཉག་འཇང་དང་གླིང་། །
ཞབས་སོར་བཀོད་ནས་ཆེ་དགུས་གཙུག་ཏུ་བཀུར། །
ཐུན་མོངས་ཐུན་མིན་ཟབ་ཆོས་དཔག་མེད་གནང་། །
རབ་བྱུང་སྒྲུབ་ནས་བསྟན་པའི་མེ་རོ་གསོས། །༩༧
ཐུན་མིན་བླ་མ་ཛམ་སྟོན་བཀའ་ལུང་ལྟར། །
ཀཿ མཐིལ་བཻ་རོའི་ཕུག་ཏུ་སྒྲུབ་པར་བཞུགས། །
ཐུགས་ཆེན་གུ་རུ་པད་མའི་ཞལ་གཟིགས་ཤིང་། །
སྒྲུབ་པའི་འབྲས་རྟགས་ངོ་མཚར་བསམ་ལས་འདས། །༩༨༽
ཚེ་སྒྲུབ་མཛད་པས་ཚེ་ལྷའི་ཞལ་གཟིགས་ཤིང་། །
སྔར་མེད་གློ་བུར་འཆི་མེད་ཚེ་ཆུ་བརྡོལ། །
སྐུ་གསུང་ཐུགས་ཀྱི་མཛད་པ་རེ་རེ་ཡིས། །
ཡུལ་མི་ངོ་མཚར་དད་པའི་གནས་སུ་བཀོད། །༩༩༽
རྒྱལ་བ་ཤཱཀ་ཐུབ་ཞལ་གཟིགས་དེའི་གསུང་ལ། །
གཡོ་མེད་ཉིན་མཚན་བཞི་ལ་ཏིང་ངེ་འཛིན། །
དགོངས་པ་འབྱམས་ཀླས་དེ་ཡི་ངང་དུ་བཞུགས། །
འདི་ལྟར་ཐུན་མིན་རྣམ་ཐར་བརྗོད་ལས་འདས། །༡༠༠༽
རི་རྩིབས་ཆོས་འཁོར་གླིང་དུ་འཇམ་དཔལ་ཟུང་། །
བགྲོ་བ་གཟིགས་པས་མ་འོངས་གདན་ས་འདིར། །
རིགས་གསུམ་སེམས་དཔའི་རྣམ་འཕྲུལ་མཁས་པའི་དབང་། །
སྤྲུལ་པ་ཡང་ཡང་གནས་འདིར་འབྱོན་པར་གསུངས། །༡༠༡༽
དགུང་གྲངས་ཞེ་གསུམ་རྒྱུད་རྒྱལ་ཨ་ནུའི་སྡེ། །
དབང་གི་ཆུ་བོ་ཆེན་པོ་ཟླ་བ་བདུན། །
གནང་རྗེས་ཀུན་འདུས་མདོ་དང་མདོ་དགོངས་འདུས། །
བཤད་པ་མཛད་ནས་འདུས་མདོའི་འགྲེལ་ཆེན་བརྩམས། །༡༠༢༽
གྲུབ་ཐོབ་རིག་འཛིན་རྒྱ་མཚོའི་ཚོགས་གྲལ་བསྙེགས། །
བྱེའུའི་རོ་ལ་གྲོང་འཇུག་མཛད་པ་དང་། །
སྡིག་ཅན་གནས་སྤར་ངན་འགྲོའི་སྐྱེ་སྒོ་གཅོད། །
མཐོང་ཐོས་དྲན་རེག་འབྲེལ་ཚད་དོན་ལྡན་པ། །༡༠༣༽
དགུང་གྲངས་ཞེ་ལྔར་དགྱེས་རྡོར་ཕུར་པ་སོགས། །
དཀྱིལ་འཁོར་ཞལ་ཕྱེས་ངོ་མཚར་སྣང་བས་ཁྱབ། །
ཞི་ཁྲོ་ཕུར་གསུམ་སྒྱུ་འཕྲུལ་སྡེ་བརྒྱད་ཀྱི། །
རྒྱུད་བཤད་སྨིན་དབང་གདམས་ཁྲིད་ཟླ་བརྒྱད་གསུངས། །༡༠༤༽
རྒྱུད་སྡེ་རྒྱ་མཚོའི་ཟབ་གནད་བཅུད་འདུས་པའི། །
གསང་བདག་སྙིང་གི་ཊཱི་ཀ་བརྩམས་པའི་སྐབས། །
ཐུགས་སྲས་བླ་མ་འབུམ་རྟེན་འོད་ལུས་དེངས། །
ཉམས་རྟོགས་རྩལ་རྒྱས་རྡོ་རྗེའི་མགུར་གླུ་འཐེན། །༡༠༥༽
མཚོ་རྒྱལ་མདུན་སར་ཚོགས་ཀྱི་འཁོར་ལོར་ཕེབས། །
པད་མའི་མདུན་ནས་དངོས་སུ་གདམས་པ་གསན། །
གྲུབ་བརྒྱའི་གཙུག་རྒྱན་གྲུབ་ཐོབ་ས་ར་ཧས། །
བརྡ་དོན་མཛད་པའི་སྒྲོ་འདོགས་ནང་ནས་ཆོད། །༡༠༦༽
ཨིནྡྲ་བོ་དྷིར་གྲུབ་ཐོབ་བརྒྱད་ཅུས་བསྐོར། །
མི་དང་མི་བཞིན་འཕྲད་དེ་དེའི་མདུན་ནས། །
ཟབ་རྒྱས་གདམས་པའི་མན་ངག་བདུད་རྩིའི་བཅུད། །
ནོས་ཤིང་གྲུབ་པའི་མཛད་རྣམ་བསམ་མི་ཁྱབ། །༡༠༧༽
དགུང་གྲངས་ཞེ་དགུ་མདོ་སྒྱུ་སེམས་གསུམ་སོགས། །
ཟབ་རྒྱས་མདོ་སྔགས་ཆོས་ཀྱི་འཁོར་ལོ་བསྐོར། །
མདོ་དབུས་ཁམས་གསུམ་འདུས་པ་ཁྲི་ཁྲག་བརྒྱད། །
ལྷན་འདུས་བསྟན་པའི་སྙིང་པོ་གསལ་བར་བྱས། །༡༠༨༽
བསྟན་པའི་རྩ་བ་གཞི་གསུམ་ཕྱག་ལེན་གྱི། །
མཁན་པོ་མཛད་དེ་དབྱར་གནས་བཞུགས་པའི་ཚེ། །
ཚུལ་ཤིང་བཞེས་མཁན་འདུས་པ་སྟོང་ཚོ་བརྒྱད། །
འདི་འདྲའི་ལོ་རྒྱུས་བོད་ཡུལ་གང་དུ་མཆིས། །༡༠༩༽
དབྱར་ཟླ་གསུམ་དུ་འདུལ་བ་སུམ་བརྒྱ་པ། །
ལུང་སྦྱར་མངོན་པ་གོང་འོག་མདོ་རྒྱན་སྦྱར། །
ཤེར་ཕྱིན་བརྒྱད་སྟོང་འཆད་ཁྲིད་ཟབ་རྒྱས་གནང་། །
མངོན་དགའ་བདེ་ཆེན་ཞིང་གི་བཀོད་པ་གཟིགས། །༡༡༠༽
སྐྱ་སེར་ཁྲི་ཕྲག་དགུ་ལྷག་ལྷན་འདུས་དབུས། །
བྱང་ཆུབ་སེམས་སྡོམ་ལན་གྲངས་སུམ་ཅུ་གནང་། །
གནམ་སའི་བར་དུ་དགེ་ལྟས་བསམ་མི་ཁྱབ། །
ཕྱིས་འབྱུང་བསྟན་པ་དར་བའང་ལུང་གིས་བསྔགས། །༡༡༢༽
སྐབས་དེར་སློབ་མའི་གཙོ་བོ་གཙང་སྟོན་པ། །
རྒྱལ་ཚབ་མངའ་གསོལ་ས་བརྒྱད་མངོན་རྟོགས་བརྙེས། །
འདུས་མདོའི་ལོ་སྒྲུབ་ཆེན་མོ་ལྷན་དུ་འཚོགས། །
ངོ་མཚར་འཇའ་འོད་འཁྱུག་ཅིང་མེ་ཏོག་བབས། །༡༡༣༽
སྒྱུ་འཕྲུལ་སྡེ་བརྒྱད་རྫོགས་ཆེན་སེམས་སྡེའི་རྒྱུད། །
བཤད་རྒྱུན་གདམས་ཁྲིད་མན་ངག་སྦུབས་མཆུར་གནང་། །
དད་ལྡན་སྐལ་བཟང་སློབ་མའི་ཚོགས་རྣམས་ལ། །
ཉིན་བཞིན་ཆོས་ཐུན་བཅུ་གསུམ་ཆད་མེད་གསུངས། །༡༡༤༽
འཕགས་པའི་གནས་བརྟན་བྷ་ར་དྷ་ཛ་དང་། །
དངོས་སུ་དམ་ཆོས་བགྲོ་བ་བགྲོ་གླེང་མཛད། །
དགུང་གྲངས་རེ་ལྔར་ཀཿ ཐོག་ལྷོ་ཕྱོགས་ཚལ། །
དཔལ་ཆེན་ཧེ་རུ་ཀ་ཡི་ལོ་སྒྲུབ་མཛད། །༡༡༥༽
ཐུན་མིན་སྐལ་ལྡན་སློབ་མའི་ཚོགས་རྣམས་ལ། །
མན་ངག་ཟབ་གསང་རྡོ་རྗེ་ཐེག་པ་ཡི། །
རྣ་བརྒྱུད་རྡོ་རྗེ་ཟམ་པའི་སྙན་བརྒྱུད་དང་། །
ཀློང་གསལ་རྒྱལ་པོའི་རྒྱུད་རྣམས་འཆད་ཁྲིད་གནང་། །༡༡༦༽
གཙང་སྟོན་ཆེན་པོས་གསོལ་བ་བཏབ་པ་ལྟར། །
མཁའ་འགྲོས་བསུ་མ་བྱུང་བ་ཕྱིར་བསྙིལ་ཞིང་། །
འཆི་བདག་བདུད་བཅོམ་ཚུལ་འཆལ་ཕྲག་དྲུག་ཅུ། །
གཎྜིའི་སྒྲ་བཅས་ཆོས་བཞིན་གནས་དབྱུང་བཏང་། །༡༡༧༽
རེ་དྲུག་ནས་བཟུང་དགུང་གྲངས་རེ་དགུའི་བར། །
སྒྱུ་འཕྲུལ་ཕྱག་རྒྱ་ཆེ་དང་འདུས་པ་མདོ། །
མན་ངག་རྫོགས་པ་ཆེན་པོ་རྩལ་སྟོན་གནང་། །
སྣང་བཞི་མཐར་ཕྱིན་རང་གཞན་དོན་གཉིས་འགྲུབ། །༡༢༨༽
གདོས་བཅས་ར་བ་རུ་མའི་རྩིག་པ་ལས། །
ཕན་ཚུན་འགོག་མེད་ཟང་ཐལ་ཕྱག་ཕེབས་ཤིང་། །
དགུང་གྲངས་བདུན་ཅུར་འདུས་ཚོགས་ཁྲི་བརྒྱད་ལ། །
སེམས་བསྐྱེད་དབང་བསྐུར་ཞལ་ཆབ་གདམས་པར་མཛད། །༡༡༩༽
འཆད་རྩོད་མ་ངེས་མི་འཁྲུལ་རྩོམ་པ་མཆོག །
བསྟན་རྒྱུན་ལ་དམིགས་མདོ་རྒྱུད་དགོངས་པ་འགྲེལ། །
ཤིང་རྟ་ཆེན་པོའི་གསུང་དང་གཉིས་སུ་མེད། །
གླེགས་བམ་བཅུ་དགུ་བསྟན་པའི་རྒྱན་ལ་བཞག །༡༢༠༽
གནས་ལུགས་རྟོགས་ཤིང་ཚུལ་དགུའི་དཔལ་གྱིས་ཕྱུག །
སྒྲུབ་བརྒྱུད་བསྟན་པ་ཡོངས་ཀྱི་བདག་པོར་གྱུར། །
མཛད་འཕྲིན་ངོ་མཚར་བསམ་གྱིས་མི་ཁྱབ་ཀྱང་། །
འཕྲིན་ལས་གཙོ་བོ་འཆད་རྩོམ་གཉིས་ལ་མཛད། །༡༢༡༽
རྗེས་འཇུག་སྐལ་བཟང་སློབ་མའི་ཚོགས་རྣམས་ཀྱིས། །
དམ་པ་མཆོག་གི་རྣམ་པར་ཐར་པ་འདི། །
ཐུགས་དམ་ཉམས་ལེན་སྙིང་པོར་དྲིལ་འདོད་ན། །
ཕ་རྗེས་བུ་འཇུག་མཛད་འཕྲིན་སྐྱོངས་འཚལ་ལོ། །༡༢༢༽
དགུང་གྲངས་བདུན་ཅུར་ཟླ་བ་གཅིག་གི་རིང་། །
འདུས་ཚོགས་ཁྲི་ཁྲག་བདུན་ལས་བརྒལ་བ་ལ། །
སེམས་བསྐྱེད་དབང་བསྐུར་ཞལ་གདམས་སེམས་ཁྲིད་བསྩལ། །༡༢༣༽
ད་ནི་དངོས་དོན་ཟིན་གྱིས་བདེ་ཆེན་ཞིང་། །
འོད་སྣང་མཐའ་ཡས་རྒྱལ་བའི་ཞིང་དུ་འགྲོ། །
གྲོགས་དག་ཟབ་མོ་རྫོགས་པ་ཆེན་པོའི་ལམ། །
འདི་ལ་རུས་གཏིང་སྙིང་གི་བུར་གྱིས་ཤིག །༡༢༤༽
ཞེས་སོགས་གདམས་ཁྲིད་སྨོན་པ་བཅས་གནང་སྟེ། །
དཔལ་ཆེན་ཆེ་མཆོག་བླ་མ་ཛམ་སྟོན་པ། །
དཔའ་བོ་མཁའ་འགྲོའི་འཁོར་ཚོགས་དུ་མ་བཅས། །
ཁོ་བོ་བསུ་ལ་འོང་བར་གདའ་གསུངས་ནས། །༡༢༥༽
ས་ག་ཟླ་བའི་ཚེས་པ་བཅོ་ལྔའི་ཉིན། །
རྩ་ར་ཀུན་དགའ་ཆོས་ཀྱི་ར་བའི་ནང་། །
རྩ་གསུམ་འཁོར་ལོ་ཚོགས་ཀྱིས་མཉེས་མཛད་ནས། །
ནུབ་ཏུ་ཞལ་གཟིགས་སྣང་མཐའི་ཐུགས་ཀློང་བསྡུས། །༡༢༦༽
ནུབ་ཀྱི་ཕྱོགས་ནས་འཇའ་འོད་སྣ་ལྔ་ཞིག །
བླ་མའི་མདུན་ཟུག་མེ་ཏོག་ཆར་པ་བབས། །
ནམ་མཁའ་དྭངས་ཤིང་ས་ཆེན་འགུལ་བ་སོགས། །
རྒྱུད་ནས་བཤད་པའི་རྟགས་ཚད་ཡོངས་སུ་རྫོགས། །༡༢༧༽
སྐལ་ལྡན་དད་པའི་རྟེན་དུ་གདུང་སྐལ་བཞག །
གདུང་རུས་རིན་ཆེན་སྣ་ལྔ་ལས་གྲུབ་ཅིང་། །
དབུ་ཐོད་སོགས་ལས་ངོ་མཚར་རང་བྱུང་སྐུ། །
ཞི་དང་ཁྲོ་བོའི་ལྷ་ཚོགས་དཔག་མེད་འཁྲུངས། །༡༢༨༽
ཁ་བ་ཅན་དུ་ཆོས་རྗེ་ཀཿ ཐོག་པ། །
བདེ་བ་ཅན་དུ་བློ་གྲོས་སྙིང་པོར་གྲགས། །
མ་འོངས་བདེ་གཤེགས་ཚེ་དཔག་མེད་པ་ཞེས། །
ལུང་བསྟན་ཐོབ་པ་ཁྱེད་ལ་གསོལ་བ་འདེབས། །༡༢༩༽
འདིས་མཚོན་དུས་གསུམ་རྣམ་དཀར་དགེ་བ་ཡིས། །
ཚེ་ཆོས་མཐར་ཕྱིན་བསྟན་འགྲོའི་དོན་ཆེན་འགྲུབ། །
འཆི་མ་ཐག་ཏུ་འོད་སྣང་རྒྱལ་བའི་ཞིང་། །
འགྲོ་བ་འདྲེན་པ་དེ་དྲུང་སྐྱེ་བར་ཤོག །༡༣༠༽
མ་འོངས་སྐར་མ་བཀྲམ་པའི་ཞིང་ཁམས་སུ། །
བདེ་གཤེགས་འགྲོ་བ་འདྲེན་པ་ཚེ་དཔག་མེད། །
དེ་ཡི་རྒྱལ་ཚབ་སྲས་ཀྱི་ཐུ་བོ་རུ། །
གྱུར་ཏེ་མཐའ་ཡས་འགྲོ་འདྲེན་སངས་རྒྱས་ཤོག །༡༣༡༽
སྤངས་རྟོགས་མཐར་ཕྱིན་རྒྱལ་བ་རྫོགས་སངས་རྒྱས། །
ཉོན་མོངས་ཉེས་པའི་དྲི་བྲལ་དམ་པའི་ཆོས། །
ཚོགས་ཀྱི་ཞིང་མཆོག་འདྲེན་པ་དགེ་འདུན་ཏེ། །
བླ་མེད་དཀོན་མཆོག་གསུམ་གྱི་བཀྲ་ཤིས་ཤོག །༡༣༢༽
ཅེས་ཤར་ཀཿ ཐོག་པའི་ཆོས་རྗེ་དམ་པ་བདེ་བར་གཤེགས་པ་སྐུ་འཁྲུངས་ནས་ལོ་དགུ་བརྒྱ་(༩༠༠)འཁོར་བའི་རྣམ་ཐར་རྗེས་དྲན་གྱི་ཆེད་རྩོམ་ཚིགས་སུ་བཅད་པ་བརྒྱ་ཕྲག་གཅིག་དང་བཅུ་ཕྲག་གསུམ་དང་གཉིས་ཀྱིས་ལམ་ནས་བྲིས་པ་འདི་ཉིད། མདོ་སྟོད་གོ་འཇོའི་ཡུལ་རྒྱལ་སྲས་རིགས་གསུམ་སེམས་དཔའི་གསུང་ངོ་མཚར་རང་བྱུང་མཐོང་གྲོལ་ཆེན་མོ་ལྷམ་མེ་ལྷན་ནེ་ལྷང་ངེར་བྱིན་རླབས་ཀྱི་གཟི་འོད་འབར་ཞིང་བཞུགས་པ་སྔོན་དུས་སྲིད་པ་ཕྱྭ་ཡི་ཡུལ་དུ་གྲགས་པའི་ཡུལ་གྱི་ཟོ་དོར་གཉན་པོ་ཀླུ་རྒྱལ་མི་མགོན་དཀར་པོས་བདག་ཏུ་བཟུང་བའི་ཡུལ། མཚམས་གཞུང་རྒྱ་མཚོའི་ལྟེ་བ་མཚོ་དང་མཚེའུ་བརྒྱ་ཕྲག་དུ་མས་ཡོངས་སུ་བསྐོར་ཞིང་མཛེས་པའི་ཡུལ་ལྗོངས་མིག་སྨན་ཐིག་ལེའི་ལྡིང་ཁང་། སྟག་དགོན་འོད་གསལ་ཐེག་མཆོག་ཆོས་འཁོར་གླིང་རྒྱུད་སྡེ་བཤད་སྒྲུབ་འཆི་མེད་པད་མ་འོད་གླིང་རིགས་གསུམ་སེམས་དཔའ་དགྱེས་པའི་དགའ་ཚལ་དུ། མདོ་སྔགས་གཉིས་ཀྱི་ཆོས་སྒྲ་ཅུང་ཟད་སྒྲོགས་པའི་རི་སུལ་ག་ལ་བ་དེར། ཤར་ཀཿ ཐོག་པའི་རིག་འཛིན་བརྒྱུད་པའི་སློབ་བུ་དངོས་མ་སྙིགས་དུས་ཆོས་སྨྲ་བའི་གཟུགས་བརྙན་ཙམ་འཆང་བའི་བཙུན་གཟུགས་ཐུབ་བསྟན་ལུང་རྟོགས་ཡེ་ཤེས་རྒྱལ་མཚན་དཔལ་བཟང་པོའམ་"ཀུན་བཟང་ཕྱོགས་ལས་རྣམ་རྒྱལ་"དུ་འབོད་པའི་འདུ་གསུམ་པ་གང་དེས། ཀཿ དམ་པ་རིན་པོ་ཆེའི་ཕྱག་བཞེས་དྲི་མེད་འདུལ་བ་གཞི་གསུམ་གྱི་ལག་ལེན་ཇི་བཞིན་བགྱིས་པའི་སྐབས། རབ་རྒྱན་ཆུ་ཡོའི་ལོའི་བོད་ཟླ་༧ ཚེས་༨ ཉིན་དབྱར་ཕྱེད་སོང་མཚམས་བཀྲ་ཤིས་པའི་གསོ་སྦྱོང་གི་ཉིན་མོ་དབུ་བཙུགས་ཏེ་ཉིན་བརྒྱད་ཀྱི་རིང་དབྱར་གནས་ཀྱི་བར་མཚམས་རྣམས་སུ་བྲིས་པས་དམ་པ་མཆོག་གི་དོན་རྒྱུད་དགོངས་པའི་བྱིན་རླབས་བདག་ལ་འཕོས་ཏེ་རྟེན་འདིར་འབད་མེད་བསྟན་འགྲོའི་དོན་ཆེན་ཡོངས་སུ་འགྲུབ་པའི་རྒྱུ་རུ་གྱུར་ཅིག། །། སརྦ་མངྒ་ལམ།
