ཚེས་7ཉིན་གྱི་ཆུ་ཚོད་9དང་སྐར་མ་5ལ། ས་ཡོམ་བརྒྱབ་པས་ལྷུན་གྲུབ་ཧོབ་ཏེ་གཉིས་ལས་སད། དེ་མུར་ཁོང་དངངས་འཚབ་དང་བཅས་ཨུ་སུག་ཀྱང་གྱོན་ལོང་མ་བྱུང་བར་མགུ་རིང་གྲོང་ཚོའི་ཕྱོགས་སུ་རྒྱུག མགུ་རིང་གྲོང་ཚོ་ནི་ཡོམ་ལྟེ་ཡིན་པའི་གྲམ་སོ་ཤང་དུ་ཡོད་པ་དང་། ད་ཐེངས་ཀྱི་ས་ཡོམ་ནང་གནོད་འཚེ་ཕོག་ཚབས་ཆེ་ཤོས་ཀྱི་གྲོང་ཚོའི་གྲས་ཤིག་ཡིན་ཞིང་། གྲོང་ཚོ་དེའི་གྲོང་མིའི་ཁང་པ་52ཚང་མ་ལོག་ཡོད་པ་རེད། ཆུ་ཚོད་10པ་ཙམ་ལ་ལྷུན་གྲུབ་དང་ཡུལ་མི་ཚོས་ཞིག་རོའི་ཁྲོད་ནས་བཟའ་ཟླའི་གཅུང་པོའི་བུ་དང་རང་ཉིད་ཀྱི་ཕྲུ་གུ་གཉིས་པོ་བཏོན་ཐུབ་པ་དང་། དེ་འཕྲལ་ནུས་ཤུགས་གང་ཡོད་ཀྱིས་མྱུར་སྐྱོབ་བྱས་རུང་རེ་བ་འབྲས་མེད་དུ་གྱུར་རྐྱེན། ཁོང་གིས་ཕྲུ་གུ་ཚོ་མྱུར་དུ་སྨན་ཁང་དུ་བསྐྱལ། འོན་ཀྱང་སྨན་ཁང་དུ་སླེབས་ཀྱང་ཕྲུ་གུ་སྐྱོབ་ཐུབ་མེད། དེ་མུར་ཁོང་གིས་ཕྲུ་གུ་ཚོའི་ཕུང་པོ་བྱང་དཀར་གྲོང་ཚོར་ཡོད་པའི་ཨ་ཕའི་སར་བསྐྱལ་ཞིང་། ཡིད་སེམས་གདུང་བས་མནར་རུང་ཕྲུ་གུ་གསུམ་པོ་བཞག་སྟེ་མྱུར་དུ་མགུ་རིང་གྲོང་ཚོར་རོགས་སྐྱོབ་ཀྱི་ལས་ལ་ཞུགས། ལྷུན་གྲུབ་ཀྱིས་གསར་འགོད་པར། ཉིན་འདི་དག་ནང་རྦད་དེ་ཞིག་རོ་བསྔོགས་ནས་སྡོད་ཀྱི་ཡོད། སྔོག་མཚམས་བཞག་མ་ཐག་ལམ་སེང་ཕྲུ་གུ་གཉིས་པོ་དྲན་ཡོང་གི་འདུག བྱས་ཙང་ངས་སྔོག་མཚམས་འཇོག་ཕོད་ཀྱི་མི་འདུག་ཅེས་བཤད་བྱུང་།
