ལམ་རིམ་ཉམས་ལེན་མན་ངག་གནད་འདུས་མ།
དཔལ་མར་མེ་མཛད་འགྲོ་མགོན་ཆོས་རྒྱལ་འཕགས་པས་གསུངས།
རྟག་ཏུ་འཆི་བ་བསམ་པར་བྱ། །
དེ་ཡིས་ཚེ་འདིའི་ཞེན་པ་ལྡོག །
འཁོར་བའི་ཉེས་དམིགས་དྲན་པར་བྱ། །
སྲིད་ལ་སྨོན་པའི་ཡིད་བྲལ་འགྱུར། །
འགྲོ་ལ་བྱམས་བརྩེ་བསྒོམས་པ་ཡིས། །
གཅིག་ཏུ་བདག་དོན་གཉེར་བ་ལྡོག །
ཆོས་རྣམས་སྟོང་པ་ཉིད་དུ་བསྒོམ། །
མཚན་མར་འཛིན་པ་སྤོང་བར་འགྱུར། །
རང་ལུས་ལྷག་པའི་ལྷ་རུ་བསྒོམ། །
དེ་ཡིས་ཐ་མལ་མངོན་ཞེན་ལྡོག །
རྟག་ཏུ་སྔགས་ཀྱི་བཟླས་པ་བྱ། །
དེ་ཡིས་ངག་གི་སྒྲིབ་པ་སྤོང་། །
སྟོང་ཉིད་སྙིང་རྗེ་ཟུང་འཇུག་བསྒོམ། །
ཡིད་ཀྱི་དྲི་མ་དག་པར་འགྱུར། །
སྤྱི་བོར་བླ་མ་མོས་གུས་བྱ། །
བྱིན་རླབས་ཡེ་ཤེས་ཉེ་བར་འགྱུར། །
བདེ་བ་དཀོན་མཆོག་དྲིན་དུ་བསམ། །
འབྱོར་པའང་ལམ་དུ་འགྱུར་བ་ཡིན། །
གདུང་བས་ལས་ངན་འདག་པར་བསམ། །
སྡུག་བསྔལ་མྱོང་བའང་ལམ་དུ་འགྱུར། །
དགེ་བ་གཞན་གྱི་དོན་དུ་བསྔོ། །
མི་ཟད་པ་ཡི་གཏེར་དུ་འགྱུར། །
ཟབ་མོ་ཉམས་སུ་ལེན་པའི་ཚུལ། །
མདོར་བསྡུས་གོ་བདེར་བཀོད་པ་ཡིན། །
