སྙན་ངག་བདམས་བཀོད།
གཅོད་པ་དོན་གྲུབ།
ཀ་ཆེན་གཅིག་གིས་འཛམ་གླིང་འདེགས་ནུས་ཤིང་།།
ཁ་དོན་གཉིས་མཚུངས་མགོ་ནག་མི་ཡི་མགོན།།
ག་དུས་བདུད་སྡེ་འཇོམས་ལ་གཉོམ་ཆུང་སྐྱོང་།།
ང་ཡི་སེང་ཆེན་རྒྱལ་པོར་སྙིང་ནས་འདུད།།
ཅ་ནོར་རིན་ཆེན་སྣ་ཚོགས་དབང་གིས་བསྡུས།།
ཆ་ལུགས་མི་འདྲ་ཧོར་བདུད་འཇང་མོན་བཞི།།
ཇ་ཁོལ་ནང་དུ་ཆུ་འཁྱགས་བླུགས་ལྟར་བཅོམ།།
ཉ་གང་ཟླ་བ་ཇི་བཞིན་བསམ་དོན་གྲུབ།།
ཏཱ་རེ་ལྷ་མོའི་ཐུགས་ལྟར་མཁྱེན་རྒྱ་ཡངས།།
ཐ་མའི་སྤྱོད་ལམ་འགོག་ལ་སྙིང་སྟོབས་མངའ།།
ད་དུང་གཞན་ཕན་སྒྲུབ་ལ་ལྷག་བསམ་ཅན།།
ན་ཆུང་དུས་ནས་སྤྲུལ་བསྒྱུར་གང་འདོད་ཐུབ།།
པ་ཏྲའི་རི་མོ་ལྟ་བུའི་ཇུས་ཆེན་ཡོད།།
ཕ་མའི་བརྩེ་སེམས་འགྱུར་མེད་རྡོ་རྗེ་ཡོད།།
བ་གླང་ཇི་བཞིན་སྡུག་རུས་བརྩོན་འགྲུས་ཡོད།།
མ་རིག་མུན་པ་སེལ་བའི་ཤེས་རབ་ཡོད།།
ཙ་ར་བཅད་ཀྱང་དམྱལ་ཡུལ་ཁམས་སུ་བསྐྱོད།།
ཚ་གྲང་དཀའ་ཐུབ་མྱངས་བའི་རྣམ་ཤེས་རྣམས།།
ཛ་དྲག་ཞི་བའི་དག་ཞིང་གནས་སུ་དྲངས།།
ཝ་ལེར་བསམ་ན་བྱང་ཆུབ་སེམས་དཔའི་ཐུགས།།
ཞ་བོ་འོན་པ་ཡིན་ཀྱང་རིས་མེད་པར།།
ཟ་མ་ཞིམ་པོ་སྤྱོད་པའི་བདེ་སྐྱིད་སྦྱིན།།
འ་ཅག་མི་སེར་ཀུན་གྱིས་གེ་སར་རྗེའི།།
ཡ་མེད་བཀའ་དྲིན་སུས་ཀྱང་བརྗེད་མི་སྲིད།།
ར་ལུག་ཕྱུགས་རིགས་བོད་མིའི་འཚོ་རྟེན་ཡིན།།
ལ་ཡངས་རི་མཐོ་བོད་མིའི་ཕ་ཡུལ་ཡིན།།
ཤ་ཆང་ཟས་སྤྱོད་བོད་མིའི་གནའ་སྲོལ་ཡིན།།
ས་གཞི་ཆེན་པོ་གླིང་དཀར་ལྷ་སྡེ་ཡིན།།
ཧ་ཅང་ལེགས་པའི་གླིང་སྒྲུང་གསེར་གྱི་རི།།
ཧ་ལམ་སུམ་བརྒྱ་བདུན་ཅུ་ཡོད་པར་ངེས།།
ཨ་རོག་རྟོགས་བརྗོད་ངོ་མཚར་རེ་རེ་ཡང་།།
ཨ་ཇོ་གེ་སར་རྒྱལ་པོའི་མཛད་འཕྲིན་ལགས།།
ཞེས་ཕྱི་ལོ2021ལོའི་ཟླ1ཚེས28ཉིན་གྱི་སྔ་དྲོར་ཐོལ་བྱུང་དུ་སྦྱར་བ་དགེ་བར་ཤོག
འཕྲིན་སྟེགས་སུ་ཚོགས་པ་དང་མི་སྒེར་གང་རུང་གི་ཁེ་དབང་ལ་གནོད་པའི་ནང་དོན་ཅན་ཡོད་ཚེ་མྱུར་དུ་འབྲེལ་གཏུགས་བྱོས་དང་དྲ་ལམ་ནས་གསུབ་ཆོག
འཕྲིན་སྟེགས་འདིར་བཀོད་པའི་བརྩམས་ཆོས་གང་ཡིན་རྩོམ་པ་པོ་དང་དོ་དམ་པས་ཆོག་མཆན་མ་ཐོབ་པར་ཅི་བསམ་གང་འདོད་དུ་བཤུ་འཁྱེར་དང་ཇི་མ་ཇི་བཞིན་དུ་བརྒྱུད་འགོད་སོགས་བྱེད་མི་ཆོག
རྩོམ་སྒྲིག་པ། རླུང་ནག་འཚུབ་མ།
འཕྲིན་སྟེགས་འདིར་དཔེ་ཀློག་ཟིན་བྲིས་གཙོས་པའི་དོན་ཚན་སྣ་ཚོགས་ཤིག་བཀོད་དང་འགོད་བཞིན་ཡོད་པས་སྐུ་ཉིད་ཕེབས་པར་དགའ་བསུ་ཞུ།
