شينحۋا اگەنتتىگىنىڭ 1 - ايدىڭ 9 - كۇنى بەيجيڭنەن بەرگەن حابارى. جۇڭگو كوممۋنيستىك پارتياسى ورتالىق كوميتەتى ساياسي بيۋروسىنىڭ تۇراقتى كوميتەتى 1 - ايدىڭ 9 - كۇنى ءماجىلىس اشىپ، شيزاڭنىڭ ديڭرىسىنداعى جەر سىلكىنىسىنە قارسى اتتانىپ، اپاتتان قۇتقارۋ قىزمەتىن اقىلداسىپ ورنالاستىردى. جۇڭگو كوممۋنيستىك پارتياسى ورتالىق كوميتەتىنىڭ باس شۋجيى شي جينپيڭ ءماجىلىستى باسقاردى ءارى ماڭىزدى ءسوز سويلەدى.
ءماجىلىس مىنالاردى اتاپ كورسەتتى: شيزاڭنىڭ ديڭرىسىندا 8. 6 بال جەر سىلكىنىسى تۋىلعاننان بەرى، شي جينپيڭ جولداستى ۇيتقى ەتكەن پارتيا ورتالىق كوميتەتىنىڭ پارمەندى باسشىلىعىندا، قاتىستى جەرگىلىكتى ورىندار مەن تاراۋلاردىڭ ارەكەتى جىلدام، ۇيىمداستىرۋى پارمەندى بولدى، قالىڭ پارتيا مۇشەلەرى، كادرلار، بۇقارا ىنتىماقتاسا ەرلىكپەن شايقاستى، اسىرەسە، مەملەكەتتىڭ جالپىلىق ءورت ءسوندىرۋ - ورتتەن ساقتانۋ، قۇتقارۋ - كومەكتەسۋ قوسىنى، ازاتتىق ارميا، قارۋلى ساقشى بولىمدەرى جانە ورتالىق كاسىپورىندارى سياقتى قۇتقارۋ - كومەكتەسۋ كۇشتەرى ەرەكشە سۋىق، وتتەگى تاپشى بولۋ سىندى قيىندىقتى جەڭىپ، مينۋت، سەكۋندتى قولدان جىبەرمەي قامالىپ قالعانداردى ىزدەپ جانە قۇتقارىپ، ءولىم - ءجىتىمدى مۇمكىندىگىنشە ازايتتى، جەر سىلكىنىسىنە قارسى اتتانىپ، اپاتتان قۇتقارۋ جالپى جاقتان ءساتتى بولدى.
ءماجىلىس مىنالاردى باسا دارىپتەدى: قازىر جەر سىلكىنىسىنە قارسى اتتانىپ، اپاتتان قۇتقارۋ قىزمەتى شەشۋشى كەزەڭگە ءوتتى، تيتتەي دە بوساڭسۋعا بولمايدى. قىزمەتتى اناعۇرلىم ەگجەي - تەگجەيلى ىستەپ، جەر سىلكىنىسىنە قارسى اتتانىپ، اپاتتان قۇتقارۋ سىندى وسى قيان - كەسكى شايقاستىڭ جەڭىسىنە باتىل قول جەتكىزۋ كەرەك. قۇتقارۋ - كومەكتەسۋ، سوڭعى جۇمىستاردى ىڭعايلاستىرۋ قىزمەتىن ۇزدىكسىز ورىستەتۋ كەرەك. ەمدەۋ ماماندارىن بىرىگىپ تەكسەرۋگە ۇيىمداستىرىپ، جارالانعانداردى بار كۇشپەن قۇتقارۋ - ەمدەۋ كەرەك. اپاتقا ۇشىراعان بۇقارانىڭ نەگىزگى تۇرمىسىن دەن قويا، سۇيىسپەنشىلىكپەن قامتاماسىز ەتىپ، ۋاقىتشا ورنالاستىرۋ جانە وتپەلى مەرزىمدىك ورنالاستىرۋدى ءبىر تۇتاس ويداعىداي جوسپارلاپ، اپاتقا ۇشىراعان بۇقارانىڭ قىستان جىلى وتۋىنە شىنايى كەپىلدىك ەتۋ كەرەك. اپاتتان كەيىنگى قالپىنا كەلتىرۋدى، قايتا قۇرۋدى تەزدەتىپ، نەگىزدىك قۇرىلعىلاردى قالپىنا كەلتىرۋ جانە قيراندىلاردى تازالاۋ جۇمىسىن ۋاقىتتى مىقتى يگەرىپ ويداعىداي ىستەپ، اپات تۋىلعان ءوڭىردىڭ قالىپتى ءوندىرىس، تۇرمىس ءتارتىبىن تەز ارادا قالپىنا كەلتىرۋ كەرەك. قوعام ورنىقتىلىعى قىزمەتىن شىن مانىندە ويداعىداي ىستەپ، ءتۇرلى قايشىلىقتاردى، داۋ - شارلاردى دەر كەزىندە ءبىر - بىردەن تەكسەرىپ شەشىپ، قۇزىرلى ينفورماتسيالاردى جاريالاۋدى ويداعىداي ىستەۋ كەرەك. ءتۇيىندى وڭىرلەردەگى ۇيلەردىڭ، نەگىزدىك قۇرىلعىلاردىڭ جەر سىلكىنىسىنە توزىمدىلىك قۋاتىن جانە جەر سىلكىنىسى اپاتىنا توتەپ بەرۋ قۋاتىن ونان ارى جوعارىلاتىپ، ءتۇرلى شۇعىل جاعدايعا توتەپ بەرۋ دايىندىعىن ويداعىداي ىستەۋ كەرەك.
ءماجىلىس مىنالاردى تالاپ ەتتى: جەرگىلىكتى پارتكوم مەن ۇكىمەت ساياسي جاۋاپكەرشىلىكتى شىنايى ارقالاۋى، قاتىستى جاقتار تىعىز سايكەسۋ، سەلبەسۋى، ءار دارەجەلى كادرلار ءبىرىنشى شەپتەن تاپجىلماي، بار كۇشىن سالۋى، نەگىزگى ساتى پارتيا ۇيىمدارى مەن قالىڭ پارتيا مۇشەلەرى جاۋىنگەر قامالدىق رولىن جانە اۆانگارد، ۇلگىلىك رولىن تولىق ساۋلەلەندىرۋى كەرەك.
ءماجىلىس باسقا دا ىستەردى اقىلداستى.
监制：叶尔兰·努哈
