༠མཛེས་པའི་སྟོང་གཟུགས་ལུས་ཀྱི་འཁྲི་ཤིང་རྩེར།།
མཛེས་པའི་མེ་ཏོག་གསར་པའི་ཞལ་རས་ཅན།།
ངག་དབང་ཚངས་པའི་བུ་མོ་སྒེར་ལྡན་མ།།
སྙན་ཚིག་སྨྲ་བའི་བློ་ཡི་མཆོད་སྦྱིན་མཛོད།།
༡རྣམ་དཔྱོད་ཆུ་རིས་འཕྱུར་བའི་རླབས་ཀྱི་རྩེར།།
སྙན་དབྱངས་ངག་གི་འཇོ་སྒེག་ངོམ་ཐེངས་རེར།།
ཚིག་རྒྱན་སྨྲ་བའི་མཁས་དབང་འབུམ་ཕྲག་གི།།
ཡིད་ཀྱི་བརྟན་པ་འཕྲོག་པའི་དགེ་ཆོས་པ།།
༢ཁྱེད་ཀྱི་སྙན་པའི་ཚིག་སྦྱོར་ལུས་ཕྲ་མས།།
མཛེས་པའི་སྟངས་སྟབས་ཅི་ཡང་བསྟན་པ་ན།།
འཕགས་བོད་སྙན་རྩོམ་བགྲེས་མོའི་ལང་ཚོ་ཕལ།།
ལྕགས་སམ་རྡོ་བའི་དུལ་བུ་བཞིན་དུ་གྱོང་།།
༣བདེན་དོན་རིག་པའི་རྒྱལ་ཁམས་ཉུལ་བ་ལས།།
གཏམ་རྒྱུད་གསེར་གྱི་ཐང་མ་བརྡལ་བ་ན།།
ཐུན་མོང་མི་ཡི་སྣང་ཚུལ་གཞིར་བཞག་པའི།།
ཡངས་པའི་འཇིག་རྟེན་མཐོང་བའི་དམིཊ་བུ་བྱིན།།
༤རིགས་ཞེན་ཁྲག་གིས་མྱོས་པའི་ངར་སྒྲ་རེས།།
རབ་དཀར་ཁ་བའི་ཞིང་ན་འཚོ་བ་ཡི།།
དཔྱོད་ལྡན་མང་པོའི་སྙིང་གི་གཏིང་རུམ་ན།།
དུང་སེམས་གངས་ལ་འཁྱུད་པའི་ལ་རྒྱ་བྱིན།།
༥ཤིན་ཏུ་ཁ་གསལ་དབུ་མ་རྩ་བའི་གཞུང་།།
ཡོན་པོའི་བློ་ཡིས་དཀྱོག་པོར་འགྲེལ་བ་ན།།
ཀླུ་སྒྲུབ་དགོངས་པ་དམར་རྗེན་སྟོན་པ་ཡི།།
ངེས་དོན་རིགས་པའི་འབྲུག་སྒྲས་ས་ཆེན་བསྒུལ།།
༦ཆོས་དང་ཚན་རིག་ཕྱོགས་རེར་ཞེན་པའི་གཏམ།།
འབྲེལ་མེད་ཅ་ཅོ་ཅི་ཡང་སྨྲ་བའི་ཚེ།།
རྩེར་སོན་ཚན་གསར་སྨྲ་བའི་རིང་ལུཊ་ལས།།
ནང་བསྟན་མདུན་བསྐྱོད་སོང་བའི་སྤོབས་པ་སྩལ།།
༧ཁྱེད་ཀྱི་ཞལ་དང་ང་ཡི་རྣ་བའི་བར།།
ལོ་དང་ཟླ་བས་རིང་དུ་བསྐལ་ན་ཡང་།།
དུང་སེམས་ཁྱེད་ལ་འཁྱུད་པའི་ཁ་བའི་བུས།།
སྙན་ཚིག་མེ་ཏོག་དམར་པོའི་ཕྲེང་བ་བསྟར།།
ཞེས་ངག་དབང་དབྱངས་ཅན་གཙུག་ལག་རྒྱ་མཚོ་ལུང་རིགས་སྨྲ་བའི་ཉི་མས་(རུས་རྐང་གཙང་མ་པས་)ཡང་ཡང་བསྐུལ་ངོར་འོད་གསལ་ཕྱག་རྒྱ་ཆེན་པོའི་གླིང་ནས་ཤར་མར་སྦྱར་བའོ།།
གྱེར་འདོན་མ། •ཚ་སྒང་། འཚོ་སྨན་མ།
དོ་དམ་པའི་སྒེར་འཕྲིན།
1924226187
བརྩམས་ཆོས་བསྐུར་ཡུལ་གྱི་ཡིག་ཟམ། 16222785500.com
སྒྲ་ལེན་པ། *ཁམས•སྤུན་ཟླའི་སྒྲ་དབྱངས་སྒྲིག་སྦྱོར་ཁང་།
སྤྱིའི་འགན་ལེན་པ། *པད་དཀར་བསྟན་འཕེལ།
