སླར་ཡང་དྲན།
སྤྲུལ•འོད་ཕྲན།
ཨེ་མ།
རྣམ་འདྲེན་བཞི་པའི་བསྟན་པ་སྙིང་པོའི་བསྟན། །
བཀའ་བབས་བཞི་འདུས་རྒྱལ་བ་བཀའ་བརྒྱུད་པའི། །
བསྟན་པའི་གདུགས་དཀར་མཁའ་རུ་བསྒྲེང་མཛད་པའི། །
བསྟན་འཛིན་དམ་པ་ཁྱེད་ཉིད་སླར་ཡང་དྲན། །
རྣམ་དཀར་དགེ་བའི་ས་བོན་འཕྲོ་བཟང་བས། །
ཆུང་ནས་རབ་བྱུང་འབྲི་ཀློག་དག་སྙན་སོགས། །
བརྡ་སྟོན་ཙམ་གྱིས་ཚེགས་མེད་ཐུགས་སུ་མངའ། །
ཤེས་ལྡན་བཤེས་གཉེན་དམ་པ་སླར་ཡང་དྲན།
ཀ་རི་ཀཱ་ནི་གསང་ཆེན་རྒྱུད་སྡེའི་བར། །
མཚན་ལྡན་བླ་མའི་ཞལ་གདམས་བཅུད་ཀྱིས་གསོས། །
གཞུང་ལུགས་ཀུན་ལ་མཁྱེན་པའི་སྤོབས་པ་མངའ། །
དཔྱོད་ལྡན་བཤེས་གཉེན་དམ་པ་སླར་ཡང་དྲན། །
རིགས་གནས་སྤྱི་ལ་མཁྱེན་པའི་རྣམ་དཔྱོད་དང་། །
དམ་པའི་མན་ངག་གཞུང་གི་དཀའ་གནད་སོགས། །
ལེགས་བཤད་སྒོ་བརྒྱ་འབྱེད་ལ་མི་ཞུམ་པའི། །
མཁས་པ་བཤེས་གཉེན་དམ་པ་སླར་ཡང་དྲན། །
རིམ་གཉིས་ཐབས་གྲོལ་ཟབ་མོ་ཕྱག་རྒྱ་ཆེ། །
རྡོ་རྗེ་འཆང་ནས་རྩ་བའི་བླ་མའི་བར། །
དོན་བརྒྱུད་རྟོགས་པའི་ཕ་ཤུལ་འཛིན་མཛད་པའི། །
བཤེས་གཉེན་དམ་པ་ཁྱེད་ཉིད་སླར་ཡང་དྲན། །
ཚུལ་གནས་ཐོས་བསམ་སྒོམ་ལ་རང་རྒྱུད་འབྱོངས། །
འཆད་རྩོད་རྩོམ་པས་བསྟན་ལ་མཛད་རྗེས་བཞག །
བསྡུ་བ་རྣམ་བཞིས་འགྲོ་བའི་དོན་མཛད་པ། །
བཤེས་གཉེན་དམ་པ་ཁྱེད་ཉིད་སླར་ཡང་དྲན། །
ཕྱི་ལྟར་ཉན་ཐོས་གཙང་མའི་གོས་ཀྱིས་མཛེས། །
ནང་ལྟར་ཐེག་ཆེན་སེམས་དཔའི་ངང་ཚུལ་ལྡན། །
གསང་བ་རིམ་གཉིས་ཟབ་མོའི་ལྟ་དགོངས་རྫོགས། །
ཚུལ་ལྡན་བཤེས་གཉེན་དམ་པ་སླར་ཡང་དྲན། །
མཁས་བཙུན་བཟང་གསུམ་དཔལ་གྱིས་ཕྱུག་པའི་མཆེད་པོ་དམ་པ་ཀརྨ་ལས་སྒྲུབ་དགོངས་པ་ཞི་བའི་དབྱིངས་སུ་གཤེགས་ནས་ལོ་འཁོར་གཉིས་ལོན་པའི་དུས་ཚིགས་ལ་རྗེས་དྲན་གྱི་ཚུལ་དུ་དྲ་མིང་འོད་ཕྲན་ནམ་དངོས་མིང་ཉི་ཕྱུག་ནས་༢༠༢༢/༡༡/༡༠ ཉིན་གུས་པས་ཕུལ་བའོ། །
སླར་སྨྲས་པ།
ལེགས་བྱས་བསོད་ནམས་ཤར་རིའི་ཕྲག་པ་ནས། །
རྟ་བདུན་དབང་པོས་ས་འཛིན་ལེན་གཅིག་གསལ། །
འོན་ཀྱང་ཞིང་འདིར་བསོད་ནམས་དམན་པའི་མཐུས། །
ཡུན་རིང་མ་བཞུགས་དབྱིངས་སུ་ནུབ་ལ་སྐྱོ། །
དོན་དམ་པའི་སྒེར་འཕྲིན།
1924226187
བརྩམས་ཆོས་བསྐུར་ཡུལ་གྱི་ཡིག་ཟམ། 16222785500.com
རྩོམ་སྒྲིག་འགན་ཁུར་བ། *ཚ་བ་རྫ་ཆབ
སྤྱིའི་འགན་ལེན་པ། *ཚ་བ་རྫ་ཆབ།
