རྩོམ་པ་པོ། འབྲུག་ལུང་རྟོགས།
དམ་ཆོས་འཆད་ཉན་དང་སྒོམ་སྒྲུབ་ཉམས་ལེན་བྱེད་སའི་ཁོར་ཡུག་ཅིག་ལ་དགོན་པ་ཞེས་མིང་བཏགས་ཆོག་པ་ལས། ཚོང་ཁེ་སོ་ནམ་བྱེད་སའམ་རྩེད་དགོད་རྣམ་གཡེང་བྱེད་སའི་ཁོར་ཡུག་ཅིག་ལ་དགོན་པ་ཞེས་པའི་མིང་དེ་བཏགས་མི་རིགས།
དམ་ཆོས་འདུལ་བའི་ཕྱག་བཞེས་ཡོད་སའི་གནས་དེ་ལ་དགོན་པ་ཞེས་འབོད་ཆོག་པ་ལས། ཕྱི་རྫིགས་ནང་སྟོང་ཅན་གྱི་ལྷ་ཁང་འདུ་ཁང་དང་སྐུ་གསུང་ཐུགས་རྟེན་ཡོད་པ་ཙམ་གྱིས་གནས་དེ་ལ་དགོན་པ་ཞེས་འབོད་མི་རིགས།
གང་དུ་ལུང་སྡེ་སྣོད་གསུམ་དང་ལམ་བསླབ་པ་གསུམ་གྱི་འོད་སྣང་འཕྲོ་སའི་ཞིང་དེ་ལ་དགོན་པ་ཞེས་བཏགས་ཆོག་པ་ལས། སྐྱ་མིན་སེར་མིན་ཚོས་ཤི་གསོན་ཁྲི་འབུམ་གྱི་རྒྱུ་ནོར་བསྡུས་སའི་གནས་དེ་ལ་དགོན་པ་ཞེས་པའི་མིང་བཏགས་མི་རིགས།
སོ་བྱང་སྔགས་གསུམ་གྱི་རང་རྒྱུད་ཕྱུག་ཅིང་བསྟན་དང་འགྲོ་དོན་ཆེན་ཁུར་དུ་བཞེས་པའི་བཙུན་པ་དང་བཙུན་མ་རྣམས་བཞུགས་སའི་གནས་ཤིག་ལ་དགོན་པ་ཞེས་བཏགས་ཆོག་པ་ལས། ཟ་ཤེས་པ་ལས་སྒྲུབ་མི་ཤེས་པའི་ཤེས་རྨོངས་པའི་སྡེ་ཞིག་ལ་དགོན་པ་ཞེས་བཏགས་རིགས་པ་མིན།
ཉམ་ཐག་པའི་སེམས་ཅན་ཐམས་ཅད་ཀྱི་དོན་དུ་དགེ་སྒྲུབ་སྡིག་སྤངས་ཀྱི་ལས་ལ་བརྩོན་མཁན་ཚོ་འདུས་སའི་དབེན་གནས་ཤིག་ལ་དགོན་པ་ཞེས་འབོད་ཆོག་པ་ལས། ཕྱོགས་རེས་ཆགས་སྡང་དང་རང་ཁེ་གཞན་ཕམ་གྱི་བསམ་སྤྱོད་ཅན་ཚོ་འདུ་གནས་ཤིག་ལ་དགོན་པ་ཞེས་འབོད་མི་རིགས།
དོན་དམ་པའི་སྒེར་འཕྲིན།
1924226187
བརྩམས་ཆོས་བསྐུར་ཡུལ་གྱི་ཡིག་ཟམ། 16222785500.com
རྩོམ་སྒྲིག་འགན་ཁུར་བ། *ཚ་བ་རྫ་ཆབ།
སྤྱིའི་འགན་ལེན་པ། *ཚ་བ་རྫ་ཆབ།
