དྭགས་པོ་བཀྲ་ཤིས་རྣམ་རྒྱལ་མཆོག་ནི།།
དེ་ཡང་ཡབ་ནི་རྗེ་དྭགས་པོའི་རིགས་དབོན་མངའ་བདག་ཆེན་མོ་ཆོས་དབང་གྲགས་པ་དང་། ཡུམ་རིག་འཛིན་སྒྲོལ་མ་གཉིས་ཀྱི་སྲས་སུ་དཔལ་སྡོང་ཞེས་པ་ཆུ་མོ་བྱ་ལོ་སྤྱི་ལོ་༡༥༡༣ལོ་ཧོར་ཟླ་གསུམ་པའི་ཚེས་བརྒྱད་ལ་མེ་ཏོག་གི་ཆར། སྙན་པའི་འབྲུག་སྒྲ་དང་བཅས་ཏེ་སྐུ་བལྟམས།། མཚན་དོན་ཡོད་རྒྱ་མཚོར་གསོལ།
ཐོག་མར་ཡུམ་གྱིས་སྐྱབས་འགྲོ་དང་། དྭགས་བསྟོད། མཛད་བཅུ་སོགས་ཞལ་འདོན་མཛད་པ་ཞར་ལ་མཁྱེན་ཏེ་མཉམ་དུ་འདོན་པར་མཛད། དགུང་ལོ་བདུན་པ་ལ་སྒོམ་པོར་ཁུ་བོའི་དྲུང་དུ་བྱོན། མཚན་བརྗོད། རྣམ་འཇོམས། ཕག་མོ དགྱེས་རྡོར། བསྐང་གསོ་སོགས་ཐུགས་འཛིན་དང་། ཞར་ལ་ཡི་གེ་གཟབ་བཤར་སྦྱངས་པ་ཕུལ་ཕྱིན་དགོངས། ཁུ་བོ་མཁན་སློབ་དང་བཅས་པའི་དྲུང་དུ་རབ་ཏུ་བྱུང་། མཚན་བཀྲ་ཤིས་རྣམ་རྒྱལ་ཆོས་ཀྱི་དཔལ་བཟང་པོར་གསོལ།། གདན་ས་ཤེས་རབ་རྣམ་རྒྱལ་ལ་བརྟེན་ནས། ཕར་ཕྱིན། མཛོད། འདུལ་བའི་སྤྱི་དོན། དབུ་མའི་སྤྱི་དོན། སྡོམ་གསུམ། ཚད་མ་ལ་རྟགས སྐོར་འགའ་ཤས་གསན། རྗེ་རིན་པོ་ཆེ་ཀརྨ་ཕྲིན་ལས་པ་ལས། དེར་མ་འཐུས་པའི་མདོ་རྒྱུད་བསྟན་བཅོས་མན་ངག་དབང་ཁྲིད་མཐའ་གཅོད་དང་བཅས་གསན་པ་རྣམས་འདིར་ཡི་གེ་མང་བས་རྣམ་ཐར་ཆེ་མོ་དང་གསན་ཡིག་ཏུ་བལྟ་བར་བྱའོ་གསུངས་འདུག་པས་ཀརྨ་ཕྲིན་ལས་ཀྱི་སློབ་མ་ཡིན་པ་དང་། ཀརྨ་ཕྲིན་ལས་པའི་དངོས་སློབ་ལ་ཀརྨ་བརྒྱད་པ་མི་སྐྱོད་རྡོ་རྗེ་ཡང་ཡོད་པ་ཡིན་ལ། ད་དུང་ཁོང་གི་ང་ཚོས་རྣམ་ཐར་ཆེ་མོ་དང་གསན་ཡིག་ལ་ངེས་པར་དུ་བལྟ་དགོས་འདུག
རོང་སྟོང་སློབ་མ་ལ་བཀྲ་ཤིས་རྣམ་རྒྱལ་ཟེར་བ་ཞིག་ཡོད་ཀྱང་འོད་ཟེར་སྐོར་གསུམ་མཛད་མཁས་གྱི་བཀྲ་ཤིས་རྣམ་རྒྱལ་དང་མི་གཅིག་མ་ཡིན་པ་ཤེས་དགོས། རྒྱུ་མཚན་ནི་རོང་སྟོང་སློབ་མ་དྭགས་པོ་པཎ་ཆེན་བཀྲ་ཤིས་རྣམ་རྒྱལ་གྱི་རྣམ་ཐར་ཞིག་ནཱ་ལེནྡྲའི་མཁན་པོ་ནོར་བུ་ཡོན་ཏན་ཕྱག་ལ་འདུག་པ་ལ་༢༠༢༢ལོ་རང་ཉིད་ཀྱི་མགོ་ནས་མཇུག་བར་ལ་བལྟས་ཀྱང་འོད་ཟེར་སྐོར་གསུམ་མཛད་ཚུལ་དང་བཀའ་བརྒྱུད་པ་ལ་འབྲེལ་བ་ཡོད་པའི་ཚིག་གཅིག་ཀྱང་མ་མཐོང་། འོད་ཟེར་སྐོར་གསུམ་དང་ལྷག་པར་ཕྱག་ཆེན་ཟླ་ཟེར་ལ་ལྟོས་དང་བླ་རྒྱུད་ལ་མར་མི་དྭགས་གསུམ་དང་དགག་བཞག་གྱི་སྔར་རྒོལ་གཙོ་བོ་ནི་ས་པཎ་ཡིན་པ་སོགས་ལ་ཤེས་རབ་ཅན་དག་གིས་བལྟས་པ་ཙམ་གྱིས་ཀྱང་བཀའ་བརྒྱུད་པའི་གཞུང་ལུགས་དྲི་མ་མེད་པ་ཞིག་ཡིན་པ་སྙོན་དུ་མེད་པ་ཞིག་གོ།། བཀྲ་ཤིས་རྣམ་རྒྱལ་ཟེར་བའི་བླ་མ་ཐམས་ཅད་མི་གཅིག་ཡིན་པ་བསམ་ན་བོད་རིགས་ནང་ལ་བཀྲ་ཤིས་དང་རྣམ་རྒྱལ་ག་ཚད་ཡོད་མེད་ངེས་བཟུང་དཀའ་བ་དེ་རེད། མདོར་ན། འོད་ཟེར་སྐོར་གསུམ་མཛད་མཁན་གྱི་བཀྲ་ཤིས་རྣམ་རྒྱལ་དང་། རང་སྟོང་གདུང་རྟེན་བཞེངས་པ་དང་ནཱ་ལེནྡྲའི་གདན་རབས་གཉིས་པའི་བཀྲ་ཤིས་རྣམ་རྒྱལ་དང་། འདས་ལོག་བཀྲ་ཤིས་རྣམ་རྒྱལ་རྣམས་བླ་མ་སོ་སོར་ཡིན་པ་ལས་མི་གཅིག་མ་ཡིན་པར་ངེས་པར་དུ་ཤེས་དགོས།།
རྒྱ་ཆེ་བའི་སྤུན་ཟླ་རྣམས་ལ་ཞུ་བྱ། ཚ་སྒང་འཕྲིན་སྟེགས་འདིར་དགོད་རྒྱུ་རྩོམ་ཡིག་རྣམས་རྩོམ་པ་པོ་རང་གིས་ཞུ་དག་ལེགས་པར་བྱེད་དགོས་པ་ལས་འདིར་ནས་ཞུ་དག་བྱེད་ཅིང་མེད། རྩོམ་ཡིག་འདིར་བསྐུར་ཟིན་ནའང་སྔར་བཤད་པ་ལྟར་རྩོམ་ཡིག་ཀྱང་ཁོར་ཡུག་དང་དུས་སོགས་དང་འཚམ་པར་ཡིན་དགོས་པ་ལས་གཞན་དག་དགོད་ཀྱི་མེད་པས་རྩོམ་བདག་རྣམས་དགོངས་འགལ་མེད་པར་གྱིས། དེ་ཚོ་དང་པོ་གོ་བར་གྱིས།
擦岗平台
གཙོ་སྐྱོང་བའི་འཕྲིན་ཕྲན། 1924226187
