ཚ་སྒང་འཕྲིན་སྟེགས་འདིར་ཁྱེད་ཕེབས་པ་དགའ་བསུ་ཞུ།
༄༅། ། རྗེ་བཙུན་མ་ལ་བསྟོད་པ་དབྱངས་ཅན་ངག་གི་རོལ་མོ།
པད་དཀར་བསྟན་འཕེལ།
འཇིགས་བརྒྱད་བཅུ་དྲུག་ལ་སོགས་འཚེ་བ་ཀུན། །
སྐྱོབ་མཛད་ལྷ་མཆོག་ཨརྱ་ཏཱ་རེ་ཞེས། །
བཅོམ་ལྡན་རྔ་སྒྲའི་རྒྱལ་པོས་ལུང་བསྟན་པའི། །
བརྩེ་བའི་རིགས་ཀྱི་མ་མས་བདག་སྐྱོངས་ཤིག །
ཆོས་ཉིད་མཉམ་བཞག་དུས་ལས་མི་འདའ་བ། །
བདུད་ཀྱི་གནོད་པ་ལ་སོགས་མི་ཚུགས་པའི། །
ཀུན་མཁྱེན་དོན་ཡོད་གྲུབ་པའི་ཞབས་དྲུང་དུ། །
ལུས་ཅན་སྲུང་ཞིང་སྐྱོབ་པར་དམ་བཅས་སོ། །
ཀ་ཝརྨ་དང་ཨ་བ་ར་སི་ཧ། །
སིངྒྷ་མི་ཏྲ་སློབ་དཔོན་ལ་སོགས་པས། །
རྗེ་བཙུན་མ་ལ་གསོལ་བ་བཏབ་ཙམ་གྱིས། །
འཇིཊ་བརྒྱད་གཡུལ་ལས་རྒྱལ་ཞེས་རྔ་ཆེན་བརྡུངས། །
མཚན་འཛིན་སྤྲོས་པའི་དྲི་མས་མ་ལྷད་ཅིང་། །
ཇི་ལྟ་ཇི་སྙེད་ཆོས་ཚུལ་མཁྱེན་པ་ཡི། །
ཀུན་ལ་མ་ལྟར་བྱམས་པའི་མྱུར་མ་ཞེས། །
རྒྱལ་བས་བསྔཊ་པར་མཛད་པའི་འཕྲིན་ལས་མ། །
འགྲོ་བའི་དོན་དུ་བྱམས་བརྩེ་མི་ལྷོད་པའི། །
གསུང་གི་ལེགས་བཤད་བདུད་རྩིའི་དཔལ་ལ་རོལ། །
ཐུགས་ཀྱི་མཁྱེན་པས་འཁྲུལ་བ་མི་སྲིད་པའི། །
འདི་ཕྱི་ལམ་མཆོག་སྟོན་མཁན་བརྩེ་བའི་ལྷ། །
སྐུ་ཡི་བཀོད་པ་ཞི་ཆགས་ཁྲོ་ཚུལ་ཏེ། །
མ་ངེས་གང་འདུལ་སྣ་ཚོགས་སྒྱུ་འཕྲུལ་གར། །
དཔག་ཡས་མུ་མཐའ་མེད་པ་ཚུལ་བསྟན་པའི། །
རྨད་བྱུང་ཐུགས་རྗེའི་བདག་ཉིད་ལྷ་ཡི་ལྷ། །
མཁྱེན་རབ་ཉི་མའི་དཀྱིལ་འཁོར་འབར་བ་ལས། །
བརྩེ་ཆེན་འོད་ཟེར་དྲ་བས་འགྲོ་བློ་སྡོམ། །
ནུས་པས་མ་རིག་མུན་པ་སེལ་མཛད་པའི། །
རྒྱལ་ཀུན་གསང་པའི་ཡུམ་མཆོག་རྗེ་བཙུན་མ། །
བདེན་གཉིས་གཅིག་ཆར་མཁྱེན་པའི་ཆ་ཤས་རྫོགས། །
སྤྲོས་མེད་མཐའ་བཞི་བྲལ་བའི་གནས་ལུགས་སམ། །
དོན་དམ་སེམས་བསྐྱེད་མངོན་སུམ་རྟོགས་པ་ཡི། །
འཕགས་པའི་ས་ལམ་བགྲོད་པའི་ཏཱ་རེ་མ། །
སྲིད་ཞི་གཉིས་ཀྱི་མཐའ་ལས་མི་ལྷུང་ཞིང་། །
བླ་ན་མེད་པའི་གོ་འཕང་རྙེད་མཛད་པའི། །
མཐར་ཐུག་སྐྱབས་སུ་འོས་པའི་མཆོག་སྦྱིན་མས། །
བདག་སོགས་གནས་ལུཊ་རྟོགས་པར་གྲོགས་མཛོད་ཀྱེ། །
2022.11.21
