རྗེས་དྲན་དུ་ཕུལ་བའི་ཚངས་སྲས་དགྱེས་པའི་མཆོད་སྤྲིན།

文摘 2023-01-01 06:41

སླར་ཡང་དྲན།

འོད་ཕྲན།

ཨེ་མ།

རྣམ་འདྲེན་བཞི་པའི་བསྟན་པ་སྙིང་པོའི་བསྟན། །

བཀའ་བབས་བཞི་འདུས་རྒྱལ་བ་བཀའ་བརྒྱུད་པའི། །

བསྟན་པའི་གདུགས་དཀར་མཁའ་རུ་བསྒྲེང་མཛད་པའི། །

བསྟན་འཛིན་དམ་པ་ཁྱེད་ཉིད་སླར་ཡང་དྲན། །

རྣམ་དཀར་དགེ་བའི་ས་བོན་འཕྲོ་བཟང་བས། །

ཆུང་ནས་རབ་བྱུང་འབྲི་ཀློག་དག་སྙན་སོགས། །

བརྡ་སྟོན་ཙམ་གྱིས་ཚེགས་མེད་ཐུགས་སུ་མངའ། །

ཤེས་ལྡན་བཤེས་གཉེན་དམ་པ་སླར་ཡང་དྲན།

ཀ་རི་ཀཱ་ནི་གསང་ཆེན་རྒྱུད་སྡེའི་བར། །

མཚན་ལྡན་བླ་མའི་ཞལ་གདམས་བཅུད་ཀྱིས་གསོས། །

གཞུང་ལུགས་ཀུན་ལ་མཁྱེན་པའི་སྤོབས་པ་མངའ། །

དཔྱོད་ལྡན་བཤེས་གཉེན་དམ་པ་སླར་ཡང་དྲན། །

རིགས་གནས་སྤྱི་ལ་མཁྱེན་པའི་རྣམ་དཔྱོད་དང་། །

དམ་པའི་མན་ངག་གཞུང་གི་དཀའ་གནད་སོགས། །

ལེགས་བཤད་སྒོ་བརྒྱ་འབྱེད་ལ་མི་ཞུམ་པའི། །

མཁས་པ་བཤེས་གཉེན་དམ་པ་སླར་ཡང་དྲན། །

རིམ་གཉིས་ཐབས་གྲོལ་ཟབ་མོ་ཕྱག་རྒྱ་ཆེ། །

རྡོ་རྗེ་འཆང་ནས་རྩ་བའི་བླ་མའི་བར། །

དོན་བརྒྱུད་རྟོགས་པའི་ཕ་ཤུལ་འཛིན་མཛད་པའི། །

བཤེས་གཉེན་དམ་པ་ཁྱེད་ཉིད་སླར་ཡང་དྲན། །

ཚུལ་གནས་ཐོས་བསམ་སྒོམ་ལ་རང་རྒྱུད་འབྱོངས། །

འཆད་རྩོད་རྩོམ་པས་བསྟན་ལ་མཛད་རྗེས་བཞག །

བསྡུ་བ་རྣམ་བཞིས་འགྲོ་བའི་དོན་མཛད་པ། །

བཤེས་གཉེན་དམ་པ་ཁྱེད་ཉིད་སླར་ཡང་དྲན། །

ཕྱི་ལྟར་ཉན་ཐོས་གཙང་མའི་གོས་ཀྱིས་མཛེས། །

ནང་ལྟར་ཐེག་ཆེན་སེམས་དཔའི་ངང་ཚུལ་ལྡན། །

གསང་བ་རིམ་གཉིས་ཟབ་མོའི་ལྟ་དགོངས་རྫོགས། །

ཚུལ་ལྡན་བཤེས་གཉེན་དམ་པ་སླར་ཡང་དྲན། །

མཁས་བཙུན་བཟང་གསུམ་དཔལ་གྱིས་ཕྱུག་པའི་མཆེད་པོ་དམ་པ་ཀརྨ་ལས་སྒྲུབ་དགོངས་པ་ཞི་བའི་དབྱིངས་སུ་གཤེགས་ནས་ལོ་འཁོར་གཉིས་ལོན་པའི་དུས་ཚིགས་ལ་རྗེས་དྲན་གྱི་ཚུལ་དུ་དྲ་མིང་འོད་ཕྲན་ནམ་དངོས་མིང་ཉི་ཕྱུག་ནས་༢༠༢༢/༡༡/༡༠ ཉིན་གུས་པས་ཕུལ་བའོ། །

སླར་སྨྲས་པ།

ལེགས་བྱས་བསོད་ནམས་ཤར་རིའི་ཕྲག་པ་ནས། །

རྟ་བདུན་དབང་པོས་ས་འཛིན་ལེན་གཅིག་གསལ། །

འོན་ཀྱང་ཞིང་འདིར་བསོད་ནམས་དམན་པའི་མཐུས། །

ཡུན་རིང་མ་བཞུགས་དབྱིངས་སུ་ནུབ་ལ་སྐྱོ། །

བཤེས་གཉེན་དམ་པ་མཁན་ཀརྨ་ལས་གྲུབ་མཆོག་རྗེས་སུ་དྲན་པ་བརྩེ་བའི་འོད་སྣང་།

མདོ་སྔགས་བསྟན་འཛིན།

སྨྲ་བའི་དབང་ཕྱུག་ཀུན་མཁྱེན་བླ་མ་ཡི།།

བསྟན་པའི་རུ་མཚོན་མཁའ་ལ་སྒྲེང་བ་ལ།།

ཞུམ་མེད་སྙིང་སྟོབས་བཙན་པོའི་གོ་གྱོན་པའི།།

མཁན་པོ་ཀརྨ་ལས་གྲུབ་རྗེས་སུ་དྲན།།

བསྟན་པའི་ཡང་སྙིང་མར་སྟོན་རྒྱལ་བའི་བསྟན།།

རྨོངས་དང་གཡོ་སྒྱུས་གཞན་དུ་བསྒྱུར་བའི་ཚེ།།

རང་བསྟན་གཙང་མ་རང་གིས་འཛིན་དགོས་པར།།

བསྐུལ་མཁན་བཤེས་གཉེན་དམ་པར་རྗེས་སུ་དྲན།།

ཐུན་མོང་སྒྲ་རྩིས་སྙན་ངག་སྡེབ་སྦྱོར་དང་།།

སྨན་དང་ལོ་རྒྱུས་བཟོ་རིག་ནས་བཟུང་སྟེ།།

ཐུན་མིན་དབུ་ཚད་མཛོད་འདུལ་ཕར་ཕྱིན་སོགས།།

ཀུན་ལ་རྨོངས་པ་བྲལ་ཁྱེད་རྗེས་སུ་དྲན།།

བསྟན་པའི་རྩེ་མོ་གསང་སྔགས་བླ་མེད་ཀྱི།།

ཆ་ལག་བཅའ་འབུད་རྡུང་དབྱངས་ལ་སོགས་ནས།།

ཕ་རྒྱུད་མ་རྒྱུད་གཉིས་མེད་རྒྱུད་འགྲེལ་རྣམས།།

ཇི་བཞིན་མཁྱེན་པའི་མཁས་དབང་རྗེས་སུ་དྲན།།

ཆེས་སྙིགས་དུས་ཀྱི་རྒུད་པའི་རང་རྟགས་སུ།།

ཕལ་ཆེར་འདོད་ཡོན་སྲིན་མོའི་རྗེས་སྙེག་ཚེ།།

དབེན་པའི་གནས་སུ་རྩེ་གཅིག་སྒྲུབ་མཛད་པའི།།

དཀར་བརྒྱུད་བསྟན་པའི་མགོན་ཁྱེད་རྗེས་སུ་དྲན།།

བློ་ལྡན་དོན་གཉེར་ཅན་གྱི་གདུལ་བྱ་ལ།།

བརྡ་སྤྲོད་སུམ་རྟགས་དག་གསུམ་ནས་བཟུང་སྟེ།།

བཀའ་པོད་ལྔ་སོགས་མདོ་སྔགས་གཞུང་འགྲེལ་རྣམས།།

ཚུལ་བཞིན་གདམས་མཛད་བཤེས་གཉེན་རྗེས་སུ་དྲན།།

ཕྱི་རུ་ཉེས་སྤྱོད་སྡོམ་པའི་ཁྲིམས་ཀྱིས་མཛེས།།

ནང་དུ་བྱང་ཆུབ་སེམས་ཀྱི་བསླབ་པས་ཕྱུག།

གསང་བར་བསྐྱེད་རྫོགས་རིམ་པའི་གནད་ལ་མཁས།།

སུམ་ལྡན་རྡོ་རྗེ་འཛིན་པ་རྗེས་སུ་དྲན།།

མདོར་ན་ཁྱེད་ཀྱི་མི་གཞི་གསེར་ལས་ལྷག།

ཁྱེད་ཀྱི་ཤེས་ཡོན་མ་དྲོས་མཚོ་ལྟར་ཟབ།།

ཁྱེད་ཀྱི་བསླབ་ཁྲིམས་པདྨའི་སྦུབ་ལྟར་གཙང་།།

ཆོས་ཀྱི་བཤེས་གཉེན་དམ་པ་རྗེས་སུ་དྲན།།

ཞེས་མཁན་པོ་ཀརྨ་ལས་གྲུབ་མཆོག་སྐུ་མྱ་ངན་ལས་འདས་ནས་བགྲང་བྱ་གཉིས་འཁོར་བའི་རྗེས་དྲན་དུ་གྲྭ་མདོ་སྔགས་བསྟན་འཛིན་གྱིས་ཕུལ།

མཁན་ཀརྨ་ལས་གྲུབ་རྗེས་སུ་དྲན་པའི་གཏམ་སྐྱོ་གདུང་མིག་ཆུའི་རླབས་འཕྲེང་།

ཁམས་བསོད་བཟང་།

མཁྱེན་རབ་ཉི་གཞོན་འཛུམ་པའི་རྩེ་དགའ་རེས།།

ཀུན་རྨོངས་མུན་པའི་སྨག་ཆེན་སེལ་མཛད་ཅིང་།།

བློ་གྲོས་བློ་ཡི་སྣང་བ་མཆོག་སྩོལ་བའི།།

འཇམ་དབྱངས་སྨྲ་བའི་ཟླ་བ་གཙུག་ན་རྒྱལ།།

འདི་ན་ཁྲིམས་གཙང་ཐོས་པས་རྒྱུད་ཕྱུག་ཅིང་།།

ལུང་རྟོགས་གདུགས་དཀར་མཐོན་པོར་སྒྲེང་བ་ཞིག།

སྐྱེ་རྒུའི་བསོད་ནམས་ཕྲག་པས་མ་ཐེག་བར།།

གློ་བུར་ཞི་བར་གཟིམས་པའི་ཚུལ་དེ་སྐྱོ།།

གཞུང་མང་འཆད༵་པའི་ལྗགས་ཀྱི་རྩལ་ཡངས་ཤིང་།།

ཕྲ་ཞིབ་རྩོད༵་པའི་རིགས་ལམ་རྣོན་པོ་ཅན།།

དོན་བཟང་རྩོམ༵་གྱིས་གཞན་ཡིད་འགུགས་ནུས་པའི།།

མཁས༷་དབང་སྨྲ་བའི་སེངྒེ་སླར་ཡང་དྲན།།

ཞི་དུལ་སྐུ༵་ལ་རྣམ་གསུམ་གོས་ཀྱིས་མཛེས།།

ལྷོད་ཆགས་གསུང༵་ལ་སྡེ་སྣོད་རྒྱ་མཚོ་འཁྱིལ།།

རྣམ་དག་ཐུགས༵་ལ་མཁྱེན་དང་བརྩེ་བ་རྒྱས།

བཙུན༷་པའི་བདག་ཉིད་ཆེན་པོ་སླར་ཡང་དྲན།།

བཅུ་ཕྲག་རིག་པའི་གནས་ལ་མཁྱེན༵་རྒྱ་ཡངས།།

ཉམ་ཐག་འགྲོ་བའི་ཁམས་ལ་བརྩེ༵་བ་ཟབ།།

བསྟན་འགྲོར་སྨན་པའི་ནུས༵་པ་མཐའ་ཀླས་པའི།།

བཟང༷་པོའི་ཕྲིན་ལས་ཅན་ཁྱོད་སླར་ཡང་དྲན།།

ལྟ་སྤྱོད་རྣམ་དག་རབ་དཀར་བརྒྱུད་པའི་སྲོལ།།

འཁྲུལ་མེད་ཉམས་སུ་ལེགས་པར་བསྟར་བའི་མཐུས།།

ཟག་མེད་བདེ་དགའ་སྙིང་ལ་རྟག་འཆར་བའི།།

ཆོས་པའི་རྣམ་ཐར་བདག་གིར་བཞེས་ཁྱོད་དྲན།

མི་གཤིས་གསེར་གྱི་རི་བོ་བརྟན་ཅིང་བརྗིད།།

རིགས་ཞེན་གཡུ་མཚོ་སྔོན་མོ་དྭངས་ཤིང་གཙང་།།

ལུགས་གཉིས་མཁྱེན་རྒྱ་ཆེ་བའི་དྲན་དབང་ཆེ།།

བསམ་ཞིང་བསམ་ན་ཕངས་འགྱོད་རི་ལས་ལྕི།།

དེ་སྐད་མ་བཅོས་སེམས་ཀྱི་སྣང་བརྙན་ངོས།།

ཡང་ཡང་ཤར་བའི་ཁྱེད་ཀྱི་ངང་ཚུལ་རྣམས།།

ཅུང་ཟད་ཙམ་ཞིག་གུས་པས་བརྗོད་པའི་མཐུས།།

སྐྱེ་ཀུན་ཆོས་རིག་སྨྲ་བའི་དཔལ་ཐོབ་ཤོག།

༢༠༢༢/༡༡/༡༠ ཉིན་གུས་ཁམས་བསོད་བཟང་གིས་ཕུལ།

ཡིད་ཀྱི་དེད་དཔོན་མཆོག་མཁན་རིན་པོ་ཆེ་ཀརྨ་ལས་སྒྲུབ་ཞིང་དུ་ཕེབས་ནས་ལོ་འཁོར་གཉིས་ལོན་པའི་རྗེས་དྲན་གྱི་གཏམ་མ་བཅོས་སེམས་ཀྱི་འབོད་པ།

བསྟན་པ་ནོར་བུ།

རང་སེམས་རྒྱ་མཚོའི་ཀུན་རྟོག་རླབས་རྩེ་ན།།

མ་ངེས་ལས་ཀྱི་རླུང་བུས་ཁྱེར་བ་ཡི།།

གསལ་ལ་མི་གསལ་སྒྱུ་མའི་ཁ་དོག་ཁྲོད།།

བརྗེད་མེད་སེམས་ཀྱི་དེད་དཔོན་ལྷ་མཆོག་ཡིན།།

སྡུག་བདེན་སྒྱུ་མའི་ཕུང་པོ་མ་ཞིག་བར།།

སྲིད་པའི་ལས་རླུང་རྗེས་སུ་རྒྱུ་ངེས་པས།།

མ་རིག་སད་ཀྱི་ཁྱེར་བའི་བདག་འདྲ་ལ།།

ལམ་སྟོན་དུས་ཀྱི་སྒྲོན་མེ་ཁྱེད་ཉིད་ཙམ།།

སྐྱིད་སྡུག་ཆར་ཆུ་འདྲེས་པའི་མི་ཚེ་ཁྲོད།།

ཕྱིར་དྲན་རྨི་ལམ་སྐྱ་མོའི་ཐང་ཆེན་ན།།

དོན་ལྡན་ཟིན་ཐོ་བཀོད་པའི་ལས་མེད་ཀྱང་།།

བཤེས་གཉེན་ཁྱེད་ཉིད་མཇལ་བས་ཚིམ་པ་ཡིན།།

མདོ་སྔགས་གསུང་རབ་སྐར་ཚོགས་བཀྲམ་པའི་ཁྲོད།།

སྣ་མང་ཤེས་བྱའི་མཐའ་རྒྱ་མ་ཆོད་རུང་།།

བརྩེ་ཆེན་བྱམས་པའི་དྲིན་གྱིས་བསྐྱངས་བ་ཡི།།

མགོན་ཁྱོད་ཡིད་ལ་དྲན་ན་ལྷག་ཏུ་སྐྱོ།།

ང་ཅག་རེ་ལྟོས་འཆང་བའི་གདུལ་བྱའི་ཚོགས།།

ལེགས་བྱས་བསོད་ནམས་སྨིན་པ་ཉམས་ཕྲ་བས།།

ཁྱེད་སྐུ་ཟླ་གཞོན་ཆུ་འཛིན་སྟུག་པོས་བསྒྲིབས།།

བསམ་ན་ཡིད་ཀྱི་མུན་པ་སངས་ཐབས་ལྕི།།

ལྔ་ལྡན་དར་གྱི་ཟེར་ཐག་ལ་བརྟེན་ནས།།

རིག་འཛིན་བྱེ་བའི་གཙུག་རྒྱན་ཚོགས་དཔོན་དུ།།

དབྱིངས་བཞུགས་ཌཱ་ཀི་ཚོགས་ཀྱིས་མདུན་བསུས་ནས།།

མི་མངོན་ཞིང་དུ་ཕེབས་པ་སྔ་སོང་ཐལ།།

ཞེས་མཁན་པོ་ཀརྨ་ལས་གྲུབ་མཆོག་སྐུ་མྱ་ངན་ལས་འདས་ནས་བགྲང་བྱ་གཉིས་འཁོར་བའི་རྗེས་དྲན་དུ་དམ་པ་གང་གི་སློབ་རིགས་སུ་གཏོགས་པ་བསྟན་པ་ནོར་བུས་ཕུལ།

ཚ་བ་ཟླ་བ་རྒྱལ་མཚན།

ཆེ་རློམ་ཆང་གིས་སྦྲིད་པའི་རྨོངས་པ་ལ། །

དོན་སྟོང་ཚིག་སྐམ་ལྒང་བུ་སྤུངས་པ་ལས། །

ཕྱི་ནང་བཙུན་དང་མཁས་ལ་རྩོད་བྲལ་བ། །

མི་གཞི་གསེར་གྱིས་བྲབས་པའི་ཁྱེད་ལྟ་བུ། །

ལན་གཅིག་དྲན་པའི་བསོད་ནམས་ཅིའི་མི་ལྷག །

ཡེ་ལོ།2023.1.1ཉིན་མཁན་ཀརྨ་ལས་སྒྲུབ་མཆོག་དགོངས་རྫོགས་དུས་དྲན་དུ་ཚ་བ་ཟླ་བ་རྒྱལ་མཚན་ནས།

ལྷད་མེད་དད་པའི་དབྱངས།

རིན་ཆེན་གྲགས།

བསླབ་པའི་ཁྲིམས་ལ་སྐྱོན་གྱིས་མ་གོས་བཙུན་པའི་གཟུཊ་ཀྱི་དཔང་མཐོ་ཞིང་།།

སྦྱང་པའི་གནས་ལ་ཕྱོཊ་རེར་མ་ལུས་མཁྱེན་པའི་རྒྱ་མཚོ་གཏིང་འཐའ་བྲལ།།

སྤྱོད་པའི་ལས་ལ་ནག་ནོག་མ་ལྷད་མཛད་བཟང་གངས་ཀྱི་ལྷུན་པོ་དཀར།།

རྡུལ་བྲལ་པདྨའི་སྦུབ་ལྟར་གཙང་བ་དམ་པ་གང་དེ་སྙིང་ནས་དྲན།།

ཕྱི་ཚུལ་ཞི་དུལ་སྤྱོད་པ་བཟང་པོས་མཐོང་ཐོས་དད་པའི་ས་བོན་བཞག །

ནང་དུ་བསླབ་པའི་ཡོན་ཏན་རྫོཊ་པས་དཔྱོད་ལྡན་མཁས་པའི་ཡིད་དབང་འཕྲོག །

རྒྱུན་པར་ཉམ་ཆུང་དམན་པའི་ཚུལ་བཟུང་སྦས་པའི་རྣལ་འབྱོར་ཆེན་པོ་དངོས།།

སྐྱེ་བ་འདི་དང་ཚེ་རབས་ཀུན་ཏུ་གཙུག་གི་ནོར་བུ་ཁྱེད་ཉིད་ལགས།།

བྱམས་པའི་ཐུཊ་ཀྱི་བརྩེ་བས་བསྐྱངས་པ་རིན་ཆེན་རྒྱུ་ཡིས་གཞལ་ནུས་མིན།།

ལེཊ་བཤད་ཆོས་ཀྱིས་གྲུ་ཆེར་བསྙིལ་བ་ཕུན་ཚོགས་གང་གིས་ལོན་པ་མིན།།

འདི་ཕྱི་བདེ་བའི་ལམ་སྟོན་གནངས་བ་སྲིད་གསུམ་ནོར་གྱིས་འགུཊ་པ་མིན།།

གཞལ་མཐའ་བྲལ་བ་ཁྱེད་ཀྱི་བཀའ་དྲིན་སྐྱེ་བ་འདི་ཀུན་བརྗེད་མེད་ཡིན།།

སྐྱིད་སྡུག་ཚོར་བ་སྣ་དགུ་བྱུང་ཡང་དད་པའི་རྟེན་མཆོག་ཁྱེད་ཉིད་དེ།།

མཐོ་དམན་གནས་རིས་གང་དུ་འགྲིམ་ཡང་རེ་ལྟོས་བཅོལ་ས་ཁྱེད་གཅིག་པུ།།

ལེཊ་ཉེས་ལམ་ཁ་ཇི་ལྟར་རྒྱུད་ཀྱང་གདུང་དབྱངས་འབོད་ས་ཁྱེད་ཁོ་ན།།

རིཊ་ཀྱི་བདག་པོ་ཁྱེད་ལས་མེད་དོ་རྟག་ཏུ་ཐུགས་རྗེས་སྐྱོངས་མཛོད་ཅིག །

རིན་ཆེན་གྲགས་ཀྱིས།

དྲན་བདེན་གྱི་རང་མདངས།

ཚ་བ་འབྲོག་སྲས།

དྲན་བདེན་གྱི་རང་མདངས།

ཚ་བ་འབྲོག་སྲས།

མི་གཤིས་གསེར་གྱི་རི་མོའི་རང་ཚུགས་བརྟན།།

ཕྱི་ནང་དབེན་པའི་ཞི་བའི་རང་གཟུགས་མངའ།།

ང་ཁྱོད་རྩོད་པའི་འདུ་ལོང་བཙན་ས་ནས།།

གནམ་བརྟན་དགེ་སློང་ཞིག་གི་རྣམ་ཐར་གསལ།།

ཁྱོད་ཞལ་མཇལ་བའི་དུས་ཚོད་སྐད་ཅིག་ཙམ།།

དེ་ཡང་གནས་བབ་མི་བདེའི་འཁོར་ཡུག་ཞིག།

འོན་ཏང་ཁྲིམས་འཆང་དགེ་སློང་ངང་ཚུལ་ལ།།

བར་སྐབས་དེ་ནས་སྨོན་པ་ཤོར་མྱངས་ཡོད།།

དེང་འདིར་སྙིགས་མ་ལྔ་ཡི་དུས་སྐབས་ཞེས།།

མགོ་ནག་བོད་ཀྱི་བཤད་ཚུལ་མཐུན་པའི་ཁྲོད།།

སྟོན་པའི་བཀའ་བསྒྲུབ་དང་བླངས་བྱེད་མཁས་པ།།

གང་ཁྱོད་ཆོས་པ་རྣལ་མའི་རྣམ་ཐར་མཚར།།

ཨེ་མ་འདའ་ཁའི་ཞལ་ཆེམས་ཚིག་བཅད་དང་།།

སྦྱར་ནས་ཕྱོགས་དང་ཕྱོགས་སུ་སྤེལ་བའི་འཕྲིན།།

བདག་གི་འདྲེན་བྱེད་ལམ་དུ་རྒྱུ་བའི་སྐབས།།

ཁ་མིན་དོན་གྱིས་དད་འདུན་ཡང་ཡང་ཤོར།།

ཆོས་རིག་ནོར་ལ་ཞེན་ཆགས་བཙན་པའི་དབང་།།

རྣམ་ཤེས་ཆོས་ལྡན་ཞིང་དང་འགྲོག་པར་སྲིད།།

ལས་ཅན་སློབ་མར་ལྷག་བསམ་དཀར་བས་ན།།

སློབ་མའི་བསམ་འདུན་ཇི་བཞིན་འགྲུབ་པར་ངེས།།

ངས་ནི་ཁྱོད་ཉིད་མཇལ་བ་ཙམ་ཞིག་ལས།།

ཆོས་དང་འཇིག་རྟེན་འབྲེལ་བ་མ་བྱུང་ཡང་།།

ཐོས་དང་སྣང་བའི་ལོ་ཟླའི་འགྲོས་གོམ་ལས།།

གང་ཉིད་སྐྱེས་བུ་དམ་པ་ཞིག་ཏུ་མཐོང་།།

མི་ཚེ་ཆོས་རིག་ནོར་གྱི་དབུ་འཕང་ལས།།

ཟད་པའི་མི་ནི་སྤྱིར་ནས་ངོ་མཚར་གནས།།

ཁྱད་པར་སྟོན་པའི་རྗེས་འཇུག་ཡིན་པས་ན།།

བསྟན་དོན་ཚེ་དང་བརྗེས་པར་ཧ་ཅང་ལེགས།།

ཁྱོད་ཉིད་ལྷ་ལམ་ཡངས་པའི་དཀྱིལ་འཁོར་དུ།།

གཤེགས་རྗེས་མི་སྙན་ཚིག་ཚོགས་གཅིག་ཀྱང་མེད།།

འཆི་སར་མི་འཇིགས་སྤོབས་པའི་ཚིག་གི་ཕྲེང་།།

སྤེལ་བར་ངོ་མཚར་འབུམ་གྱིས་སྒྲུན་ནུས་མིན།།

ཅེས་པའང་བཀྲ་ཤིས་རྟགས་བརྒྱད་ཀྱི་ཚིག་བཅད་གྲངས་དང་ལྡན་པ་འདི་ཉིད་དམ་པ་གང་ལ་ཆོས་ཀྱི་འབྲེལ་བ་མ་ཐོབ་ཀྱང་ཁ་མིན་སེམས་ཀྱིས་དད་ཞེན་མངའ་བས་རྗེས་དྲན་དུ་ཕུལ་བ་ཙམ་མོ།།

མ་བཅོས་སེམས་ཀྱི་གདུང་དབྱངས།

ལོ་མ་དམར་པོ།

སྔོན་གྱི་ལས་སྨོན་བཟང་པོའི་རྟེན་འབྲེལ་གྱིས། །

ངེས་དོན་སྟོན་པ་གཅིག་གི་བསྟན་ཞབས་སུ། །

མཚན་ལྡན་བླ་མ་གཅིག་གི་སློབ་བུ་དང་། །

དམ་གཙང་དཀྱིལ་འཁོར་གཅིག་གི་རྡོ་རྗེ་སྤུན། །

ཁྱེད་ཉིད་ཞིང་དུ་གཟིམས་ཞེས་མི་འདོད་གཏམ། །

ཁོ་བོའི་སྒྲ་འཛིན་བུ་གར་ཐོས་པའི་མོད། །

ཡ་ཆུང་སེམས་པ་དམར་པོའི་གཏིང་རིམ་ན། །

བཟོད་མེད་སྐྱོ་བའི་ན་ཟུག་ཅི་ཡང་བྱིན། །

འོན་ཀྱང་དམ་པ་གང་གི་སྐུ་ཚེའི་རིང་། །

རྣམ་དག་ཚུལ་ཁྲིམས་གཙང་མས་རྒྱུད་བསྡམས་ཤིང་།

ཐོས་བསམ་སྒོམ་དང་འཆད་རྩོད་རྩོམ་པ་ཡི། །

མཛད་བཟང་མཐའ་འཁྱོངས་ཚུལ་ལ་ཡིད་རེ་སྨོན། །

མི་འགྱུར་ལྷུན་པོ་ལྟ་བུའི་རང་ཚུགས་དང་། །

མི་དཔོག་རྒྱ་མཚོ་ལྟ་བུའི་ཡངས་པའི་ཐུགས། །

མི་འགག་ཆགས་ཐོགས་བྲལ་བའི་མཁྱེན་རབ་སོགས། །

རེ་རེ་བསམ་ཚེ་གང་ཉིད་རེ་རེ་དྲན། །

མ་འོངས་མངོན་གཟིགས་ལྟ་བུའི་ཆག་འཇོག་དང་། །

དོན་མཐུན་དཔེ་ལ་སྦྱར་བའི་བཀའ་མོལ་དང་། །

ཚིག་ཉུང་གནད་ལ་སྨིན་པའི་ཞལ་ཏ་སོགས། །

ད་ལྟ་ད་དུང་རྣ་བར་ལྷང་ངེར་འཁོར། །

ཁ་ཙམ་མ་ཡིན་དོན་གྱི་མཛད་རྗེས་ཡོད། །

ཕྱི་ཙམ་མ་ཡིན་ནང་གི་ཉམས་ལེན་ལྡན། །

ཕྱོགས་ཙམ་མ་ཡིན་རིག་གཞུང་ཀུན་ལ་མཁས། །

མཁས་གྲུབ་གཉིས་ལྡན་སྐྱེས་བུ་དམ་པ་ལགས། །

ཤཱཀྱའི་དགེ་སྦྱོང་གང་ཉིད་གཤེགས་ཤུལ་དུ། །

གླེགས་བམ་འགའ་དང་ཆོས་གོས་རེ་ཟུང་ཙམ། །

རྣམ་དག་ཆོས་པ་ཞིག་གི་ངང་ཚུལ་འདིས། །

སྒྲུབ་བརྒྱུད་གོང་མའི་རྣམ་ཐར་འཆང་བ་དང་། །

ཀུན་མཁྱེན་བླ་མ་ཡིད་བཞིན་ནོར་བུ་ཡི། །

ཚད་ལྡན་སློབ་བུ་ཞིག་གིས་འདི་ལྟར་ཞེས། །

ཕྱི་རབས་ངེད་ཚོར་གདམས་པའི་དཔེ་སྟོན་དང་། །

གསུབ་མེད་ལོ་རྒྱུས་གསལ་བའི་མེ་ལོང་དངོས། །

སྐྱེ་འཆི་འདུ་འབྲལ་སྒྱུ་མའི་ངང་ཚུལ་ལས། །

མགོན་ཁྱོད་རིང་ནས་གྲོལ་ཡང་རྟག་འཛིན་ཅན། །

མི་རྟག་ཆོས་ལ་བསྐུལ་བའི་རྣམ་ཐར་བསྐྱངས། །

ས་དང་ལམ་ལ་བར་ཆད་མེད་པར་སྨོན། །

མཁན་པོ་ཀརྨ་ལས་སྒྲུབ་མཆོག་གཟུགས་སྐུ་ཞི་བར་གཟིམས་པའི་གཏམ་ཐོས་པའི་མོད་ལ་ལོ་མ་དམར་པོས་སྐྱོ་དུང་དུང་ངང་དུ་མྱུར་སྟབས་སུ་བྲིས་ཏེ་ཕུལ། །

•རྫས།

ཟླ་བ་དཀར་པོ་ནུབ་ཀྱི་རི་ནས་ཡལ།།

སྐར་མའི་མིག་ཆུ་ཁ་བའི་ཟོལ་གྱི་འབབ།།

ཉི་མའི་དཔུང་རོགས་བྲལ་བའི་བར་སྣང་དུ།།

རེ་བའི་ལབ་རྩེ་སྐྱོ་གདུང་སྨུག་པས་བཟུང་།།

ཀྱེ་མ་ཀྱེ་མ་ལས་ཀྱི་གནམ་ངོ་འདིར།།

སེམས་གསོའི་དབུགས་དབྱུང་ཇི་ལྟར་བྱས་ན་དྲག།

ད་ནི་ཕུ་བོས་བསྐྱུར་བའི་བྱིས་པ་བཞིན།།

གོ་ཁའི་ཐལ་རྡུལ་དཀྱིལ་ན་སུ་འགའ་ལུས།།

མཁན་པོ་ཀརྨ་ལས་སྒྲུབ་རྗེས་སུ་དྲན་པའི་ཚིག་མེ་ཏོག་ཕྲེང་བ།

སྐལ་བཟང་དབང་འདུལ།

ཁྱེད་ཀྱི་ཡོན་ཏན་ནི་ཁ་བའི་རྡུལ་བརྩིགས་ཏེ། །

ཡོད་ཚད་བརྗོད་པ་ཡི་ཤེས་ཡོན་མི་མངའ་ཡང་། །

ཁྱེད་ལ་བཅོས་མིན་གྱི་དགའ་དད་ཡོད་པའི་རྐྱེན། །

ཡོན་ཏན་ཆ་ཤས་ཙམ་བརྗོད་ལ་བདག་སེམས་སྤྲོ། །

བརྡ་སྤྲོད་རིག་གཞུང་ཙམ་མི་ཚེ་མ་སྟོང་ཞིང་། །

བསྡུས་རྟགས་ཚིག་འཕྲུལ་འགས་བློ་ཡིད་མ་ཚིམ་པའི། །

མདོ་སྔགས་རྒྱུད་སྡེ་བཅས་ཐོས་བསམ་མཐར་ཕྱིན་པ། །

ངེས་དོན་བཤེས་གཉེན་དེའི་ཤེས་ཡོན་རྗེས་སུ་དྲན། །

ཚད་མ་ཕར་ཕྱིན་དང་དབུ་མ་མཛོད་འདུལ་སོགས། །

གང་ལ་གང་འཚམ་ཞིག་བློ་ངོར་ཤར་ཙམ་གྱིས། །

རིགས་འཕྲུལ་སྐམ་པོ་ཡིས་ཁྲོམ་བསྒྲགས་མ་གནང་པ། །

ངེས་དོན་བཤེས་གཉེན་དེའི་ཉམས་ལེན་རྗེས་སུ་དྲན། །

ཐོབ་ཆེན་དཔོན་པོ་ལ་ངོ་བསྟོད་མ་མཛད་ཅིང་། །

ནུས་མེད་ཉམས་ཆུང་ལ་སྡང་མིག་མ་བགྲད་པའི། །

མཚན་དང་སྙན་གྲགས་འོག་དྲང་བདེན་མ་དོར་བ། །

ངེས་དོན་བཤེས་གཉེན་དེའི་རང་ཚུགས་རྗེས་སུ་དྲན། །

གང་གི་ལྟ་བ་ནི་གངས་རི་དཀར་པོ་སྟེ། །

དྲི་མེད་དྭངས་གཙང་གི་རྫ་ཆུ་བཞུར་བ་ལྟར། །

ལེགས་བཤད་བདུད་རྩིའི་རྒྱུན་སློབ་ལ་བསྟིམས་མཛད་པ། །

ངེས་དོན་བཤེས་གཉེན་དེའི་གདམས་ངག་རྗེས་སུ་དྲན། །

ཤུལ་བཞག་རིན་བྲལ་གྱི་གདམས་ངག་རིན་ཆེན་མཛོད། །

ཤུལ་ལུས་ང་འདྲ་བའི་གདུལ་བྱའི་དཔུང་ཚོགས་སུ། །

རྗེས་ཤུལ་ནུབ་མེད་ཀྱི་རྡོ་རིང་བཙུགས་མཛད་པ། །

ངེས་དོན་བཤེས་གཉེན་དེའི་མཛད་རྗེས་རྗེས་སུ་དྲན། །

ཅེས་རང་ཡུལ་གྱི་མཁན་ཆེན་ཀརྨ་ལས་སྒྲུབ་མཆོག་དགོངས་པ་ཆོས་ཀྱི་དབྱིངས་སུ་ཐིམ་ནས་ལོ་འཁོར་གཉིས་ལོན་པའི་རྗེས་དྲན་དུ་གང་ཉིད་ཀྱི་སློབ་འབངས་སུ་གཏོགས་པ་གུས་སྐལ་བཟང་དབང་འདུས་ནས་བྲིས་པའོ། །

དད་སེམས་ཀྱི་དབྱངས་རྟ་རིང་མོ།

ལེགས་བྲིས།

མ་བཅོས་སེམས་ཀྱི་རང་བཞིན་རྣམ་པ་དག།།

མ་འབད་ཚུལ་ཁྲིམས་གཙང་མའི་ས་གཞི་བརྟན།།

གཡོ་ཡིས་མ་བསླུས་སྐྱོན་གྱིས་མ་གོས་པའི།།

རང་བྱུང་ཡེ་ནས་དག་པའི་གཤིས་འདི་མཛེས།།

མི་གཞི་གསེར་གྱི་རི་བོ་བརྟན་པོ་ཡིན།།

ཚུལ་ཁྲིམས་འོ་མའི་རྒྱ་མཚོ་གཙང་མ་ཡིན།།

ཤེས་རབ་རལ་གྲི་ཅན་གྱི་བྱིན་བརླབས་པའི།།

དྲང་སྲོང་བཙུན་པ་ཁྱེད་ལ་ཕྱག་འཚལ་ལོ།།

ཞེ་ལ་ཐོགས་པའི་དྲོད་ཀྱི་ཐིག་ལེ་ཡིན།།

སྙིང་ལ་ཞུགས་པའི་ལྷ་ཡི་བུ་ཆུང་ཡིན།།

ཡིད་ལ་འབབ་པའི་རྡོ་རྗེ་ཕ་ལམ་ཡིན།།

སེམས་ལ་འཚེར་བའི་སྐར་མ་འོད་ཆེན་ཡིན།།

མ་རང་ཚིག་གིས་སྒྲོ་སྐུར་བྱས་པ་དང་།།

མི་འདོད་ལུས་ཀྱིས་རྣམ་འགྱུར་ངན་པ་སོགས།།

ཅིས་ཀྱང་བཏང་སྙོམས་གནས་སུ་བཞག་མཛད་ནས།།

བཟོད་པའི་ཉམས་ལེན་གནད་ལ་རྟག་ཏུ་བརྩོན།།

ཕྱི་ནང་ལུས་ངག་ཉེས་སྤྱོད་མ་ལུས་ཀུན།།

དྲུང་ནས་འབྱིན་ཏེ་ཞི་དུལ་སྤྱོད་པ་ཡིས།།

ཀུན་གྱི་དང་བ་ངང་གིས་འདྲེན་པ་ཡི།།

བཤེས་གཉེན་ཁྱེད་ནི་འདུལ་བའི་མིག་གཅིག་པུར།།

བཙུན་པའི་ཚུགས་ལ་བཅོས་བཅོས་མི་དགོས་ལུས་ངག་སྤྱོད་པ་ཞི་བ་ཡིན།།

དོན་མེད་མི་ལ་འགྲན་སེམས་མི་དགོས་ཡེ་ནས་འགྲན་པའི་ཟླ་བྲལ་ཡིན།།

གཞན་ཟེར་གཏམ་ལ་གཡམ་རྒྱུག་མི་དགོས་ལེགས་བཤད་གསེར་གྱི་བང་མཛོད་ཡིན།།

ལོ་ཟླའི་མཚམས་ཀྱིས་བསགས་གྲངས་མི་དགོས་ཆོས་པ་རྣལ་མའི་ཉམས་ལེན་ཡོད།།

རྗེས་དྲན་མིག་ཆུའི་བཞུར་སྒྲ།

ལུང་རིགས་ཟླ་བ།

བསླབ་གསུམ་མིག་འབྲས་ཚུལ་བཞིན་བསྲུངས།།

སྡེ་སྣོད་གནད་ལ་ཤིན་ཏུ་མཁས།།

ཐ་མལ་སྣང་ཞེན་རིང་དུ་དོར།

སྤྱོད་པ་གཙང་བའི་བཤེས་གཉེན་དྲན།།

མི་ཚེ་གང་པོ་འདི་ནང་ལ།།

དཀའ་སྡུག་དུ་མའི་འཕྲང་བརྒལ་ནས།།

ཐོས་བསམ་ལས་ལ་དུས་འདའ་བས།།

བདག་ཉིད་སྤྱོད་ཚུལ་བླ་མ་དྲན།

བསླུ་བྲིད་རྫུན་གྱིས་སྤུལ་པ་མིན།།

བསྟན་དང་འགྲོ་བའི་ཁུར་ལྕི་བ།།

ལྷག་བསམ་ཟོལ་མེད་སློབ་འབངས་བསྐྱངས།།

ཀརྨ་མཚན་ཅན་ཡང་ཡང་དྲན།།

མི་གཞི་བཟང་ཞིང་རང་ཚུགས་བརྟན།།

མཐོ་ལ་ཕྲག་དོག་དྲི་མ་ཡལ།།

དམའ་བར་སྙིང་རྗེས་བུ་བཞིན་སྐྱོང་།།

དམན་ས་བཟུང་བའི་དགེ་སྦྱོང་དྲན།།

ཕྱི་ལྟར་ངུར་སྨིག་བརྒྱན་སྤྲས་ཞིང་།།

ནང་ལྟར་བྱང་སེམས་ཐུགས་རྒྱུད་བརླན།།

གསང་བའི་ཉམས་ལེན་གནད་ལ་བཀར།།

ནམ་ཡང་དྲན་ནོ་བླ་མ་མཁྱེན།།

ཐོས་པས་མུན་པ་ཕ་མཐར་བསྐྲད།།

བསམ་པས་ཤེས་བྱ་སྒྲོ་འདོགས་ཆོད།།

སྒོམ་པས་དུག་ལྔའི་རྩ་བ་འཇོམས།།

བཤེས་གཉེན་དམ་པ་སྙིང་ནས་དྲན།།

ཡང་གསང་ཟབ་པའི་སྙིང་པོ་སྟེ།།

འོད་གསལ་ཕྱག་རྒྱ་ཆེན་པའི་དོན།།

འཁྲུལ་མེད་ལུང་རིགས་གཏན་ལ་ཕེབས།།།

གནས་ལུགས་རང་མཇལ་བླ་མ་དྲན།།

བཀའ་བརྒྱུད་འཕྲིན་ལས་བྱེད་པོ་ཁྱེད།

བད྄ེ་ལྡན་དག་པའི་ཞིང་ཁམས་ལ།།

གཤེགས་པ་སྔ་སོང་རིན་པོ་ཆེ།།

ཤུལ་ལུས་དྭ་ཕྲུག་མགོན་མེད་སྐྱོ།།

༢༠༢༢/༡༢/༢༨ཉིན་ལུང་རིགས་ཟླ་བ་ནས་བྲིས་པའོ།།

ཚངས་སྲས་ལྷ་མོའི་སྐྱེམས་ཆང་།

མཁན་པོ་ཀརྨ་ལས་སྒྲུབ་མཆོག་རྗེས་སུ་དྲན་པ།

རེ་བའི་མིག་ཅན།

དཀར་འཇམ་ཤེལ་གྱི་ལྕུག་ཕྲན་ལྡེམ་པའི་རྩེར། །

ཉ་གང་ཟླ་བའི་མེ་ལོང་གཏེགས་འདྲ་བའི། །

འཇོ་སྒེག་ལྷ་ཡི་བུ་མོ་ཡིད་འཕྲོག་མ། །

དེང་འདིར་སྙན་པའི་ངག་ལ་རབ་མདར་སྐྱོན། །

ཤེལ་དཀར་ལྷུན་པོར་མཆར་ཀའི་མཚམས་སྤྲིན་གྱིས། །

འཁྱུད་པར་མི་མཚོན་དམར་སེར་ཆོས་ཀྱི་གོས། །

རྒྱན་དུ་མཛེས་པའི་ཤཱཀྱའི་དགེ་བའི་བཤེས། །

ཡོངས་འཛིན་སྨྲ་བའི་ཉི་མས་བདག་རྒྱུད་སྲོང་། །

སྐྱེ་འགྲོའི་བསོད་ནམས་ནམ་མཁའི་ངོས་ཡངས་པོར། །

རྨད་བྱུང་ཐུགས་བསྐྱེད་སྐྱ་རེངས་ཀྱིས་འདྲེན་པའི། །

དམ་ཆོས་པད་ཚལ་སྐྱོང་བའི་གཉེན་གཅིག་པུར། །

སྐྱབས་གཅིག་སྣང་བྱེད་བདག་པོ་རྗེ་བླ་མ། །

ངམ་གནག་འདོད་ཡོན་སྲོད་ཀྱི་བུ་མོ་ཡིས། །

དབང་དུ་མ་གྱུར་དྲི་མེད་བློ་ཡི་གྲོས། །

གཞན་རྒྱུད་རྨོངས་པའི་མུན་ཚོགས་བཅོམ་མཛད་པའི། །

རྒྱུ་སྐར་རྒྱལ་པོ་ལས་ལྷག་བླ་མ་དྲན། །

དྲི་བྲལ་ཚུལ་ཁྲིམས་ལྗོན་པའི་ཆུ་བར་བརྟན། །

ཐོས་བསམ་སྒོམ་པའི་ཡལ་འདབ་ཀུན་ཏུ་རྒྱས། །

སྙིང་རྗེས་་གྲིབ་བསིལ་སྐྱེས་འགྲོའི་གདུང་བ་བསལ། །

བཤེས་གཉེན་ཡོངས་འདུས་ས་བརྟོལ་སླར་ཡང་དྲན། །

སྒྲུབ་བརྒྱུད་བསྟན་པ་གངས་ཀྱི་རི་བོ་སྤོར། །

བཀའ་ཕྱག་ཉི་ཟླའི་རྣ་ཆ་མཛེས་པ་ཡི། །

ཟབ་ལམ་ཆོས་ཀྱི་མཛོད་ལ་དབང་སྒྱུར་བ། །

མ་ཧཱ་མུན་དྲའི་བརྒྱུད་འཛིན་ཁྱོད་གཅིག་པུ། །

ཐུན་མོང་རིག་པའི་དྲི་ཞིམ་ཕྱོགས་ཀུན་འཐུལ། །

ནང་རིག་བསྟན་བཅོས་དོན་གྱི་མེ་ཏོག་བཞད། །

རྩེ་གཅིག་ཏིང་འཛིང་སྒོམ་པའི་འབྲས་བུ་སྨིན། །

པུཎྜ་རི་ཀ་འདྲ་བའི་བླ་མ་དྲན། །

ཆེན་པོ་གནམ་གྱི་ངོས་སུ་མི་སྙོབ་ལ། །

དམན་པའི་ས་གཞི་ལྗིད་ཀྱི་མི་བརྫི་ཞིང་། །

མཉམ་པར་གནས་ལ་སྤྲེལ་ལད་མི་འཁྲབ་པའི། །

དྲང་འགྲོ་སྒྲོ་ལྡན་འདྲ་བའི་བླ་མ་དྲན། །

མི་གུས་ལྷ་ཆེན་རལ་པ་ལས་བྱུང་བའི། །

བརྩོན་འགྲུས་ཛ་ཧུར་བུ་མོའི་རྒྱུན་བཟང་པོ། །

ཐོས་བསམ་རྒྱ་མཚོའི་གནས་སུ་འཇུག་མཁས་པའི། །

ལྷ་ཆབ་སྔོན་མོ་འདྲ་བའི་བླ་མ་དྲན། །

ཡིན་མིན་གནས་ལུགས་དོན་རྣམ་མ་ནོར་ཞིང་། །

དཔྱད་གསུམ་ཚད་མའི་འཕྲུལ་ཐབས་ལ་བརྟེན་ཏེ། །

ཚུལ་བཞིན་འབྱེད་པའི་རྣམ་སྤྱོད་ཕུལ་བྱུང་བ། །

ཤེས་རབ་སྡོང་བུ་འདྲ་བའི་བླ་མ་དྲན། །

མཛེ༵ས་མ༵ཛེས་ངུར་སྨྲིག་གོས་ཀྱིས་སྐུ་ལུས་མཛེ༵ས། །

སྙ༵ན་སྙ༵ན་ལེགས་བཤད་ཆོས་ཀྱིས་ཞལ་གསུང་སྙ༵ན། །

ཟ༵བ་ཟ༵བ་དེ་ཉིད་རྟོགས་པས་ཐུགས་མཆོག་ཟ༵བ། །

ཡ༵ང་ཡ༵ང་སྐུ་གསུང་ཐུགས་ཀྱི་ཡོན་ཏན་དྲན། །

ལྷ་གཅི༵ག་ཡོངས་འཛིན་བླ་མའི་བྱིན་རླབས་མཐུས། །

རིམ་གཉི༵ས་གདམ་ཟབ་བདུད་རྩིའི་བཅུད་བཟང་པོ། །

མཁྱེན་གསུ༵མ་ཆོས་ཀྱི་ཡོ་གོར་ནས་དྲང་ཏེ། །

སྐུ་བཞི༵་ཆོས་ཀྱི་རྒྱལ་སར་གཤེགས་ཁྱོད་དྲན། །

མཁས་པོ་སྐུ་མྱ་ངན་ལས་འདས་ནས་ལོ་འཁོར་གཉིས་ལོན་པའི་རྗེས་དྲན་དུ་«རེ་བའི་མིག་ཅན»ནས།

རྗེས་དྲན་སེམས་ཀྱི་མཆོད་དབྱངས།

རྐྱང་སད།

སྤྲིན་མེད་ལྷ་ལམ་ཡངས་པའི་མཁའ་དབྱིངས་སུ།།

དམར་སེར་མདངས་ཀྱིས་མཛེས་པ་ངང་པའི་ཁྱུ།།

དལ་བར་བསྐྱོད་པའི་ངང་ཚུལ་རེ་རེ་ཡིས།།

ཤཱཀྱའི་རྗེས་འཇུག་གང་དེ་ཡིད་ལ་འཁོར།།

འཆལ་ཚུལ་དྲི་མའི་སྐྱོན་གྱིས་མ་གོས་ཤིང་།།

བསླབ་པ་གསུམ་གྱི་ཉམས་ལེན་རབ་མཛེས་པའི།།

བཙུན་མཆོག་མ་ལ་ཡ་ཡི་སྡོང་པོ་ལ།།

དྲན་པའི་ཚིག་གི་ཕྲེང་བ་རྟག་ཏུ་འཐོར།།

གཞུང་ལུགས་མེ་ཏོག་བཞད་པའི་སྐྱེད་ཚལ་ན།།

བློ་གསལ་རྐང་དྲུག་འདུས་པའི་སྡེ་ཚོགས་ཀྱིས།།

ཀུན་ཏུ་ཆོས་ཀྱི་དབྱར་རྔ་བསྒྲོགས་པའི་དུས།།

མཁས་མཆོག་ཁྱེད་ཀྱི་རྣམ་ཐར་ཡིད་ལ་དྲན།།

མཁས་དགུའི་ཡོན་ཏན་རྒྱན་པའི་དགེ་སྦྱོང་མཆོག །

ཕྱི་ནང་གསང་བ་གསུམ་གྱི་མཛད་སྤྱོད་ཀུན།།

དྭངས་གཙང་པདྨའི་ལང་ཚོ་ལྟར་མཛེས་པའི།།

གནས་བརྟན་འདུལ་འཛིན་པ་ཁྱེད་ཡིད་ལ་འཁོར།།

མང་ཐོ༷ས་གཞུང་ལུགས་ཀུན་ལ་མཁྱེན་རབ་རྒྱས།།

ལྷག་བས༷མ་བསྟན་པའི་དོན་ལ་གཅིག་ཏུ་དཀར།།

མཐའ་ཐུགས་ལྟ་སྒོ༷མ་གནད་ལ་མངའ་རྙེས་པ།།

རྗེད་མེད་དྲན་པའི་མེ་ཏོག་རྟག་པར་བརྩེགས།།

དཔལ་ལྡན་བླ་མ་དྲན་པའི་གདུང་དབྱངས་སེམས་ཀྱི་མཆོད་པ།

ཀེ་ཤུལ་བ།

འདོད་རྒུའི་ལོངས་སྤྱོད་རྒྱང་དུ་དོར་ཞིང་། །

རྒྱལ་བསྟན་སྙིང་པོ་ལུང་རྟོགས་གཉིས་ལ། །

ཤེས་བརྩོན་ཟུང་གིས་སྐུ་ཚེ་སྐྱེལ་བའི། །

དཔལ་ལྡན་བླ་མ་སྙིང་ནས་དྲན་བྱུང་། །

དམ་པའི་སྐྱེས་མཆོག་དུ་མའི་ཞལ་ནས། །

གདམས་ངག་ཟབ་མོ་མང་དུ་ཞུས་ཀྱང་། །

སྙིང་པོ་དོན་གྱི་རྒྱུད་པའི་ཕ་ཆོས། །

ཚུལ་བཞིན་སྒྲུབ་པའི་བཤེས་གཉེན་དྲན་བྱུང་། །

འདུལ་བའི་གཞུང་གི་གནང་བཀག་ཇི་བཞིན། །

ཚུལ་ཁྲིམས་གཙང་མར་སྤྱན་བཞིན་གཅེས་པའི། །

ངུར་སྨྲིག་གོས་ཀྱིས་ཁ་དོག་འོག་གི །

ཤཱཀྱའི་དགེ་སྦྱོང་ཁྱེད་ཉིད་དྲན་བྱུང་། །

མཐོ་ལ་དཔོན་གྱི་ངོ་སོ་མི་འཛིན། །

དམན་ལ་ཁྱད་གསོད་མཆིལ་ཞགས་མི་འཕེན། །

ཀུན་པོར་འདྲ་མཉམ་འདུ་ཤེས་སྐྱོངས་བའི། །

བདེན་པའི་དཔའ་བོ་ཁྱེད་ཉིད་དྲན་བྱུང་། །

ཡུན་མ་ཐུང་གི་སྐུ་ཚེའི་ནང་དུ། །

སྐྱིད་མ་སྡུག་གི་ཚོར་འདུ་ཀུན་པོ། །

སྙིང་པོ་མ་ལུས་ཉམས་སུ་བླངས་ནས། །

ཞི་བར་གཤེགས་པའི་དམ་པ་དྲན་བྱུང་། །

གོང་མའི་ལམ་བཟང་ཐན་དུ་མ་འཛིན། །

གསར་པའི་ལུགས་སྲོག་ལྟར་མ་གཅེས། །

སྙིགས་དོར་བཅུད་ལེན་སྤང་བླངས་མཁས་པའི། །

སྒལ་ཚིགས་ཅན་གྱི་ཕོ་རྒོད་དྲན་བྱུང་། །

གཞན་གྱི་ཡོད་ཚད་དང་དུ་མ་བླངས། །

རང་གི་ཡོད་ཚད་རྒྱང་དུ་མ་དོར། །

ཕྱི་དང་ནང་གི་དབྱེ་འབྱེད་ཤེས་པའི། །

ཤེས་རབ་ཅན་གྱི་སྐྱེས་བུ་དྲན་བྱུང་། །

ཕྱི་ཚུལ་རིང་ལུགས་གཙོ་བོར་མ་འཛིན། །

ནང་གི་ཉམས་ལེན་དོན་གྱིས་མ་བརླགས། །

འ་རེ་འུ་རེའི་བྱ་བཞག་སྤངས་བའི། །

རང་ཚུགས་ཅན་གྱི་ཁྱེད་ཉིད་དྲན་ནོ། །

ཞེས་མཁན་པོ་ཀརྨ་ལས་གྲུབ་མཆོག་སྐུ་མྱ་ངན་ལས་འདས་ནས་བགྲང་བྱ་གཉིས་འཁོར་བའི་རྗེས་དྲན་དུ་2023.1.1ཉིན་དམ་པ་གང་གི་སློབ་རིགས་སུ་གཏོགས་པ་ཀེ་ཤུལ་བས་ཕུལ།

བླ་མ་དྲན་པའི་རྗེས་དྲན།

བསྟན་པ་ཕྲིན་ལས།

རྨད་བྱུང་ལུང་རིགས་འདབ་ཟུང་ཕྱོགས་བརྒྱར་བསྐྱོད་པའི།།

དམ་ཆོས་སྒྲ་དབྱངས་སྙན་མོ་བརྒྱུད་མར་འཁྲོལ་བའི།།

ཐར་བ་དོན་གཉེར་ཁྲིམས་ལྡན་ངང་པའི་ཚོགས་ལ།།

དམ་ཆོས་བདུད་རྩི་གནང་བའི་བླ་མ་དྲན་སོང།།

འཆད་ན་ལེགས་བཤད་འབུམ་གྱི་ཆོས་ཆར་འཇོ་བ།།

རྩོད་ན་ལུང་དང་རིགས་པའི་ངར་སྐད་ཆེ་བ།།

རྩོམ་ན་སྙན་ཚིག་ཉམས་འགྱུར་རོལ་མོས་མཛེས་པ།།

འཆད་རྩོད་རྩོམ་གྱིས་ཕྱུག་པའི་བླ་མ་དྲན་སོང་།།

ནམ་ཟླ་དགོན་ཁ་སློབས་པའི་འཇིག་རྟེན་ཞིག་དུ།།

ཆུ་འཛིན་ནུ་རིར་བརྒལ་བའི་སློབ་གླིང་ཞིག་ལ།།

སྐར་ཚོགས་ཁྲ་མོ་ཁྱུ་གཅིག་ཤི་མ་གསོན་གྱི། །

མུན་པ་ཡོངས་སུ་སྒྲིབ་པའི་ན་ཟུག་བཟོས་ཐལ།།

སངས་རྒྱས་བསྟན་པ་འཛིན་པའི་ལྗོན་ཤིང་ཆེན་པོ།།

མི་མངོན་ཆོས་ཀྱི་དབྱིངས་དུ་མངོན་པར་བགྲོད་སོང་།།

ཤུལ་དུ་ལུས་པའི་འདབ་ལོ་ཉམས་ཆུང་ནུས་མེད།།

ས་ཆེན་བྱེ་ཐང་ཞིག་ཏུ་མགོན་མེད་ལུས་སོང་།།

ཤེས་རིག་རྣམ་དཔྱོད་ཅན་དང་ལེགས་ཉེས་འབྱེད་པ།།

ཡ་རབས་ཀུན་སྤྱོད་ལྡན་པའི་སེམས་པའི་སྤྱོད་པ།།

གཞན་ཕན་ལྷག་བསམ་ཅན་གྱི་དྲང་སྲོང་ཆེན་པོ།།

ཐར་པའི་ལམ་དུ་གཤེགས་པའི་མྱ་ངན་ཞུ་འོ།།

མདོ་སྔགས་རིགས་གསུམ་གྱིས་བསྡུས་པའི་གཞུང་བརྒྱ་སྨྲ་བའི་དགེ་བའི་བཤེས་གཉེན་ཆེན་པོ་ཀརྨ་ལེགས་གྲུབ་མཆོག་སྐུ་མྱ་ངན་ལས་འདས་ནས་ལོ་འཁོར་གཉིས་ལོན་པའི་རྗེས་དྲན་གྱི་ཚུལ་དུ་དམ་པ་ཁོང་གི་སློབ་རིགས་སུ་གཏོགས་པའི་བསྟན་པ་ཕྲིན་ལས་ཀྱིས་བྲིས་སོ།།

དབྱངས་ཅན་ཟླ་མཛེས།

བསྟོད་བཀུར་མིང་གྲགས་ཐོབ་དང་གོ་ས་ལ།།

རེ་བའི་འདུན་པ་མིང་ཙམ་མ་གོས་ཤིང་།།

བསྟན་དང་འགྲོ་ལ་ལྷག་བསམ་རབ་དཀར་བའི།།

ཞི་བའི་དགེ་སྦྱོང་ཁྱེད་ཉིད་སླར་ཡང་དྲན།།

ཐོས་བརྩོན་ཤེས་རབ་གཟི་དྭངས་མ་ཉམས་ཤིང་།།

བསླབ་གསུམ་ཁྲིམས་ཀྱི་རང་རྒྱུད་རབ་རྒྱན་པའི།།

དམ་པ་གང་ཉིད་ཞི་བར་གཤེགས་པའི་ཉིན།།

རྗེས་དྲན་ཚབ་མཚོན་ཙམ་ཞིག་ཕུལ་བ་ལགས།།

གདུང་འབོད་སྙིང་གི་མཆི་མ།

དོན་བརྒྱུད་བཀྲ་ཤིས།

ཐུགས་རྗེ་ཆུ་འཛིན་འཁྲིགས་པའི་གུར་ཁང་ནས།།

དམ་ཆོས་སྦྲང་ཆར་རྟག་ཏུ་འཇོ་མཛད་པ།།

མཚུངས་མེད་དྲིན་ཅན་བླ་མ་ཞི་དབྱངས་སུ།།

གཤེགས་པའི་སྣང་ཚུལ་འདི་ཀོ་བདེན་ནམ་ཅི།།

ཉིད་ཀྱི་མཛད་འཕྲིན་སྣང་བ་དཀར་པོ་ཡིས།།

ཕྱོགས་དུས་ཀུན་ཏུ་ཁྱབ་པའི་སྐལ་བཟང་གིས།།

ཐམས་ཅད་རབ་ཏུ་དགེ་བའི་དུས་ཀྱི་ཚེ།།

ཀྱེ་མ་སྙིང་གི་ཉི་མ་གློ་བུར་ནུབ།།

ལུགས་གཉིས་ལམ་བཟང་སྟོན་པའི་སློབ་དཔོན་མཆོག།

མ་རིག་མུན་པ་སེལ་བའི་འོད་སྟོང་ལྡན།།

གང་བསམ་འདོད་རྒུ་སྩོལ་བའི་དཔག་བསམ་ཤིང་།།

སྐྱབས་གཅིག་དྲིན་ཅན་བླ་མ་སྙིང་ནས་དྲན།།

ངེད་ཅག་ལས་སྨོན་བཟང་པོའི་བདེན་མཐུ་ཡིས།།

ལུང་རྟོགས་ཆོས་ཀྱི་ཞིང་ནས་ལྷན་གཅིག་ཏུ།།

ཟབ་རྒྱའི་ཐེག་དགུའི་ཆོས་ལ་ལོངས་སྤྱོད་ཚེ།།

མི་འདོད་ཡ་ངའི་ཚུལ་འདི་ཀྱེ་མ་ཧུད།།

མི་རེའི་ཁོང་ནས་གཅེས་པའིསྙིང་རེ་བཏོན།།

སྐྱོ་བའི་གདོང་ལས་མཆི་མའི་ཆར་རྒྱུན་རྡོལ།།

གང་དྲན་གཏད་སོ་བྲལ་བའི་མྱ་ངན་ཁྲོད།།

མགོན་བྲལ་མཆེད་གྲོགས་གདུང་བའི་ཆོ་ངེ་བཏོན།།

བླ་དོར་སྟོན་པའི་བཤེས་གཉེན་སུ་ལ་བྱེད།།

དྲི་མེད་ལྷ་དར་་དཀར་པོ་སུ་ལ་འབུལ།།

ངེད་ཅག་དྭ་ཕྲུག་བློ་རྟེན་སུ་ལ་བྱེད།།

བསམ་ཞིང་བསམ་ན་སེམས་པ་ལྷག་པ་སྐྱོ།།

ཤར་རི་འཇའ་སྤྲིན་འཁྱིལ་བའི་དབེན་ཁྲོད་ནས།།

ཡང་གསང་སྙིང་གི་མན་ངག་དྲི་མེད་པ།།

བརྩེ་བས་སྐལ་ལྡན་བུ་ལ་ལེགས་བསྩལ་བའི།།

བཀའ་དྲིན་དྲན་པས་སྙིང་ཡང་འགས་ལ་ཕྱོགས།།

མཚུངས་མེད་ཕ་གཅིག་བླ་མ་ཞི་དབྱིངས་སུ།།

གློ་བུར་གཤེགས་པའི་སྡུག་ཡུས་མ་གཟོད་པ།།

སྐྱོ་གདུང་མུན་པ་འཁྲིགས་པའི་མཚན་ལྗོངས་སུ།།

གདུང་འབོད་སྙིང་གི་མཆི་མ་དབང་མེད་འཐོར།།

སློབ་བུ་བ་དོན་བརྒྱུད་བཀྲ་ཤིས་ནས་མཚན་ཐུན་གཅིག་ལ་བྲིས་སོ།།

རྗེས་དྲན་དད་པའི་སྨྱུག་གླིང་།

འབྲོག་ཕྲུག །

ཐོས༵་པའི་རྡུལ་མང་དལ་གྱིས་བརྩེགས་པ་ལས། །

དཀའ་གནད་ཤེས་བྱའི་མཛེས་སྡུག་མ་ལུས་མཇལ། །

མཚུངས་མེད་བློ་གྲོས་ཟླ་གཞོན་་རབ་རྒྱས་པ། །