རྩེད་མཚར་གྱི་འཕྲིན་པ།
རེ་བའི་མིག་ཅན།
ད་ནི་སྲིད་པའི་གཏམ་རྒྱུད་རིང་མོ་ཞིག །
མ་བཅོས་ཚིག་གི་ལམ་ནས་ཐལ་འདོད་པས། །
སྡེབ་སྦྱོར་མཁས་པའི་གཞུང་བཟང་མི་ཤེས་ཤིང་། །
སྙན་སྙན་དྲི་ཟའི་རྒྱུད་མངས་མི་ལྡན་མོད། །
སྐྱེ་་ཤི་འཕོ་འགྱུར་མང་དུ་མ་བྱུང་ཡང་། །
ལོ་དང་ཟླ་བ་བརྩེགས་པའི་དུས་ཚོད་ནང་། །
མཐུན་ནས་འཁོན་ཞིང་འཁོན་ནས་མཐུན་པ་སོགས། །
དགའ་སྡུག་འགྱུར་བའི་རི་མོ་ཅི་ཡང་བྲིས། །
ང་ཁྱོད་སྒྱུ་མའི་ཐག་གུས་བཅིངས་པ་ཡི། །
མི་ཚེ་འཇའ་ཡི་མེ་ཏོག་བཏུ་འདོད་ཀྱང་། །
རྐང་ཆུང་རྡོ་ལ་བཞག་པ་འདི་ཡིས་ནི། །
རྡོ་ལ་མེ་ཏོག་བཞད་པའི་དོན་མ་མཆིས། །
སྐྱེས་ནས་འཆི་ཞིང་ཤི་ནས་སྐྱེ་བ་ཡི། །
མགོ་ནག་གནམ་གྱི་སྡུག་འདིར་བཟོད་ཐུབ་ཀྱང་། །
འཕྲད་ནས་བྲལ་ཞིང་བྲལ་བའི་བར་ཐག་འདི། །
བསམ་ན་མིག་ཆུའི་རླབས་ཕྲེང་འགོག་མ་ནུས། །
བདག་ནི་ཕ་ཡུལ་བྲལ་ཏེ་ས་ཡི་མཐར། །
དཔེ་མང་ནང་ནས་་མི་ཚེ་རོལ་སྟངས་འཚོལ། །
འཚོ་བའི་ཁ་ཕྱོགས་ཙམ་ལས་འཚོ་བ་དངོས། །
མ་རྙེད་པ་འདི་གནོངས་དང་འགྱོད་ཀྱི་གཞི། །
མཐོ་སྒང་ས་ལའི་སྨན་ལྗོངས་ལྟོ་བ་ན། །
དྲི་མེད་ལྷག་བསམ་འཛུམ་པའི་སྐྱེད་ཚལ་དུ། །
གཞུང་བཟང་ཟླ་བས་གསོས་པའི་སྟོ༵བས་ལྷ་རྒྱ༵ལ། །
རྒྱལ་ཕམ་ཆོས་རའི་ནང་དུ་དཀའ་འམ་ཅི། །
བླ་མའི་བཀའ་གསུང་འདུད་པས་མ་ཆིངས་ཤིང་་། །
ཆོས་ཁྲིམས་གསེར་གྱི་དབྱུག་པས་མ་ཐུལ་བའི། །
མགོ་མེད་འཇུག་མེད་གྲྭ་རྒོད་ཁྱུ་ཡི་ཁྲོད། །
དཔུང་དང་བློས་ཐུབ་རོགས་ཤིག་ཨེ་མཁོ་ཐལ། །
ཐ་སྙད་ཚིག་ལ་མི་ཚེ་སྐྱེལ་བ་་ཡི། །
དགོས་མེད་ཁྱོད་སྒྲ་སྤུངས་པའི་རིགས་འཕྲུལ་དང་། །
ཡིན་ལོག་མིན་ལོག་རྣམ་བཞག་རྩི་བའི་ཚེ། །
མགོ་བོ་རྡོ་ལ་རྡུང་འདོད་ཨེ་སྐྱེས་ཐལ། །
ཐེག་དམན་འཕགས་པའི་ཞུགས་འབྲས་བགྲོད་སྟངས་དང་། །
ཐེག་ཆེན་འཕགས་པའི་སེམས་བསྐྱེད་ཆེ་ཚུལ་སོགས། །
རྩོད་པའི་མཐའ་ལ་ཐུག་དུས་མེད་པ་འདིས། །
མི་ཚེའི་རིན་ཐང་བསམ་ཏེ་ཨེ་སྐྱོ་ཐལ། །
མི་ཡུལ་ས་མཐར་ལྟོ་ཐུན་གཅིག་གི་ཆེད། །
གོམ་གསུམ་སྤོས་ན་རྗེས་དྲུག་དོད་པ་འདིས། །
རང་ཡུལ་ཨ་མ་བགྲེས་མོའི་ལག་པའི་ཟས། །
དྲན་ནས་མི་ཆུ་འགའ་ཡང་ཨེ་ཤོར་ཐལ། །
རང་དགོན་ནང་ནས་བུད་པའི་ཐ་ཤལ་འདིས། །
རང་ཡུལ་རྒྱབ་གཏོད་བྱས་ཚུལ་སྒྲོ་བཏགས་ན། །
གྲོགས་མེད་གཉེན་མེད་གཅིག་པུར་ས་མཐའ་རུ། །
ཡུལ་གྱར་འཚོ་བ་རོལ་འདོད་ཨེ་བྱུང་ཐལ། །
ཕ་དང་མེས་པོརམི་དགའ་སུ་ཞིག་ཡོད། །
ཡུལ་དང་ལྷ་སྐལ་མི་བརྩེ་སུ་ཞིག་ཡོད། །
གངས་བུ་རང་ཉིད་སྒེར་གྱི་མདུན་ལམ་ལ། །
ཁ་སྔ་ལག་མགྱོགས་བྱས་པ་ཨ་རེ་སྐྱོ། །
འོན་ཀྱང་ཡུན་ཐུང་མི་ཚེའི་སྣང་བ་འདི། །
མ་ནུབ་དེ་སྲིད་ང་ཁྱོད་རང་གི་ཆེད། །
ལྕི་མོའི་མགོ་བོ་ཐེག་པའི་རྐང་པ་ཞིག །
ཅིས་ཀྱང་ཡོད་ན་འོས་སོ་སྙིང་གི་སྤུན། །
2023/8/26
དོན་དམ་པའི་སྒེར་འཕྲིན།
1924226187
བརྩམས་ཆོས་བསྐུར་ཡུལ་གྱི་ཡིག་ཟམ། 16222785500.com
རྩོམ་སྒྲིག་འགན་ཁུར་བ། *ཚ་བ་རྫ་ཚབ།
སྤྱིའི་འགན་ལེན་པ། *ཚ་བ་རྫ་ཆབ།
