རྗེ་ཉིད་ཀྱི་སྡོམ་ཚིག །
ཆོས་དང་འཇིག་རྟེན་གང་གི་ངོས་ནས་ཡིན་ན་འང་གཡོ་སྒྱུ་ཟོལ་མེད་ཀྱི་ལྷག་བསམ་དང་།
གཞུང་དྲང་གཞན་ཕན་ལྡན་པའི་མི་ཞིག་བྱེད་དགོས།
མདོར་ན་གཅིག་པུར་བསྡད་ན་དཀོན་མཆོག་གིས་མ་ཁྲེལ་བ་དང་།
མཉམ་པོར་སོང་ན་རོགས་ཀྱིས་མ་ཁྲེལ་བ་ཞིག་བྱེད་རྒྱུ་དེ་གལ་ཆེན་པོ་རེད།
མཛད་པ་པོ། ཀརྨ་པ་ཨོ་རྒྱན་ཕྲིན་ལས་རྡོ་རྗེ།
མགུར་མཁན། ཕྲིན་ལས་དབང་རྒྱལ།
༈མྱུར་བྱོན་གསོལ་འདེབས་བཞུགས་སོ།
དཀོན་མཆོག་རྩ་བ་གསུམ་དང་ཁྱད་པར་དུ།།
དུས་གསུམ་ཀུན་མཁྱེན་དཔལ་ལྡན་ཀརྨ་པའི།།
ཡི་དམ་ཆོས་སྲུང་རྒྱ་མཚོའི་བདེན་མཐུ་ཡིས།།
དེང་འདིར་འདོད་དོན་འགྲུབ་པའི་དགེ་ལེགས་སྩོལ།།
བསླབ་བསུམ་གསེར་གྱི་དྲྭ་བས་གདོང་གཡོགས་ཤིང་།།
དད་གསུམ་མོས་གུས་ཟབ་མོའི་ཡན་ལག་བརྟན།།
བསྟན་འགྲོའི་ཁུར་ཆེན་འདེགས་ལ་མི་ངལ་བའི།།
སྐྱེས་མཆོག་གཉིས་འཐུང་དབང་པོ་མྱུར་བྱོན་གསོལ།།
ཐོས་ན་དད་པའི་སྤུ་ལོང་གཡོ་བྱེད་ཅིང་།།
མཐོང་ན་སྐྱེ་དགུ་དགའ་བའི་མཚན་པའི་ཅན།།
དྲན་ན་ཉོན་མོངས་གདུང་བ་གཞིལ་ནུས་པའི།།
འབྲེལ་ཚད་དོན་ལྡན་བླ་མ་མྱུར་བྱོན་གསོལ།།
ཞེས་ཚ་སྒང་ཡེ་ཆེན་དགོན་གྱི་སེར་སྐྱ་ཡོངས་ཀྱི་ངོ་ཚབ་པ་དཔལ་ལྡན་རྒྱ་མཚོས་ཡེ་ཆེན་སྤྲུལ་སྐུ་ཀརྨ་སྒྲུབ་བརྒྱུད་ཀྱི་མྱུར་བྱོན་གསོལ་འདེབས་ཤིག་དགོས་ཞེས་ཡང་ཡང་བསྐུལ་ངོར། ཀརྨ་པ་ཨོ་རྒྱན་ཕྲིན་ལས་རྡོ་རྗེས། ཕྱི་ལོ་ ༢༠༡༥ ཟླ་ ༡༡ ཚེས་ ༢༤ ལ་ཤར་མར་བྲིས།
1924226187
བརྩམས་ཆོས་བསྐུར་ཡུལ་གྱི་ཡིག་ཟམ། 16222785500.com
སྤྱིའི་འགན་ལེན་པ། *པད་དཀར་བསྟན་འཕེལ།
