【作者简介】 梅晓民，男，1955年生，从事群众文化工作三十年。现为嘉兴市作协会员、民间文艺家协会会员；嘉兴市政协文史特邀员、秀洲区政协文史研究员、秀洲区朱彝尊研究会理事、《王店镇志》主编。已出版地方历史文化专著《王店记忆》《王店再忆》《王店叁忆》以及明清时期王店镇诗词集《梅里诗综》和《梅里词综》。
第一卯拍秋泾桥（洋泾浜嘉兴话）
■梅晓民
吾务小出生勒嘉兴深乡瓦，对嘉兴城里的事体一滴阿勿晓得。
1982格晨光，吾廿七岁，有个知识青年朋友回城哩，伊勒光明街格航运公司里当团委书记。吾兴匆匆地去拜访，还骑勒脚踏车勒光明街附近兜勒一圈，啥修道院、双魁巷、落帆亭、洋关老统统到过，可惜当时格晨光还勾勿起照相机（就是勾得起嘢拍勿来，哈哈）。记得格秋泾桥好象有勒一条叫啥“闸前街”佬相，沿牢格条街路一直往东去，具体位置有点神知巫知记勿清爽哩。
上卯子，阿就是2007年格劳动节，吾吃饱哩呒啥事体做，伊骑勒脚踏车去光明街走走，其它然到过哩，还拍哩好几张照片。就是东升路造好后，老路寻勿着哩，吾沿老洋关佬格塔格一条马路朝东去，路越来越狭窄，后来好象是骑进了一个小区，就是寻勿着秋泾桥，只好回转。
今年劳动节（2013年），吾依去光明街，仍旧寻勿着格断命秋泾桥，气煞。
听吾大佬讲，秋泾桥勒东升路往东第二爿大桥勿到点、北面格一条小路里进去的。格卯子，阿就是2013年格5月25号，吾用哩心，沿佬格条小路一直骑过去，喔，原来一滴啊勿远，一歇歇就到哩。到哩桥边一看，原来好象蛮高蛮大格秋泾桥，哪哈勒象人老哩缩急哩一样，一滴嘢勿象腔哩，同边佬格破房子勒介，破破烂烂，有滴看勿过去。当然佬，桥还是蛮陡格，吾推佬格部脚踏车上桥还是蛮吃力格。就是有滴怕死死，想拍张象样格照片啊拍勿出。呒末办法，只得瞎搭糊涂拍哩几张交交差。
其实秋泾桥是老哩，好象有三百七十几年哩喔，当然勿象腔唠！大家然喊要“保护”，格是要钞票来“保护”格，讲讲蛮简单，国家拿勿出钞票来，奶哈“保护”法？桥海边笃块牌子嘢叫“保护”呀，倷讲对伐？哈哈，勿讲哩，还是来看看吾拍格照片灵清伐？
11.难得看见有只船
写于2013年5月
