![]()
བྲག་གདོང་བཀྲས་གླིང་དབང་རྡོར།
བྲག་གདོང་བཀྲས་གླིང་དབང་རྡོར། 1934ལོར་བོད་ལྗོངས་རྒྱལ་རྩེ་ཁུལ་བྲག་གདོང་བཀྲས་གླིང་ཞེས་པའི་ཁྱིམ་དུ་སྐྱེས། 1940ལོ་ནས་རྒྱལ་རྩེ། ལྷ་ས་བཅས་སུ་བོད་ཀྱི་ལུགས་རྙིང་སློབ་གྲྭར་ཞུགས། 1946ལོ་ནས་རྒྱ་གར་རྡོ་རྗེ་གླིང་སེན་འཇོ་སེབ་ཏུ་གྲགས་པའི་དབྱིན་ཇིའི་སློབ་གྲྭར་སློབ་སྦྱོང་མཛད་ཅིང་། 1953ལོར་ཕྱིར་ཕེབས་ནས་ལྷ་ལྡན་ཟས་ཞིང་སློབ་གྲྭ་དང་རྒྱལ་རྩེ་སློབ་ཆུང་དུ་དགེ་མིང་མཛད། 1958-1976ལོར་རྒྱལ་རྩེ་གཞོན་ནུ་སྡེ་ཚོགས་ལས་དོན་ཨུ་ཡོན་ལྷན་ཁང་དང་གཞིས་རྩེ་ས་གནས་ལས་བྱེད་སློབ་གྲྭ། གཞིས་རྩེ་རྟ་ནག་གློག་ཁང་སོགས་སུ་ཕྱག་ལས་མཛད། 1977-1984ལོར་རང་སྐྱོང་ལྗོངས་སློབ་གསོ་ཐིན་དུ་སློབ་གྲྭ་འབྲིང་ཆུང་གི་སློབ་དེབ་རྩོམ་སྒྱུར་མཛད། 1985-1991ལོར་བོད་རང་སྐྱོང་ལྗོངས་ཡུལ་སྐོར་ཅུས་སུ་ཕྱག་ལས་གནང་མྱོང་།བརྩམས་ཆོས་ལ། རང་རྩོམ་དང་སྒྱུར་རྩོམ་གཉིས་སུ་འདུ། «བཀྲས་ཟུར་ཚང་གི་གསང་བའི་གཏམ་རྒྱུད»ཅེས་སྒྲུང་གཏམ་རིང་གྲས་བོད་ཡིག་དང་དབྱིན་ཡིག་གཉིས་སུ་འབྲི་གནང་མཛད་ལ། «བོད་ཡུལ་དང་བོད་མི»ཞེས་པ་རྒྱ་ཡིག་ནས་དབྱིན་ཡིག་ཏུ་བསྒྱུར།«ཡུལ་སྐོར་སྣེ་ཤན་པའི་ཉིན་དེབ»ཅེས་པ་དབྱིན་ཡིག་གིས་བྲིས་པ་མ་ཟད། «བོད་དབྱིན་རྒྱ་གསུམ་ཤན་སྦྱར་ཚིག་མཛོད»ཅེས་པའི་དེབ་ཆུང་ཞིག་ཀྱང་རྩོམ་སྒྲིག་མཛད། དེ་དག་ལས«བཀྲས་ཟུར་ཚང་གི་གསང་བའི་གཏམ་རྒྱུད»ལ1997ལོར་བོད་ཀྱི་རྩོམ་རིག་སྒྱུ་རྩལ་རྩོམ་སྒྲིག་ཁང་གི་རླུང་རྟ་བུམ་པའི་བྱ་དགའ་དང་། 1999ལོར་སྐབས་གཉིས་པའི་བོད་ལྗོངས་དུས་རབས་གསར་པའི་རྩོམ་རིག་བྱ་དགའ་ཐོབ།![]()
![]()
![]()
![]()
བཀྲས་ཟུར་ཚང་གི་གསང་བའི་གཏམ་རྒྱུད་ཀྱི་ཐ་སྙད་མཆན་འགྲེལ།
འབྲུ་ཚ་རིན་ཆེན་མཁར།
ལེའུ་བཅུ་བ།
བཏང་ཐུང་། ལས་ཀ་ཙག་ཙིག་བཅོལ་བ་ལ་གོའམ་སྙམ།
སྦོ་ཏོར། ཤེལ་དམ་གྱི་མིང་སྟེ། ཨིན་སྐད་དུBottleཞེས་པ་སོར་བཞག་བྱས་འདུག
དར་ཚན། གྲངས་བཅུ་གཉིས་ཀྱི་དོན་སྟེ། ཨིན་སྐད་དུDozenཞེས་པ་སོར་བཞག་བྱས་འདུག
ལམ་པར་ཀྲེནཤྭ་བ་ལམ་པར། སྤྲེའུ་ལན་པར་སོགས་ཀྱི་ལམ་པར་རམ་ལན་པར་ནི་ཚོང་རྟགས་ཀྱི་དོན་སྟེ།ཨིན་སྐད་དུLabelཞེས་པ་སོར་བཞག་བྱས་འདུག
སྦབ་ཆ། དངོས་རྫས་མང་པོ་ཕྱོགས་གཅིག་ཏུ་སྡོམ་པའི་ཆག་པའི་མིང་། ཨམ་སྐད་དུ་བག་ཆ་ཟེར།
དགུ་ཟླ། རྩིས་ཀྱི་སྒྱུར་ཐབས་མན་ངག་ཅིག
ཀློག་ལྟར། ཀློག་དར་ཨེ་ཡིན་ནམ། ཀློག་སློབ་མཁན་ལས་དང་པོ་བར་དམིགས་པའི་དེབ་ཅིག启蒙课本ལྟ་བུ།
བྱང་ཤིང་། སྦྱང་ཤིང་བྲིས་ཡོད་སའང་འདུག འདི་གཙུག་གཡུའི་འགྲེལ་དུ་གསལ།
ཟློས་ཧྲལ། བརྩེགས་འདོགས་ཅན་གྱི་ཡིག་ཆེན་ལ་གོ
ཐུགས་རྗེ་ལེགས་འབུལ། དྲིན་གཟོ་བ།
ཐོན་ཇ། སློབ་མཐར་ཕྱིན་པའི་རྟེན་འབྲེལ་གྱི་ཆོ་ག་ཞིག
ཕྱི་མ། མ་ཡར་ལ་གོ་བ་ཡིན་ནམ་སྙམ།
ལྕགས་ཤད། རྟའི་སྤུ་ཤད་བྱེད་ཅིག
སྦེ་སེ་ཀོབ། གློག་བརྙན་གྱི་དོན་སྟེ། ཨིན་སྐད་དུBioscopeཞེས་པ་སོར་བཞག་བྱས་འདུག
མི་སི་ཀྲར། སྐུ་ཞབས་ཀྱི་དོན་སྟེ། Mrཞེས་པ་སོར་བཞག་བྱས་འདུག
ཆག་ཕད། གཟན་ཆས་བླུག་སྣོད་ལ་གོ ཨམ་སྐད་དུ་ཆས་ཁུག་ཟེར།
ཟུབ་ཤེ། གཙུག་གཡུ་རུ་གསལ།
ཤིང་འཁྲུག འདིར་ཤིང་འབྲུག་ལོའི་དམག་འཁྲུག་ལ་གོ
ཡ་མ་བྱེད། ཁ་མ་སློང་ངམ་ཕོག་ཐུག་མ་བཟོ་ཞེས་པའི་དོན།
སྦ་རྫར་དང་སྦ་རི་སྦ། རྒྱ་གར་སྐད་དེ་ཁྲོམ་སྲང་དང་དུས་ཚོད་བཅུ་གཉིས་ཀྱི་དོན་ནོ།
ཀོར། སྟོད་ལྭའམ་ཐོག་ལྭ་རིང་བོ་སྟེ། ཨིན་སྐད་དུCoatཞེས་པ་སོར་བཞག་བྱས་འདུག
སུ་ཀྲ། ནུབ་ལྭ་སྟེ།ཨིན་སྐད་དུSuitཞེས་པ་གཡར་བར་འདོད།西装ལྟ་བུས་སྒྲ་དང་དོན་གཉིས་ཀ་ཡོང་ཡོད་པ་འདྲ།
ཡ་པ་དང་ཇོ་མོ། འབྲས་ལྗོངས་སྐད་དེ་སྲས་སྐུ་ཞབས་དང་ལྕམ་སྐུ་ཞབས་ཡིན་པར་ངེས།
ཀང་ཁྲ། རྐང་ཕྲ་བྲིས་ཡོད་སའང་ཡོད་དེ། ཟས་ཟ་སྤྱད་ཚེབ་སྟེ། རྒྱ་སྐད་དུ钢叉ཞེས་པ་སོར་བཞག་བྱས་འདུག
གྷི་ལ་སི ། ཤེལ་གྱི་ཆང་ཕོར་སྟེ། ཨིན་སྐད་དུGlassཞེས་པ་སོར་བཞག་བྱས་འདུག
གཟིམ་འཇོ། ཉལ་ཐུལ་ཕྱི་ཤུན་གྱི་ཞེ་ས་སྟེ། རྒྱ་སྐད་དུ被套ཟེར།
རྒྱལ་སྲས་ཟ་འོག་ལ་སྤེལ་བའི་བརྩམས་སྒྲུང་དང་ལྷུག་རྩོམ་གང་ཡིན་ཡང་གུས་པས་རང་གི་དགའ་ཕྱོགས་ལྟར་ཡག་པོར་མཐོང་བ་སྐོར་ཞིག་བདམས་པ་ཡིན་ཞིང་། སྒྲོག་འདོན་དང་འཁྲབ་བཤད་བྱེད་སྐབས་ཨ་མདོའི་འབྲོག་སྐད་ལས་མཚོ་སྔོན་པོའི་ཁ་སྐད་གཙོར་བཟུང་སྟེ་བཏོན་ཡོད་པས་ཁ་སྐད་དང་ཡིག་སྐད་གཉིས་དོ་མི་མཉམ་པ་དང་ཀློག་སྟངས་སོགས་ལ་ཡུལ་སྐད་གཞན་དང་མི་མཐུན་སའང་གང་མང་ཡོད་སྲིད། དེ་མིན་ལྷུག་རྩོམ་རྣམས་ཀློག་པའི་སྐབས་སུ་ཁ་སྐད་རྐྱང་རྐྱང་ངམ་ཚིག་ནག་ལ་ཕབ་དྲགས་ན་རྩོམ་པ་པོ་རྣམས་ཀྱིས་ཚིག་རྩལ་བཏོན་པའི་ཆ་རེ་ཉམས་ཨེ་འགྲོར་དོགས་ནས་ཡིག་སྐད་སོར་བཞག་དང་སྐབས་རེར་ཁ་སྐད་དང་ཡིག་སྐད་མཉམ་བསྲེས་བྱས་ཡོད། གཞན་ཡང་། གུས་པ་སྒྲོག་འདོན་ཞེས་པའི་ལམ་ཁར་ཞུགས་ཙམ་ཡིན་ཞིང་སྒྲོག་འདོན་ཞེས་པའི་ཐ་སྙད་འདིའི་སྦྱོར་སྟངས་སོགས་འགྲིག་མིན་གྱི་ཁ་ཚོན་ཡང་གཅོད་དཀའ་ལ། མང་པོས་ཁྱད་མེད་དུ་སྤྱོད་པའི་ཀློག་འདོན་དང་སྒྲོག་འདོན། སྙན་སྒྲོན། གྱེར་འདོན། ཟུར་བཤད། སེམས་གཏམ། འཁྲབ་བཤད་སོགས་ལའང་ཁྱད་པར་ཅུང་ཙམ་རེ་ཡོད་སྲིད་ནའང་ཁོ་བོས་དེ་དག་རེ་རེའི་མཚན་ཉིད་འདི་ཡིན་དང་ཁྱད་པར་འདི་ལྟར་དབྱེ་དགོས་སོགས་ཀྱི་ཐད་ནས་གང་ཡང་སྨྲ་བར་མི་སྤོབས་སོ།།![]()
![]()
![]()
![]()
![]()
![]()
![]()
![]()
![]()
![]()
![]()
