བྲག་གདོང་བཀྲས་གླིང་དབང་རྡོར།
བཀྲས་ཟུར་ཚང་གི་གསང་བའི་གཏམ་རྒྱུད་ཀྱི་ཐ་སྙད་མཆན་འགྲེལ།
འབྲུ་ཚ་རིན་ཆེན་མཁར།
ལེའུ་ལྔ་བ།
ཀེར། གྱེན་དུ་འགྲེང་བའི་དོན། འདིར་གྱང་ངོར་རྐང་ཐུར་གཅིག་བྲིས་པའི་དོན།
གཟར་བུ། རྒྱུ་ཆ་ཤིང་ལས་བཟོས་ཤིང་ཐུག་པ་བླུགས་བྱེད་ཀྱི་ཤིང་སྐྱོགས་ཀྱི་མིང་།
འཕར་མ། འདིར་ལྷག་མའི་དོན།
རྐྱོང་གདན། བར་ཚངས་སྲ་མོ་ཅན་གྱི་གདན་ལྟེབས་བརྩེགས་བྱེད་ཆོག་པ་ཞིག
འབའ་ཉེས། ཁ་དན་ནམ་ཁྲིམས་དང་འགལ་ན་ཉེས་ཆད་འདི་ཙམ་འབུལ་གྱི་ཡིན་ཞེས་འབའ་བཞག་པའི་གན་རྒྱ་དང་འགལ་བ།
བཅུ་ལྟིར། ཆང་བླུག་སའི་སྣོད་ཁོག་ལྡིར་དངུལ་སྲང་བཅུ་རིན་པ་ཞིག་ལ་ཟེར།
སྐུ་ཚོང་། ཚོང་གི་ཞེ་ས།
གཟིགས། འདིར་ཅ་དངོས་ཉོ་བའི་དོན།
དྲག་པ། མཆོག་གམ་བཟང་བའམ་ལེགས་པའི་དོན།
བྲེས། རྟ་དྲེལ་སོགས་ལ་གཟན་རྩྭ་སྟེར་སའི་ར་བའི་མིང་། རྟ་བྲེས་ཟེར་བ་བཞིན་ནོ།
ཡོག སྐུད་པ་འཁེལ་བའམ་སྒྲིམ་པའི་དོན།
རྐྱན་བུ། ཇ་དང་ཆང་སོགས་བཏུང་བ་འདྲེན་བྱེད་ཀྱི་སྣོད་མཆུ་ཕྲ་ལ་ལྟོ་བ་ལྡིར་བ་ཞིག
མེ་སྙོལ། དོལ་པོའི་སྐད་དེ་མེ་རོ་དང་དོན་གཅིག་ཡིན་ནམ་སྙམ།
ཤ་སློམ། ཁ་ཟས་སོགས་འཇོག་སྣོད་སྨྱུག་མ་དང་ལྕུག་མས་སླས་པ་ཞིག་སྟེ། སློ་མ་དང་གཅིག་ཡིན།
བཤུགས། གྲོགས་པོའམ་བཟང་ས་ནང་ཁུལ་ལ་དངོས་ཟོག་སོགས་ཁེ་བཟང་མི་ལེན་པར་འཚོང་བའི་དོན་ཡིན་མོད། །འདིར་བྱིན་པར་གོའམ་སྙམ།
ཙག་བཤགས། ཤ་ཁོག་སོགས་དཀྱིལ་ནས་བཤགས་པ།
ཐང་རྐྱལ། སྤགས་གཡོ་བྱེད་ཀྱི་པགས་སྣོད་ཅིག་སྟེ། ཐང་ཁུག་དང་དོན་གཅིག
ཏི་ག ཆུང་ངུ་ལ་གོའམ་སྙམ།
ཐོར་རྩྭ། ཐོ་རེངས་ལ་སྟེར་རྒྱུའི་གཟན་རྩྭ་ཡིན་ནམ་སྙམ།
རྫབ་དོང་། སྤྱིར་འདམ་རྫབ་ཀྱི་ས་དོང་ལ་གོ་མོད། འདིར་གཅིན་སྐྱག་གཏོང་སའི་དོང་ཡིན་ནམ་སྙམ།
བཞུ་བཀྱགས། སྒྲོན་མེ་འཇོག་སའི་སྟེགས་བུ་ཡིན་ནམ་སྙམ།
ཤིང་སྒྲོག བེད་མེད་ཀྱི་ཤིང་ཆ་ཙག་ཙིག་ཡིན་ནམ་སྙམ།
སི་ར། ལྕུག་མས་བཏགས་པའི་སླེལ་པོའམ་སྨྱུག་གཤགས་ཀྱིས་བཟོས་པའི་སྣོད།
ཕད་ཁོག ཅ་དངོས་བླུག་སའི་སྣོད་དམ་སྒྱེ་མོ་ཅུང་ཆེ་རིགས། དཔེར་ན། ཕད་གོག་གི་ནང་དུ་འབྲུ་རིགས་བླུག་དགོས་ལྟ་བུ།
ཨ་ཤིང་། ཁང་པ་སོགས་ཀྱི་སྒོ་གནོན་བྱེད་གཏན་ཤིང་ལ་ཟེར།
རྩྭ་རས། རྩྭ་ཡིས་བཟོས་པའི་རས། ཨམ་སྐད་དུ་རྩོ་སྒྱེ་ཟེར།
ཁྱི་འདོགས་སར་པེལ་པེལ། མེ་མདའ་འགེལ་སར་ཨང་གསེས། སྔར་གྱི་དངོས་པོའི་ཚབ་ཏུ་དངོས་པོ་གཞན་ཞིག་བཞག་པ། ཚིག་ངོས་ཀྱི་དོན་ནི་ཁྱི་འདོགས་སར་བེའུ་བཏགས། མེ་མདའ་འགེལ་སར་ལྕགས་ཚེབ་བཀལ་ལྟ་བུ་ཡིན་པ་འདྲ།
ཨ་དྲུང་རྟ་ཤད། ཨ་དྲུང་རྟ་ཞོན་དང་དོན་གཅིག་སྟེ། སྔར་དགའ་ལྡན་ཕོ་བྲང་གཞུང་གི་རྟ་བཞོན་ནས་ཡི་གེ་སྐྱེལ་མཁན་གྱི་བང་ཆེན་གྱི་མིང་། དཔེར་ན། ཨ་དྲུང་རྟ་ཤད་ལམ་ལ་ཆས། ཨ་དྲུང་རྟ་ཤད་ཀྱི་བཀའ་ཡིག་ལྟ་བུ།
ཟླ་ཕྲ་མོ། ཅུང་ཙམ་ཞེས་པའི་དོན།
སྣོད་སྒོག་ཕྲུག སུར་པན་ཆུར་རྡུང་གི་སྣོད། རྒྱ་སྐད་དུ་辣酱盒ཟེར།
རྫོག་རྡོ། དངོས་པོ་སོགས་གཅོག་པ་དང་རྡུང་བྱེད་ཀྱི་རྡོ་ཆེན་པོར་གོའམ་སྙམ།
