བྲག་གདོང་བཀྲས་གླིང་དབང་རྡོར།
བཀྲས་ཟུར་ཚང་གི་གསང་བའི་གཏམ་རྒྱུད་ཀྱི་ཐ་སྙད་མཆན་འགྲེལ།
འབྲུ་ཚ་རིན་ཆེན་མཁར།
གྲིབ་ཁུང་། ཉི་འོད་ཤར་མི་ཐུབ་པའི་ཁང་པ།
ལྕགས་མདོང་། འདིར་ལྕགས་ཀྱི་དུ་ཁུང་ལ་གོའམ་སྙམ།
སྤུས་འབོར། སྤུས་ཀ་དང་གྲངས་ཀའི་བསྡུས་མིང་།
དོས། དགལ་བྱའི་ཁལ་ལམ་ཁུར་བོའི་མིང་སྟེ།བལ་དོས་སྔོན་ལ་བསྐྱལ་ལྟ་བུ།
དཀར་རྟགས། གྲོ་ཕྱེ་མཐེབ་ཆེན་ལ་བྱུགས་ནས་གདུང་མ་དང་རྩིག་ངོས་སུ་བྱུགས་པའི་དབུས་ཀྱི་རྟེན་འབྲེལ་གྱི་མཚོན་རྟགས་ཤིག
བསྐོལ་ལྡན། དགུན་དུས་སུ་བོད་ཆང་ལ་བུ་རམ་དང་སྔོ་ཕྱུར། རྩམ་ཕྱེ་གསུམ་བཏབ་ནས་བསྐོལ་བའི་བཏུང་བྱ་ཞིག དཔེར་ན། དགུན་དུས་གྲངས་ངར་ཆེ་སྐབས་སྐོལ་ལྡན་འཐུང་ལྟ་བུ།
ཐེབས་པད། བྱ་སྒྲོ་སོགས་ལས་བཟོས་པའི་རྐང་རྩེད་རྩེད་ཆས་ཤིག ལག་པ་མི་འཆང་བར་རྐང་པ་དང་མགོ ཕྲག་པ་དང་བྲང་སོགས་ཀྱིས་གཞུས་ནས་ས་ལ་ལྷུང་དུ་མི་འཇུག་པར་ཕན་ཚུན་ལ་འཕེན་རེས་བྱ་རྒྱུ་ཞིག་ཡིན།
ཨབ་ཅུག ར་ལུག་སོགས་ཀྱི་པུས་ཚིགས་རུས་ཆུང་བྱིས་པ་རྣམས་ཀྱིས་རྩེད་སྤྱད་བྱེད་པ་དེ་ལ་ཨ་ཅུག་ཟེར་འདུག་མོད་དེ་ཡིན་ནམ་སྙམ། ཨམ་སྐད་ཐེ་གེ་ཟེར།
དངུལ་སྐྱུར། དངུལ་སྒོར་སར་གཡུགས་ནས་རྩེད་རྒྱུའི་རྩེ་མོ་ཞིག
རྒྱ་ལུ་ཆས། སྔར་བོད་གཞུང་གི་མཛད་སྒོ་གལ་ཆེན་ཁག་གི་སྐབས། དྲུང་འཁོར་ཚོས་གྱོན་རྒྱུའི་ཆས་ཤིག་སྟེ། དེར་རྒྱལ་སྲིད་སྣ་བདུན་ཚང་ལུགས་ནི། གཟན་གྱིས་གླང་ཆེན། ཀོང་རྣས་འཁོར་ལོ། པན་ཏོག་གིས་བཙུན་མོ། སྐེད་གྲིས་དམག་དཔོན། ཁུག་ཁྲ་ཐིག་ཤུབས་ཀྱིས་རྟ་མཆོག ཨར་ཀོང་གིས་བློན་པོ། རིན་ཆེན་སྤྱིས་ནོར་བུ་རིན་པོ་ཆེ་བཅས་མཚོན། འདིའི་སྲོལ་གཏོད་པ་པོ་ནི་དུས་རབས་བཅུ་བཞི་པར་སྣེའུ་གདོང་མི་དབང་གྲགས་པ་རྒྱལ་མཚན་ཡིན།
དབུ་ཞྭ་ཨར་ཀོང་། དཔོན་ཞྭ་དཀར་པོ་ཞིག་ལ་གོ
ལྷམ་འཇའ་ཆེན། གཙུག་གཡུ་རུ་གསལ།
ཚོགས་ཆེན་ཞལ་ངོ་། དགོན་པ་ཁག་གི་གྲྭ་པ་ཚོའི་འདུལ་ཁྲིམས་དང་སྒྲིག་ལམ་ལ་ལྟ་རྟོག་གནང་མཁན་གྱི་ལས་སྣེ་གཙོ་བོ། དཔེར་ན། ཚོགས་ཆེན་ཞལ་ངོའི་ཡན་ལ་མི་མེད། གནས་ཆུང་ཆོས་རྒྱལ་ཡན་ལ་ལྷ་མེད་ཅེས་ཟེར་སྲོལ་ཡོད་པ་ལྟ་བུ།
དགེ་གཡོག། དགེ་བསྐོས་ཀྱི་ཞབས་ཕྱིའམ་ཆབ་རིལ་གྱི་མིང་ལ་ཟེར།
གཏུན་ཁུང་ཆུ་མིག ལྷ་སའི་གཙུག་ལག་ཁང་གི་ཕྱོགས་བཞིར་ཁྲོན་པ་བཞི་ཡོད་ལུགས་བརྗོད་སྲོལ་ཡོད་པའི་ཡ་གྱལ་ཏེ། དེ་ནི་ལྷ་སའི་གཙུག་ལག་ཁང་གི་ཡོན་ཆབ་ལེན་ས་ཡིན་སྟབས། ཤོ་བཤད་ནང་ལའང་གཏུན་ཁུང་ཆུ་མིག་ནས་ཆུ་ཞིག་ལེན། ལྷ་སའི་ཇོ་བོར་ཡོན་ཆབ་ཕུལ་ཞེས་བརྗོད་སྲོལ་ཡོད། དེ་སྔ་ལྷ་སའི་སྨོན་ལམ་ཆེན་མོ་དང་ཚོགས་མཆོད་སྐབས་བཞེས་ཐུག་གི་ཆུ་གཏུན་ཁུང་ཆུ་མིག་ནས་བླངས་ཡོད། དེང་སྐབས་ཁྲོན་པ་དེའི་རྒྱུད་དུ་སྡོད་མཁན་གྱིས་ཁྲོན་པ་དེར་གཙང་སྦྲ་ལེགས་པོ་ཡོང་ཕྱིར་རྫ་གོ་སེར་རྩིའི་རྒྱ་ཕིབས་དབྱིབས་ཀྱི་ཐོག་ལྡན་གྱི་ཀ་ཕིབས་དང་། རྒྱ་རྡོའི་སྒྲོམ་སྐྱོར་སོགས་ཚར་དུ་དངར་བ་བཟོས་འདུག དེ་བཞིན་གཙུག་ལག་ཁང་གི་ནུབ་ཏུ་ཡོད་པའི་རྡོ་སྒོར་གྱི་ཁྲོན་པའི་ཤུལ་དུའང་རྡོ་སྐྱོར་བསྐོང་ནས་བདག་གཅེས་གང་ལེགས་བྱས་ཏེ་ད་ལྟ་མཐོང་རྒྱུ་ཡོད།
ཞལ་ངོ་སྒང་། སྐབས་དེའི་་སྒྲིག་ལམ་ལྟ་རྟོག་བྱེད་མཁན་གྱི་ལས་ཁུངས་ལ་གོ།
སྦང་འཛིན། རྟ་སྦང་བཏང་ཆོག་པའི་ཆོག་མཆན་ཡི་གེ་ཞིག་ལ་གོ
ཐོག་བཤུས་ཟིན་ཏེ། ཁང་ཀླད་བཀོག་ཟིན་པ་ཡིན་ནམ་སྙམ།
ཅི་ནི། ཀ་ར་བྱེ་མ་ལ་གོའམ་སྙམ།
ཡི་ཙེ། འདག་ཆལ་ལ་གོ རྒྱ་སྐད胰子ཟེར།
མུ་ཟི། འདིར་འབར་ཞུན་ལ་གོའམ་སྙམ།
བྱིང་ནག་པོ། གཙུག་གཡུ་རུ་བྱིང་དཀར་པོ་ལ་འགྲེལ་བ་རྒྱབ་པ་ནང་བཞིན་ནོ།
ཨུ་མུ་སུ། སོག་སྐད་ཡིན་པ་འདྲ་སྟེ། རྐང་ཤུབས་ལ་གོ་མོད། འདིར་སྐུད་པའི་སླེས་པའི་ཞྭ་མོ་ལ་གོ
གོས་ཀྱིས་མི་བཟོ་བ་ཐག་ཆོད་རེད། གོས་ཀྱིས་མི་བརྒྱན་ཡོང་བ་ཐག་ཆོད་རེད་ཟེར་བ་ལྟ་བུ།
