قار شاڭعى اۋەسكەرلەرىنە قولايلىلىق جاراتتى

جۋىقتا شىنجىننان كەلگەن قار شاڭعى اۋەسكەرى لي جياجيا گەنەرال تاۋى حالىقارالىق قار شاڭعى دەمالىس رايونىنداعى شۇنفىڭ IP تاقىرىپتىق دۇكەنىندە قار شاڭعى تاقتايشاسىن جەتكىزۋ قىزمەت وتەۋىن بىتىرگەننەن كەيىن مۇنداعىلاردىڭ ىقىلاستى قىزمەت وتەۋىن اۋىز جاپپاي القاپ: قار شاڭعى الاڭىنداعى شۇنفىڭ IP تاقىرىپتىق دۇكەنىنىڭ قىزمەت وتەۋى كەمەلدى ەكەن. مۇندا، ءتۇرلى مادەنيەت جاسامپازدىعى ءونىمىن تاماشالاپ، جەرگىلىكتى ەرەكشە تاعامنان تەگىن اۋىز تيۋگە بولادى، كاسىپتىك قار شاڭعى تاقتايشاسىن جولداۋ قىزمەتىن وتەيدى، بۇل ساپارىمىزعا اسا قولايلى بولدى،- دەدى.

مەملەكەتتىك 5S دارەجەلى قار شاڭعى الاڭى رەتىندە گەنەرال تاۋى حالىقارالىق قار شاڭعى دەمالىس رايونى ساپالى قار بايلىعى مەن كەمەلدى قۇرىلعىلارى ارقىلى شينجياڭنىڭ ءىشى-سىرتىنداعى قار شاڭعى اۋەسكەرلەرىنىڭ قار شاڭعى تەبەتىن كوزەۋلى جەرىنە اينالدى. الايدا، قار شاڭعى اۋەسكەرلەرىنە قار شاڭعى جابدىعىن قار شاڭعى الاڭىنا حاۋىپسىز، جىلدام جەتكىزۋ قيىن ماسەلە بولىپ كەلگەن ەدى. شينجياڭ شۇنفىڭ جەدەل جەتكىزۋ شەكتى سەرىكتەستىگىنىڭ التاي ايماقتىق بولىمشە سەرىكتەستىگى بىلتىردان باستاپ قار شاڭعى جابدىعىن جەتكىزۋ قىزمەت وتەۋىن جولعا قويىپ، قار شاڭعى اۋەسكەرلەرىنىڭ قيىنشىلىعىن شەشتى.

ۇعىسۋعا قاراعاندا، 2023-جىلى شينجياڭ شۇنفىڭ جەدەل جەتكىزۋ شەكتى سەرىكتەستىگىنىڭ التاي ايماقتىق بولىمشە سەرىكتەستىگى گەنەرال تاۋى حالىقارالىق قار شاڭعى دەمالىس رايونىندا IP تاقىرىپتىق دۇكەنىن قۇرعان. دۇكەندە شينجياڭ ەرەكشەلىگىندەگى ساياحات ورنى، شينجياڭ تانىمال زاتتار كورمە ورنى، حالىققا قولايلى قىزمەت وتەۋ ورنى، ونىمدەر ورنى جانە شۇنفىڭ مادەنيەت جاسامپازدىعى كورمە ورنى ورنالاستىرىلىپ، كوپتەگەن قار شاڭعى اۋەسكەرىن باۋرادى.

IP تاقىرىپتىق دۇكەنىنىڭ جاۋاپتىسى جياڭ شيانفي تىلشىگە: شۇنفىڭ قار شاڭعى ”شۋەجۇيجي“ قىزمەت وتەۋى قار شاڭعى اۋەسكەرلەرىنە قاراتىلعان جوعارى ساپالى قىزمەت وتەۋ. قار شاڭعى اۋەسكەرلەرى شۇنفىڭ ۇكىمەت توراپ بەكەتى نەمەسە قول تەلەفون APP ىندا ”شۋەجۇيجي“ ايدارىنا كىرىپ قاتىستى ينفورماتسيا مەن قار شاڭعى تاقتايشاسىنىڭ سالماعى، ولشەمى قاتارلى مازمۇندى تولتىرسا بولعانى تاپسىرىستى وپ-وڭاي بىتىرۋگە بولادى. بۇدان سىرت، سەرىكتەستىك قار شاڭعى جابدىعىن كاسىپتىك قوراپتاۋ، اقىسىز الىپ كەتۋ، دۇكەندە اقىسىز ساقتاۋ، قار شاڭعى الاڭدارى اراسىندا ءوزارا جەتكىزۋ قاتارلى ىقىلاستى قىزمەت وتەۋمەن قامداپ، قار شاڭعى اۋەسكەرلەرىنىڭ ءجۇرىس- تۇرىسىنا قولايلىلىق جاراتادى،-دەدى.

ايتا كەتۋگە تاتيتىنى، شينجياڭ شۇنفىڭ جەدەل جەتكىزۋ شەكتى سەرىكتەستىگىنىڭ التاي ايماقتىق بولىمشە سەرىكتەستىگى گەنەرال تاۋى حالىقارالىق قار شاڭعى دەمالىس رايونىندا IP نەگىزگى تاقىرىپتىق دۇكەن قۇرۋمەن بىرگە، كوكتوعاي حالىقارالىق قار شاڭعى دەمالىس رايونىندا، جىكبەلەڭ حالىقارالىق قار شاڭعى دەمالىس رايونىندا ارناۋلى تيجارات دۇكەنىن قۇرىپ، قىزمەت وتەۋ كولەمىن ونان ارى كەڭەيتتى. بۇل سەرىكتەستىك تاسىمال جولىن ۇيلەسىمدى جوبالاپ، قار شاڭعى تاقتايشاسىن جەتكىزۋ تاپسىرىسىن الدىمەن ءبىرجاقتى ەتتى ءارى دەركەزىندە زات اينالىمىنىڭ ىزىنە ءتۇسۋ يقۋاتىن ازىرلەپ، ”قار شاڭعى جابدىعىن الىپ ءجۇرۋ قيىن بولۋ، تاسۋعا كۇش جۇمساۋ، اۋەجايدان اكەلۋگە ۋاقىت سارىپ بولۋ“ قاتارلى ماسەلەنى ءونىمدى شەشىپ، قار شاڭعى اۋەسكەرلەرىن اناعۇرلىم قولايلى، جوعارى ءونىمدى قىزمەت وتەۋمەن قامدادى.