كاسىپ سالاسىنىڭ جوعارى ساپالى دامۋىن جەبەدى

11-ايدىڭ 27-كۇنى كوكتوعاي اۋدانى موڭكەم تەمىر كەنى شەكتى جاۋاپكەرشىلىك سەرىكتەستىگىندە ماشينالار گۇرىلدەپ، دۋماندى ءوندىرىس جاعدايى ءجۇز بەردى. باۋ-ۋ توبى قاراستىلىعىنداعى باگاڭ كەن ىستەرى سەرىكتەستىگىنىڭ بولىمشە سەرىكتەستىگى بولعان —موڭكەم تەمىر كەنى زەردەلى جاساۋدى قوزعاۋشى كۇش ەتىپ، تەمىر رۋداسىن جىنتىكتەي مانەرلەۋ كاسىبىنىڭ اناعۇرلىم جوعارى دەڭگەيگە كوتەرىلۋىن ىلگەرىلەتتى.

موڭكەم تەمىر كەنىنىڭ شارشا تەمىر ءوندىرۋ زاۆودىنا كىرسەڭىز، وسىزاماندانعان ءوندىرىس جابدىقتارىن كورەسىز. كەڭ دە جارىق الىس ارالىقتى مەڭگەرۋ بولمەسىندە شارشا تەمىر ءوندىرىس لەنياسىنداعى ءتۇرلى ماشينا جابدىقتارى جوعارى ونىمدىلىكپەن جۇمىس جۇرگىزۋدە. شيكىزاتتى ۇنتاقتاۋدان، سەزگىلەۋدەن، ارالاستىرۋدان شارشا تەمىر جاساۋعا، ورتەۋگە، سۋىتۋعا دەيىن ءارقايسى بۋىندار عىلىم-تەحنيكالىق كۇشكە سۇيەندى. جۇمىسشىلار وزىق مەڭگەرۋ جۇيەسى ارقىلى ءوندىرىس ساندى مالىمەتتەرىن دەركەزىندە باقىلاپ، ءوندىرىس پارامەترىن رەتتەپ، ءونىم ساپاسى مەن ءوندىرىس ونىمدىلىگىنە كەپىلدىك ەتتى.

جۋىق جىلداردان بەرى، موڭكەم تەمىر كەنى مەملەكەتتىڭ كەن كاسىبىنىڭ تيپىن وزگەرتىپ دارەجەسىن جوعارىلاتۋدى ىلگەرىلەتۋ، زەردەلى كەن قۇرىلىسىن جەدەلدەتۋ جونىندەگى ۇندەۋىنە بەلسەنە ءۇن قوسىپ، عىلىم-تەحنيكادا جاڭالىق اشۋدى قوزعاۋشى كۇش، جاسىل دامۋدى نىسانا ەتىپ، زەردەلى كەن قۇرىلىسىن بارىنشا ىلگەرىلەتتى. زاتتار ينتەرنەتى، ءىرى ساندى مالىمەت، بۇلتتىق ەسەپتەۋ، جاساندى زەردە قاتارلى الدىڭعى لەكتىك تەحنيكالاردى ەنگىزۋ ارقىلى موڭكەم تەمىر كەنى جوعارى ءونىمدى، حاۋىپسىز، جاسىل ءبىرتۇلعالانعان زەردەلى كەن ۇلگىسىن ءساتتى قالىپتاستىرىپ، كەن كاسىپورىندارىنىڭ ساپالىق حاۋىپسىزدىگىنە سارقىلماس قوزعاۋشى كۇش قوستى.

موڭكەم تەمىر كەنى زەردەلى كەن قۇرىلىسىندا ءوندىرىس حاۋىپسىزدىگىن باستان-اياق ماڭداي الدى ورىنعا قويدى. بۇل سەرىكتەستىك قازۋ-تاسۋ جابدىقتارىن ماشينالاندىرۋدى، زەردەلىلەندىرۋدى، جاڭالاۋدى، دارەجەسىن جوعارىلاتۋدى ىلگەرىلەتىپ، قۇدىق ىشىندە قازۋ، ۇڭگۋ، تاسۋ جانە كەن سۇرىپتاۋ قاتارلى بۋىنداردا زەردەلىلەنگەن جۇمىس جۇرگىزۋدى جۇزەگە اسىردى. سونىمەن بىرگە، تۇراقتى جابدىق قۇرىلعىلارىن اۆتوماتتاندىرىپ مەڭگەرۋ جۇيەسىن وزگەرتۋدىڭ ورىندالۋىن، قۇدىق ىشىندەگى تۇراقتى جابدىقتى، قۇرىلعى ورىندى كۇزەتسىز، جەر بەتىندە الىس ارالىقتان شوعىرلى مەڭگەرۋدى جۇزەگە اسىرىپ، حاۋىپسىزدىكتى بارىنشا كۇشەيتتى. بۇدان سىرت، موڭكەم تەمىر كەنى قۇدىققا كىرۋشىلەردىڭ سالاۋاتىن دالەلدەۋ، قۇدىق استىنداعى ادام مەن ماشينانىڭ ورنىن تۇراقتاندىرۋ قاتارلى ينفورماتسيالاندىرۋ قۇرىلىسىن ىلگەرىلەتىپ، قۇدىق استىنداعى جىلجىمالى جۇمىس جۇرگىزۋشىلەر مەن جابدىقتاردى دەركەزىندە مەڭگەرىپ، كەن حاۋىپسىزدىگىن باسقارۋ دەڭگەيىن ونان ارى جوعارىلاتتى.

زەردەلى جاساۋ مەن حاۋىپسىز ءوندىرىستىڭ ىشكەرىلەي توعىسۋى موڭكەم تەمىر كەنىن سەنىمدى تەحنيكالىق كەپىلمەن قامدادى. بۇل سەرىكتەستىك ىلگەرىندى-كەيىندى 238 ميلليون يۋان قارجى قوسىپ، ءتۇيىندى باقىلاپ-باسقارىلاتىن 19 ءتۇرلى تەحنولوگيانى اۆتوماتتاندىرىپ وزگەرتىپ، 16 جۇمىس ءتۇرىن ماشينالاندىرىپ، ادامسىز زەردەلىلەندىرۋدى جولعا قويدى. بۇل شارا قۇدىق استىندا جۇمىس ىستەيتىن قىزمەتكەرلەردى ازايتىپ، ناق مايداندا ادام بولماۋدى جۇزەگە اسىرۋمەن بىرگە، ءوندىرىس ونىمدىلىگى مەن تيىمدىلىگىن جوعارىلاتتى، سوندا-اق اۋىر حاۋىپ-قاتەر قاينارىن الىس ارالىقتى زەردەلى باقىلاپ- مەڭگەرۋدى جولعا قويىپ، ماڭىزدى جابدىق-قۇرىلعىلاردى ماشينالاندىرىپ، شارلاۋ-تەكسەرۋ مولشەرىن %90 كە جەتكىزىپ، كەن جۇمىسشىلارىن جىلىنا %8 ازايتۋ نىساناسىن جۇزەگە اسىردى.

موڭكەم تەمىر كەنى جاسىل ورتانى قورعاۋ ۇستانىمىن امالياتتا ايگىلەدى. بۇل سەرىكتەستىك ”اق جەر بولسا اعاش ەگۋ“ پرينسيبى بويىنشا قىرۋار قارجى قوسىپ، كەن رايونىن جاسىلداندىردى. كەن رايونىنداعى ورماننىڭ، گۇل-ءشوپتىڭ ءوسۋى ويداعىداي بولىپ، قاتارعا قوسىلۋ مولشەرى %95 تەن استى. سونىمەن بىرگە، كەن ءوندىرىسىنىڭ تەحنولوگيالىق بارىسىن ساپالىلاندىرۋدى ۇزدىكسىز ىلگەرىلەتىپ، شارشا تەمىر جاساۋ تەحنولوگيالىق بارىسىن باسقارۋ-مەڭگەرۋدى جانە كومىر جاعۋ ونىمدىلىگىن ارتتىرىپ، شىنجىرلى سۇزگىش ماشيناسى، اينالمالى قۇمداننىڭ جىلۋ ەنەرگياسىن جيناپ الىپ پايدالانۋ قاتارلى ەنەرگيانى ۇنەمدەپ، ىس-تۇتەك ازايتۋ شارالارىنىڭ اتقارىلۋىن، كومىر قىشقىل گازىنىڭ شىعارىلۋىنىڭ جالپى مولشەرىن ءونىمدى تومەندەتتى. زەردەلى جاساۋ، مەشەۋ ماشينا ەلەكتر جابدىقتارىن بىرتىندەپ قاتاردان قالدىرۋ، جوعارى ءونىمدى ماشينا ەلەكتر جابدىقتارىن اۋىستىرۋ، ءارقايسى ءوندىرىس جۇمىس ءتارتىبىنىڭ ەلەكتر شىعىنىن تومەندەتۋ، ەلەكتر ەنەرگياسىنىڭ سارىپ بولۋ جالپى مولشەرىن تىزگىندەۋ، كومىر قىشقىل گازىنىڭ شىعارىلۋى جوعارعى مانگە جەتۋ، كومىر قىشقىل گازىن بەيتاراپتاندىرۋ نىساناسىن جۇزەگە اسىرۋ قىزمەتىن تىڭعىلىقتى ىستەۋ ارقىلى كەننىڭ باياندى دامۋىنا بەرىك نەگىز قالادى.

كوكتوعاي موڭكەم تەمىر كەنى شەكتى جاۋاپكەرشىلىك سەرىكتەستىگىنىڭ ورىنباسار ديرەكتورى گاۋ ماۋلين بىلاي دەدى: 2024-جىلعى كۇردەلى ەكونوميكالىق ورتا مەن قاتاڭ كاسىپتىك جاعداي الدىندا، نازاردى قۇن جاسامپازدىعىنا شوعىرلاندىرىپ، كاسىپورىنداردىڭ جاڭا ساپالى وندىرگىش كۇشتەرىن بەلسەنە جەتىلدىرىپ، ەسەپ جاساپ تيجارات جۇرگىزۋ،جۇمىستى قۇنتتاپ جۇرگىزۋ، ولشەمگە تۋرالاپ پارىقتى تابۋ ارقىلى باسقارۋداعى وزگەرىستى ۇزدىكسىز ىلگەرىلەتتىك. قازىر كاسىپورىنداردىڭ اينالىم ونىمدىلىگى مەن تيجارات ونىمدىلىك دەڭگەيى ۇزدىكسىز جوعارىلاپ، تۇتاس جىلدا بەلگىلەنگەن ءوندىرىس مىندەتى نەگىزىنەن ورىندالدى. بولاشاقتا موڭكەم تەمىر كەنى عىلىم-تەحنيكادا جاڭالىق اشۋدى قوزعاۋشى كۇش، جاسىل دامۋدى نىسانا ەتىپ، كەن كاسىبىنىڭ تيپىن وزگەرتىپ دارەجەسىن جوعارىلاتۋعا جانە باياندى دامۋعا اناعۇرلىم زور ۇلەس قوسىپ، زەردەلى كەن قۇرىلىسىنىڭ جاڭا جولىن، جاڭا ءادىسىن ۇزدىكسىز قاراستىرىپ، كەن كاسىبىنىڭ جوعارى ساپالى دامۋىن ىلگەرىلەتەدى.