اۋىل شارۋاشىلىعى جانە اۋىل – قىستاق مينيسترلىگىنىڭ ەڭ جاڭا باقىلاۋ مالىمەتىنە قاراعاندا، 10 – ايعا وتكەننەن بەرى، كەيبىر كوكونىستەردىڭ باعاسى 9 – ايداعىمەن سالىستىرعاندا قايتا ارزانداعان. كۇز ماۋسىمىنداعى كوكونىستەردىڭ بىرتىندەپ قاۋىرت بازارعا شىعارىلۋىنا بايلانىستى، كوكونىستەردىڭ باعاسى ماۋسىمدىق ارزانداۋ كەزەڭىنە ءوتۋى مۇمكىن.
ۇعىسۋعا قاراعاندا، 9 – ايدىڭ سوڭعى شەنىندە كەڭ كولەمدى سۋىق اعىستىڭ ىقپالىنا ۇشىراعاندىقتان، شىعىس – سولتۇستىك، سولتۇستىك جۇڭگونىڭ سولتۇستىك بولىگى قاتارلى سۋىق جەرلەردىڭ كوكونىستەرى بازاردان ەرتە شەگىنگەن، حىبەي، سانشي قاتارلى جەرلەردە كوكونىستەردىڭ ءوسۋ قارقىنى باياۋلاعان، مۇنان سىرت، سۋىق اعىس پەن ەكى رەتكى تايفىڭ داۋىلى قاباتتاسا ىقپال جاساعاندىقتان، جياڭسۋ، انحۇي قاتارلى جەرلەردە كوكونىس ءوندىرۋ جانە تاسىمالداۋ قيىندىق دارەجەسى جوعارىلاپ، وزىندىك قۇنى ارتقان.
اۋىل شارۋاشىلىعى جانە اۋىل – قىستاق مينيسترلىگىنىڭ اۋىل شارۋاشىلىعى جاعدايىنا ورنالاستىرۋ جاساۋىنا قاراعاندا، قازىر ەلىمىز بويىنشا اتىزداعى كوكونىستەردىڭ كولەمى 105 ميلليون مۋ، سايكەستى مەزگىلدەگىدەن 900 مىڭ مۋدان استام ارتقان، بۇل كۇز بەن قىستا كوكونىسپەن قامداۋعا بەرىك نەگىز قالاعان.
10 – اي كۇز مەزگىلىندەگى كوكونىستەر بازارعا قاۋىرت شىعارىلاتىن مەزگىل، كۇزدىك شىتىرشىق، شالعام، قاۋدان كاپۋستا قاتارلى اشىق اتىزداعى كۇزگى كوكونىستەر كوپ مولشەردە بازارعا شىعارىلادى، قۇرىلعىدا وندىرىلەتىن پاميدور، قيار، اشتى بۇرىش قاتارلىلار دا ىركەس – تىركەس جيناپ الىنادى، ونىڭ ۇستىنە، نەگىزگى ءوندىرىس رايوندارىندا اۋا رايى شارت – جاعدايى جالپى جاقتان ءتيىمدى بولاتىندىقتان، كوكونىسپەن قامداۋ مولشەرى اناعۇرلىم ارتادى. سونىمەن بىرگە، اۋا رايىنىڭ سۋىتۋىنا بايلانىستى كوكونىستەردىڭ شىرۋگە توزىمدىلىگى ارتىپ، تاسىمالداۋ، ساقتاۋ بارىسىندا ىسىراپ بولۋى تومەندەيدى، تاسىمالداۋدىڭ وزىندىك قۇنى تومەندەيدى. جالپى جاقتان العاندا، الدا كەڭ كولەمدى اپاتتى اۋا رايى تۋىلماعان جاعدايدا، كوكونىستەردىڭ باعاسى ءالى دە بىرتىندەپ قايتا ارزانداپ، ماۋسىمدىق سيپاتتى ارزانداۋ كەزەڭىنە قادام تاستايدى.
حاباردى دوستارىڭىزعا، توپتارىڭىزعا جولداپ، حالىق تورابىنا قولداۋ كورسەتىڭىز!
اۋدارعان: نۇرعيسا قۇرمانجان ۇلى
دايىنداعان: نۇرعيسا قۇرمانجان ۇلى
كەلۋ قاينارى: حالىق تورابى
