بەيجيڭ قالالىق ۇكىمەت پارتگرۋپپاسىنىڭ بۇرىنعى مۇشەسى، بۇرىنعى ورىنباسار قالا باستىعى گاۋ پىڭ تارتىپكە، زاڭعا اۋىر قايشىلىق جاساعاندىقتان پارتيادان جانە قىزمەتتەن ايدالدى
شينحۋا اگەنتتىگىنىڭ 10 – ايدىڭ 22 – كۇنى بەيجيڭنەن بەرگەن حابارى. ج ك پ ورتالىق كوميتەتىنىڭ بەكىتۋىمەن، ورتالىق ءتارتىپ تەكسەرۋ كوميتەتى، مەملەكەتتىك باقىلاۋ – تەكسەرۋ كوميتەتى بەيجيڭ قالالىق ۇكىمەت پارتگرۋپپاسىنىڭ بۇرىنعى مۇشەسى، بۇرىنعى ورىنباسار قالا باستىعى گاۋ پىڭنىڭ تارتىپكە، زاڭعا اۋىر قايشىلىق جاساۋ ماسەلەسىنە دەلو تۇرعىزىپ، تەكسەرۋ جۇرگىزدى.
تەكسەرۋ ارقىلى مىنانى انىقتادى: گاۋ پىڭ مۇرات - سەنىمنەن ايرىلىپ، اۋەلگى ماقساتتان، بورىشتان بەزىپ، اۋىر حاۋىپ - قاتەر، سىن - سىناقتار الدىندا شەگىنشەكتەپ، جاۋاپكەرشىلىكتەن قاشقالاقتاپ، ساياسي جاقتا ناشار ىقپال تۋدىرعان؛ ورتالىقتىڭ 8 ءتۇرلى بەلگىلەمەسىنىڭ رۋحىن ەلەپ - ەسكەرمەي، ۇكىمەت قىزمەتىن ءادىل اتقارۋعا ىقپال جاساۋى مۇمكىن بولعان قوناعاسىنى قابىلداعان، باسقارۋ جانە قىزمەت وتەۋ وبيەكتىسىن ءوز وتباسىنا ”كۇتۋشى“ سياقتى قىزمەت وتەۋگە ورنالاستىرعان؛ ۇيىمدىق يدەياسى سولعىنداپ، بەلگىلەمەگە قايشى فورمامەن كادرلاردى تاڭداپ مىندەتكە قويۋ قاتارلى قىزمەتتەردە باسقالارعا مۇددە جەتكىزىپ، جالعانشىلىق ىستەپ، وقۋ تاريحي، عىلىمي اتاقتى الداپ العان؛ پاكتىك جاعىندا تازا، پاك بولۋ نەگىزى جاقسى بولماي، بەلگىلەمەگە قايشى فورمامەن تارتۋ – تارالعى، اقشا قابىلداعان، بەلگىلەمەگە قايشى فورمامەن جارنا ساۋدالاعان، باسقارۋ جانە قىزمەت وتەۋ وبيەكتىسىنەن كوپ مولشەردە قارىز العان، ۇقىق – ءناپسى ساۋداسىمەن بارىنشا اينالىسقان؛ راقاتقۇمارلىققا بەرىلىپ، پاسىقتىققا بوي ۇرعان؛ ءتارتىپ پەن زاڭدى كوزگە ىلمەي، ۇقىق - اقشا ساۋداسىمەن بارىنشا شۇعىلدانىپ، قىزمەت قولايلىعىنان پايدالانىپ باسقالاردىڭ مىندەتىن ءوسىرۋ، كاسىپورىن ساۋداسى، قۇرىلىستى كوتەرەگە الۋ قاتارلى جۇمىستارىنا پايدا جەتكىزگەن، قىرۋار زاڭسىز مال – مۇلىك العان؛ قىزمەتتە سالعىرتتىققا سالىنىپ، مەملەكەت مۇددەسىنە اۋىر زيان جەتكىزگەن.
گاۋ پىڭ پارتيانىڭ ساياسي تارتىبىنە، ۇيىمدىق تارتىبىنە، پاكتىك تارتىبىنە جانە تۇرمىس تارتىبىنە اۋىر قايشىلىق جاساپ، مىندەتىندە زاڭعا اۋىر قايشىلىق جاساعان ءارى پارا الۋ، قىزمەتىنە نەمقۇرايدى قاراۋ قىلمىسىنا شاتىلعان، ونىڭ ۇستىنە پارتيا 18 ـ قۇرىلتايىنان كەيىن دە تيىلماعان، تىزگىنىن تارتپاعان، سيپاتى اۋىر، ىقپالى ناشار، قاتاڭ ءبىر جاقتى ەتۋ كەرەك. «جۇڭگو كوممۋنيستىك پارتياسىنىڭ ءتارتىپ جازاسى ەرەجەسى»، «جۇڭحۋا حالىق رەسپۋبليكاسىنىڭ باقىلاۋ - تەكسەرۋ زاڭى»، «جۇڭحۋا حالىق رەسپۋبليكاسىنىڭ ۇكىمەت قىزمەتكەرلەرىنىڭ اكىمشىلىك ىستەرىن ءبىر جاقتى ەتۋ زاڭى» سياقتى قاتىستى بەلگىلەمەلەرگە ساي، ورتالىق ءتارتىپ تەكسەرۋ كوميتەتى تۇراقتى كوميتەتى ءماجىلىسىنىڭ اقىلداسۋى ءارى ج ك پ ورتالىق كوميتەتىنىڭ بەكىتۋى ارقىلى گاۋ پىڭعا پارتيادان شىعارۋ جازاسىن بەرۋدى ۇيعاردى؛ مەملەكەتتىك باقىلاۋ - تەكسەرۋ كوميتەتى وعان قىزمەتتەن ايداۋ جازاسىن بەردى؛ تارتىپكە، زاڭعا قايشى تابىسىن تاركىلەدى؛ قىلمىس كۇمانى تاعىلعان ماسەلەسىن پروكۋراتۋرا ورگانىنىڭ زاڭ بويىنشا تەكسەرىپ ايىپتاۋىنا وتكىزىپ بەرەدى، وعان ساياتىن مال - مۇلىك بىرگە وتكىزىپ بەرىلەدى.
اۋدارعان: مانەپ ەربول ۇلى
دايىنداعان: مانەپ ەربول ۇلى
كەلۋ قاينارى: حالىق تورابى
