كۇشتى سۋىق اعىس كىرەدى! ەلىمىزدىڭ سولتۇستىك وڭىرىنە ىقپال جاسايدى
شينحۋا اگەنتتىگىنىڭ ءتىلشىسى گاۋ جيڭ، حۋاڭ ياۋ 10 – ايدىڭ 16 – كۇنى بەيجيڭنەن حابارلايدى. ءتىلشىنىڭ 10 – ايدىڭ 16 – كۇنى ورتالىق اۋا رايى ستانسياسىنان ۇعىسۋىنشا، ەلىمىزدىڭ ورتا - شىعىس وڭىرىندە كەڭ كولەمدى جاۋىن – شاشىن جاۋادى، ىلە – شالا تاعى دا سۋىق اعىس كىرەدى، سولتۇستىك ءوڭىردىڭ كوپ جەرىندە 10 – ايدىڭ 18 – كۇنىنەن باستاپ بوران سوعىپ، اۋا تەمپەراتۋراسى تومەندەيدى، وسىنداي اۋا رايىنىڭ قاتىناسقا، اۋىل شارۋاشىلىعىنا جانە ادامداردىڭ دەنساۋلىعىنا ىقپال جاساۋىنا كوڭىل ءبولۋ قاجەت.
10 – ايدىڭ 16 – كۇنى كۇندىز يۇننان، جياڭشي، جىجياڭ قاتارلى جەرلەردىڭ ءىشىنارا وڭىرىندە ورتاشا نەمەسە قالىڭ جاڭبىر جاۋدى. بولجامعا قاراعاندا، 10 – ايدىڭ 16 – كۇنى كەشتەن 10 – ايدىڭ 18 – كۇنىنە دەيىن، سولتۇستىك جۇڭگونىڭ ورتا – وڭتۇستىك بولىگى، حۋاڭحى – حۋايحى ءوڭىرى، چاڭجياڭ – حۋايحى ءوڭىرىنىڭ سولتۇستىك بولىگى، چاڭجياڭ – حانجياڭ ءوڭىرى، چاڭجياڭنىڭ وڭتۇستىگىندەگى ءوڭىردىڭ باتىس بولىگى، وڭتۇستىك جۇڭگونىڭ باتىس بولىگى جانە سولتۇستىك بولىگى، باتىس – وڭتۇستىك ءوڭىردىڭ شىعىس بولىگى قاتارلى جەرلەردىڭ ءىشىنارا وڭىرلەرىندە ورتاشا نەمەسە قالىڭ جاڭبىر جاۋادى، مۇنىڭ ىشىندە، شاندۇڭنىڭ ورتا – وڭتۇستىك بولىگى، حىناننىڭ شىعىس بولىگى، حۋبەيدىڭ شىعىس بولىگى، حۋناننىڭ باتىس بولىگى، گۇيجوۋ، گۋاڭشيدىڭ سولتۇستىك بولىگى قاتارلى جەرلەردە نوسەر نەمەسە قالىڭ نوسەر جاۋادى. شينجياڭنىڭ باتىس – سولتۇستىك بولىگى، شيزاڭنىڭ شىعىس – وڭتۇستىك بولىگى قاتارلى جەرلەردىڭ ءىشىنارا ورىندارىندا ورتاشادان قالىڭ دارەجەگە دەيىن جاڭبىر جاۋادى نەمەسە قار ارالاس جاڭبىر جاۋادى، شينجياڭنىڭ باتىس – سولتۇستىك بولىگىنىڭ ءىشىنارا جەرلەرىندە قالىڭ قار نەمەسە ەرەكشە قالىڭ قار جاۋادى.
اۋا رايى ماماندارى مىنانى ەسكەرتەدى: 10 – ايدىڭ 17 – كۇنى جاۋىن – شاشىن ەڭ كۇشتى مەزگىلگە قادام تاستايدى، جۇرتشىلىقتىڭ جاۋىن – شاشىندى اۋا رايى سەبەبىنەن كورىنىمدىلىك دەڭگەيى تومەندەۋ، جول بەتىنىڭ تايعاناق بولۋى قاتارلى قاتىناس پەن ءجۇرىس – تۇرىسقا جاسايتىن ءتيىمسىز ىقپالعا نازار اۋدارعانى، جۇرىس – تۇرىس ۋاقىتى مەن جول جەلىسىن ۇيلەسىمدى ورنالاستىرعانى ءجون.
وسى جولعى جاۋىن – شاشىننان سوڭ، مەجەمەن 10 – ايدىڭ 18 – كۇنىنەن 19 – كۇنىنە دەيىن، چاڭجياڭنىڭ سولتۇستىگىندەگى باسىم كوپ ساندى وڭىرلەردە بوران سوعىپ، اۋا تەمپەراتۋراسى تومەندەيدى، باتىس – سولتۇستىك ءوڭىردىڭ شىعىس بولىگى، شىعىس – سولتۇستىك ءوڭىر، سولتۇستىك جۇڭگونىڭ ورتا – شىعىس بولىگى، حۋاڭحى – حۋايحى ءوڭىرىنىڭ شىعىس بولىگى، چاڭجياڭ – حۋايحى ءوڭىرى، چاڭجياڭ – حانجياڭ ءوڭىرىنىڭ شىعىس بولىگى، چاڭجياڭنىڭ وڭتۇستىگىندەگى ءوڭىردىڭ شىعىس بولىگى قاتارلى جەرلەردە اۋا تەمپەراتۋراسى 8 گرادۋستان 10 گرادۋسقا دەيىن تومەندەيدى، سولتۇستىك جۇڭگونىڭ سولتۇستىك بولىگىندە، شىعىس – سولتۇستىك ءوڭىردىڭ ورتا – وڭتۇستىك بولىگىندە اۋا تەمپەراتۋراسى 10 – 12 گرادۋس تومەندەيدى، ءىشىنارا جەرلەردە تەمپەراتۋرانىڭ تومەندەۋ مولشەرى 14 گرادۋستان اسادى. اۋا تەمپەراتۋراسى تومەندەگەن سوڭ، ەڭ تومەنگى تەمپەراتۋرا نولدەن تومەن تۇسەتىن بەلدەۋ سولتۇستىك جۇڭگونىڭ سولتۇستىك بولىگىندەگى وڭىرگە جەتەدى. جۇرتشىلىقتىڭ اۋا تەمپەراتۋراسىنداعى وزگەرىسكە نازار اۋدارىپ، جىلى كيىنگەنى، دەنساۋلىققا ءمان بەرگەنى ءجون.
حاباردى دوستارىڭىزعا، توپتارىڭىزعا جولداپ، حالىق تورابىنا قولداۋ كورسەتىڭىز!
اۋدارعان: نۇرعيسا قۇرمانجان ۇلى
دايىنداعان: نۇرعيسا قۇرمانجان ۇلى
كەلۋ قاينارى: حالىق تورابى
