阿拉老底子每天呈送精彩文章一组
打开尘封的记忆，寻觅往昔的岁月
叙老底子事 忆老底子人
诉老底子情
原创：薛理勇
沪语改写、讲述：洪瑛
文字修正：丁迪蒙
编辑：王乙其
“挑绷绷”又写作“跳绷绷”，是一种儿童游戏，多流行于小姑娘之间。玩法老简单個，但是花头经还是蛮透個。寻一根长约1米個细绳，两头打结成一环，一人将绳环绷到双手十指浪，做出一定個花样，然后另一人用双手手指，以勾，挑、移等动作将绳环转移到自家個双手十指浪，并改变了绳环個原来式样，一人继续以搿种方式再拿绳环移到自家手浪，搿能依次重复进行，直到绳环勒一人手中打成死结或者只剩下一只环，迭个人就输脫了，可以再重新来过。
“挑绷绷”只是一种儿童游戏，但是，以前上海流传了搿样一句俚语——“挑绷绷会落雨個”，从字面浪理解，就是白相挑绷绷游戏后，天就会得落雨，迭个只是民间個一种说法，啥人也勿会去深究伊個出处，当然，也勿会相信，白相“挑绷绷”游戏会得引起老天下雨。但是，当小囡缠牢大人白相挑绷绷游戏個辰光，大人就往往会以“挑绷绷会落雨個”来拒绝小囡。
勒我小辰光，上海個家庭大多數是多子女家庭。兄弟姊妹多。而且年龄也相近；当时小学上半天到学堂上课，下半天勒屋裏家自修，大多数学堂根据学生家庭居住個远近组成“学习小组”，小朋友聚勒一道自修、做功课，结束后就一道白相。伊个辰光個家长根本勿会过多管束小囡，更加勿会有家长陪小孩白相，搿能，调皮個男小囡聚勒一道白相斗鸡、捉强盗之类個游戏，而小姑娘白相跳橡皮筋、造房子、坢野貓貓、挑绷绷等游戏。回首当年上海個家庭大多数勿富裕，但小朋友真是天真烂漫，白相得开心啊。
到了20世纪60年代末 ，中国开始实行计划生育政策，提倡“晚婚晚育”，结婚、生育被严格控制，每对夫妻只能生一个小囡，交关家庭就是“独生子女” 家庭。对只有一个小囡個家长来讲，肯定对子女爱护有加，常怕小囡发生意外，所以大多数家庭勿准小囡到弄堂里白相，甚至勿肯让小囡离开自家個视线，弄堂里能看到個小囡越来越少了，小囡勒一道白相個机会也越来越少了。当时，又没电视机、游戏机之类個物事，交关家庭连收音机也嘸没。但小囡喜动、白相個天性是难以抹杀個，男小囡会得趁家长勿注意個辰光溜出家门，而小姑娘只好缠牢姆妈白相挑绷绷游戏。
挑绷绷是简单個儿童游戏，大人白相一歇就烦了，而白象挑绷绷游戏大多是以小人失败而结束，所以，小姑娘哭出乌啦缠牢大人继续白相下去，而大人又想方设法拒绝。上海人拿小囡声泪俱下個哭讲作“落雨”，开始，大人以“挑绷绷输脱勿许落雨哦”来告戒小囡输了勿许哭，后来又以“挑绷绷输脱要落雨個”来嘲笑、嗔怪小囡，后来又以“挑绷绷会落雨個”打发小囡，久而久之，大家就忘记了“挑绷绷会落雨個”真正個出处，误认为搿是民间個一个经验——挑绷绷真個会得引起落雨。
现在，“挑绷绷”基本浪退出了儿童游戏项目，“挑绷绷会落雨個”已经淡出了上海话词语。可能，只有50岁以上個老人还记得伐。
作者：薛理勇
讲述：洪瑛
丁迪蒙，启迪蒙昧者也。上海市人。原上海大学中文系教师，多年来一直致力于沪语和海派文化的传承。
沪语是吴方言的代表方言，是吴侬软语的典范。她既可以用来拉家常，也同样可以用来朗读各类诗歌散文。
沪语完全可以书写，同粤语可以写作是一样的。本平台所有文章都是经过改写后，用沪语来演绎的，汉字书写也是正确的。
丁迪蒙所撰写的，与沪语相关的著作主要有：
《学说上海话》上海科技文献出版社
《听听说说上海话》少年出版社
《实用沪语》复旦大学出版社
《上海话绕口令》少儿出版社
《上海方言词语使用手册》上海教育出版社
《上海话读成语故事》少儿出版社
《囡囡学童谣》，少儿出版社。
转自：海上梦叠
我知道你在看哟~
