བོད་ཤིང་འབྲུག་ལོའི་བོད་ཟླ་བཅུ་གཅིག་པའི་ཚེས་ཉེར་གཅིག་སྟེ་དེ་རིང་ནི་འཕགས་མཆོག་ས་ཡི་སྙིང་པོའི་དུས་ཆེན་དམིགས་བསལ་བ་ཡིན་པ་དང་། ལྷག་ཏུ་ཕྱི་ལོ་གསར་བ2025ལོའི་ས་སྙིང་དུས་ཆེན་ཐོག་མའང་ཡིན། དུས་བཟང་དེ་དང་བསྟུན་ནས་སངས་རྒྱས་ཀྱི་བསྟན་པ་དར་ཞིང་སེམས་ཅན་ལ་བདེ་སྐྱིད་འབྱུང་བའི་ཕྱིར་དང་། མི་སྒེར་སོ་སོའི་འདོད་དོན་ལེགས་འགྲུབ་ཡོང་བའི་ཆེད་དུ་ས་ཡི་སྙིང་པོའི་མཚན་གྱི་དགེ་བསྐུལ་ཞིག་བྱེད་རྒྱུ་ཡིན་པས་ཚང་མས་ཅི་ནུས་ཀྱིས་བཏོན་ནས་འོག་གི་འབོར་བསྡོམས་རེའུ་མིག་ཏུ་འགོད་རོགས་ཞུ།
བྱང་ཆུབ་སེམས་དཔའ་སེམས་དཔའ་ཆེན་པོ་ས་ཡི་སྙིང་པོ་ལ་ཕྱག་འཚལ་ལོ།། མཆོད་དོ།། སྐྱབས་སུ་མཆིའོ།།
འཕགས་པ་ས་ཡི་སྙིང་པོ་ལ་གསོལ་བ་བཏབ་པའི་ཕན་ཡོན།
ས་སྙིང་འཁོར་ལོ་བཅུ་པ་ལས། གནས་གང་དག་ན་སེམས་ཅན་གང་དག་འདོད་ཆགས་དང་། ཞེ་སྡང་དང་། གཏི་མུག་ལ་སོགས་པ་དྲག་ལ་རྣོ་བས་སྲོག་གཅོད་པ་དང་། མ་བྱིན་པར་ལེན་པ་དང་། འདོད་པས་ལོག་པར་གཡེམ་པ་དང་། བརྫུན་དུ་སྨྲ་བ་དང་། ངག་རྩུབ་པོར་སྨྲ་བ་དང་། ཕྲ་མ་བྱེད་པ་དང་། ཚིག་ཀྱལ་པར་སྨྲ་བ་དང་། འདོད་ཆགས་ཅན་དང་། ཞེ་སྡང་ཅན་དང་། ལོག་པར་ལྟ་བ་དང་། མི་དགེ་བ་བཅུའི་ལས་ཀྱི་ལམ་མངོན་དུ་སྤྱོད་པ་དག་གིས་སེམས་རྩེ་གཅིག་ཏུ་བྱང་ཆུབ་སེམས་དཔའ་སེམས་དཔའ་ཆེན་པོ་སའི་སྙིང་པོའི་མཚན་ནས་བརྗོད་ཅིང་དམིགས་པས་བསྟི་སྟང་དང་བཅས་ཏེ་མཆོད་པ་བྱས་ན་ཉོན་མོངས་པ་ཐམས་ཅད་ཞི་ཞིང་མི་དགེ་བ་བཅུ་དང་ཡོངས་སུ་བྲལ་ཏེ་དགེ་བ་བཅུའི་ལས་ཀྱི་ལམ་དང་ལྡན་ཞིང་སེམས་ཅན་ཐམས་ཅད་ལ་བྱམས་པ་དང་། སྙིང་རྗེ་བ་དང་། ཕན་པ་དང་བདེ་བའི་སེམས་སྐྱེ་བར་འགྱུར་རོ།། ཞེས་དང་། གནས་གང་ན་སེམས་ཅན་གང་འདོད་པ་རྣམ་པ་སྣ་ཚོགས་ཀྱིས་སྡུག་བསྔལ་ཏེ། འདོད་པས་ཡོངས་སུ་གདུངས་པར་གྱུར་པ་དག་སེམས་རྩེ་གཅིག་ཏུ་བྱང་ཆུབ་སེམས་དཔའ་སེམས་དཔའ་ཆེན་པོ་སའི་སྙིང་པོའི་མཚན་ནས་བརྗོད་ཅིང་། དམིགས་པས་བསྟི་སྟང་དང་བཅས་ཏེ་མཆོད་པ་བྱས་ན་ཅི་དང་ཅི་འདོད་པ་ཐམས་ཅད་འཐོབ་ཅིང་སྡུག་བསྔལ་དང་བྲལ་ཏེ། སྐལ་བ་ཅི་ལྟ་བ་བཞིན་དུ་མཐོ་རིས་ཀྱི་ལྷར་སྐྱེ་བ་ནས་མྱ་ངན་ལས་འདའ་བའི་བར་དུ་འཐོབ་པར་འགྱུར་རོ།། ཞེས་གསུངས་སོ།།
