མིའི་བྱེད་ནུས་ཅན་གྱི་འཕྲུལ་མིས་མི་ལ་དཀའ་ངལ་གང་མང་སྤྲད་རྒྱུ་རེད།
ཁ་སང་དེ་རིང་གསར་འགྱུར་བརྒྱུད་ལམ་དག་ན་བཅོས་མའི་སེམས་ཅན་ཞེས་ཚ་ཚ་འུར་འུར་བྱེད་ཀྱིན་འདུག སྤྱིར་འཕྲུལ་གྱི་མི་གཟུགས་མངག་པའི་དོན་སྒྲུབ་པར་ནུས་པ་ཙམ་དར་ནས་ཡུན་རིང་ཙམ་ཡིན་ཡང་། ད་ལྟ་གླེང་བཞིན་པ་འདི་༢༠༡༩་ལོ་ཨ་རིའི་གཞོན་ནུ་སཱམ་ཟེར་བ་ཞིག་གིས་བཟོས་པ་ཡིན་འདུག ཐོག་མར་ཤིན་ཏུ་རྣམ་རིག་ཅན་གྱི་སྙི་ཆས་ཤིག་བཟོས་པ་ལ། ཚོང་དཔོན་ཞིག་གིས་ཨ་སྒོར་དུང་ཕྱུར་བཅུའི་མ་རྩ་བཙུགས་ནས་ཡར་རྒྱས་བཏང་བ་དང་། ལོ་གསུམ་གྱི་རིང་ལ་ཚད་ལས་བརྒལ་བའི་ཡར་རྒྱས་བྱུང་བ། དེའི་ཆ་ཤས་བཅོས་མའི་སེམས་ཅན་ཞེས་ལོགས་སུ་བྱུང་བ་འདྲ། བཅོས་མའི་སེམས་ཅན་ནི་འཕྲུལ་གྱི་མི་ཞིག་ཡིན་ཞིང་། མི་དང་འདྲ་བར་མི་ཡིས་གང་བྱེད་པ་ཐམས་ཅད་བྱེད་ཤེས་པ་མ་ཟད་མཁས་ཤིང་འཇོན་ལ་བྱད་གཟུགས་ཕུན་སུམ་ཚོགས་པ་ཞིག་ཡིན་པར་འདུག
དཔེར་ན། གཞོན་ནུ་ཞིག་མཛེས་ཤིང་ལྟ་ན་སྡུག་པའི་བུ་མོ་ཞིག་དང་འཕྲད་ནས་རྩེ་དགའི་ལོངས་སྤྱོད་ཀྱི་དཔལ་ལ་རོལ་ཞིང་། ཕན་ཚུན་མཛའ་ཞིང་བརྩེ་བས་འབྲལ་མི་ཐུབ་པ་ལྟར་གྱུར་བ་ན། ཉིན་ཞིག་གཞོན་ནུས་རང་གི་བརྩེ་ཞིང་དུང་སའི་བུ་མོ་ནི་བཅོས་མའི་སེམས་ཅན་ཞིག་ཡིན་པར་གློ་བུར་དུ་ཤེས་པ་སོགས་སྲིད་ཟེར། གཞུང་ལུགས་རྩོམ་པ་དང་ལྷ་འབྲི་བ་སོགས་དཀའ་བའི་གནས་ཐམས་ཅད་ལ་མཁས་པ་ཕུལ་དུ་ཕྱིན་པ་ཞིག་ཡིན་པར་ཟེར། དེ་འདྲའི་བཅོས་མའི་སེམས་ཅན་དེ་དར་དུ་འཇུག་གམ་མི་འཇུག འཇུག་ན་ཉེན་ཁ་གང་དང་གང་འདུག མི་འཇུག་ན་གྱོང་གུད་ཅི་དང་ཅི་འདུག་ཅེས་གླེང་བཞིན་པ་རེད། ཉེན་ཁ་ནི་ཧ་ཅང་ཆེན་པོ་ཡིན་པར་འདུག བེད་སྤྱོད་ལོག་པར་གཏོང་བ་གཅིག་པུའི་ཉེན་ཁ་ལ་བསམ་མི་ཕོད་པ་ཙམ་ཡིན་པར་འདུག བཅོས་མའི་སེམས་ཅན་ལ་རང་བཞིན་གྱི་ཡོད་པའི་སྐྱོན་ཞིག་ནི། འདི་འདྲའི་མི་དག་གིས་ཡུལ་ཀུན་ཁྱབ་པར་གྱུར་ཚེ་སྙིང་རྗེ་སྤུ་ཙམ་མེད་པ་ཤ་སྟག་ཡིན་པ། འདི་གཅིག་པུས་སེམས་སྔངས་ནས་དབུག་འབྱིན་མི་ཐུབ་པ་ཙམ་དུ་འགྱུར། ད་དུང་འདི་དག་གིས་མི་འབུར་དུང་ཕྱུར་གསུམ་ཙམ་གྱི་གཏན་འཇག་ལས་ཀ་བརླག་པར་བྱེད་ཟེར།
འདི་དར་བར་བྱས་ན་སྐབས་ཤིག་མིའི་རིགས་ཡོངས་རྫོགས་ལ་དབང་སྒྱུར་ཞིང་འགྱུར་བ་གཏོང་བར་སྲིད་ཟེར། འདི་གསར་གཏོད་བྱེད་པའི་གཞོན་ནུ་དེས་ལག་པ་བྲང་ལ་བཞག་ནས་བསམ་བློ་གཏོང་ཚེ་ངས་གཞན་དང་མི་འདྲ་བའི་ཆེས་བཟང་ཞིང་འབུར་དུ་ཐོན་པའི་ལས་ཀ་ཞིག་བྱེད་ཀྱིན་འདུག་གམ། ཡང་ན་འཇིགས་ཤིང་སྐྱི་གཡའ་བའི་བྱ་བ་ངན་པ་ཞིག་བྱེད་ཀྱིན་འདུག་བསམ་སྟེ་ཐེ་ཚོམ་ནས་ཐེག་མི་ཆོད་པར་འདུག་ཟེར། ཨེ་ལན་མ་སུ་ཁེས་གཙོའི་ཚན་རིག་པ་གྲགས་ཅན་གཅིག་སྟོང་ཙམ་འཛོམ་སར་བློ་འདྲི་བར་འདུག ལས་ཀ་བརླགས་པའི་མི་རྣམས་ལ་སྤྱི་མང་གཞི་རྩའི་ཡོང་འབབ་བམ། ཡོང་འབབ་ཁ་གསབ་ཀྱི་ལམ་ལུགས་ཤིག་འཛུག་ཆོག་ལ། དེ་ལྟར་ན་མི་རྣམས་ལས་ཀ་ལ་མགོ་མི་འཁོར་བར་བྱ་བ་གཞན་ལ་བསམ་བློ་གཏོང་བའི་གོ་སྐབས་ཡོད་པས་གསར་གཏོད་དང་དོན་དག་དེ་ལས་བཟང་བ་ཡང་འགྲུབ་པར་འགྱུར་སྲིད། ཅ་ལག་འདི་གཏན་ནས་མཚམས་འཇོག་བྱེད་ཟེར་ན། འདིའི་བཟང་ཕྱོགས་ཀྱི་ནུས་པ་དང་ལེགས་ཆ་བསམ་གྱིས་མི་ཁྱབ་པས། དེ་ལས་འདི་ཡི་ཉེན་ཁའི་ཕྱོགས་ཇི་ལྟར་འགོག་ཐབས་ཡོད་ལྟ་དགོས་པར་འདུག་ཟེར། འདི་དེང་སང་གི་གསར་འགྱུར་ཆེན་པོ་ཞིག་རེད། ཉེན་ཁ་འགོག་ཐབས་ལ་རྒྱལ་ཁབ་ཐམས་ཅད་བསམ་ཕྱོགས་གཅིག་མཐུན་འོང་དགོས་པས་དཀའ་བར་འདུག
