(རྨ་ལྷོ) བཀྲ་ཤིས་རྒྱལ།
ན་ནིང་གི་ཟླ་བཅུ་གཅིག་པའི་ནངས་མོ་ཞིག་ལ། ང་རང་ལས་ཚོགས་ལ་ཅུང་ཟད་འཕྱིས་དྲགས་པས། ཁ་ངོ་གཙང་མ་ཞིག་ཀྱང་བཀྲུ་ཁོམ་མ་བྱུང་བར་བྱ་འཕུར་བ་ལྟར་རླངས་འཁོར་བསྐོར་ཏེ་ངེད་ཀྱི་ལས་ཁུངས་འདབས་རོལ་དུ་ཡོད་པའི་རྒྱལ་ལམ་བཞི་མདོར་སླེབས། སྐར་ཆ་ལྔ་ལས་མེད་པའི་གློག་ལྗང་དེས་ང་ལ་ཉེན་བརྡ་གང་ཞིག་སྟོན་བཞིན་མཆིས། ངས་དེ་ལ་ཁ་ཡ་སྤུ་ཙམ་ཡང་མ་བྱས་པར་སྣུམ་སྒོ་ཤུགས་ཀྱིས་མནན་ཏེ་ཤར་མར་བརྒྱུགས་པ་ཡིན། ང་རང་ཕ་གིར་མ་སླེབས་གོང་གློག་དམར་ཤར་འདུག་ལ། གར་ཡོང་ཆ་མི་འཚལ་བའི་མྱུར་སྐྱེལ་བ་ཞིག་གིས་གློག་སྒུལ་འཕྲུལ་རྟ་ཞིག་ཞོན་ཏེ་ངའི་མདུན་སར་གློ་བུར་མངོན། ངེད་གཉིས་ནས་དུས་མཉམ་དུ་འཁོར་སྒག་གློ་བུར་མནན་ཡང་ཡོད་ཚད་འཕྱིས་སོང་། སྐག་སྒྲ་དང་བཅས་འཕྲུལ་རྟ་དེས་ངའི་རླངས་འཁོར་གྱི་མདུན་ལ་བརྒྱབ་ཅིང་མི་ཁོ་རང་ངའི་རླངས་འཁོར་གྱི་སྣ་ཁེབས་བརྒྱུད་ཐང་ལ་བརྡབས། ཨ་ཁ་ཁ། ངའི་ཁ་ནང་དུ་གློ་བུར་སྐད་ངན་འདི་འདྲ་ཞིག་ཕྱུང་ཞིང་དངངས་སྐྲག་དང་སེམས་ཁུར་མཉམ་སྐྱེས་ཀྱིས་མྱུར་དུ་རླངས་འཁོར་ལས་བབས། ངས་རྨས་མ་སྐྱོར་ཏེ་ལམ་འགྲམ་དུ་བཞག་རྗེས། ཇི་འདྲ་འདུག་ཅེས་སེམས་འཚབས་ཀྱིས་དྲིས། མི་དེས“ངའི་པུས་མོ། ངའི་སྒྱིད་པ”ཞེས་ཟུག་རྔུ་རྣར་གཟན་པ་ཞིག་བརྒྱབ་བྱུང་། འགྲིམ་འགྲུལ་ཉེན་རྟོག་པའང་འཕྲལ་མར་ངེད་གཉིས་ཀྱི་གམ་ལ་འབྱོར། མི་སྲོག་ལ་སྐྱོན་མེད་པ་ཤེས་རྗེས། རླངས་འཁོར་གྱི་འདུག་གནས་སོགས་པར་ལེན་བཞིན་མཆིས། རྨས་མ་བསྐྱབ་རྒྱུ་གལ་ཆེ་བས། ངས་གླ་འཁོར་ཞིག་གླས་ཏེ་ཁུལ་སྨན་ཁང་དུ་བསྐྱལ།
གནས་སྐབས་ཟི་ལིང་དུ་འཁྱེར་དགོས་མ་བྱུང་བས། ང་ཚོས་ཁུལ་སྨན་ཁང་ནས་དུས་ཐོག་སྨན་བཅོས་བགྱིས། ཉིན་གུང་ཙམ་ལ། རྨས་མའི་ཁྱིམ་མི་ཐོན་ཏེ་ངུ་འབོད་ལྷ་འབོད་བྱས། ངེད་ཀྱི་ཁྱིམ་མི་འགའ་ཡང་ཐོན་ཏེ་ལེ་བདའ་དང་འཁང་ར་བྱས། ངས་གཞུང་སྒེར་གྱི་འབྲེལ་ཡོད་མིར་རང་སྐྱོན་ངོས་ལེན་བྱས་པར་མ་ཟད། སྐྱིན་ཚབ་འཇལ་བའི་དམ་བཅས། རྨས་མ་སྨན་ཁང་ལས་འབུད་རག་དབར་ངས་གཉོར་སྐྱོང་གང་ལེགས་བྱ་རྒྱུའི་འགན་བླངས།
རྒྱུས་ལོན་བྱུང་བ་ལྟར་ན། རྨས་མ་ཁོ་ནི་ཁུལ་ཐོག་དང་ཁད་ཉེ་བའི་ཧུའེ་རིགས་གྲོང་ཚོ་དེའི་ཡིན་ལ། ཆུང་དུས་ནས་ཕ་མེད་དྭ་ཕྲུག་ཏུ་ལུས་པས་འབྱོར་འཁོས་ཞན་ལ་སྤོ་བོ་དང་སྤོ་མོས་གཉོར་སྐྱོང་བྱས་ཏེ་ནར་སོན་པ་ཞིག་རེད་འདུག ལོ་ན་ཆུང་ཡང་ལས་ལ་བརྩོན་པ་ཞིག་ཏུ་མཐོང་བས་སྙིང་ཉེ་བ་ཞིག་ཀྱང་འདུག དེ་བས། སྨན་ཁང་དུ་སྡོད་ཡུན་རིང་ལ་ངས་རང་གི་ཕུ་ནུ་བཞིན་གཉོར་སྐྱོང་གང་ལེགས་བྱས།
ཟླ་བ་གཉིས་དང་ཉིན་བཅུ་བཞིའི་རྗེས། ཁོ་རང་གཞི་ནས་སངས་དྲག་ཏུ་གྱུར་ཏེ། སྨན་ཁང་ལས་སྒོར་བུད། དེ་དུས། ཁོས་ང་ལ“ཕུ་བོ”ཞེས་འབོད་བཞིན་མཆིས། ཁོའི་ཁྱིམ་མི་དག་གིས་ཀྱང་ངའི་ཁ་ཞེ་གཉིས་མེད་ཀྱི་སྙོར་སྐྱོང་ལ་ཁས་ལེན་གང་ལེགས་བྱསྨན་བཅོས་ཀྱི་འགྲོ་ལུགས་ཡོངས་སུ་བསྒྲུབས་ཚར་རྗེས། ངས་ཁོ་ལ་གློག་སྒུལ་འཕྲུལ་རྟ་གསར་པ་ཞིག་ཀྱང་ཉོས། ཁོ་རང་མྱུར་སྐྱེལ་བ་ཞིག་ཡིན་པས། ཐེངས་འདིའི་རྨས་སྐྱོན་འདི་མྱུར་སྐྱེལ་ཀུང་སིའི་ངོས་ནས་ལས་རྨས་ཀྱི་ཁོངས་སུ་བཞག་སྟེ། ཁོ་ལ་སྐྱིན་ཚབ་གཞལ་ན་འགྲིག་མོད། ཀུང་སིས་ཁོ་རང་གནས་སྐབས་ཀྱི་གླ་སྐྱེལ་བ་ཞིག་ཡིན་ཚུལ་དང་གན་རྒྱ་བཞག་མེད་ཚུལ་ལབ་པས། དེའི་སྐོར་ནས་ཁྲིམས་མཐུན་གྱི་ཁེ་དབང་བརྩོན་ལེན་བྱེད་མ་ཐུབ།དེ་བས། ཁོའི་ཟླ་གཉིས་ཀྱི་ཡོང་སྒོའི་ཐད་ནས་ཀྱང་འཚོ་བའི་ཁ་གསབ་ལྟ་བུ་ཞིག་སྟེར་དགོས་སྙམ་སྟེ་དེ་ལྟར་བཤད་པར། ཁོ་དང་ཁོའི་ཁྱིམ་མི་ཡོད་དོ་ཅོག་ནས་མི་དགོས་པའི་ཚུལ་ནན་གྱིས་བསྟན། སྨྲ་ར་དུང་ལྟར་དཀར་བའི་སྤོ་བོ་བགྲེས་སོང་དེས་ངའི་ལག་མགོར་ལག་པ་བཞག་ནས། “ཁྱོད་ཀྱིས་ངའི་ཚ་བོ་འདིར་འགན་ཡག་པོ་འཁུར་སོང་། དོན་རྐྱེན་འདིའང་ཁྱོད་གཅིག་པུས་བསླངས་པ་ཞིག་ག་ལ་ཡིན། ཁྱོད་ལ་འོ་བརྒྱལ་ཆེན་པོ་གཏད་སོང་། ད་གསབ་དངུལ་ཞིག་ལེན་སྲོལ་གང་ན་ཡོད། བོད་དང་ཧུའེ་རིགས་གཉིས་ས་འདིའི་ཁྱིམ་མཚེས་ཡིན་ལ། སྤུན་ཟླ་མི་རིགས་ཀྱང་ཡིན། བསམ་གཟས་ནས་འོས་མེད་བཅའ་སྲོལ་ཞིག་གང་ན་ཡོད”ཅེས་ཡང་ཡང་ཟློ་བར་བྱེད།
འགྲིམ་འགྲུལ་དོན་རྐྱེན་ཆུང་ངུ་འདི་བྱུང་ནས་ལོ་གཅིག་འགོར་ནའང་། འདིས་རྟག་ཏུ་ང་ལ་བདེ་སྲུང་གི་གསལ་འདེབས་ཚ་བོ་ཞིག་བྱེད་བཞིན་ཡོད།
མི་ཚེ་ཐུང་ཐུང་ལ་ཚེ་སྲོག་གཅིག་མ་གཏོགས་མེད་པས། ང་ཚོས་འདི་ལ་མི་གཅེས་གང་ལ་གཅེས། ཁ་ལོ་བའི་འཛིན་ཡིག་ནི་ཟླ་བ་གཅིག་གཉིས་ཀྱི་དོན་དག་ཅིག་ཡིན་མོད། རླངས་འཁོར་གྱི་བདེ་འཇགས་ནི་ཚེ་གང་གི་དོན་དག་ཅིག་རེད། དེ་བས། ཁྱོད་རང་འཕྲུལ་འཁོར་གྱི་ཁ་ལོ་བ་ཞིག་བྱས་པ་ནས། འཇིག་རྟེན་གྱི་དོན་དག་ཆེས་ཆེ་ཤོས་འགྲིམ་འགྲུལ་བདེ་འཇགས་ཀྱི་འགན་འཁྲི་དེ་རང་གི་ཕྲག་སྟེང་ལ་དབབ་ཡོད་པ་ཤེས་པར་གྱིས་ཤིག
སྤྱི་ཁྱབ་ལྟ་སྐུལ་པ། དབང་གྲགས་ཚེ་རིང་།
