(དཀར་མཛེས) ཞོགས་ཉི།
ཚན་རྩལ་གྱི་རྦ་རླབས་བར་མེད་གཡོ་ཞིང་འཕྲུལ་ཆས་ཀྱིས་གནམ་ས་སྒུལ་བའི་དུས་འདིར། མི་རྣམས་ནི་དུས་རབས་ཀྱི་རླུང་ཁར་ཡན་པའི་འདོད་ཧམ་གྱི་མཇུག་མ་རིང་པོ་འདྲུད་མཁན་དེ་དང་། འཕྲུལ་ཆས་ཀྱི་པང་ན་གང་འདོད་དུ་རྩེན་པའི་བྱིས་པ་ཞིག་དང་མཚུངས་ཨང་།
གདོད་མར་ང་ཚོ་བོད་མི་རིགས་ཀྱི་འགྲིམ་འགྲུལ་ཡོ་བྱད་གཙོ་བོ་སྒོ་ཕྱུགས་ཀྱི་རིགས་ཡིན་ལ། འཚོ་བའི་ཆ་རྐྱེན་དེ་འདྲའི་འཛོམས་པོ་མིན་ནའང་། མི་རྣམས་དག་གཙང་གི་ཁོར་ཡུག་ན་ཆོག་ཤེས་ཀྱིས་འཚོ་བཞིན་ཡོད་ལ། འགྲིམ་འགྲུལ་ཡོ་བྱད་དག་ཀྱང་སྲོག་ལྡན་ཡིན་པས་བདེ་འཇགས་ཀྱི་ཚད་ཧ་ཅང་མཐོ།
ད་ལྟ་འཕྲུལ་ཆས་ཀྱིས་ཁ་ལོ་བསྒྱུར་བཞིན་པའི་དུས་རབས་འདིར། མི་རྣམས་ཀྱིས་སྲོག་མེད་ཀྱི་འཕྲུལ་འཁོར་ལ་བརྟེན་ནས་འཚོ་བའི་དགོས་མཁོ་སྐོང་བཞིན་ཡོད་མོད། འཕྲུལ་ཆས་ཀྱིས་བསླངས་པའི་ཆག་སྒོ་དག་གིས་ང་ཚོ་སྡུག་བསྔལ་གྱི་གཡང་ལ་འཕེན་གྱིན་ཡོད།
དེ་ནི་སྟོན་མཇུག་གི་སྡོང་ལོ་འཐོར་བའི་ས་སྲོད་ཅིག་ཡིན་ལ། ང་རང་ཕ་ཡུལ་དང་གྱེས་ནས་རྒྱང་རིང་གི་ལས་གནས་སུ་བསྐྱོད་པའི་ཉིན་གཉིས་པ་ཡིན། དར་རྩེ་མདོ་རུ་འབྱོར་ཞིང་ཐང་ཆེན་ཉེ་འགྲམ་གྱི་ཇ་ཁང་ཞིག་ཏུ་ཇ་ཁེར་འཐུང་བྱས་ནས་སྡོད་སྐབས་ཤིག་ལ། རྣ་ལ་གཟན་པའི་གཏམ་ངན་དེ་རླུང་འཚུབ་ཅིག་དང་འདྲ་བར་ངའི་གློ་སྙིང་མཆིན་གསུམ་བར་མེད་དུ་གཡོས་ལ། གློ་བུར་ང་རང་ཧ་ཅང་ཁེར་རྐྱང་དུ་གྱུར། ཆུང་ནས་འདྲིས་ཤིང་འགྲོགས་པའི་གྲོགས་པོ་ཞིག་གློ་བུར་རླངས་འཁོར་དོན་རྐྱེན་གྱིས་འདས་གྲོངས་སུ་གྱུར་སོང་བ་དེས། འཛོམས་པའི་གཉེན་གྲོགས་ནི་དངོས་གནས་ཚོང་འདུས་མགྲོན་པོ་དང་འདྲ་ཞིང་འཕྲུལ་ཆས་ནི་སྐབས་སྐབས་སུ་འུ་ཅག་གི་ཚེ་སྲོག་གི་གཤེད་མ་ཡིན་པའི་ངེས་ཤེས་རྙེད། དེ་བས། དེང་གི་དུས་ནི་ཚེ་སྲོག་ལག་ཟུང་གིས་བསྐྱོར་བའི་དུས་རབས་ཤིག་སྟེ། རླངས་འཁོར་ནི་འུ་ཅག་ལ་དང་ལུང་པ་བརྒལ་བྱེད་ཀྱི། སྐྱ་མོ་ལམ་དུ་བགྲོད་བྱེད་ཀྱི་མེད་དུ་མི་རུང་བའི་འཚོ་བའི་མཐུན་རྐྱེན་ཡག་པོ་ཞིག་ཏུ་ཆགས་ཡོད། ཡིན་ནའང་། རླངས་འཁོར་ནི་ལག་པ་ཐོགས་ཐོགས་ཀུན་གྱིས་ཁ་ལོ་བསྒྱུར་ཆོག་པ་ཞིག་དང་། རྐང་བ་ཡོད་ཚད་ཀུན་གྱིས་སྣུམ་སྒོ་ཕྱེ་ཆོག་པ་ཞིག་མིན་པར། དེ་ལ་ཚད་ལྡན་གྱི་ལག་རྟགས་དང་བྱང་ཆ་ལྡན་པའི་ལག་རྩལ། བློ་ལ་འབྱམས་པའི་རྒྱུན་ཤེས་སོགས་མེད་ན་ཚེ་སྲོག་ནི་སྐད་ཅིག་གི་མགྲོན་པོ་ཇི་བཞིན་རླངས་འཁོར་གྱི་རྩེད་ཆས་འབའ་ཞིག་ཡིན།
དེང་གི་ཆར། མང་པོ་ཞིག་གི་སྣང་ངོར་རྒྱུ་འབྱོར་བ་ཡོད་ན་རླངས་འཁོར་གང་འདོད་དུ་ཉོས་ཆོག་ལ། ཉོས་ནས་གང་འདོད་དུ་རྒྱུག་པ་དེའང་རྒྱུན་ལྡན་ལྟར་སྣང་། དེ་ལྟ་བུའི་གནས་ཚུལ་གྱི་འོག་ཏུ་མི་ཤི་རྟ་འགྱེལ་དང་མ་བུ་ཁ་བྲལ་གྱི་དོན་རྐྱེན་རྒྱུན་མི་ཆད་པར་བྱུང་གིན་འདུག་པས། འདི་ནི་ང་ཚོར་འགྲིམ་འགྲུལ་བདེ་འཇགས་ཀྱི་འདུ་ཤེས་མེད་པ་དང་གཙོ་ཕལ་གྱི་དབྱེ་བ་འབྱེད་པའི་བློ་མིག་ལྡོངས་སོང་བས་རེད།
ང་ཚོས་རྒྱུན་པར་ཉེན་རྟོག་པ་ཡོད་མེད་ལ་ལྟ་བ་ལས་ཚེ་སྲོག་གི་རིན་ཐང་ལ་བསམ་བློ་མི་གཏོང་བར། ཐ་ན་སྐྱོབ་ཐག་རྒྱག་རྒྱུ་ཙམ་ཡང་ཉེན་རྟོག་པའི་རྣམ་འགྱུར་ལ་ལྟ་བཞིན་པ་འདི་ནི་རང་ཉིད་ཉེན་ཁའི་གཡང་དུ་མཆོང་བཞིན་པ་ལས་ཉེན་རྟོག་པར་གྱོང་གང་ཡང་མེད།
ཨ་རག་གི་བཟི་ཁ་བཙན་པོས་འཕྲུལ་སྣང་གི་གཤོག་པ་སྤྲད་དེ་གཡང་དུ་མཆོངས་སོང་བ་མང་ལ། གཏི་མུག་གི་ཡོལ་བ་ནག་པོས་མིག་ཟུང་གི་སྒེའུ་ཁུང་བསྒྲིབས་ཏེ་འཇིག་རྟེན་ལ་གྱེས་ཕྱག་ཕུལ་བ་ཡང་ཡོད། མྱུར་ཚད་ཀྱི་སྣུམ་སྒོ་ཆེན་པོས་བང་རྩལ་གྱི་གོམ་ཁ་འགྲན་ཏེ་ཚེ་སྲོག་གི་རྫ་བུམ་ཆག་པའང་ཡོད་པས། འདི་དག་ཡོད་ཚད་ཀྱིས་ང་ཚོའི་བདེ་འཇགས་ཀྱི་འདུ་ཤེས་དང་ཚེ་སྲོག་ལ་བཟུང་བའི་རྣམ་འགྱུར་མཚོན་ཐུབ།
ལ་ལ་བྲེལ་འཚུབ་ཀྱིས་ལམ་ལ་ཆས་ནས་ཚེ་ཡི་སྐྱོབ་ཐག་རྒྱག་རྒྱུ་བརྗེད་འགྲོ་ལ། ལ་ལ་ཁ་པར་གྱི་འཆར་ངོས་ལ་ཅེར་ནས་སྲོག་གི་གཤེད་མ་ཐོན་པ་མ་ཚོར། འགའ་ཤས་ཁ་བརྡ་དང་གླེང་མོལ་ལ་མགོ་འཁོར་ནས་ལང་ཚོ་ལ་ཆག་གྲུམ་ཤོར་སོང་བ་མང་བས། མི་ལུས་གཡར་མ་འདི་ཡུན་དུ་བརྟན་ཆེད་གཟབ་ནན་གྱིས་ལམ་ལ་ཆས་ཏེ་བདེ་འཇགས་ཀྱིས་དམིགས་སར་འབྱོར་དགོས།
ཀྱེ། གྲོགས་པོ་ལགས། རྒྱུན་པར་ལམ་ལ་ཆས་མ་ཐག་ཏུ་ཚེ་སྲོག་ལག་པས་བསྐྱོར་ནས་འགྲོ་བཞིན་པའི་ཉེན་ཁ་ཡིད་ལ་དྲན་དགོས།
སྤྱི་ཁྱབ་ལྟ་སྐུལ་པ། དབང་གྲགས་ཚེ་རིང་།
