阿拉老底子每天呈送精彩文章一组
打开尘封的记忆，寻觅往昔的岁月
叙老底子事 忆老底子人
诉老底子情
来源：大上海小龙弄
作者：马尚龙
讲述：耕云、京剧猫
文字、语音审核：丁迪蒙
编辑：王乙其
老底子，也就是四十多年前，上海石库门弄堂里有人家结婚，酒水基本浪就摆勒石库门弄堂里，自家屋里就是新郎新娘搭仔双方父母加起来一两桌，更多个桌头，就摆勒弄堂个邻舍隔壁屋里向。
石库门个人欢喜勒石库门里办婚礼，勿是要显摆自家个上海味道，而是，呒没场化办婚礼呀，借勿到天，只好借地。
埃歇辰光上海还是邪气贫穷个，还呒没改革开放，社会个主人，也就是穷人。上海滩呒没几只饭店，普通老百姓也呒没铜钿到饭店消费个。到了上世纪七十年代，一大批青年到了谈婚论嫁个岁数。虽然上级领导部门提倡“移风易俗，办一个革命化个婚礼”，但是对于老百姓来讲，结婚总归要有明媒正娶个仪式感，老百姓个结婚仪式感，就是车嫁妆，办喜酒，发喜糖，一方是儿子讨老婆了，一方是囡儿嫁出去了。只是彼此侪老穷个，饭店呢也呒没开放办喜酒。
京剧猫
搿个辰光，石库门弄堂办喜酒个两大优势就显现出来了。第一大优势是石库门邻里之间侪蛮亲近，欢喜做热心事体，勿像公寓房子个邻居搿能有文化，像煞有介事；第二大优势是石库门虽然一户一户分门进出，但是每只楼层侪是比邻，侪可以派用场。
比方讲15号张家儿子要结婚了，只要算清爽有几化人来吃喜酒，总归会得有最热心，也是最搞得定个人毛遂自荐运筹帷幄。隔壁老王前客堂可以摆两桌，对面张木匠可以摆一桌，圆台面有几只摆几只，勿够就是方台子配长凳，也好坐八个人了。搿能介一来，酒席真个是要从弄堂口摆到弄堂笃底了。哪能有介许多亲亲眷眷？弄堂里邻舍隔壁也要算进去个呀，人家出地方个出地方，借圆台面个借圆台面，单位食堂师傅来掌勺了，啥人家好勿请伊？
耕云
新郎新娘也勿像现在搿能高大上，赛过是王子公主个婚礼，也呒没婚庆司仪，更呒没五点十八分二十八分开席个做法，人坐齐了就开吃，图个是闹猛。菜是家常个菜，有鱼有肉，有足够个量就好了，真要是啥冷菜味道好，抢光了，主人是会来添个，比方讲鳗鲞抢光了，再加点。水笋烤肉吃光了，也再加点。当然加上来个，质量就要推板一眼了，鳗鲞是尾巴部位，水笋烤肉侪是水笋。除脱仔摆勒自家屋里个一两桌，还有敬酒个仪式，弄堂喜酒吃好算数。闹新房，搿是要到新房里再闹了。
京剧猫
石库门喜酒最大个亮点是，新郎新娘“近亲结婚”概率老高个。勿是血缘浪个近，而是邻里浪个近。3号个王家儿子搭18号二层阁刘家个囡儿结婚了，算勿算近亲结婚呢？石库门侪是知根知底个，人好人坏看勒眼睛里，而且互相之间亲和随便，甚至隔壁弄堂也是面熟陌生。少男少女眉来眼去，要么就自家好上了，要么弄堂里个红娘来介绍了，一条弄堂里，或者是隔壁弄堂里，经济条件侪差勿多，阿伯勒勒啥个厂里向做啥，拿几化工资，勿是啥秘密，屋里有几个阿弟阿妹，将来结婚阿有亭子间，或者后楼，或者可以搭阁楼，介绍辰光，就讲得清清爽爽，要想吹牛也吹勿响。人看中了，爷娘也看中了，成功率邪气高。
耕云
特别是经过一个夏天乘风凉，夜里勒弄堂里摆开躺椅，青年男女抬头看星星，低头谈恋爱，总归有几对有苗头了。到了开年，也就要办喜酒了。乘风凉夹带男女情。顺带便讲一句，也有辰光，姘头轧发轧发也就轧出来了。邻居男女，隔壁私情。不过用现在个标准来看，大多数个“勿正当男女关系”，实际浪也呒啥事体个，就是比较讲得拢。
京剧猫
近实在是近，12号个黄家阿六头，讨了28号个张家妹妹。从前，嫁妆就是勒弄堂里向搬过去了，新娘子也就是走过去了。后首来条件好了一眼，嫁妆还是直接搬过去了，但是新娘子过门，有点小小个排场了。新娘子勿往婆家屋里走，而是走到弄堂口，已经有差头停勒海，是新郎来接。上仔婚车，到热闹个地方兜一圈，又回到了弄堂口，新郎新娘走进弄堂，也算是乘过婚车了。耕耘
耕耘
改革开放前，上海石库门婚礼就是搿能勿像腔。要讲拨石库门，拨上海人，乃至拨中国内地老百姓带来好日脚个，只有改革开放。之前个日脚？勿谈了！
京剧猫
石库门“近亲结婚”，勒上海属于稳定性最强个婚姻。一是双方个家庭彼此熟悉，三观也接近，二是，即使婚后勿开心，要想离婚，整条弄堂个阿姨妈妈侪是自告奋勇来做思想工作个“老娘舅”，离婚比登天还难。
作者：马尚龙
讲述：耕云、京剧猫
丁迪蒙，启迪蒙昧者也。上海市人。原上海大学中文系教师，多年来一直致力于沪语和海派文化的传承。
沪语是吴方言的代表方言，是吴侬软语的典范。她既可以用来拉家常，也同样可以用来朗读各类诗歌散文。
沪语完全可以书写，同粤语可以写作是一样的。本平台所有文章都是经过改写后，用沪语来演绎的，汉字书写也是正确的。
丁迪蒙所撰写的，与沪语相关的著作主要有：
《学说上海话》上海科技文献出版社
《听听说说上海话》少年出版社
《实用沪语》复旦大学出版社
《上海话绕口令》少儿出版社
《上海方言词语使用手册》上海教育出版社
《上海话读成语故事》少儿出版社
《囡囡学童谣》，少儿出版社。
转自：“海上梦叠”公众号
我知道你在看哟~
