阿拉老底子每天呈送精彩文章一组
打开尘封的记忆，寻觅往昔的岁月
叙老底子事 忆老底子人
诉老底子情
作者：袁卫东
沪语改写：郭莉
讲述：沈珊明
文字、语音审核：丁迪蒙
编辑：王乙其
2003年夏天介，我应聘进了上海个一家报社，从事新闻工作，地点就勒徐家汇。讲起来我是盐城射阳人，但是屋里个祖籍是南通海门，也属于“吴语区”个，交关语音、腔调、侪搭上海闲话接近，因此，我当时学上海闲话个基础条件搭仔“学习环境”侪勿错。
也是巧，我迭个人有个特别爱好，就是欢喜学地方方言。从前勒青岛当兵，我就常庄跟山东、河南个战友学伊拉个家乡语言。所以勒报社里，我就存心去寻几位本地老师搭腔，一度还有个别同事当是我是勒“巴结”前辈老师唻。
其实，开始辰光我也勿大好意思主动开口个，常怕拨人家讨惹厌。但几位老师倒是鼓励我、指导我，我勿再顾虑，勿到半年就基本可以搭同事用“洋泾浜”个“苏北上海话”去交流了。后来，我慢慢叫发展到社会浪，勒报亭、商店等公共场合，也好“自信心爆棚”，去搭上海人搭腔了。顶结棍个，就是我外出采访，也敢全程用上海闲话开展工作，完全拿自家当成“道地上海人”了。
老实讲，廿一世纪初，上点年纪个“老上海人”多少还是有点“排外思维”个，伊拉还是觉着“外地人”素质勿高，心里对外地人呒啥好感。所以，尽管我个“上海闲话”进步明显，可以以假乱真，但真个碰到年纪大点个上海本地“老阿姨、老爷叔”，还是有点心虚个，稍微有两句勿对头，马上就“落荒而逃”了，独怕自家出洋相尴尬。
不过，学会上海闲话毕竟还是有交关优势个，至少有种“亲近感”，常庄会得带来工作、生活浪个各种便利。
自从学了眼上海闲话，我就觉着自家个生活圈里，一记头多出了交关“老乡”，也增添了勿少“喜剧色彩”。有趟到湖北恩施参加地方旅游节采访，下山回程邪气衰瘏，正好跟一群讲上海闲话个“中年旅游团”同行，马上觉着特别个亲切，腰勿酸，脚也勿痛了，回到宾馆浑身轻松。侬讲，搿种“乡音”力量，阿是蛮结棍个啊？
还有一年到泰国去旅游，勒芭堤雅海边碰到一对上海老年夫妻，天腿热，伊拉个水壶里水没了，我主动拿两瓶矿泉水拨伊拉，听我也讲上海闲话，老夫妻穷讲唻：“是阿拉上海人啊”。后首来晓得我其实并勿是上海人，伊拉又有眼感动了：“还是中国人好呀！”我倒是熬勿牢笑出来了。
勒上海生活了十二年，后来离开了迭座城市，讲上海闲话个语境虽然呒没了，但是无论走到啥地方，只要碰着上海人，我还是毫勿犹豫，拿并勿标准个上海闲话大胆讲起来，迭个也算是勒怀念自家“曾经也是上海人”个一份特殊个情感伐！
讲述：沈珊明
丁迪蒙，启迪蒙昧者也。上海市人。原上海大学中文系教师，多年来一直致力于沪语和海派文化的传承。
沪语是吴方言的代表方言，是吴侬软语的典范。她既可以用来拉家常，也同样可以用来朗读各类诗歌散文。
沪语完全可以书写，同粤语可以写作是一样的。本平台所有文章都是经过改写后，用沪语来演绎的，汉字书写也是正确的。
丁迪蒙所撰写的，与沪语相关的著作主要有：
《学说上海话》上海科技文献出版社
《听听说说上海话》少年出版社
《实用沪语》复旦大学出版社
《上海话绕口令》少儿出版社
《上海方言词语使用手册》上海教育出版社
《上海话读成语故事》少儿出版社
《囡囡学童谣》，少儿出版社。
转自：“启迪心田沪语”公众号
我知道你在看哟~
