ཞིང་ཆེན་ཏང་ཨུའི་རྒྱུན་ལས་ཨུ་ཡོན་ལྷན་ཁང་གིས་རྒྱས་འཛོམས་གྲོས་ཚོགས་བསྡུས།

ཟླ1ཚེས10ཉིན། ཞིང་ཆེན་ཏང་ཨུའི་རྒྱུན་ལས་ཨུ་ཡོན་ལྷན་ཁང་གིས་རྒྱས་འཛོམས་གྲོས་ཚོགས་བསྡུས་ཏེ། མཚོ་སྔོན་ཞིང་ཆེན་ཏང་ཨུའི་རྩ་འཛུགས་པུའུ་ཡིས2024ལོའི་ལོ་ཧྲིལ་བོའི་ཏང་ཨུ་དང་ཏང་ཙུའུ་ཧྲུའུ་ཅིས་གཞི་རིམ་གྱི་ཏང་འཛུགས་བྱ་བ་དམ་འཛིན་བྱས་པའི་སྐོར་གྱི་གནས་ཚུལ་སྙན་ཞུ་བྱས་པར་ཉན་པ་དང་། གྲོང་ཁྱེར་དང་ཁུལ་སོ་སོའི་ཏང་ཨུའི་ཧྲུའུ་ཅི་དང་། ཞིང་ཆེན་ཏང་ཨུས་མངགས་གཏོང་བྱས་པའི་ཏང་གི་ལས་དོན་ཨུ་ཡོན་ལྷན་ཁང་གི་ཧྲུའུ་ཅི། ཞིང་ཆེན་ཐད་གཏོགས་འབྲེལ་ཡོད་ལས་ཁུངས་ཀྱི་ཏང་ཙུའུ་ཧྲུའུ་ཅི་བཅས་ཀྱིས2024ལོའི་ལོ་ཧྲིལ་བོར་གཞི་རིམ་གྱི་ཏང་འཛུགས་བྱ་བ་དམ་འཛིན་བྱས་ཚུལ་དང་། ཏང་སྲོལ་སྲིད་གཙང་འཛུགས་སྐྲུན་ལག་བསྟར་བྱས་པ། འདུ་ཤེས་འཛིན་སྟངས་བྱ་བའི་འགན་འཁྲིའི་ལམ་ལུགས་དངོས་འབེབས་བྱས་ཚུལ་བཅས་ཀྱི་འགན་སྒྲུབ་སྙན་ཞུ་ཕུལ་བར་ཉན་ནས་དཔྱད་འཇོག་བྱས། ཞིང་ཆེན་ཏང་ཨུའི་ཧྲུའུ་ཅི་ཝུའུ་ཞའོ་ཅུན་གྱིས་མགོ་འཛིན་བྱས་ཏེ་གདེང་འཇོག་གཏམ་བཤད་བྱས། ཞིང་ཆེན་ཏང་ཨུའི་ཧྲུའུ་ཅི་གཞོན་པ། ཧྲིན་ཀྲང་ཚབ་མ་ལའོ་ཏུང་ཁྲོན་དང་། ཞིང་ཆེན་སྲིད་གྲོས་ཀྱི་ཀྲུའུ་ཞི་མགོན་པོ་བཀྲ་ཤིས་གྲོས་ཚོགས་སུ་ཞུགས། ཀྲུང་དབྱང་རྩ་འཛུགས་པུའུ་རྩ་འཛུགས་ཅུའུ་གཉིས་པའི་ཅུའུ་ཀྲང་གཞོན་པ་ཡའོ་ཡོན་གྱིས་རང་ཞིང་གི་ཏང་ཨུ་དང་ཏང་ཙུའུ་ཧྲུའུ་ཅིས་གཞི་རིམ་ཏང་འཛུགས་དམ་འཛིན་བྱས་པའི་འགན་སྒྲུབ་དཔྱད་འཇོག་བྱ་བར་མཛུབ་སྟོན་བྱས།

ཚོགས་ཐོག་ཏུ། གྲོང་ཁྱེར་དང་ཁུལ་སོ་སོའི་ཏང་ཨུའི་ཧྲུའུ་ཅིས་རིམ་པ་བཞིན་འགན་སྒྲུབ་སྙན་ཞུ་ཕུལ། ཞིང་ཆེན་ཏང་ཨུས་མངགས་གཏོང་བྱས་པའི་ཏང་གི་ལས་དོན་ཨུ་ཡོན་ལྷན་ཁང་གི་ཧྲུའུ་ཅི་དང་། ཞིང་ཆེན་ཐད་གཏོགས་འབྲེལ་ཡོད་ལས་ཁུངས་ཀྱི་ཏང་ཙུའུ་ཧྲུའུ་ཅིས་ཡིག་ཐོག་ནས་འགན་སྒྲུབ་སྙན་ཞུ་ཕུལ། ཝུའུ་ཞའོ་ཅུན་གྱིས་དཔྱད་འཇོག་ཁྲོད་གྲུབ་འབྲས་ལ་ཁས་ལེན་དང་གནད་དོན་ཕྱིར་འདོན་བྱས་ལ། རྒྱུ་རྐྱེན་ལ་དབྱེ་ཞིབ་བྱས་ནས་བླང་བྱ་གསལ་བོ་བཏོན། ཝུའུ་ཞའོ་ཅུན་གྱིས་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་ཏང་གི་འཛུགས་སྐྲུན་བྱ་བའི་དགོངས་པ་གལ་ཆེན་སློབ་སྦྱོང་དང་ལག་བསྟར་གཏིང་ཟབ་བྱེད་པ་དང་། བློ་བརྟན་འགྱུར་མེད་སྒོས་སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་མཛུབ་སྟོན་གནང་བའི་ཁ་ཕྱོགས་སུ་མདུན་སྐྱོད་བྱས་ཏེ། ཞིང་ཆེན་གོང་འོག་ཡོངས་ལ་མཐུན་སྒྲིལ་སྣེ་ཁྲིད་ཀྱིས་གཏན་ཕབ་གཉིས་ཀྱི་ཐག་གཅོད་རང་བཞིན་གྱི་དོན་སྙིང་ལ་གོ་བ་ཟབ་མོ་ལེན་པ་དང་སྲུང་སྐྱོང་གཉིས་མཐའ་གཅིག་ཏུ་སྒྲུབ་པ། སྤྱི་ཁྱབ་ཧྲུའུ་ཅིའི་གཅེས་སེམས་དང་ཐུགས་ཁུར་གནང་བ་དེ་གྲུབ་འབྲས་དངོས་དང་ཕན་འབྲས་དངོས་སུ་འགྱུར་བར་བྱས་ནས། གཞི་རིམ་གྱི་ཏང་འཛུགས་བྱ་བ་དང་། ཏང་སྲོལ་སྲིད་གཙང་འཛུགས་སྐྲུན། འདུ་ཤེས་འཛིན་སྟངས་བཅས་ཀྱི་ཐད་ནས་གྲུབ་འབྲས་གསར་པ་ལེན་པར་སྐུལ་འདེད་གཏོང་དགོས་ཞེས་བསྟན།

ཝུའུ་ཞའོ་ཅུན་གྱིས་གཞི་རིམ་དམ་འཛིན་དང་རྨང་གཞི་བརྟན་གཏོང་། གཞི་རྩ་སྲ་བརྟན་བཅས་ལ་དམིགས་ཏེ། གཞི་རིམ་ཏང་རྩ་འཛུགས་ཀྱི་འཐབ་འཛིན་བཙན་རྫོང་དང་ཏང་ཡོན་གྱི་གདོང་མཆོང་དཔེ་སྟོན་གྱི་བྱེད་ནུས་འདོན་སྤེལ་གང་ལེགས་བྱས་ནས། སྡེ་བ་རིམ་པའི་མགོ་ཁྲིད་པའི་འདེམ་སྒུག་པ་ཕུལ་བྱུང་ཅན་གསོ་སྐྱོང་དང་གསོག་འཇོག་བྱེད་དགོས་ལ། ཁེ་ལས་གཉིས་དང་གསར་པ་གསུམ་ཁྱབ་ཁོངས་ཀྱི་ཡོངས་ཁེབས་གཉིས་མཐོར་འདེགས་གཏོང་བ་དང་། ཏང་ཡོན་སློབ་གསོའི་ཁ་གཏད་རང་བཞིན་དང་དངོས་ཕན་རང་བཞིན་དངོས་སུ་ཇེ་དྲག་ཏུ་གཏོང་བ། གཞི་གདངས་ནན་མོ་དང་བྱེད་ཐབས་ནན་མོ། རྣམ་པ་གཟབ་ནན་བྱ་རྒྱུ་དེ་ཏང་རྩ་འཛུགས་ཀྱི་རང་རྟོགས་འདུ་ཤེས་སུ་འགྱུར་བར་བྱེད་པ་དང་། ཁྱབ་ཁོངས་སོ་སོའི་ཏང་ཡོན་རྣམས་དེང་རབས་ཅན་གྱི་མཚོ་སྔོན་གསར་པའི་འཛུགས་སྐྲུན་ཁྲོད་ཧུར་ཐག་གིས་ཞུགས་ནས། དོན་དངོས་འགུལ་སྐྱོད་ལ་བརྟེན་ནས་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་དྲིན་འཇལ་བ་དང་ཏང་ཀྲུང་དབྱང་གི་དྲིན་འཇལ་དགོས། ཏང་གི་ཆབ་སྲིད་འཛུགས་སྐྲུན་གྱིས་གཅིག་འདོམས་བྱེད་པ་རྒྱུན་འཁྱོངས་བྱས་ཏེ། ཏང་གི་སྒྲིག་ཁྲིམས་སློབ་སྦྱོང་སློབ་གསོའི་གྲུབ་འབྲས་སྲ་བརྟན་དང་གཏིང་ཟབ་ཏུ་གཏོང་བ་དང་། ལྷོད་གཡེང་མེད་པར་སྤྱོད་ངན་བཞིའི་རྣམ་པ་གསར་པ་སེལ་བར་བྱེད་པ། ཕྱོགས་ཡོངས་ནས་ཏང་བཅོས་སྐྱོང་ནན་མོ་བྱེད་པའི་སྤྱིའི་འགན་འཁྲི་དང་ལྟ་སྐུལ་འགན་འཁྲི་ཤུགས་དྲག་ཏུ་གཏོང་བ། དོ་དམ་ལྟ་སྐུལ་ནན་མོ་དང་སྐུལ་འདེད་ཁག་ཁུར་གྱི་བྱེད་ཕྱོགས་གཅིག་གྱུར་ཡོང་བར་བྱས་ཏེ་ཏང་ཡོན་གྱིས་སྒྲིག་སྲོལ་བརྩི་སྲུང་བྱེད་པའི་ཁྲོད་བཅོས་སྒྱུར་མཁྲེགས་གཏོར་དང་སྤུས་ཚད་མཐོ་བའི་འཕེལ་རྒྱས་ལ་སྐུལ་འདེད་གཏོང་ཐུབ་པར་བྱེད་དགོས། ཏང་གི་གསར་གཏོད་གཞུང་ལུགས་ཀྱིས་བློ་སྒྲིལ་སེམས་སྐྱེད་བྱེད་པ་རྒྱུན་འཁྱོངས་བྱས་ཏེ། འདུ་ཤེས་འཛིན་སྟངས་ཀྱི་བདེ་འཇགས་སྐུད་ཐག་དུས་ནམ་ཡང་དམ་པོར་བསྡམས་དགོས་ལ། ཚད་མཐའི་བསམ་བློ་དམ་པར་བྱེད་པ་དང་འཐབ་རྩོད་ཀྱི་འཇོན་ནུས་ཇེ་མཐོར་གཏོང་བ། འདུ་ཤེས་འཛིན་སྟངས་ཀྱི་གནས་ཡུལ་དོ་དམ་བཟང་པོ་དང་སྟོབས་ལྡན་དུ་གཏོང་བ་དང་འདུ་ཤེས་འཛིན་སྟངས་བྱ་བའི་འགན་འཁྲིའི་ལམ་ལུགས་ཕྱོགས་ཡོངས་ནས་དངོས་འབེབས་བྱས་ནས། ས་ཁོངས་སྲུང་བའི་འགན་འཁྲི་ཡོད་པ་དང་ས་ཁོངས་སྲུང་བའི་འགན་འཁྲི་ཁུར་བ། ས་ཁོངས་སྲུང་བའི་འགན་འཁྲི་སྒྲུབ་པ་བཅས་བྱས་ཏེ་ཏང་གི་འདུ་ཤེས་འཛིན་སྟངས་བྱ་བའི་ཐད་ཀྱི་མགོ་ཁྲིད་དབང་ཆ་ཁོང་དུ་དམ་པོར་ཆུད་པར་བྱེད་དགོས་ཞེས་ནན་གྱིས་བསྟན།

ཡའོ་ཡོན་གྱིས་མཚོ་སྔོན་ཞིང་ཆེན་གྱིས་གཞི་རིམ་ཏང་འཛུགས་བྱ་བའི་ཐད་ནས་བླངས་པའི་གྲུབ་འབྲས་ལ་ཁས་ལེན་གང་ལེགས་བྱས་ཏེ་བསྟན་དོན། འདས་པའི་ལོ་གཅིག་གི་རིང་ལ། མཚོ་སྔོན་ཞིང་ཆེན་ཏང་ཨུ་དང་རིམ་པ་སོ་སོའི་ཏང་རྩ་འཛུགས་ཀྱིས་ཞི་ཅིན་ཕིང་གི་དུས་རབས་གསར་པའི་ཀྲུང་གོའི་ཁྱད་ཆོས་ཀྱི་སྤྱི་ཚོགས་རིང་ལུགས་དགོངས་པ་དང་སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་མཚོ་སྔོན་གྱི་བྱ་བའི་ཐད་གནང་བའི་མཆན་བཀོད་མཛུབ་སྟོན་གལ་ཆེན་གྱི་དགོངས་དོན་མཛུབ་སྟོན་དུ་བྱེད་པ་རྒྱུན་འཁྱོངས་བྱས་ཏེ། དུས་རབས་གསར་པའི་ཏང་གི་རྩ་འཛུགས་ལམ་ཕྱོགས་ཕྱོགས་ཡོངས་ནས་ལག་བསྟར་དང་། གཞི་རིམ་ནན་འཛིན་གྱི་ཁྲིད་ཕྱོགས་གསལ་བོ་རྒྱུན་འཁྱོངས་བྱས་ཤིང་། ཏང་གི་སྒྲིག་ཁྲིམས་སློབ་སྦྱོང་སློབ་གསོ་གཏིང་ཟབ་ཏུ་སྤེལ་བར་སྐུལ་འདེད་ཏན་ཏིག་བཏང་བ་དང་། ཏང་འཛུགས་དམ་འཛིན་བྱས་ནས་གྲོང་གསེབ་དར་སྤེལ་ལ་སྐུལ་འདེད་གཏོང་བའི་བྱ་བར་སྐུལ་འདེད་ནུས་ལྡན་བཏང་ཞིང་། ཏང་འཛུགས་ཀྱིས་སྣེ་ཁྲིད་ནས་གཞི་རིམ་བཅོས་སྐྱོང་གི་ཕན་ནུས་རྒྱུན་ཆད་མེད་པར་མཐོ་རུ་བཏང་བ་དང་། ཞིང་ཆེན་ཐད་གཏོགས་ལས་ཁུངས་ཀྱི་སྟོབས་ལྡན་བཞིའི་ཏང་ཀྲི་པུའུ་འཛུགས་སྐྲུན་ལ་རྒྱུན་མཐུད་ངང་སྐུལ་འདེད་བཏང་ནས། དེང་རབས་ཅན་གྱི་མཚོ་སྔོན་གསར་པ་བསྐྲུན་ཆེད་རྩ་འཛུགས་ཀྱི་འགན་སྲུང་བརྟན་པོ་འདོན་སྤྲོད་བྱས་ཡོད། 2025ལོར་གཞི་རིམ་ཏང་འཛུགས་བྱ་བས་རྒྱལ་དོན་གྱི་ཆེ་ཕྱོགས་དང་ཏང་གི་ཇུས་ཆེན་སེམས་སུ་ཉར་ནས། ཆབ་སྲིད་སྣེ་ཁྲིད་དང་ཞབས་ཞུ་བཅོས་སྒྱུར། གཙོ་གནད་འགག་སྒྲོལ། དངོས་འབེབས་དམ་འཛིན་བཅས་ཀྱི་སྟེང་ནུས་ཤུགས་ཡོད་རྒུ་འདོན་པ་དང་། ཏང་གི་ཆབ་སྲིད་དགེ་མཚན་དང་རྩ་འཛུགས་དགེ་མཚན་དེ་བཅོས་སྒྱུར་ཕྱོགས་ཡོངས་ནས་སྔར་ལས་ཟབ་སྤེལ་བྱེད་པ་དང་། ཀྲུང་གོའི་ལུགས་ཀྱི་དེང་རབས་ཅན་ལ་སྐུལ་འདེད་གཏོང་བའི་སྟོབས་ཤུགས་ཆེན་པོ་རུ་འགྱུར་བར་བྱེད་དགོས་ཞེས་བསྟན།

མཚོ་སྔོན་ཞིང་ཆེན་གྱི་ཏང་ཨུ་དང་ཏང་ཙུའུ་ཡི་མགོ་ཁྲིད་གཙོ་བོ་དང་མགོ་ཁྲིད་ཚན་ཁག་གི་ཁོངས་མིའི་འགན་འཁྲི་གཙང་སྒྲུབ་ཀྱི་བྱེད་ཐབས་གཞིར་བཟུང་སྟེ། འབྲེལ་ཡོད་ལས་ཁུངས་དང་སྡེ་ཁག་ཏང་ཙུའུ་ཡི་འགན་ཁུར་བློ་མཐུན་གཙོ་བོས་ཡིག་ཐོག་ནས་འགན་སྒྲུབ་སྙན་ཞུ་ཕུལ།

ཞིང་ཆེན་ཏང་ཨུའི་རྒྱུན་ལས་ཨུ་ཡོན་དང་། ཞིང་ཆེན་དམངས་ཆེན་རྒྱུན་ལས་ཨུ་ཡོན་ལྷན་ཁང་དང་ཞིང་ཆེན་སྲིད་གཞུང་། ཞིང་ཆེན་སྲིད་གྲོས་བཅས་ཀྱི་ཏང་ཡོན་མགོ་ཁྲིད་བློ་མཐུན། ཞིང་ཆེན་ཁྲིམས་ཁང་དང་ཞིང་ཆེན་ཞིབ་དཔྱོད་ཁང་གི་ཏང་ཙུའུ་ཧྲུའུ་ཅི་གྲོས་ཚོགས་སུ་ཞུགས། ཞིང་ཆེན་སྲིད་གཞུང་གི་དྲུང་ཡིག་ཆེན་མོ་དང་། ཞིང་ཆེན་ཏང་ཨུ་དང་ཞིང་ཆེན་སྲིད་གཞུང་གི་འབྲེལ་ཡོད་དྲུང་ཡིག་ཆེན་མོ་གཞོན་པ། ཞིང་ཆེན་ཏང་ཨུའི་ཏང་འཛུགས་བྱ་བའི་མགོ་ཁྲིད་ཚན་ཆུང་གི་ཁོངས་མི། ཞིང་ཆེན་ཐད་གཏོགས་འབྲེལ་ཡོད་ལས་ཁུངས་དང་གྲོང་ཁྱེར་དང་ཁུལ་སོ་སོའི་འབྲེལ་ཡོད་སྡེ་ཁག་གི་འགན་ཁུར་བློ་མཐུན་གཙོ་བོ། འཐུས་མི་གཉིས་དང་ཨུ་ཡོན་གཅིག་དང་གཞི་རིམ་གྱི་ཏང་ཡོན་ལས་བྱེད་མང་ཚོགས་ཀྱི་འཐུས་མི་ཁ་ཤས། མཚོ་སྔོན་དུ་སྡོད་པའི་ཀྲུང་དབྱང་གི་སྨྱན་བྱད་ལས་ཁུངས་ཀྱི་འགན་ཁུར་བློ་མཐུན་གཙོ་བོ་བཅས་གྲོས་ཚོགས་སུ་ཞུགས།

རྩོམ་སྒྲིག་པ། སྐལ་བཟང་རྣམ་རྒྱལ།    

 རྩོམ་སྒྲིག་འགན་ཁུར་པ། བསོད་ནམས་ཚེ་རིང་། 

གཡང་འབུམ་རྒྱལ།

དོ་དམ་པ། བསོད་ནམས་དོན་འགྲུབ།

ལྟ་སྐུལ་པ། ཕྱུག་ལོ།

སྤྱི་ཁྱབ་ལྟ་སྐུལ་པ། དབང་གྲགས་ཚེ་རིང་།