![]()
![]()
ཕ་མ་ཚེ་ལས་འདས། ཕུ་ནུ་ནང་དམེ་བྱུང་།ཕ་མ་གཉིས་ཀ་ཚེ་ལས་འདས། །
ཕ་ལོའི་ཁང་པ་ཇི་ལྟར་བགོ། །
མ་ལོའི་གསོག་དངུལ་སུ་ལ་སྟེར། །
ཕུ་ནུ་བར་ལ་ནང་དམེ་བྱུང་། །
སྤྱིར་ན་མ་ཁོག་གཅིག་བརྒྱུད་པའི་ཕུ་ནུ་མིང་སྲིང་དག་ལ་མཚོན་ན། མཛའ་བརྩེའི་འོ་ཆུ་གཅིག་ཏུ་འདྲེས་པ་ལྟར་སྡུག་གི་ཁུར་བོ་མཉམ་ཁུར་དང་སྐྱིད་ཀྱི་རྟ་ཕོར་མཉམ་དུ་ཞོན་ན་འགྲིག་མོད། འོན་ཀྱང་ཕུ་ནུ་གཉིས་ཀྱིས་ཕ་མ་གཉིས་ཀ་ཚེ་ལས་འདས་རྗེས་ཤུལ་བཞག་རྒྱུ་ནོར་ཐད་ཨ་ཕའི་ཁང་པ་ཇི་ལྟར་བགོ། ཨ་མའི་གསོག་དངུལ་སུ་ལ་སྟེར་ཞེས་རྩོད་པ་རྫོགས་རྒྱུ་མེད་པ་བྱུང་ནས་ཁྲིམས་ཁང་དུ་སོང་།ཉེ་ཆར། མཚོ་ཤར་གྲོང་ཁྱེར་ལོའུ་ཏུའུ་ཆུའུ་མི་དམངས་ཁྲིམས་ཁང་གིས་གྱོད་གཞི་དེར་ཡོངས་བསྒྲགས་ངང་འདྲི་གཅོད་བྱས་ཏེ་བཅད་ཁྲ་ཁྱབ་བསྒྲགས་བྱས་པ་རེད།![]()
ལིན་ཀྲེང་དང་ཀྲའོ་དབྱིན་བཟའ་ཟླ་གཉིས་འཚོ་བཞུགས་སྐབས་མཚོ་ཤར་གྲོང་ཁྱེར་ལོའུ་ཏུའུ་ཆུའུ་རུ་བསྡད་ཡོད་ཅིང་།
བུ་གཉིས་ཡོད་ལ་ཕུ་བོ་ལིན་ཝུན་ད་ལོར་ལོ51ཡིན་པ་དང་ནུ་བོ་ལིན་ཝུའུ་ལོ49ལ་བུད་ཡོད།
ཕུ་ནུ་གཉིས་ཀྱིས་ཆུང་དུས་ནས་ཕ་མ་དང་མཉམ་དུ་འཚོ་བ་རོལ་ཅིང་རྗེས་སུ་རང་རང་ས་ནས་གཉེན་བསྒྲིགས་ཏེ་འཁོར་བ་བསྐྱངས།
ལོ་བཅུ་ལྷག་གི་སྔོན་ལ་ཕ་རྒན་ལིན་ཀྲང་ཚེ་ལས་འདས། ཕ་རྒན་གྱིས་སྔོན་ཆད་ནས་བཟུང་ཁ་ཆེམས་ཤིག་བཞག་ཡོད་ཅིང་།
ཁོ་ཚེ་ལས་འདས་རྗེས་ཁང་པ་དེ་བུ་གཉིས་ལ་ཐུན་མོང་དུ་དབང་བར་བྱས།ལིན་ཀྲེང་ཚེ་ལས་འདས་རྗེས། ཁང་པ་དེར་ཨ་མ་ཀྲའོ་དབྱིན་བསྡད་ནས་བེད་སྤྱོད་བྱས།2013ལོར། ཁང་རྙིང་བཤིག་སྤོ་བྱས་ནས་སྡོད་ཁང་གསར་པ་ཞིག་བཀོད་སྒྲིག་བྱས་ཤིང་།
ནུ་བོ་ལིན་ཝུའུ་གཉེན་འཐོར་རྗེས་རང་གི་བུ་ཁྲིད་དེ་ཨ་མ་དང་མཉམ་དུ་ཁང་པ་གསར་པ་རུ་བསྡད།2022ལོའི་ཟླ10པར།
མ་ལོ་ཚེ་ལས་འདས་ཤིང་གསོག་དངུལ་སྒོར་ཁྲི30ལྷག་བསྐྱུར།
ཕུ་བོ་ལིན་ཝུན་གྱིས་ཨ་མ་ཚེ་ལས་འདས་རྗེས་ནུ་བོར་སེམས་སྡུག་ཙམ་ཡང་མེད་པར་མ་ཟད། ད་དུང་ཕ་མ་གཉིས་ཀྱིས་བཞག་པའི་ཁང་པ་དང་གསོག་དངུལ་སྒོར་ཁྲི30ལྷག་བགོ་མི་འདོད་པར་སྙམ་ནས་གཏུག་ཡིག་ཅིག་གིས་ནུ་བོ་ཁྲིམས་ཁང་ལ་གཏུག![]()
2024ལོའི་ཟླ4པའི་ཚེས18ཉིན།
མཚོ་ཤར་གྲོང་ཁྱེར་ལོའུ་ཏུའུ་ཆུའུ་མི་དམངས་ཁྲིམས་ཁང་གིས་ཡོངས་བསྒྲགས་ངང་ཁྲིམས་ར་འཚོགས་ནས་གྱོད་གཞི་དེར་ཞིབ་གཅོད་བྱས་པ་རེད།
འདྲི་གཅོད་བྱེད་སྐབས། གཏུག་མཁན་ཏེ་ཕུ་བོ་ལིན་ཝུན་གྱིས“2011ལོའི་ཟླ5པའི་ཚེས8ཉིན།
ཕ་རྒན་ཚེ་ལས་འདས་ཤིང་། ཁོ་རང་ཚེ་ལས་མ་འདས་གོང་དུ་རང་མིང་འོག་གི་ཁང་པ་དེ་གྲོས་མཐུན་གྱི་རྣམ་པའི་ཐོག་ནས་ངེད་ཕུ་ནུ་གཉིས་ལ་བགོས་པ་དང་།
རྗེས་སུ་ཁང་པ་དེར་ཐོག་མཐའ་བར་གསུམ་དུ་ཨ་མ་བསྡད་ནས་བེད་སྤྱོད་བྱས། 2022ལོའི་ཟླ10པའི་ཚེས24ཉིན།
ཨ་མ་འགོག་ཐབས་མེད་པའི་ནད་ཀྱི་དབང་གིས་ཚེ་ལས་འདས། ང་རང་འདས་མཆོད་བྱ་བར་ཞུགས་མ་ཐུབ་པས་སྡུག་བསྔལ་དྲག་པོ་སྐྱེས།
ཕྱིས་སུ་སེམས་ཀྱི་སྐྱོ་བ་དང་སྡུག་བསྔལ་སེལ་ཆེད། ང་རང་ཐེངས་མང་པོར་ཕ་མ་གཉིས་ལ་མཆོད་འབུལ་བྱེད་དུ་སོང་བ་ཡིན།
འོན་ཀྱང་ནུ་བོ་ལིན་ཝུའུ་ཡིས་མ་ལོར་མཆོད་འབུལ་མི་བྱེད་པར་མ་ཟད། ད་དུང་ཨ་མའི་ཁང་པ་རུ་སོང་ནས་མོ་ཚེ་ལས་འདས་རྗེས་ཀྱི་དངུལ་བཅོལ་འཛིན་བྱང་བཙལ་ནས་བསྡད།
ནུ་བོས་ཨ་མའི་དངུལ་བཅོལ་འཛིན་ཡིག་ལག་ཏུ་འབྱོར་རྗེས་ཡོད་ཚད་རང་ལ་དབང་ཆོག་པར་སྙམ་ནས་ངའི་བཅོལ་དངུལ་བགོ་བཤའ་རྒྱག་པའི་རེ་འདུན་ཁས་མ་བླངས།
ཕ་རྒན་འཚོ་བཞུགས་སྐབས་སུ་ཕ་མ་གཉིས་ཀྱིས་གྲོས་བྱས་ནས་ཁང་པའི་ས་ཞིང་བཀོལ་སྤྱོད་དཔང་ཡིག་གསབ་སྒྲུབ་བྱས་པར་མ་ཟད། ས་ཞིང་བཀོལ་སྤྱོད་དབང་ཆ་ཡོད་པའི་མི་དེ་ཕོ་ནུ་གཉིས་ཀར་དབང་བར་བསྒྱུར།2013ལོའི་ཟླ9པར།
སྲིད་གཞུང་གིས་ཁང་པ་དེ་བསྡུ་སྤྱོད་བྱས་ནས་རྒྱ་ཁྱོན་སྨི་གྲུ་བཞི་མ100དང་རིན་ཐང་སྒོར་ཁྲི60ཡིན་པའི་ཁང་པ་ཞིག་ལ་བརྗེས་པ་དང་ལིན་ཝུའུ་ཡིས་ཀྱང་བགོ་བཤའ་མ་བརྒྱབ”ཅེས་བཤད་དེ།
མི་དམངས་ཁྲིམས་ཁང་ལ་ཕ་མའི་ཁང་པ་ཆ་སྙོམས་སུ་བགོ་རྒྱུ་དང་། ཨ་མའི་མིང་འོག་གི་གསོག་དངུལ་དེ་ཁྲིམས་བཀོད་ཤུལ་འཛིན་གྱི་གཏན་འཁེལ་ལྟར་བགོ་དགོས་པའི་རེ་བ་བཏོན།གཏུག་ཡུལ་ཏེ་ནུ་བོ་ལིན་ཝུའུ་ཕུ་བོའི་བསམ་ཚུལ་ལ་འཐད་པ་མ་བྱུང་།
ཁོས“ཕུ་བོས་བཤད་པའི་ཁང་པ་ལ་སྨི་གྲུ་བཞི་མ100མེད་པ་དང་རིན་ཐང་ཡང་སྒོར་ཁྲི60མིན།
ང་རང་ཕུ་བོ་དང་ཆ་སྙོམས་ཀྱིས་ཁང་པ་བགོ་བཤའ་རྒྱག་པར་འཐད་པ་བྱུང་ནས་སྔོན་ལ་ཐེངས་འགར་གྲོས་བྱས་པ་སྟེ།
གཞུང་དཔང་བྱེད་སར་སོང་ནས་ཁང་པ་བགོ་བཤའ་རྒྱག་དུས་ལིན་ཝུན་བློ་འགྱོད་སྐྱེས་བྱུང་།
མ་ལོའི་གསོག་དངུལ་བགོ་སྟངས་ཀྱི་ཐད་ནས་ང་གཏན་ནས་མི་འཐད།
སྒོར་མོ་དེ་ནི་ངས་ཨ་མར་བྱིན་པ་ཡིན། ང་ལ་ཁང་བ་ཞིག་ཡོད་ནའང་ནམ་རྒྱུན་ཕྱི་རོལ་དུ་ཞོར་ལས་སུ་འགྲོ་བཞིན་ཡོད་པས་ཁང་བ་གཞན་ལ་གླས་ཡོད་ཅིང་།
བོགས་དངུལ་ནི་ཨ་མས་ངའི་ཚབ་ཏུ་བླངས་ཡོད། དེའི་རྐྱེན་གྱིས་སྒོར་མོ་འདི་ནི་ངས་ཨ་མར་བཅོལ་བ་ཡིན་པས་ང་ལ་དབང་བ་ཡིན”ཞེས་བཤད།![]()
ལོའུ་ཏུའུ་ཆུའུ་མི་དམངས་ཁྲིམས་ཁང་གིས་ཞིབ་གཅོད་བྱས་ནས་དོན་དངོས་གཏན་འཁེལ་བྱས་པ་སྟེ།
གཏུག་མཁན་ལིན་ཝུན་དང་གཏུག་ཡུལ་ལིན་ཝུའུ་གཉིས་ནི་ཕ་མ་གཅིག་པའི་སྤུན་ཟླ་ཡིན་ལ། ཁོ་གཉིས་ཀྱི་ཕ་མ་གཉིས་སྡོད་སའི་ཁང་རྙིང་བཤིག་སྤོ་བྱས་པའི་རྐྱེན་གྱིས2013ལོའི་ཟླ9པའི་ཚེས6ཉིན་ཨ་མ་ཀྲའོ་དབྱིན་ལ་བཀོད་སྒྲིག་བྱས།2022ལོའི་ཟླ10པའི་ཚེས24ཉིན།
ཀྲའོ་དབྱིན་ནད་ཀྱི་དབང་གིས་ཚེ་ལས་འདས། ཁང་པ་དེའི་རིན་གོང་ཚོད་རྩིས་བྱས་པ་ལྟར་ན་སྒོར་ཁྲི44ཡིན་ལ།
ཀྲའོ་དབྱིན་གྱི་མིང་ཐོག་ཏུ་གསོག་དངུལ་སྒོར272916.93ཡོད། ཀྲའོ་དབྱིན་ཚེ་ལས་མ་འདས་གོང་དུ་ཁ་ཆེམས་སམ་ཤུལ་དངོས་གནང་སྦྱིན་དང་གསོ་སྐྱོང་གི་གྲོས་མཐུན་བཞག་མེད།
གཞན་ཡང་ལིན་ཝུན་དང་ལིན་ཝུའུ་ཡི་ཕ་རྒན་ལིན་ཀྲང2011ལོའི་ཟླ5པའི་ཚེས8ཉིན་འདས་པ་ཤེས་རྟོགས་བྱུང་།ཕ་རྒན་སྡོད་སའི་ཁང་རྙིང་བཤིག་སྤོ་བྱེད་སྐབས་ལིན་ཝུན་དང་ལིན་ཝུའུ།
ཨ་མ་ཀྲའོ་དབྱིན་བཅས་ཚང་མར་བཀོད་སྒྲིག་བྱས་ཤིང་། ཀྲའོ་དབྱིན་འཚོ་བཞུགས་སྐབས་ལིན་ཝུའུ་ཕ་བུ་གཉིས་དང་མཉམ་དུ་གྱོད་འབྲེལ་གྱི་ཁང་པའི་ནང་བསྡད་པ་རེད།
དེའི་རིང་ལིན་ཝུའུ་ཡི་མིང་འོག་གི་ཁང་པ་གཞན་ཞིག2020ལོ་ནས2023ལོ་བར་མི་གཞན་ལ་གླས་པ་དང་།
བོགས་དངུལ་ཀྲའོ་དབྱིན་གྱིས་ཚབ་ལེན་དང་ཉར་ཚགས་བྱས་ནས་བསྡོམས་པས་སྒོར61200ཡོད། ལོའུ་ཏུའུ་ཆུའུ་མི་དམངས་ཁྲིམས་ཁང་གིས་ཞིབ་གཅོད་བྱས་རྗེས།
ཤུལ་བཞག་རྒྱུ་ནོར་ནི་རང་བྱུང་མི་འདས་དུས་སུ་བཞག་པའི་མི་སྒེར་གྱི་ཁྲིམས་མཐུན་རྒྱུ་ནོར་ཡིན་ཞིང་།
ཤུལ་བཞག་ནོར་བདག་ཚེ་ལས་འདས་དུས་ནས་ཤུལ་འཛིན་མགོ་ཚུགས་པ་དང་། ཤུལ་འཛིན་བྱེད་མགོ་ཚུགས་རྗེས་ཁྲིམས་བཀོད་ཤུལ་འཛིན་ལྟར་བསྒྲུབ་དགོས་ལ་ཁ་ཆེམས་ཡོད་ན་ཁ་ཆེམས་ལྟར་ཤུལ་འཛིན་བྱ་དགོས།གྱོད་དོན་འདིའི་ཁྲོད་དུ། གཏུག་མཁན་དང་གཏུག་ཡུལ་གཉིས་ནི་ཤུལ་བཞག་ནོར་བདག་ཀྲའོ་དབྱིན་གྱི་བུ་ཡིན་ལ།
ཤུལ་བཞག་ནོར་བདག་དང་པོ་ཡིན་པས་ཤུལ་འཛིན་བྱེད་དབང་འདྲ་མཉམ་ཡིན། མ་ལོ་ཚེ་ལས་མ་འདས་གོང་དུ་ཁ་ཆེམས་བཞག་མེད་པས་ཁྲིམས་བཀོད་ཤུལ་འཛིན་གྱི་གཏན་འཁེལ་ལྟར་ཁོ་ལ་ཤུལ་དངོས་བགོ་དགོས།
ཁྲིམས་རའི་འདྲི་གཅོད་བྱེད་སྐབས། གཏུག་མཁན་དང་གཏུག་ཡུལ་གཉིས་ཀྱིས་གསར་དུ་བཀོད་སྒྲིག་བྱས་པའི་ཁང་པར་སྒོར་ཁྲི44ཡི་རིན་གོང་ལྟར་བགོ་བཤའ་རྒྱག་པར་ཁས་བླངས་པ་དང་།
གཏུག་ཡུལ་ལིན་ཝུའུ་ཡིས་ཁང་པ་དེ་གཏུག་མཁན་ལིན་ཝུན་ལ་དབང་བ་དང་། གཏུག་མཁན་ལིན་ཝུན་གྱིས་དེར་བབ་མཚུངས་ཀྱི་དངུལ་སྤྲོད་དགོས་པའི་རེ་བ་བཏོན་པར་བརྟེན་གཏུག་མཁན་ལིན་ཝུན་ཡང་མོས་མཐུན་བྱུང་།
དེའི་ཕྱིར་ཁང་པ་དེ་གཏུག་མཁན་ལིན་ཝུན་ལ་དབང་བ་དང་། ཁོས་གཏུག་ཡུལ་ལིན་ཝུའུ་ལ་སྒོར་ཁྲི22སྤྲོད་དགོས།གཏུག་མཁན་གྱིས་བཏོན་པའི་བཅོལ་དངུལ་བགོ་བཤའ་རྒྱག་པའི་སྐོར་གྱི་རེ་ཞུ་ལ་མཚོན་ན།
ཨ་མ་ཀྲའོ་དབྱིན་ཚེ་ལས་འདས་པའི་སྐབས་སུ། དངུལ་ཁང་གི་གསོག་དངུལ་བསྡོམས་པས་སྒོར272916.93ཡིན་པ་རྩད་ཞིབ་བྱས་ཟིན། གཏུག་ཡུལ་ལིན་ཝུའུ་ཡིས་འདོན་སྤྲོད་བྱས་པའི་ཁང་གླའི་འཛིན་ཡིག་ལས་སྒོར61200ནི་གཏུག་ཡུལ་ལིན་ཝུའུ་ཡི་ཁང་པའི་བོགས་དངུལ་ཡིན་པ་དང་།
དེ་ནི་གཏུག་ཡུལ་ལིན་ཝུའུ་མི་སྒེར་གྱི་རྒྱུ་ནོར་ཡིན་པ་ལས་ཀྲའོ་དབྱིན་གྱི་ཤུལ་བཞག་རྒྱུ་ནོར་མིན།
དེའི་ཕྱིར་ཀྲའོ་དབྱིན་གྱི་གསོག་དངུལ་ནི་སྒོར211716.93ཡིན་ཞིང་། གཏུག་མཁན་དང་གཏུག་ཡུལ་གཉིས་ཀྱིས་སོ་སོར་སྒོར105858.46ལྟར་ཤུལ་འཛིན་བྱ་དགོས།ད་ལོའི་ཟླ4པའི་ཚེས18ཉིན།
ལོའུ་ཏུའུ་ཆུའུ་མི་དམངས་ཁྲིམས་ཁང་གིས་འབྲེལ་ཡོད་བཅའ་ཁྲིམས་གཞིར་བཟུང་སྟེ། ཤུལ་བཞག་ནོར་བདག་ཀྲའོ་དབྱིན་གྱི་མིང་ཐོག་གི་ཁང་པ་དེ་གཏུག་མཁན་ལིན་ཝུན་ལ་དབང་བ་དང་།
གཏུག་མཁན་ལིན་ཝུན་གྱིས་གཏུག་ཡུལ་ལིན་ཝུའུ་ལ་སྒོར་ཁྲི22སྟེར་དགོས།
ཤུལ་བཞག་ནོར་བདག་ཀྲའོ་དབྱིན་གྱི་མིང་ཐོག་ཏུ་བཞག་པའི་དངུལ་ཁང་གི་བཅོལ་དངུལ་སྒོར211716.93ལས་སྒོར105858.46གཏུག་མཁན་ལིན་ཝུན་ལ་དབང་བ་དང་། སྒོར105858.46གཏུག་ཡུལ་ལིན་ཝུའུ་ལ་དབང་བ་ཐག་བཅད།(གྱོད་དཔེའི་ཁྲོད་དུ་བརྫུས་མིང་བཀོལ་ཡོད)སངས་བཀྲ་ཡིས་བསྒྱུར།
ལག་བསྟར་རྩོམ་སྒྲིག་པ། སངས་བཀྲ།སྤྱིའི་ལྟ་སྐུལ་བ། ཚེ་དབང་རྡོ་རྗེ།
མཚོ་སྔོན་ཞིང་ཆེན་ཟི་ལིང་གྲོང་ཁྱེར་ནུབ་སྲང་ལམ་ཆེན་ཨང79པ།
ཁ་པར། 0971-6312635
སྦྲག་སྲིད། 810008
ཡིག་ཟམ། qhfzb@aliyun.com
地址：青海省西宁市西关大街79号
电话：0971-6312635
邮编：810008
E_mail：qhfzb@aliyun.com
