གླུ་ཨ་ལ་གླུ་ཡི་ལེན་ལུགས་རེད། །
མ་ཐ་ལ་ངག་གི་འགུག་ལུགས་རེད། །
མཆོད་ཅིག་སྐྱབས་མགོན་ཡེ་ཤུ་མཆོད། །
ཕོ་ང་ཡི་གླུ་སྣ་འདྲེན་པར་མཛོད། །
ས་འདི་དང་ས་ངོ་མ་ཤེས་ན། །
ཡུལ་སྐྱིད་པོ་ཨ་རིའི་ལུང་པ་རེད། །
ལྷོ་འཛམ་བུ་གླིང་གི་གནས་མཆོག་རེད། །
སྟོབས་ཆེ་བ་འགྲན་ཟླ་མེད་ས་རེད། །
མི་ང་དང་ང་ངོ་མ་ཤེས་ན། །
མི་ང་ལ་ཁྲོམ་ཕུར་རྒྱལ་པོ་ཟེར། །
ས་འཛམ་གླིང་ནུབ་ཀྱི་བདག་པོ་བྱས། །
ལྷོ་འཛམ་གླིང་ཡོངས་ལ་ཞབས་སོར་བཀོད། །
སྐྱིད་མ་མྱོང་ཟེར་བ་ང་ལ་མེད། །
ཟོས་མ་མྱོང་ཟེར་བ་ང་ལ་མེད། །
སོང་མ་མྱོང་ཟེར་བ་ང་ལ་མེད། །
རོལ་མ་མྱོང་ཟེར་བ་ང་ལ་མེད། །
ཐོབ་མངའ་ཐང་དགོས་ན་ང་ལ་ཡོད། །
རྒྱུ་དཔལ་འབྱོར་དགོས་ན་ང་ལ་ཡོད། །
མཚན་སྙན་གྲགས་དགོས་ན་ང་ལ་ཡོད། །
གནའ་འཁོར་ལོས་བསྒྱུར་རྒྱལ་ཟེར་བ་ཡང་། །
ངའི་ཡན་གྱི་མི་ཞིག་ཡིན་སྣང་མེད། །
སྟེང་ལྷ་ཆེན་ཚངས་པ་ཟེར་བ་ཡང་། །
ངའི་ཡན་གྱི་དཔོན་ཞིག་ཡིན་སྣང་མེད། །
རྒྱལ་ཆེན་ཕོ་འགྱིང་ཟེར་བ་ཡང་། །
ངའི་ཟུར་ལ་ཐོན་ན་ཆུང་ཆུང་ཡིན། །
ཨུ་ཡུག་འཐབ་འཁྲུག་ཟེར་བ་ཡང་། །
ཕོ་ང་འདྲ་ཐོན་ན་བདེ་འཇགས་ཡིན། །
ངས་མེད་པ་སྒྲོ་འདོགས་བྱས་པ་མིན། །
རྣ་ཡར་མར་གཏོད་ལ་ཉན་ཡག་བྱོས། །
ངས་རང་བསྟོད་རང་བསྔགས་བྱས་པ་མིན། །
མིག་ཡར་མར་འཁོར་ལ་བལྟ་ཡག་བྱོས། །
ཡིན་རྒྱུ་དེ་འདྲ་ཡིན་ན་ཡང་། །
དེང་སང་ང་ལ་ངེས་འབྱུང་སྐྱེས། །
འཁོར་བའི་ཆོས་ལ་ཞེན་པ་ལོག །
མི་རྟག་རྒྱུ་འབྲས་ངོ་བོ་རྟོགས། །
ནང་པའི་ཆོས་ལ་རབ་ཏུ་བྱུང་། །
བུ་དང་ཆུང་མ་རྒྱབ་ལ་བསྐྱུར། །
རྒྱུ་དང་དཔལ་འབྱོར་གཡས་སུ་བཞག །
ཐོབ་དང་མངའ་ཐང་གཡོན་དུ་དོར། །
མགོ་བོའི་སྐྲ་ལོ་རལ་གྲིས་བཅད། །
ནུབ་ལྭ་དོར་ནས་ཆོས་ལྭ་གྱོན། །
ནང་པའི་ཆོས་ལ་དད་པ་སྐྱེས། །
ཡེ་ཤུ་དོར་ནས་སྐྱབས་སྡོམ་བླངས། །
ད་ནི་བྱང་ཆུབ་སེམས་ལ་སློབ། །
འཁོར་བའི་ལས་ལ་ཁ་ཡ་མེད། །
དད་ས་དཀོན་མཆོག་གསུམ་པོ་ཡིན། །
བསམ་རྒྱུ་ལས་དང་རྒྱུ་འབྲས་ཡིན། །
ཨ་སྒོར་མི་སྒོར་ངས་མི་ཤེས། །
འབུ་ཤ་ཉ་ཤ་ངས་མི་བཟའ། །
ཆང་དང་དུ་བ་གཏན་འདོར་ཡིན། །
རིན་ཆེན་གསེར་དངུལ་རེག་མི་འདོད། །
ཕྱི་མ་ཁོ་ན་དོན་དུ་གཉེར། །
རབ་ན་ཐར་ལམ་ཟིན་པ་ཞིག །
འབྲིང་ན་ཚེ་ཆོས་མཉམ་པ་ཞིག །
ཐ་མ་ཆོས་དད་ཡོད་པ་ཞིག །
དེ་མ་གཏོགས་ང་ལ་བསམ་རྒྱུ་མེད། །
ས་ཐག་རིང་ཨ་རིའི་ཡུལ་ནས་ཡོང་། །
གྲགས་ཆེ་བ་གངས་ལྗོངས་ཡུལ་ལ་ཐོན། །
མགོའི་སྐྲ་ལོ་བཅད་ནས་རབ་ཏུ་བྱུང་། །
ད་ང་ཡི་བསམ་པ་འགྲུབ་པ་ཡིན། །
ཚེ་མཐར་ཆོས་དང་འཕྲད་པ་འདི། །
ཚེ་རབས་སྔོན་མའི་བསོད་ནམས་ཡིན། །
ད་མང་པོ་བཤད་པའི་ཁོམ་པ་མེད། །
ཚེ་མི་རྟག་ནམ་མཁའི་སྤྲིན་པ་ཡིན། །
ཕྱིར་སོང་ནས་མ་ཎི་འདོན་དགོས་ཡོད། །
གླུ་གོ་ན་སྙན་གྱི་སྦྲང་རྩི་ཡིན། །
ད་མ་གོ་འགྲེལ་བ་རྒྱག་ཁོམ་མེད། །