ཕ་ཡུལ་ནགས་ཤོད།

ཕ་ཡུལ་ནགས་ཤོད་དེ་འབྲི་ལྗོངས་ཕྱུག་མོ། སྟོད་དུ་ཕྱོགས་བཞི་མཚམས་བརྒྱད་ཀྱི་བརྗིད་ཆགས་རི་བོས་བསྐོར་ཞིང་། སྨུག་སྤྲིན་ལང་ལོང་དཀྲིགས་པའི་ཀློང་ནས་རྩེ་མོ་ནམ་མཁར་གཟུགས་པ་ལྟར་སྣང་།  སྨད་དུ་རྩི་མེ་ཏོག་དཀར་དམར་གྱི་རྒྱན་ཆ་བཀླུབས་ཤིང་ཁྲ་ཆེམ་མེར་རི་ལུང་བར་མེད་གང་།

དེའི་སྟེང་དུ་ཟིལ་བ་ཁྲོམ་ཁྲོམ་ཆགས་ཤིང་དྲི་ངད་ལྡན་ཡོད་ལ། ད་དུང་ནགས་རི་སྟུག་པོ་ཤིང་ལོ་འགུལ་འགུལ་གཡོ་ཞིང་བྱ་ཚོགས་ཀྱི་སྐད་སྙན་ལྷང་ལྷང་སྒྲོག །གནས་འདི་ནི་མེས་པོ་དམ་པའི་ཞལ་རྒྱུན་ལས་ཐོས་པའི་དག་པའི་ཞིང་མཆོག་ཟེར་བ་དེ་ཡིན་སྲིད།

རེད་ཡ། ཕ་ཡུལ་ནགས་ཤོད་ཕྱུག་མོ། མཚོ་དང་མཚེའུ་རང་བྱུང་དུ་འཁྱིལ་ཞིང་། རི་ལུང་ཐང་གསུམ་རྟ་ནོར་ལུག་གསུམ་གྱིས་རྒྱན་ཆ་སྤྲས་པ་སྟེ།  རྟ་ཕོའི་བང་རྩལ་འགྲན་ས། འབྲི་མོའི་བཞོ་དབྱངས་འཐེན་ས། གཡང་དཀར་ལུག་གི་འབའ་སྒྲ་སྙན་ས། འབྲོག་གི་བུ་མོའི་རྫི་གླུ་སང་སང་གྱེར་སའི་ཡུལ་འདི་ཆེས་གཞན་དང་མི་འདྲ་བའི་ཁྱད་ཆོས་ལྡན།

ཨེ་མ་ལྟོས་དང་། ཡུལ་ལྗོངས་འདི་ནི་ཅི་འདྲའི་མཛེས་སྡུག་ལྡན་ཞིང་།  ཡིད་དབང་འཕྲོག་ལ། འདི་ནི་སུ་ཞིག་གིས་བྲིས་པ་མ་ཡིན་པར་གང་ཞིག་གིས་བཟོས་པའང་མིན་པའི་རང་བྱུང་ཁམས་འདི་ཅི་འདྲའི་ངོ་མཚར་ལྡན་པ་ཞིག་རེད་ཨང་།

དགེ་རྒན་ལགས་དུས་ཆེན་བཟང་།

དགེ་རྒན་ལགས། ཁྱེད་ནི་ང་ཚོའི་ཤེས་རིག་གི་བློ་སྒོ་འབྱེད་པའི་ལྡེ་མིག་འཛིན་མཁན་དེ་ཡིན་ལ། ཁྱེད་ནི་མིའི་རིགས་ལ་སྤྲོ་སྣང་གི་དཔལ་ཡོན་བསྐྲུན་པའི་དེད་དཔོན་དེ་ཡིན། ཁྱེད་ནི་འུ་ཅག་གི་རྨོངས་མུན་གྱི་ལམ་བུ་ལས་སྒྲོལ་མཁན་གྱི་རབ་གསལ་གྱི་སྒྲོན་མེ་དེ་ཡང་ཡིན།

དགེ་རྒན་ལགས། སློབ་མ་ངས་ཁྱེད་ཀྱི་དྭངས་གཙང་གི་གསུང་ངག་སྙན་མོ་དང་ཤེས་རིག་གི་གཤོག་ཟུང་ཐོགས་པ་ལ་བསྔགས་པར་འདོད་དེ། ཁྱེད་ཀྱིས་ང་ཚོ་ལ་གསུངས་བའི་གདམས་ངག་རེ་རེར་སྙིང་སྟོབས་ཀྱི་གོ་ཆ་ཐོགས་པར་མཛད། ཁྱེད་ཀྱི་མཚན་སྙན་ནི་དབྱར་གྱི་རྔ་གསང་སྒྲོག་པ་ལྟར་ཕྱོགས་བཞིར་གྲགས་ཤིང་། ཁྱེད་ཀྱི་འགྱུར་མེད་ཀྱི་སྤོབས་སེམས་དང་ལྷད་མེད་ཀྱི་ལྷག་བསམ་ནི་རི་བོ་བཞིན་བརྟན་ཞིང་གཟི་བྱིན་ལྡན་པ་ཞིག་རེད་ཨང་།

དགེ་རྒན་ལགས། སློབ་མ་ངའི་སེམས་ཁོང་དུ་ཁྱེད་ནི་ཡལ་མེད་རྟག་ཏུ་འཚེར་བའི་གསེར་མདོག་གི་ཉི་མ་སྟེ། ཁྱེད་ནི་ང་ཚོ་སློབ་མ་རྣམས་ལ་འབྱུང་འགྱུར་གྱི་ཕུགས་བསམ་འཚོལ་བའི་ཁྲོད་དུ་རེ་བཞག་གི་ཉི་འོད་སྩོལ་མཁན་དེ་ཡིན། ཁྱེད་ཀྱི་འཆད་པ་དང་རྩོད་པ། རྩོམ་པའི་ལས་ཀྱིས་བློ་གསལ་གྱི་གཞོན་ནུ་རྣམས་ལ་ཤེས་རིག་གི་ལང་ཚོ་རྒྱས་པར་མཛད། ནམ་ཞར་ཁྱེད་ཀྱི་སྙིང་སྟོབས་ལ་འགྲན་པར་མི་ནུས་ཤིང་། ཁྱེད་ཀྱི་ཐུགས་ཡངས་ལ་གཞལ་མཐའ་བྲལ།

དགེ་རྒན་ལགས། བཀའ་དྲིན་ཆེ། ལོ་ཟླ་འདི་དག་གི་རིང་ལ་ཁྱེད་ཀྱིས་སློབ་མ་ང་ཚོའི་དོན་དུ་དཀའ་ཚེགས་རྒྱབ་ཏུ་བསྐྱུར་ཏེ་གཅེས་སྐྱོང་གནང་བ་ནི་གུས་མོར་མཚོན་ན་ཆེས་ཡིད་སྨོན་འཆོར་ས་ཞིག་སྟེ། དེང་འདིར་ཁྱེད་ཉིད་ལུས་བདེ་སེམས་སྐྱིད་དང་། བྱ་བ་ལམ་འགྲོ། ཅི་བསམ་ལྷུན་གྱིས་འགྲུབ་པའི་སྨོན་འདུན་ཞུ་བ་དང་ཆབས་ཅིག་དུས་ཆེན་ལ་བཀྲ་ཤིས་བདེ་ལེགས་ཞུའོ།།                                         2022/9/10ཉིན།

ཕ་ཡུལ་ལགས། ང་ཁྱེད་ཀྱི་པང་ནས་འཚར་ལོངས་བྱུང་།

ཨེ་མ། མཛེས་ཤིང་ལྟ་ན་སྡུག་པའི་ཕ་ཡུལ་ལགས། ཁོ་མོའི་ཡིད་ངོར་རྟག་དུ་དྲན་གྱིན་པ་ནི་སྔོ་ལྗང་བརྗིད་ཆགས་པའི་རྩྭ་ཐང་ཡངས་མོ་དང་། རབ་དཀར་མདངས་སུ་བཀྲ་བའི་གངས་རིའི་ཕྲེང་བ། བཞུར་སྒྲ་སྙན་ཞིང་དྭངས་གཙང་ཆུ་བོ། དྲོད་འཇམ་ཉི་འོད་སོགས་ཡིན། དེ་ཡང་འདས་སོང་གི་ལོ་ཟླའི་ཁྲོད་དུ་རང་ཉིད་ཀྱི་ལྟེ་ཕྲག་འཕོ་སའི་ཕ་ཡུལ་ཞེས་པ་འདི་བསམ་ཞིང་ཡང་ཡང་གླེང་ན། ལོ་ངོ་འདི་དག་གི་འཚར་ལོངས་བརྒྱུད་རིམ་ནི་ཆེས་དྲན་གསོ་བྱེད་འོས་པ་ཞིག་ཅི་ལ་མིན།  གང་ཡིན་ཞེ་ན། གནས་དེ་ནི་ཁོ་མོའི་ཕུ་ནུ་མིང་སྲིང་གི་ཟུངས་ཁྲག་འཁྱིལ་ཞིང་ཕ་རྒྱུད་རུས་རྒྱུད་ཀྱི་ལམ་ལུགས་ཟབ་ལ། བླ་སློབ་རྣམ་པ་བཀུར་བསྟི་མཛད་མཁན་གྱིས་གནས་ཤིག་དང་ཡུལ་དེར་གཞན་ལས་ལྷག་པའི་ཁྱད་ཆོས་དུ་མ་འཛོམས།

གཟིགས་དང་། གཡས་ལ་བལྟས་ན་རྩྭ་ཐང་དང་། གཡོན་ལ་བལྟས་ན་སྦྲ་ནག རྒྱབ་ལ་བལྟས་ན་གངས་རི། མདུན་ལ་བལྟས་ན་མཚོ་མོ་བཅས་རི་མོ་བའི་པིར་རྩལ་ལས་ཐོན་པ་ཇི་བཞིན་སྣང་། 

རེད་ཡ། ཁ་བ་ལྷབ་ལྷུབ་ཏུ་བབས་པའི་དགུན་གཞུང་ནི་ཆེས་བརྗེད་པར་དཀའ་བའི་དུས་ཤིག་མ་ཡིན་ནམ།སྐབས་དེར་དབྱིག་འཛིན་བུ་མོས་སྲབ་ལ་འཇམ་པའི་རབ་དཀར་གོས་བཟང་ཞིག་བཀླུབས་ཏེ། སྤྲོ་སྣང་ལྡན་པའི་བྱིས་པ་ཚོར་མཛེས་སྡུག་བཀྲ་བའི་ཁོར་ཡུག་གསར་པ་ཞིག་ལེགས་སྐྱེས་སུ་ཕུལ་བ་དང་ཀུན་ནས་མཚུངས། དུས་སྐབས་དེར་ང་དང་ང་འདྲ་བའི་བྱིས་པ་ཚོའི་སེམས་སུ་རང་ཉིད་དང་བློ་ཐག་ཉེ་བའི་རྩེད་གྲོགས་ཡག་ཤོས་དེ་མདུན་དུ་བསུས་པ་དང་འདྲ་བའི་ཚོར་སྣང་ཞིག་ངང་ངམ་ཤུགས་སུ་སྦྱིན་པར་བྱེད་ལ། དུས་ཚིགས་དེ་ནི་ང་ཚོ་བྱིས་པ་རྣམས་ཀྱི་ངོས་ནས་བརྗོད་ན། ཆེས་སྤྲོ་སྣང་དོད་ཤོས་དང་། བདེ་སྐྱིད་ལྡན་པའི་ལོ་ཟླ་ཞིག་ལོས་ཡིན།

ཕ་ཡུལ་ཡ། ཕ་ཡུལ།

ཁྱེད་ཀྱིས་ཁོ་མོར་རྫོགས་མཐའ་བྲལ་བའི་བདེ་སྐྱིད་དང་། བརྗེད་པར་དཀའ་བའི་བག་ཆགས་ཟབ་མོ་བཞག་ལ། མཛེས་སྡུག་ལྡན་པའི་ཁོར་ཡུག་དང་། སྤྲོ་སྣང་མཆིས་པའི་བྱིས་དུས་ཀྱི་འཚོ་བ་ལ་སྙིང་པོ་བསྐྲུན་ཡོད།

རེད་ཨང་། ཕ་ཡུལ་ལགས། ཁྱེད་ནི་ངའི་བྱིས་དུས་ཀྱི་རྩེད་ཡ་དང་། འཚར་ལོངས་འབྱུང་སའི་གནས་གཅིག་པུ་དེ་ཡིན་ལ། ཁྱེད་ནི་ཁོ་མོའི་འདས་སོང་གི་ལོ་ཟླར་ཕྱིར་དྲན་གནང་བའི་གཞི་མ་ཡིན་པར་མ་ཟད། མ་འོངས་པའི་ལོ་ཟླར་གསོན་ཤུགས་སྦྱིན་མཁན་གྱི་རེ་བའི་འོད་ཟེར་དེ་ཡང་ཡིན་ནོ།། ཕ་ཡུལ་ལགས། བཀའ་དྲིན་ཆེ།

2021/12/28ཉིན།

གཅེས་ཕྲུག་ཚོ་དང་ལོ་ཟླ།

—སློབ་གླིང་ཞིག་ནས་བྱིས་པ་ཚོ་བསམ་པའི་ཟིན་ཐོ།

ལོ་ཟླ་འདི་དག་གི་འཚོ་བའི་ཀློང་ནས་ང་ཚོས་མ་འོངས་ཀྱི་ལམ་བུ་ཇི་ལྟར་དྲན་པ་རི་མཐོན་པོའི་རླུང་དང་། ཆུ་གཙང་བོའི་རླབས། སྟོན་ཐ་མའི་སྡོང་ལོ་མ་གཏོགས་སུ་ཞིག་གིས་ཤེས་ཨང་། ཇོ་མོ་གླང་མའི་བརྟན་བརླིང་དང་། ཞི་བདེ་རྒྱ་མཚོའི་མངའ་ཐང་། རྨ་འབྲི་རིང་མོའི་བཞུར་བརྒྱུན་ལ་བལྟས་ན། འཇིག་རྟེན་མི་རྟག་པ་ཞིག་ཡིན་པ་མཐོང་དཀའ་ཡང་། ཞོགས་པའི་ཟིལ་བ་དང་། ཆུ་ཁའི་ལྦུ་བ། དཔྱིད་ཀའི་གནམ་གཤིས་ལ་བལྟས་ན། འཇིག་རྟེན་མི་རྟག་པ་ཞིག་ཡིན་པ་ཡང་མཐོང་སླའོ། །རིང་ཞིང་ཐུང་བའི་མི་ཚེ་འདིར། བྱིས་པ་སྣབས་ལུག་འདི་དག་དང་མཉམ་དུ་འཕྲད་པ་ནི་ལས་དབང་ཡིན་ལ་མཉམ་དུ་འགྲོགས་པའི་དུས་ཚོད་དེ་འདྲ་ཐུང་ན་ཡང་། དེ་ནི་ཅི་འདྲ་བརྗེད་དུ་མེད་པའི་ལོ་ཟླ་ཞིག་རེད།

ཁོ་མོ་ཐོག་མར་བྱིས་པའི་རྨི་ལམ་གྱི་དག་ཞིང་ལྟ་བུའི་སློབ་གླིང་འདིར་ཐོན་སྐབས། བྱིས་པ་འབའ་ཞིག་ནི་དགེ་རྒན་དག་གིས་སྐུལ་སློང་དང་བཤད་བཤད་ཇི་ལྟར་བཏང་ཡང་གོ་མེད་ཚོར་མེད་ངང་སྣབས་ལུད་ཡ་ཁ་ནས་ནར་ཏེ་ལྷམ་སྒྲོག་སར་འདྲུད་བཞིན་གཏོར་བཤིག་གང་ཞིག་འགོ་བརྩམས་ཏེ་སློབ་ཁང་ནི་གློག་བརྙན་ནང་གི་འགྱིག་ཕྲུག་སྣ་ཆེ་ལྟོ་ཆེ་དེ་དག་གི་ཁྱིམ་ན་འཛུལ་བ་དང་གཅིག་མཚུངས་ཡིན་ལ་སྐབས་དེར་བྱིས་པ་དེ་དག་འགྲམ་ལྕག་ཚ་བེར་བེར་ཞིག་ཅི་དྲག་སྙམ་ཡང་། རྗེས་སུ་ཁོ་མོས་ནོར་བ་ལ་ནོར་སྐྱོན་རྟོགས་པས་ངོས་ལེན་ཞུ་ཆོག་པར་གྱིས། བྱིས་པའི་བསམ་བློ་ཞེས་པ་མ་གཞིར་དེ་ལྟར་ཡིན་སྲིད་ལ་དེ་ནི་སུས་ཀྱང་བསྒྱུར་བཅོས་དཀའ། འོན་ཀྱང་། ང་ཚོ་སྐྱིད་སྡུག་མཉམ་གཤིབ་ཀྱི་ལོ་ཟླའི་བང་རིམ་བརྒལ་ནས་ཡོང་ཚེ། ཁོ་མོའི་སེམས་སུ་བྱིས་པ་འདི་དག་མཐོང་མ་ཐག་ཅི་ཡིན་འདི་ཡིན་མི་ཤེས་པའི་རྒྱུས་མངའ་ཟབ་མོ་ཞིག་གིས་ཁོང་ཚོའི་བསམ་བློའི་ཀུན་སྤྱོད་དང་དྭངས་གཙང་ལྷད་མེད་ཀྱི་འཛུམ་མདངས་དེ་རིགས་ལ་ཧ་ཅང་ནས་སྙིང་རྗེ་ཞིང་གསེར་མདོག་གི་ཉི་འོད་ལྟ་བུའི་དྲོད་ཁོལ་ཞིག་མིག་ལམ་ནས་ཡང་ཡང་འཚེར་བ་ལྟར་མངོན་ཞིང་། རིམ་གྱིས་བྱིས་པ་དེ་དག་ཁ་ནས་སྣབས་ལུག་ཅེས་ཡང་ཡང་བོས་ཀྱང་དོན་དམ་དུ་སེམས་ཀྱི་གཅེས་ཕྲུག་དེ་ཡིན།

རེད་ཡ། ང་ཚོ་འཚོ་བའི་བར་གསེང་ནས་སྤྲོ་སེམས་ལྷོད་པོའི་ངང་ནས་གཞས་དང་ཞབས་བྲོ། དེ་བཞིན་རྩེད་མོའི་གླིང་ག་རུ་རོལ་གྱིན་ཞོར་དུ་སློབ་སྦྱོང་ཐད་ཀྱང་འབད་བརྩོན་ཧུར་ཐག་བྱེད་ཀྱིན་ཡོད། མཚམས་རེར་སློབ་གྲོགས་ཕན་ཚུན་བར་ངོ་ཤེས་དང་རྒྱུས་མངའ་ཏོག་ཙམ་ལོངས་སུ་བཅུག་ཚེ། བྱིས་པ་ནི་བྱིས་པ་རང་རེད། ཧ་ཅང་དགའ་བཞིན་དགོད་བཞིན། ལ་ལ་ནི་སྣ་ལུད་ཡོད་ཚད་ཕུ་ཐུང་ཁ་རུ་ཕྱིས་ཀྱང་ད་དུང་གར་རྣམ་འགྱུར་གྱིས་ཕྱུག་ཅིང་དགའ་བའི་གླུ་ལེན་དང་། སྐྱིད་པའི་ཞབས་བྲོ་འཁྲབ་ལ། འགའ་རེ་ནི་ཧ་ཅང་བྲོད་པ་འཕེལ་བའི་ཚོར་སྣང་ཀློང་དུ་སློབ་ཁང་གི་ས་གདན་ཐོག་ཏུ་འགྲེ་ལོག་ཡང་ཡང་བརྒྱག ཅིག་ཤོས་ནི་གདོང་ལ་བཅོས་མིན་གྱི་འཛུམ་མདངས་ཤིག་ཐོགས་ཏེ་སྙན་པའི་ཐལ་མོ་རྡེབ་བཞིན་ལྟད་མོར་རོལ། རྒན་པ་རྣམས་ལ་བསྟུན་ན་འདི་ནི་ཅི་འདྲའི་སུན་སྣང་དང་རྙོག་དྲ་ཅན་ཞིག་ངོས་འཛིན་ཡང་བྱིས་པར་བསྟུན་ན་ཆེས་དགའ་བའི་དགའ་སྟོན་བཟང་པོ་ལྟ་བུ་ཞིག་ཡིན་སྲིད་པས་བྱིས་པའི་བསམ་བློ་གཅེས་སྲིང་བྱ་རྒྱུ་འདི་སློབ་གསོའི་ཐབས་ལམ་ཉག་ཅིག་ཡིན་ལ། དགེ་རྒན་ཞིག་གིས་ངོས་ནས་བརྗོད་ན་ཕྲག་ཏུ་བབས་པའི་འགན་འཁྲི་ལྕི་མོ་ཞིག་ཀྱང་རེད་འདོད། མ་ཟད་བྱིས་པའི་ལུས་སེམས་སྙོམ་སྒྲིག་དང་འཕེལ་རྒྱས་གཏོང་བ་ལ་གྲུབ་འབྲས་ངེས་ཅན་ཞིག་འཐོབ་འདོད་ན། རྒྱུན་དུ་སློབ་ཁང་ནང་དུ་འགུལ་ཙམ་ཡང་བྱེད་དུ་མ་བཅུག་པར་བཞག་ཚེ་ཆེས་སུན་འབྱིན་ནམ་མནར་གཅོད་ལྟ་བུ་ཞིག་ལས་ཕན་ནུས་གང་ཡང་མེད་པས་ཁོང་ཚོར་སློབ་ཁང་དུའང་རང་དབང་ཏོག་ཙམ་བྱིན་ན་དགེ་བ་རེད་དྲན།

གང་ལྟར་ལོ་ཟླ་འདི་དག་རིང་གཅེས་ཕྲུག་ཚོ་དང་ཕན་ཚུན་ཁ་རྩོད་ཀྱི་ཁྲོད་དུ་བཤད་བཤད་མང་དུ་བཏང་དགོས་བྱུང་རུང་། ང་ཚོ་ནི་དུས་ནམ་ཡང་རི་རྒྱབ་རྩྭ་ཐང་གཅིག་ཏུ་མཉམ་ཟ་མཉམ་འཐུང་གི་བརྩེ་བ་ཟབ་ཅིང་། ལྷག་ཏུ་གཅིག་ཕན་གཅིག་མཐུན་གྱི་འདུ་ཤེས་སློང་ནས་སྙན་པའི་དབྱངས་གསལ་སོ་བཞིའི་ངག་རྟ་འཇམ་མོ་དང་སྐྱིད་པའི་དུས་ཚིགས་ཀྱི་བྱུང་རིམ་གྱི་གཏམ་རྒྱུད་དེ་དག་བདག་གི་རྨི་ལམ་ན་དུས་ད་ལྟ་ཡང་གློག་བརྙན་ཇི་བཞིན་འཆར་གྱིན་འདུག དེའི་ཉིན་ཞག་རེ་རེའི་འཚོ་བ་དང་། གཟའ་སྐར་རེ་རེའི་འཁོར་བགྲོད། ལོ་ཟླ་དེ་དག་ཇི་ལྟར་འཚོལ་ན་རྫོགས་མིན་སྡོམ་ཚིག་རེ་བཀོད་ཚེ་ཆེས་སྤྲོ་སྣང་དོད་ཤོས་དང་བདེ་སྐྱིད་ཀྱི་གཞི་མ་ཟེར་བའང་འདི་ལྟར་གྲུབ་པ་ཡིན་སྲིད། རེད་ཡ། ད་ནས་མ་འོངས་པར་ཁྱོད་ཚོ་ལང་ཚོའི་ཁོ་ལག་རྒྱས་ཤིང་ལེ་བར་ཁྲི་ཚོ་བརྒལ་བའི་ཕ་མཐའ་ནས་ཕུགས་བསམ་ཆེ་གེ་མོ་ཞིག་གི་ལམ་སྣེར་འཇུས་ཏེ་དུས་རྟག་ཏུ་རྣམ་པར་རྒྱལ་བར་གྱུར་ན། ཁོ་མོའི་བསམ་དོན་འགྲུབ་པའོ། །                                   

2021•12•15ཉིན།

རྨི་ལམ་ཟ་ཟི།

རྨི་ལམ་ཟ་ཟིའི་ཀློང་དུ།།

རླུང་དང་ཆར་པས་ཁེངས་སོང་།།

དྲན་པ་མག་མོག་ཁྲོད་དུ།།

སྣང་བ་ཆུ་ལ་འཐིམ་སོང་།།

འཇའ་རིས་འཁྱོག་པོའི་འཁྲིས་སུ།།

མིག་ཟུང་བཅར་རྒྱུ་མ་བྱུང་།།

ཕར་ལ་ཅི་ཙམ་བལྟས་ན།།

ཕྱིར་ལྡོག་འབྲོས་པ་སྣང་ཡོང་།།

སྤྲིན་པའི་ཞྭ་མོའི་མཐའ་ནས།།

ཆར་ཀྱི་བདུད་རྩི་འཇོ་བའི།།

རི་དེ་དཀྱིལ་ལྷ་ཡིན་པས།།

གདུང་འབོད་ལན་གསུམ་བྱས་ཡོད།།

2022•2•16ཉིན།

ངའི་ཕ་ཡུལ།

ཆུ་འཛིན་ལང་ལོང་འཐིབ་པའི་མཁའ་དབུཊ་མཛེས།།

རྩི་ཏོག་རྣམ་པར་བཀྲ་བའི་སྤང་ལྗོངས་མཛེས།།

རྟ་ནོར་ལུག་གསུམ་ཁེངས་པས་སྦྲ་གུར་མཛེས།།

མཛེས་པ་འདི་གསུམ་ང་ཡི་ཕ་ཡུལ་རྒྱན།།

བཅུ་དྲུག་ལང་ཚོ་གཞོན་པའི་བཞིན་དཔལ་དཀར།།

ལྷད་མེད་འོ་ཞོ་མངར་མོའི་རང་མདངས་དཀར།།

འབྲོག་མིའི་རྩམ་གྱི་ཕུད་མཆོད་ལྷག་པར་དཀར།།

དཀར་བ་འདི་གསུམ་ང་ཡི་ཕ་ཡུལ་རྒྱན།།

མཛའ་མཐུན་ཨ་ལོང་སྦྲེལ་བའི་སྤུན་ཟླ་འཛོམས།།

འགྱུར་ཁུགས་རྣ་བར་འཇེབས་པའི་རྫི་གླུ་འཛོམས།།

གཡང་དཀར་འབའ་སྒྲ་སྒྲོག་པའི་དགེ་མཚན་འཛོམས།།

འཛོམས་པ་འདི་གསུམ་ང་ཡི་ཕ་ཡུལ་རྒྱན།།

2020/8/24ཉིན།

དབྱར་གྱི་སྒེག་ཉམས།

མེ་ཏོག་དཀར་དམར་བཀྲ་བའི་ཡིད་འོང་གི་སྤང་དུ།།

གཡུ་སྦྲང་འཕུར་རྩལ་གཡོ་བའི་སྤྲོ་ཉམས་ཀྱིས་ཁེངས་ཤིང་།།

གཙང་པོའི་བཞུར་སྐད་སྙན་མོ་རྣ་བ་རུ་ཐོས་རྗེས།།

དབྱར་གཞུང་མཛེས་པའི་སྒེག་ཉམས་མིག་མདུན་དུ་འཕྲོས་བྱུང་།།

རྫ་རི་མཐོན་པོར་སྤྲིན་དཀར་ལང་ལོང་དུ་འཁྱུད་དེ།།

སྤང་རི་སྤང་ཐང་སྤོས་དཀར་དྲི་བསུང་གིས་ཁྱབ་ཚེ།།

འདབ་ཆགས་ཚོགས་རྣམས་གླུ་དབྱངས་སྙན་མོ་རེ་ལེན་བཞིན།།

དབྱར་གཞུང་མཛེས་པའི་སྒེག་ཉམས་མིག་མདུན་དུ་འཕྲོས་བྱུང་།།

སྦྲ་ནག་གྲུ་བཞིའི་དུ་སྨུག་གནམ་འཕང་ལ་འཁྱུག་བཞིན།།

གནག་ཕྱུགས་འབྲི་མོའི་འུར་སྐད་ལྷང་ལྷང་དུ་སྒྲོག་ཅིང་།།

དགོ་དགོ་ངག་གི་བཞོ་དབྱངས་རྣ་བ་རུ་སྙན་པ།།

དབྱར་གཞུང་མཛེས་པའི་སྒེག་ཉམས་མིག་མདུན་དུ་འཕྲོས་བྱུང་།།

རྩི་ཏོག་འདབ་བརྒྱ་གྲོལ་བའི་འབྲོག་ཐང་གི་སྤང་དཀྱིལ།།

སྟག་ཤར་དཔའ་མཛངས་མངའ་བའི་མདའ་རྩལ་གྱི་ཉམས་དང་།།

ལུས་ཕྲ་མ་ཡི་སྐེད་པའི་ལྡེམ་གཉེན་དེ་མཚར་བ།།

དབྱར་གཞུང་མཛེས་པའི་སྒེག་ཉམས་མིག་མདུན་དུ་འཕྲོས་བྱུང་།།

དབྱར་གསུམ་དགའ་ཚལ་ལྟ་བུའི་ཡིད་འོང་གི་འབྲོག་འདབས།།

འོ་མ་བརྒྱ་གཡུག་སྟོང་གཡུག་སྒྲ་སྙན་གྱིས་ཁེངས་ཤིང་།།

ཤ་མར་ཐུད་གསུམ་ཟས་སྣ་ཕུན་སུམ་དུ་ཚོགས་པའི།།

དབྱར་གཞུང་མཛེས་པའི་སྒེག་ཉམས་མིག་མདུན་དུ་འཕྲོས་བྱུང་།།

དབྱངས་གསལ་སོ་བཞིའི་མདངས་སྙན་ངག་སྒོ་ནས་གྱེར་བཞིན།།

ཡིད་འོང་གླུ་གར་བྲོ་གསུམ་ཉམས་འགྱུར་གྱི་དཔལ་དུ།།

གཞོན་པའི་སྣང་བ་དགའ་སྤྲོའི་གླིང་ཁ་རུ་རོལ་བ།།

དབྱར་གཞུང་མཛེས་པའི་སྒེག་ཉམས་མིག་མདུན་དུ་འཕྲོས་བྱུང་།།

ཁ་བ་སྐྱ་བོ།

ཁ་བ་སྐྱ་བོ་རི་ལུང་གང་སར་གཡོགས།།

བྱེའུ་ཆུང་དཀར་མོ་འཁྱག་གིས་འཁུམ་པར་བྱས།།

ཕྱུགས་ཟོག་མནར་གཅོད་ཁྲོད་ནས་རེ་སྒུག་བྱེད།།

དགུན་གྱི་ལྷགས་རླུང་ཡ་ང་སྙིང་རྗེ་དབེན།།

ཁ་བ་སྐྱ་བོ་མདོ་ཁམས་སྨད་དུ་ཁྱབ།།

མུ་མཐའ་མེད་པའི་ན་ཀྲའི་གྲོང་ཁྱེར་ཞིག།

ཆུ་མོ་དར་ཁ་འགྲིག་པའི་དགུན་གཞུང་དེར།།

ཉ་མོ་འཁྱག་གིས་བཟུང་བའི་དུས་ཚིགས་ཤར།།

ཁ་བ་སྐྱ་བོ་གོ་ལའི་ཡང་རྩེ་བསྡོམས།།

ཉམ་ཐག་དུད་འགྲོ་སྡུག་བསྔལ་ཁོར་མོ་སྤྲད།།

ཨ་ཕ་རྒས་པོ་ཁ་བའི་ལྗོངས་སུ་ལྷགས།།

འཇིག་རྟེན་མི་ཡི་འགྲོ་འདུག་ལམ་བུ་བཀག།

2021/12/30ཉིན།

སློབ་གླིང་།

ཡིད་དགའི་སྤྲོ་སྣང་སྟེར་བའི་སློབ་གླིང་དེར།།

མ་བོས་ངང་གིས་འདུས་པའི་སློབ་བུ་ཚོགས།།

ཤེས་བྱའི་བདུད་རྩི་འཇོ་བའི་བདེ་སྐྱིད་ནི།།

མཛེས་རྩལ་མཁན་པོས་རྒྱན་རིས་བཀོད་པ་བཞིན།།

ཁོར་ཡུག་ཀུན་ཏུ་ཤེས་རིག་མེ་ཏོག་བཞད།།

དབྱངས་གསལ་སོ་བཞིའི་གྱེར་ཀློག་ཁུ་བྱུག་གསུང་།།

སློབ་གསོའི་འཕེལ་ཁ་རླབས་ཕྲེང་གཡོ་བ་བཞིན།།

མཛེས་སྡུག་སློབ་གླིང་ལྷ་ཡི་དགའ་ཚལ་འགྲན།།

མག་མོག་འཁྲུལ་བའི་མི་ཚོགས་ཡོམ་ཡོམ་ཁྲོད།།

སྤྱི་ཚོགས་ཟང་ཟིང་དབྱར་རྔ་སྒྲོག་པ་སྟེ།།

ལྷག་པའི་བསམ་པ་དཀར་བའི་དགེ་རྒན་ནི།།

མུན་ནག་ཀློང་དུ་གསལ་བའི་སྒྲོན་མེ་ཡིན།།

ཕུགས་བསམ་འདུན་མ་རིང་བའི་སློབ་བུ་ཚོགས།།

ཤེས་བྱའི་གཤོག་ཟུང་ཐོགས་ཏེ་མཁའ་རུ་ལྡིང་།།

མི་ཚེའི་ལམ་འཕྲང་འོད་མདངས་སྟོང་གིས་ཁྱབ།།

མཛེས་པའི་སློབ་གླིང་ཁ་བའི་ལྗོངས་སུ་གནས།།

2023/12/23ཉིན།

མདང་ནུབ་ཀྱི་རྨི་ལམ།

མདང་ནུབ་རྨི་ལམ་ཁྲོད་དུ།།

སྤོ་བོ་འདས་པོ་མཇལ་བྱུང་།།

ཁ་དྲང་ཁོག་དྲང་སེམས་པའི།།

གསུང་གི་བདུད་རྩི་གནང་བྱུང་།།

སྙིང་རྗེའི་བཞིན་རས་འཇམ་པོ།།

འཛུམ་དམུལ་བཞད་པའི་མེ་ཏོག།

སྡོང་རྩ་སད་ཀྱིས་བཅོམ་ཡང་།།

འདབ་ལོ་དགུང་ལ་འཕྱུར་འགྲོ།།

རྐང་དྲུག་འཁོར་བའི་ཆུ་སྐྱེས།།

དྲི་བསུང་ཐུལ་བའི་སྤོ་བོ།།

གཟུགས་སྐུ་ཆོས་དབྱིངས་འཐིམ་ཡང་།།

མདང་ནུབ་དངོས་སུ་མཇལ་བྱུང་།།

ཁ་ལན་སྤྲོད་ཁོམ་མེད་པའི།།

སྐྱ་མདའ་ཤར་ནས་ཤར་འདུག།

སེམས་པ་འཚུབ་པོའི་ངང་ནས།།

ང་ཡི་རྨི་ལམ་དཀྲོགས་སོང་།།

2023/8/6

བརྩེ་བ་ཨ་ལོང་ཆ་འགྲིག

སྔོན་བསགས་ལས་དབང་ཞིག་གིས་མཉམ་དུ་འཛོམས།།

གཙུག་ལག་བང་མཛོད་གཅིག་ཏུ་ཁད་ཀྱིས་འཛོམས།།

བདེ་སྐྱིད་མལ་སྟན་དྲོན་མོའི་གནས་གཅིག་འཛོམས།།

འཛོམས་པ་ཡག་མོ་བཀྲ་ཤིས་རྟེན་འབྲེལ་འགྲིག།

ཤེས་བྱའི་སྦྲང་རྩི་བཏུང་བའི་ན་ཆུང་དུས།

པིར་སྨྱུག་ལག་ཏུ་ཐོགས་པའི་སློབ་བུ་ཚོགས།།

སྐྱིད་སྡུག་ལས་དབང་གཅིག་པའི་གྲོགས་མཆོག་སྟེ།།

གངས་རིའི་བདེ་སྡུག་བསམ་ནས་མདུན་དུ་སྐྱོད།།

ཞེ་འདང་རི་མོ་མེ་ཏོག་ལྟ་བུར་འཛུམ།།

བཅོས་མིན་བརྩེ་བ་སེམས་ཀྱི་ཟབ་སར་གནས།།

དུང་བའི་མངར་ཁ་མཚོ་མོ་བཞིན་དུ་འཁྱིལ།།

ཕུགས་བསམ་འདུན་མ་གཅིག་པའི་ལམ་གྱི་ཟླ།།

མི་ཚེའི་ལང་ཚོ་དཔྱིད་དཔལ་ལྟར་དུ་མཛེས།།

གཞོན་ནུའི་དུས་རབས་འདབ་སྟོང་བཞིན་དུ་གྲོལ།།

རིག་པའི་འགྲན་རྩོད་བུང་རྩལ་ལས་གཡོ་བས།།

འུ་ཚོ་ནམ་ཡང་སློབ་གྲྭའི་མཁའ་དབྱིངས་འགྲིམ།།

2023•5•1ཉིན།

དུས་བཞིའི་མཛེས་སྡུག

༡ དབྱར།

རྩི་ཏོག་དཀར་དམར་འཇའ་ཚོན་བཀྲ་བའི་དཔལ།།

གཡུ་སྦྲང་འཕུར་རྩལ་གཡོ་བའི་རྩེད་འཇོའི་ཀློང་།།

མཚར་སྡུག་ཡིད་དབང་འཕྲོག་པའི་དབྱར་གཞུང་འདིར།།

མཛེས་སྡུག་ལྷ་ཡི་དགའ་ཚལ་ལྟ་བུའི་ཞིང་།།

༢ དགུན།

ཡངས་བའི་ས་འཛིན་གོས་དཀར་རྒྱན་གྱིས་བཀླུབས།།

སྡོང་པོ་སད་ཀྱིས་བཅོམ་པའི་ཆབ་རོམ་ཁྲོད།།

གཙང་པོ་དར་ཁ་འགྲིག་པའི་དགུན་གཞུང་འདི།།

བརྗིད་ཆགས་ལྷ་ཡི་དགའ་ཚལ་ལྟ་བུར་མཛེས།།

༣ སྟོན།

སྡོང་འི་ཁ་དོག་སྐད་ཅིག་འགྱུར་བའི་དུས།།

འདབ་ལོ་སེར་པོ་རླུང་གིས་སྐྱོམ་པ་ཡིས།།

ས་གཞི་གསེར་མདོག་སྤུད་པའི་སྟོན་གཞུང་འདི།།

བརྗིད་ཆགས་ལྷ་ཡི་དགའ་ཚལ་ལྟ་བུར་མཛེས།།

༤ དཔྱིད།

ས་གཞིར་རྩི་ཏོག་གསོན་ཤུགས་རྒྱས་པའི་སྐབས།།

དྲི་ངད་ཕྱོགས་ཀུན་འཐོར་བའི་མཛེས་སྡུག་དབུས།།

རི་ཀླུང་གཡུ་མདོག་རྒྱས་པའི་དཔྱིད་གཞུང་འདི།།

བརྗིད་ཆགས་ལྷ་ཡི་དགའ་ཚལ་ལྟ་བུར་མཛེས།།

2023/9/10ཉིན།

སྟོན་ལོར་འཐིམས་པའི་ཕ་ཡུལ།

འབྱམས་ཀླས་ནེའུ་གསིང་གསེར་མདོག་རྒྱན་དུ་བཀླུབས།།

སྟོན་གྱི་ལོ་མ་ཐར་ཐོར་ས་ལ་ལྷུང་།།

རླུང་བུ་བསིལ་བསིལ་སྙིང་ཁའི་བར་ནས་ལྡང་།།

ཕ་ཡུལ་དྲན་པའི་གདུང་བ་མིག་གིས་འཐུ།།

ནགས་ཀྱི་བྱེའུ་སུན་སྣང་སྐད་ངག་འདར།།

ལོ་མ་སེར་པོའི་ཤུག་སྒྲ་རྣ་བར་གཟན།།

གསེར་མིག་ཉ་ཆུང་སྐྱོ་བའི་དབུགས་རིང་འབྱིན།།

ཕ་ཡུལ་དྲན་པའི་གདུང་བ་མིག་གིས་འཐུ།།

དགུན་ཟླ་བསུ་བའི་གྲང་རླུང་སོ་ཁ་རྒོད།།

སེམས་པ་སྐྱ་བོ་འཁྱག་གིས་བསྡམས་པ་སྟེ།།

སྡོང་རྒན་གོག་པོས་སྟོང་བསམ་བདག་ལ་གླེང་།།

ཕ་ཡུལ་དྲན་པའི་གདུང་བ་མིག་གིས་འཐུ།།

གཡའ་དག་མཁའ་ཡི་དཀྱིལ་འཁོར་ཡངས་བའི་ཀློང་།།

ཟླ་འོད་གཞོན་ནུ་ཁེར་རྐྱང་གོམ་བགྲོད་འཁྱོར།།

མཚན་མོའི་འདབ་ལོ་ཤག་ཤག་ས་རུ་འཁྱར།།

ཕ་ཡུལ་དྲན་པའི་གདུང་བ་མིག་གིས་འཐུ།།

2023/9/30ཉིན།