མགོ་འབྲེག་དག
སྟོབས་ལྡན།
ཆོས་མདོ་སྔགས་གཉིས་ཀྱིས་མ་ཐུལ་བའི།།
མ་བུ་མོར་འཁྲེང་བའི་སེམས་ནད་དེ།།
ཕྱི་ཚུལ་འཆོས་ཙམ་གྱིས་མ་གཡོགས་ནས།།
གྲོང་སྡེ་ཆེན་གཞུང་ལ་ཕེབས་ཤོག་ཨ།།
བསྟན་ལུང་རྟོགས་གཉིས་ཀྱིས་མ་བསལ་བའི།།
ཡུལ་སྣང་བར་ཞེན་པའི་སེམས་སྐྱོན་དེ།།
ཁ་ཕོ་རུས་ཙམ་གྱིས་མ་བསྐུང་ནས།།
གཞིས་འཁོར་བའི་གླིང་ལ་ཕེབས་ཤོག་ཨ།།
ལམ་མཐོང་སྒོམ་གཉིས་ཀྱིས་མ་གྲོལ་བའི།།
ཚེ་འདི་ལ་ཆགས་པའི་གཅོང་ནད་དེ།།
གོས་དམར་སེར་གཉིས་ཀྱིས་མ་བཏུམ་ནས།།
གནས་གཏན་ཡུལ་མི་ཡི་ཞིང་ལ་ཕེབས།།
སེམས་ངེས་འབྱུང་བསྒོམས་པས་མ་ཕན་པར།།
ཕྱི་ཚོགས་དྲུག་ཡུལ་ལ་ཞེན་ཆགས་ཆེ།།
སྡོམ་སོར་ཐར་བླངས་བའི་ཡུད་ཙམ་ལས།།
དགྲ་ཉོན་མོངས་འདུལ་རྫོ་ཕ་རོལ་རི།།
སེམས་སྨོན་འཇུག་བསྐྱེད་པས་མ་ཡོང་བར།།
བློ་ཕྱོགས་རིས་ཆུ་བོ་བཞུར་བཞུར་ལ།།
ནང་བྱང་སྡོམ་རློམ་པའི་ཁེངས་པ་ལས།།
ཕྱོགས་རིས་མེད་སྙིང་རྗེ་དེ་མོ་ཙམ།།
སྒོམ་བསྐྱེད་རྫོགས་ཟབ་མོས་མ་ཐུབ་པར།།
གཞི་གཉིས་སྣང་གཏི་མུག་ཇེ་ཆེ་ལ།།
སྔགས་སྡོམ་པ་ཡོད་མདོག་ཁ་ཕོ་ལས།།
རང་རིག་པའི་ཡེ་ཤེས་དེ་ཀ་ཙམ།།
ཕྱི་འདུལ་སྡོམ་སྲུང་མདོག་ཞོམ་ཞོམ་ཞོམ།།
སེམས་བྱང་སྡོམ་ལྡན་མདོག་སྒམ་སྒམ་སྒམ།།
ནང་སྔགས་ཤེས་མདོག་གྲུང་གྲུང་གྲུང་།།
དོན་བདག་ཉམས་རང་སྐུབས་བརྡོལ་ནས་ཡོད།།
ལར་ཆོས་ལུགས་ཟེར་བའི་གཡེར་ཅན་དེ།།
མིའི་ལག་ཏུ་མི་ལོན་ཁ་ཆུ་ཙམ།།
དུག་ཉོན་མོངས་ཟེར་བའི་བླ་ཤོར་འདི།།
སྤོང་ཟེར་བ་ཨ་ཐང་ཆད་པའི་རྒྱུ།།
2016/6/3/13:49
རྩོམ་སྒྲིག་པ། སྟོབས་ལྡན།
གཙོ་གཉེར། གུ་ཡངས་སྤྱི་གཉེར།
