བོད་ཀྱི་གྱེར་འདོན་སྤྱི་སྟེགས་ཆེན་མོ་ནི་གྱེར་འདོན་སྒྱུ་རྩལ་ལ་ཐུགས་མོས་ཆེ་བའི་མི་བུ་རེ་སྙེག་ཅན་རྣམས་ལ་བསྐྲུན་པའི་སྐད་ངག་གི་ཉམས་སྣང་མངོན་སའི་གར་སྟེགས་ཤིག་དང་། ནང་སེམས་ཀྱི་འགྱུར་བ་བསྙལ་སའི་གནས་མལ་ཞིག་ཡིན་པས། གྱེར་འདོན་སྒྱུ་རྩལ་པ་གང་མང་སྐྱེད་སྲིང་སྒོས་ལོ་རྒྱུས་ཀྱི་ཉམས་སད་ཐེག་ཅིང་དུས་རབས་ཀྱི་སྙིང་སྟོབས་ལྡན་པ་ཞིག་ཏུ་འགྱུར་བར་རེ་བཞག་ཤིན་ཏུ་ཆེ།
བོད་ཀྱི་སྙན་ངག་པ་གྲགས་ཅན་འབྲུག་ལྷ་རྒྱལ་ནས།
藏族朗诵平台是藏区最大的朗诵媒体之一,本公众号主要是分享藏族已出版过的一些诗歌、经典朗诵、朗读，小品、故事等。
རྩེ་ཞོགས་དང་རྩེ་ར།
༡
ཉི་འོད་མིག་ཟུང་དུ་བཅུག་སྟེ།
མཚན་མོ་བཀར་དགོས་བསམ་བྱུང་།
༢
གཉིད་མ་ཁུགས་པར་སྒེའུ་ཁུང་ལས་སྐྱ་རེངས་ལ་ལག་པ་གཡུགས།
འུ་ཐུག་སྟེ་ར་སྐོར་ནང་གི་བྱ་ཕོ་ལ་བདའ་ལུང་བདའ་བྱས།
ཞེ་བྲེལ་ནས་ཕྱག་མདུད་གསེང་གི་པི་པི་ཤུབ་བུར་བུས།
ཡང་ཡང་སྒེའུ་ཁུང་ཕྱི་ཡི་སྒྲ་ལ་ཉན།
སྒྲ་ནི་ལྷིང་ཞིང་འཇགས།
ཡང་ཡང་དུས་ཚོད་ངོས་ཀྱི་མདའ་རྩེར་བལྟས།
མདའ་རྩེ་ཁེགས་ཤིང་དཀག
རྩེ་ཞོགས་ཀྱི་ཟ་འཕྲུག་ཁྲག་དང་རྩ་རྒྱུས་དེད་ནས་འབར།
ལྭ་གསར་ནང་ནས་རྩེ་དགོད་སྟེགས་ལ་ཤིན་ཏུ་བྲེལ།
སང་ཞོགས་དྲུག་པའི་ཚེས་གཅིག་ལ།
༣
འཛུམ་ཆུང་མེ་ཏོག་བཞིན་བཞད།
མེ་ཏོག་གཅིག་ཡ་གཉིས་ཡ།
གར་སྟབས་བུང་བ་ལྟར་སྐྱེན།
བུང་བ་གཅིག་ཡ་གཉིས་ཡ།
ཀྱུར་ཀྱུར་གླུ་ཡང་ལེན།
ལྡེམ་ལྡེམ་གར་ཀྱང་འགྱུར།
དེ་རིང་དྲུག་པའི་ཚེས་གཅིག་ལ།
༤
ཉི་མ་རིང་དུ་འཐེན་ནས།
མཚན་མོར་མདུད་པ་བརྒྱག་དགོས་བསམས།
དྭངས་ཤིང་གསལ་བའི་ཉིན་མོ་འདི་བསྲིང་ཐབས་སུ།
༥
སྤྲིན་པ་དཀར་སེར་གྱི་ཁ་དོག་ཚེས་པའི།
ངོ་གདོང་ཆུང་ཆུང་དང་ལྭ་ལྭ་གསར་བར་ས་རྡུལ་གྱི་གཡུང་དྲུང་འཁྱུད།
ཕ་མ་མིང་སྲིང་གི་བརྩེ་བ་བྲན་པའི།
རྡེའུ་དཀར་ནག་དང་བྱ་བྱེའུ་འབའ་འབུར་ཞལ་བརྡ་ཤར་ཤར་མིག་ཆུའང་མཆོད།
རི་དང་གཙང་པོའི་ཞལ་ཁ་ཕྱེ་བའི།
ལྷམ་ཆུང་གིས་མ་ཁོགས་པའི་མཛུབ་མོ་སྙིང་ལ་རྗེ་དག
རླུང་གི་གཤོག་པ་ཐོགས་ཐོགས་ཀྱང་འཕུར།
ཨ་ཙི་ཙི།
ཉི་ནུབ་དང་གྲོད་པས་འབོད་ཀྱིན་འདུག
ཡུལ་ལ་ལོག་དགོས་བྱུང་སོང་།
དགོད་དམ། ནམ་མཁའི་ལྷ་ཡང་བཞད།
ངུའམ། ནག་པོ་བདུད་ཀྱང་བསྔུན།
དྲུག་པའི་ཚེས་གཅིག་ལ།
༦
དྲུག་པའི་ཚེས་གཅིག་ལ།
ཉི་མའང་དྲོ།
རླུང་ཡང་གཡུགས།
ངོ་གདོང་ཆུང་ཆུང་འདིའི།
ཕྱེད་ཀ་འཛུམ་ཆུང་ཡིན།
ཕྱེད་ཀ་མིག་ཆུ་ཡིན།
