སྡོང་ལོ་ཐོར་ཚུལ། མདོ་བ་བློ་བཟང་བསྟན་པའི་སྙན་ངག

རིགས་ཀྱི་བླ་སྲོག་སྦྲུམ་པའི་སྙན་འཇེབས་ངག  །

ངག་ཏུ་གྱེར་བའི་ཤེས་ལྡན་གཞོན་ནུའི་ཁྱུ།།

ཁྱུ་མཆོག་ཇི་བཞིན་གདོང་དམར་སྣེ་དྲངས་ཏེ།།

ཏེ་བོའི་གནས་སུ་འཕགས་ལ་སོམ་ཉི་ཅི།།

བོད་ཀྱི་སྙན་ངག་པ་གྲགས་ཅན་ལྡོང་ཕྲུག་ནས།

སྙན་འཇེབས་ངག་གི་གདངས་དབྱངས་འདི་ན་འཁྱིལ།།

གསལ་དག་དབྱངས་ཀྱི་ཟིལ་ཤུགས་འདི་ན་རྫོགས།།

ཚོར་བས་མི་སེམས་འཕྲོག་པའི་ངག་གི་འཕྲུལ།།

བོད་ཀྱི་གྱེར་འདོན་སྒྱུ་རྩལ་དར་བར་ཤོག།

     བོད་ཀྱི་གྱེར་འདོན་པ་གྲགས་ཅན་བཀྲ་ཤིས་དབང་ཕྱུག་ནས།

གསལ་དག་སྙན་པའི་གདངས་དབྱངས་གྲོགས་སུ་ཁྱེར།།

ཆགས་སྡང་སྒྱུ་རྩལ་རྣམ་ཤེས་སྲོག་ཏུ་ཞུགས།།

གངས་ལྗོངས་མགྲིན་ངག་འབར་བའི་རྟེན་འབྲེལ་དུ།།

བོད་ཀྱི་གྱེར་འདོན་སྤྱི་སྟེགས་བྱོན་པ་ལེགས།།

བོད་ཀྱི་སྙན་སྒྲོན་པ་གྲགས་ཅན་དབྱངས་ཅན་ནས།

 དེ་ཡང་། མེས་པོ་དམ་པ་གོང་མ་དག་གི་བློ་གྲོས་ཀྱི་མྱུ་གུ་ལས་འཁྲུངས་པའི་རྩོམ་རིག་གི་གཙང་བོ་འདིའི་བཞུར་རྒྱུན་ཉམས་པ་མེད་པར་མུ་ནས་མུ་རུ་མཐུད་ཅིང་།  ལོ་ཟླའི་འཁོར་སྐྱོད་དང་དུས་རབས་ཀྱི་འཕེལ་རྒྱས་དང་བསྟུན་ནས་དེང་གི་དུས་འདིར་སླེབས་པ་ན།  དེ་ཉིད་ཚིག་གི་སྦྱོར་བ་དང་དོན་གྱི་སྙིང་བོས་འཁྱིལ་བའི་མཚོ་མོ་ཙམ་ཞིག་མ་ཡིན་པར།  ངག་གི་སྒྱུ་རྩལ་གྱི་རླབས་ཕྲེང་ཁོ་ནས་ངེད་ཅག་ལ་རོལ་མྱོང་གི་དགའ་སྟོན་གྱ་ནོམ་པ་ཞིག་ཀྱང་ཕུལ་ཡོད་པས་ན།  འདིར་བོད་ཀྱི་གྱེར་འདོན་སྤྱི་སྟེགས་ཆེན་མོས་འདས་པའི་ལོ་ངོ་གཅིག་གི་རིང་ལ་བོད་ཀྱི་རྩོམ་རིག་དང་སྒོས་སུ་གྱེར་འདོན་གྱི་ལས་དོན་རླབས་པོ་ཆེ་འདི་ལ་ཁ་ཞེ་གཉིས་མེད་ཀྱིས་མཛད་འཕྲིན་བླ་ན་མེད་པ་བསྐྲུན་དང་སྐྲུན་མུས་ཡོད་པ་འདི་ལ་དུས་ནམ་ཡང་ཡི་རང་དང་བཀུར་བསྟི་བྱེད།  དེ་དང་ལྷན་ཅིག་བོད་ཀྱི་གྱེར་འདོན་སྤྱི་སྟེགས་ཆེན་མོ་བཙུགས་ནས་ལོ་འཁོར་གཅིག་ལོན་པར་རྟེན་འབྲེལ་ཞུ་བ་དང་། ཞོར་དུ་མ་འོངས་པའི་ལམ་ཁ་ཡངས་ནས་ཡངས་སུ་འགྱུར་བའི་སྨོན་འདུན་སྙིང་ནས་ཞུའོ།།

སྙན་ངག་པ་འབྲོང་ཕྲུག་ནས།

རྔམ་ཁ་ཅན་གྱི་ལྷུན་པོའི་རྩེ་མོས་ཁ་བ་དཀར་པོའི་ཞྭ་མོ་གྱོན་སོང་།།

ཆུ་ཕྲན་དྭངས་གསལ་ཤང་ཤང་རྒྱུ་བས་ཆུ་འདབས་ལྗོན་པའི་ར་ལག་བཀུག་བྱུང་།།

གྱ་གྱུའི་མགྲིན་དབྱངས་མཚོ་ལ་ཐིམ་པས་འདབ་ཆགས་དེ་དག་ནགས་ལ་བཞུད་སོང་།།

འོན་ཏེ་ཁེར་སྐྱེས་འཇོལ་མོ་ཁྱེད་རང་གྲེ་བ་སང་སང་སོས་ག་བསུས་ཡོང་།།

སྣེ་མང་སྤྱི་ཚོགས་ཆ་འཇོག་མེད་པ་གང་ལ་སོང་ན་འདྲ་འདྲ་ཡིན་འདྲ།།

སྣེ་མང་འཚོ་བའི་མེ་ལོང་སྔོན་པོ་ག་དུས་ཡིན་ཡང་གཡའ་ཡིས་མ་གོས།།

འཇོལ་མོ་ཁྱེད་རང་གྲེ་བ་བསལ་ཤོག་གདངས་སྙན་དབྱངས་ལ་འགགས་པ་མེད་ཤོག།

ཁྱེད་རང་གྲེ་འགྱུར་ཉམས་པ་མེད་ན་ནམ་ཞིག་བྱ་ཁྱུས་མཐའ་ནས་བསྐོར་ཡོང་།།

ཞེས་འཆི་མེད་ཀྱིས་གུས་ཕུལ།

བོད་ཀྱི་གྱེར་འདོན་སྤྱི་སྟེགས་ཆེན་མོ།

ཁྱེད་ཀྱིས་ང་ཡི་རྣམ་དཔྱོད་བཏེགས་ཏེ་ཆོལ་གསུམ་ཡུལ་ལ་གཡས་བསྐོར་བརྒྱབ་སོང་། 

ཁྱེད་ཀྱིས་ང་ཡི་མགྲིན་པ་བཏེགས་ནས་ས་སྒང་རིལ་མོར་དཀྲིས་གསུམ་བྱས་སོང་། 

དེ་བས། ངས་ཁྱེད་ལ་དུས་གསུམ་གྱི་མ་མ་ཞེས་བོས་ཡོད། 

ཁྱེད་ཀྱིས་གསར་དུ་གྱེར་འདོན་ལ་ཕྱོགས་ཀྱིན་པའི་གཞོན་རབས་དག་ཁྲིད་དེ། 

སྒྱུ་རྩལ་ཞིག་གི་ཞིང་ཁམས་བསྟན་སོང་། 

ངག་རིག་ཅིག་གི་ཁ་དོག་བསྟན་སོང་། ཚོར་འདུ་ཞིག་གི་རླབས་རྒྱུན་བླུད་སོང་། 

དེ་བས། 

ཁྱེད་ནི་དུས་ཀྱི་ལམ་སྣ་འདྲེན་པའི་མ་མ་རེད། 

བོད་སྐད་ཡིག་གི་སྲོག་ཤིང་འདེགས་པའི་དབྱངས་རྟ་རེད། 

ངས་མགྲིན་པ་གཟེངས་སུ་བཏེགས་ནས་ཁྱེད་རང་ཁྲི་ལོར་ཤོག་ཅེས་འབོད་ངེས།

ཁྱེད་ཀྱིི་རུས་གསེང་ནས་ངས་ཕ་སྐད་མ་ཡིག་གི་བྲོ་བ་གསར་དུ་རྙེད་པས་ཡིན། 

ཁྱེད་ཀྱི་གདངས་འགྲོས་ལས་ངས་མེས་པོའི་མགྲིན་ངག་གི་དྲན་པ་སླར་ཡང་སོས་པས་ཡིན། 

ཁྱེད་ཀྱི་ཟིལ་ཤུགས་ལས་ངས་ཐོན་མིའི་རྣམ་དཔྱོད་ཀྱི་ཁ་དོག་གཞན་ཞིག་མཐོང་བས་ཡིན།

ཞེས་ཀྱེ་ཕུར་མཆོག་གསུམ་ནས།

  བོད་ཀྱི་གྱེར་འདོན་སྤྱི་སྟེགས་ཆེན་མོ་གཉེར་ནས་ལོ་འཁོར་གཅིག་ལོན་པར་རྟེན་འབྲེལ་ཞུ་བ་དང་ཆབས་ཅིག་རང་ཉིད་ཀྱི་བརྗོད་འདོད་པའི་སྐད་ཆ་ཁ་ཤས།  

སྤྱི་སྟེགས་འདི་ནི་བོད་གངས་ཅན་པའི་ཉག་ཕྲ་བའི་སྐད་ཡིག་གི་ལས་དབང་ལ་དོ་ཁུར་བྱ་བའི་སྤྱི་སྟེགས་ཤིག་ཡིན་ལ།   སྤྱི་སྟེགས་འདིས་ངང་ངམ་ཤུགས་ཀྱིས་ལོ་རབས་ཤིག་གི་འགན་ཁུར་ཕྲག་ཏུ་ཁུར་སྟབས།  དམིགས་ཡུལ་དང་ཚད་གཞི་མེད་པའི་སྤྱི་སྟེགས་གཞན་དག་ལས་འགོངས་དོན་དེ་ཡིན་ལ། སྤྱི་སྟེགས་འདི་ནི་བོད་མདོ་དབུས་ཁམས་གསུམ་གྱི་གྱེར་ཚིག་རྩོམ་པ་པོ་དག་གི་ནང་སེམས་ཀྱི་དགའ་སྐྱོ་ཆགས་གསུམ་བྱོ་ས་དང་།   གྱེར་འདོན་པ་དག་གི་གསལ་དག་སྙན་གསུམ་གྱི་མགྲིན་པའི་རྩལ་ཤུགས་ངོམ་ས་ཡིན་པས་ཁ་གཡང་དང་ཟོལ་བཅོས་ཀྱིས་བསླུས་པའི་འཕྲིན་སྟེགས་གཞན་དང་མི་འདྲ་སའང་དེ་ཡིན།   ཚེ་རབས་སུ་བསླངས་པའི་ལོ་རྒྱུས་ཀྱི་བདེན་པ་དང་དུས་རབས་ཤིག་གི་ངོ་གདོང་མཚོན་པའི་འཕྲིན་སྟེགས་འདི་བསྐལ་བརྒྱར་བརྟན་པར་ཤོག་ཅིག     

ཞེས་གུས་པ་གཡག་གྲུ་གཟིངས་ཀྱིས། 

 ངག་རིག་དབྱངས་ཀྱི་སྡིངས་ཆ།

—བོད་ཀྱི་གྱེར་འདོན་སྤྱི་སྟེགས་ཆེན་མོ་ཤར་གཏོང་བྱས་ཏེ་མི་ལོ་གཉིས་འཁོར་བར་རྟེན་འབྲེལ་ཞུ།

བོད་ཀྱི་གྱེར་འདོན་སྤྱི་སྟེགས་ཆེན་མོ།

ཕ་སྐད་ཀྱི་སྨྲ་ལྕེ་རྒོད་པོའི་འབབ་སྟེགས་དང་བོ།

ངག་གི་གདངས་ལས་སྡེབས་སྦྱོར་ཅན་གྱི་ཡི་གེ་འགའ་དབྱངས་འགྲོས་སུ་བསྐྱོན།

སེམས་འདུན་གྱི་ཚོར་བ་དྭངས་མོ་མགྲིན་སྦུག་ནས་ལྷོད་ལྷོད་ངང་།  

དལ་བུའི་དབྱངས་དང་མཐོ་དམའི་གདངས།

ཚིག་གི་དོན་སོགས་རོལ་མོའི་དབྱངས་སུ་གཅུད།

དེ་ནི་དྲན་ངོགས་ཀྱི་རི་མོ་རིས་སུ་ཕབ་པའི་ལོ་ཟླ་གསར་བ་ཞིག

ན་གཞོན་སྙིང་རུས་ཅན་ཞིག་གིས་ལྗིད་ཏིག་ཏིག་ཏུ་ཕྲག་ཞེང་ལ་ཁུར།

དེ་ནི་དུས་གསར་གྱི་སྟེགས་བུ་རུ་སྤར་བའི་ལང་ཚོའི་ཞབས་རྗེས་ཡིན་ལ།

རིགས་ཞེན་གྱི་མགྲིན་ངག་ལས་འཕོས་པའི་དབྱངས་རྟའི་ཕོ་ཉའང་ཡིན།

བོད་ཀྱི་གྱེར་འདོན་སྤྱི་སྟེགས་ཆེན་མོ།

ཆོལ་གསུམ་ངག་རིག་སྒྱུ་རྩལ་གྱི་སྡིངས་ཆ་གྲུ་བཞི།

དཀའ་བ་དང་སྡུག་ཡུས་ཀྱི་དུས་ཚོད་སྤོབས་པས་བགྲང་ཞིང་།

ཕ་སྐད་གཙང་མའི་དགེ་མཚན་གླུ་རུ་གྱེར་ཏེ་མི་ལོ་གཉིས་སོང་ཟིན།

ཀ་ཁ་ག་ངའི་གཤོག་ཟུང་གི་བསྐྱོད་ཡ་ཡངས་མོ།

ཨི་ཨུ་ཨེ་ཨོའི་ཚེ་སྲོག་གི་རྒྱབ་རི་བཀན་མོ། 

ན་ནིང་ཁྱོད་ཀྱི་རླུང་རྟ་གངས་རིའི་རྩེ་ནས་གཡོས།

ད་ལོར་ཁྱོད་ཀྱི་ཕུགས་བསམ་རྒྱ་མཚོའི་འཇིངས་ལས་ཟབ།

ཁ་སང་ཁྱོད་ཀྱི་ས་བོན་ས་ནག་ཞིང་ལ་བཏབ་ཀྱང་།

ད་ལོར་ཁྱོད་ཀྱི་འབྲས་བཟང་གངས་རིའི་རྒྱན་དུ་སྨིན་ཡོད།

དུས་རབས་གསར་བའི་མཁའ་དབྱིངས་སུ་མཆེད་པའི་ངག་རིག་གི་སྐར་མདའ།

འོད་ཀྱི་ལེར་ཁྲ་ལམ་མེར་གཟིམ་པ་མེད་པར་རྟག་བརྟན་ཡུན་རིང་དུ་འཚེར་གྱུར་ཅིག

ཅེས་བོད་ཀྱི་གྱེར་འདོན་སྤྱི་སྟེགས་ཆེན་མོའི་གཙོ་སྐྱོང་བ་ཁྱུང་སྲས་ཀུན་བཟང་ལགས་ཀྱི་རེ་འདོད་དུ་ངག་རིག་སྨྲ་བ་ཁ་གྱའི་ཁྱུང་སྔོན་གྱིས་༢༠༡༩/༣/༨/ལ་རི་དྭགས་གཙོད་ཀྱི་རྟགས་མཚན་གྱིས་བརྒྱན་པའི་མཐོ་སྒང་གི་གྲོང་ཁྱེར་དེ་རུ་བྲིས།

མྱི་བརྒྱ་ཐུབ་པའི་ཁྲོམ་ཟིལ་གྱིས་རླུང་འཕྲིན་འཁྲབ་གཞུང་གི་ལྟད་མོ་གངས་རིར་ཕུལ་ཞིང་གངས་རིའི་སྙན་ངག་གི་རྣམ་ཤེས་སྲོག་ཏུ་སྦྲུམ་མཁན་ཏེ། རང་རེའི་བསིལ་མོ་ལྗོངས་ཀྱི་མདོ་འཛིན་པ་དང་རྩོམ་པ་པོ་གྲགས་ཅན་རུས་པ་ལགས་ཀྱིས་ཆོལ་གསུམ་བོད་ཀྱི་གྱེར་འདོན་སྤྱི་སྟེགས་ཆེན་མོ་བགྲང་བྱ་གཉིས་ལ་སོན་པར་སྐྱེས་སུ་བསྟམས་པའི་ནོམ་པ་གང་དེ་འདི་ལྟ་ལགས་ཏེ།

བོད་ཀྱི་གྱེར་འདོན་སྤྱི་སྟེགས་ཆེན་མོར་བསྟབས་པ།

ཁ་རྩང་དེ་རིང་གི་བོད་ཀྱི་གཞས་གསར་སྣ་ཚོགས་དང་ཡང་སྒོས་རྩོམ་རིག་གསར་བའི་མི་དང་བརྩམས་ཆོས་ཀྱི་སྒྲོམ་གཞི་ཁ་ཆག་སྣ་རལ་དུ་འགྱུར་གྱིན་པའི་སྨུག་པ་ལྟ་བུའི་སྣང་ཚུལ་མོག་མོག་དེར། ཁོ་བོས་སྔར་མུས་བཞིན་སྐྱོ་གར་གྱི་རྣམ་འགྱུར་ཅིག་བཟུང་ཡོད། དེ་ལྟར་ཟད་ཀྱང་རྗེས་སུ་ཡི་རང་གི་དམིགས་པ་མ་དོར་བའི་ཡིད་སྨོན་གྱི་སྣང་ཚུལ་རེ་འགའ་ཡང་མཆིས་ཏེ་བོད་ཀྱི་གྱེར་འདོན་སྤྱི་སྟེགས་ཆེན་མོ་ནི་མངའ་རིས་དེ་དག་ཁྲོད་ཀྱི་སྙན་ངག་ངག་གི་གྲོང་ཚོ་ཅིག་ཡིན།  རེ་བ་ནི་གྱེར་འདོན་སྤྱི་སྟེགས་ཆེན་མོ་འདིས་ནི་རྣམ་ཀུན་གླུ་བརྒྱ་གདངས་གཅིག་གི་གྱེར་འདོན་ལ་བསལ་ལེན་དང་། རྗོད་བྱེད་ཚིག་གི་སྙན་ཆ་ལ་བོད་རང་གི་སྒྲ་སྙན་གྱི་དྲི་ངད་ལྡང་ཞིང་བརྗོད་བྱ་དོན་གྱི་འགྲེམ་སྟངས་ལ་མི་རིགས་ཀྱི་བདེ་སྡུག་མངོན་པར་གསལ་བའི་ལེགས་རྩོམ་དག་ལ་ཁམས་བཅུད་ལྡན་པའི་གཤིན་ས་ལེགས་པོ་ཞིག་བསྐྲུན་ཏེ། བོད་ཀྱི་སྙན་ངག་གསར་བའི་ཕོ་བྲང་གི་རྔམ་བརྗིད་འདེགས་པའི་གསེར་གྱི་གདུང་མ་ཞིག་ཏུ་འགྱུར་བའི་སྨོན་ལམ་ཡང་ཡང་འདེབས།       ཞལ་དྲོ།

ཞེས་སྙན་ངག་པ་རུས་པར་འབོད་པས་གནའ་མཁར་ཟི་ལིང་ནས་ཕུལ།

དེ་ཡང་གཞན་ཡིད་རྒྱ་མཚོའི་ཀློང་གི་ཐོས་བསམ་ནོར་བུ་ལེན་པའི་ཐབས་མཁས་ཏེ་ཁམས་པའི་བརྙན་འཕྲིན་ཁང་གི་མདོ་འཛིན་པ་གྲགས་ཅན་བྱམས་པ་རྡོ་རྗེ་ལགས་ཀྱིས་བོད་ཀྱི་གྱེར་འདོན་སྤྱི་སྟེགས་ཆེན་མོ་བགྲང་བྱ་གཉིས་ལ་འཁོར་བའི་གཏམ་སྙན་གྱི་ཅོང་སྒྲ་ཐོས་འཕྲལ་དགའ་མགུའི་སེམས་ཀྱི་མཆོད་པ་ཕུལ་བའི་ལྷག་བསམ་སྤྲིན་གྱི་རང་མདངས་གཤམ་གསལ་ལྟར།

གསལ་དག་སྙན་གསུམ་ཁྱེད་ཀྱི་ཁྱད་ཆོས་ཡིན།།

བདེན་བྱམས་མཛེས་གསུམ་ཁྱེད་ཀྱི་ཡོན་ཏན་ཡིན།།

རྒན་དར་གཞོན་གསུམ་ཁྱེད་ཀྱི་རྒྱབ་དཔུང་ཡིན།།

མདོ་དབུས་ཁམས་གསུམ་ཁྱེད་ཀྱི་ཡོད་ཚད་ཡིན།།

འདིར་བོད་ཀྱི་གྱེར་འདོན་འཕྲིན་སྟེགས་ཆེན་མོ་ལེགས་གྲུབ་བྱུང་ནས་བགྲང་བྱ་གཉིས་འཁོར་བར་དགའ་སྟོན་རྟེན་འབྲེལ་ཞུ་བ་དང་ཆབས་ཅིག  ཕ་སྐད་སྙན་ངག་གྱེར་འདོན་ཡག་ཐོག་ཡག་རྩེགས་དང་། ཤ་ཐོག་མར་རྩེགས་ཡོང་བའི་བཀྲ་ཤིས་སྨོན་འདུན་ཞུ།

ཞེས་ཁམས་སྐད་མདོ་འཛིན་པ་བྱམས་པ་རྡོ་རྗེས་གྲོང་ཁྱེར་པད་མ་ཅན་ནས་གུས་ཕུལ།

དུར་ཁྲོད་སྙན་ངག་པའི་མཚན་ཉིད་ཅན། སྙན་ངག་པ་གྲགས་ཅན་གངས་བུ་འབྲུག་ལྗང་དུ་འབོད་པས་བོད་ཀྱི་གྱེར་འདོན་སྤྱི་སྟེགས་ཆེན་མོའི་བགྲང་བྱ་གཉིས་ཀྱི་དགའ་སྟོན་ལ་བཀྲ་ཤིས་བདེ་ལེགས་འབྱུང་བའི་ལྷ་དར་དཀར་པོ་ཞིག་གི་དོད་དུ་བོད་ཀྱི་གྱེར་འདོན་སྤྱི་སྟེགས་ཆེན་མོར་ཕུལ་བ། 

སྒྲ་དང་དབྱངས་ཀྱི་ང་རོ།ཕ་སྐད་གཙང་མའི་་མཆོད་པ།ངག་རིག་ཤུལ་བཞག་ནོར་བུ།བླ་སྲོག་གི་སྒོ་མོ་འབྱེད་པའི་ལྡེ་མིག མི་རབས་རྗེས་མའི་རྣམ་ཤེས་འདྲེན་པའི་དབྱངས་རྟ། རི་ཁ་བ་ཅན་གྱི་རི་ཆུ་ནགས་གསུམ་ལ་གསོན་ཤུགས་ཀྱི་སྟོབས་སྐྱེད་ནུས་པའི་སྨྲ་བའི་འབབ་སྟེགས། སྐལ་བཟང་ངག་གི་སྒྲོན་མེ།ནམ་ཡང་ཉམས་པ་མེད་པར་ཤོག  བཀྲ་ཤིས་བདེ་ལེགས།

ཞེས་དུར་ཁྲོད་སྙན་ངག་པ་འབྲུག་ལྗང་དུ་འབོད་པས་ཟླ་ཚེས་བཟང་བོར་བྲིས།

བར་སྣང་རླུང་འཕྲིན་གྱི་ལས་དོན་ཁུར་དུ་བཞེས་ཏེ་ཁུ་བྱུག་མགྲིན་ངག་གི་གྲེ་འགྱུར་སྙན་མོས་རི་ཁ་བའི་ལྗོངས་ཀྱི་སྙན་དབང་བསུས་མྱོང་བའི་མདོ་འཛིན་པ་གྲགས་ཅན་བསོད་ནམས་ལྷ་མོས་ངེད་སྤྱི་སྟེགས་ལ་བྲིས་པའི་སྙན་འགྱུར་ངག་གི་མཆོད་པ་གཤམ་ལྟར།

གྱེར་གྱེར་སེམས་ཀྱི་གྱེར་དབྱངས་དགའ་སྐྱོ་ཆགས་སྡང་གསལ་བས་བྲང་ཁོག་ཟབ།།

འདོན་འདོན་ངག་གི་འདོན་རྟ་གསལ་དག་སྙན་གསུམ་འཛོམས་པའི་ངག་སྒོ་ཡངས།།

བོད་ཀྱི་གྱེར་འདོན་སྤྱི་སྟེགས་ཆེན་མོའི་ལོ་འཁོར་གཉིས་ཀྱི་སྐྱེས་སྐར་ལ་སྙིང་ཁོང་རུས་པའི་གཏིང་ནས་རྟེན་འབྲེལ་ཞུ་བ་དང་ཆབས་ཅིག།  འབྱུང་འགྱུར་གྱི་ལོ་ཟླའི་ནང་ཡར་ངོའི་ཟླ་ལྟར་འཕེལ་ཏེ་ཀུན་གྱིས་དོ་སྣང་བྱེད་ཡུལ་དུ་འགྱུར་བར་སྨོན།

ཞེས་མཚོ་སྔོན་རླུང་འཕྲིན་ཁང་གི་མདོ་འཛིན་པ་བསོད་ནམས་ལྷ་མོས་བྲིས་པའོ།

ཨ་མདོ་བརྙན་འཕྲིན་ཁང་གི་མདོ་འཛིན་པ། ཕ་སྐད་གློག་བརྙན་འཁྲབ་སྟོན་པ་ཨ་རིག་མཐོང་གྲོལ་ལམ་སྒྲོལ་མ་སྐྱབས་ལགས་ཀྱིས་ཀྱང་བོད་ཀྱི་གྱེར་འདོན་སྤྱི་སྟེགས་ཆེན་མོ་གཉེར་ནས་ལོ་འཁོར་གཉིས་ལོན་པར་བཀྲ་ཤིས་པའི་སྨོན་ཚིག་ཏུ་འདི་ལྟ་སྟེ།

ལྷག་བསམ་འོ་མའི་རང་མདངས་གངས་ཅན་ཁ་བའི་ལྗོངས་ལ་གཏོར།།

ཕ་སྐད་གཙང་མའི་མགྲིན་ངག་རང་བྱུང་སེམས་ཀྱི་གསོས་སུ་སྨིན།།

བཅུ་ཕྲག་རིག་པའི་འབྲས་བུ་དཔྱོད་ལྡན་པ་ཡི་ངག་ལས་མཆེད།།

གྱེར་འདོན་སྤྱི་སྟེགས་འདི་ཉིད་དུས་སུ་བབས་པའི་ཆར་དང་མཚུངས།། 

 ཞེས་མདོ་འཛིན་པ་སྒྲོལ་མ་སྐྱབས་སམ་ཨ་རིག་མཐོང་གྲོལ་དུ་འབོད་པས་བྲིས།