ཐེངས་དང་པོར་ཁྲུང་ཁྲུང་སྐེ་ནག་གིས་མཚོ་སྔོན་དུ་དགུན་སྒྲོལ་བ་ལྟ་ཞིབ་ཚད་ལེན་བྱུང་།ཉེ་ཆར། གསར་འགོད་པས་མཚོ་སྔོན་ཞིང་ཆེན་ནགས་ལས་དང་རྩྭ་ཐང་ཅུས་ནས་ཤེས་རྟོགས་བྱུང་བ་ལྟར་ན། ད་ལོར་མཚོ་སྔོན་ཞིང་ཆེན་གྱིས་ཐེངས་དང་པོར་ཁྲུང་ཁྲུང་སྐེ་ནག་དང་ཁྲུང་ཁྲུང་སྐྱ་བོ་སོགས་འདབ་ཆགས་རིགས་ཀྱིས་མཚོ་སྔོན་དུ་དགུན་སྒྲོལ་བ་ལྟ་ཞིབ་ཚད་ལེན་བྱུང་། ཉེ་དུས་མཚོ་སྔོན་ཞིང་ཆེན་ནགས་ལས་དང་རྩྭ་ཐང་ཅུས་སོགས་ལས་ཁུངས་ཀྱིས་མཚོ་སྔོན་གྱི་ཆུ་བྱ་ཡོད་པའི་ས་ཁོངས26ཏུ་དགུན་སྒྲོལ་བའི་ཆུ་བྱ་ལ་དུས་མཉམ་དུ་ལྟ་ཞིབ་ཚད་ལེན་བྱས་པ་རེད། ལྟ་ཞིབ་ཚད་ལེན་དུས་ཡུན་ཉིན་བཅུ་དང་ལམ་ཐག་སྤྱི་ལེ3087ཡིན་ལ། ཁྱོན་བསྡོམས་དགུན་སྒྲོལ་ཆུ་བྱ་སྡེ6དང་ཚན10 རིགས42 ཁ་གྲངས57298བཅས་ལ་ལྟ་ཞིབ་ཚད་ལེན་བྱས་པ་དེ2024ལོར་དུས་མཚུངས་སུ་ལྟ་ཞིབ་ཚད་ལེན་བྱས་པའི་དགུན་སྒྲོལ་ཆུ་བྱ་སྡེ6དང་ཚན9 རིགས38 ཁ་གྲངས21675བཅས་དང་བསྡུར་ན། གྲངས་འབོར164.4%འཕར་ཡོད་པ་རེད། མཚོ་སྔོན་ཞིང་ཆེན་ནི་དུས་བྱའི་གནས་སྤོར་བགྲོད་ལམ་གལ་ཆེན་ཞིག་ཡིན་པའི་ཆ་ནས། ཀྲུང་གོའི་དུས་བྱའི་གནས་སྤོར་བགྲོད་ལམ4ལས་གཙོ་བོ་ཡ་གླིང་ཤར་མ་ནས་ཨོ་སི་ཁྲུ་ལི་ཞི་ཡ་དང་ཡ་གླིང་དབུས་མའི་གནས་སྤོར་ལམ་ཐིག་གཉིས་ལ་འབྲེལ་ཡོད།
![]()
ཐེངས་འདིར་ལྟ་ཞིབ་ཚད་ལེན་བྱས་པའི་ངང་བ། (པར་རིས་མཚོ་སྔོན་ཞིང་ཆེན་ནགས་ཚལ་དང་རྩྭ་ཐང་ཅུས་ཀྱིས་མཁོ་འདོན་བྱས།)
ངོ་སྤྲོད་བྱས་པ་ལྟར་ན། ལྟ་ཞིབ་ཚད་ལེན་བྱུང་བའི་དགུན་སྒྲོལ་ཆུ་བྱ་ལས་ཆེས་མང་བ་ནི་ངང་ཁྲུང་གི་དབྱིབས་སྡེ་ཡིན་པ་སྟེ། དེ་ལ་ཚན1དང་རིགས22ཡོད་པ་དང་། སྤྱིའི་རིགས་ཁྱུའི་ཁ་གྲངས་ཀྱིས52.38%ཟིན། དེ་རྗེས་མཐིང་རིལ་གྱི་དབྱིབས་སྡེ་ཡིན་ཞིང་། དེ་ལ་ཚན4དང་རིགས10ཡོད་ལ། 23.81%ཟིན། ཆེས་ཉུང་བ་ནི་གག་བྱའི་དབྱིབས་སྡེ་ཡིན་ལ། དེར་ཚན1དང་རིགས1ཡོད་པ་དང་། 2.38%ཟིན་ཡོད། ཁྱུ་ཚོགས་ཀྱི་གྲངས་འབོར་ལས་ངང་ཁྲུང་དབྱིབས་སྡེའི་བྱ་གག་གི་ཚན་ནི་གཙོ་བོ་ཡིན་པ་དང་། ཁ་གྲངས་མང་ཉུང་ལྟར་བསྒྲིགས་ན་རིམ་པ་བཞིན་གག་པ་ཆུ་དམར30897དང་། ངུར་བ17708 གག་པ་མགོ་ལྗང2109 ངང་བ1242 སྐྱ་གག1081 ཆུ་བྱ་གཞན་རིགས4261བཅས་རེད། ཐེངས་འདིར་རྒྱལ་ཁབ་ཀྱི་རིམ་པ་དང་པོའི་སྲུང་སྐྱོབ་བྱ་རིགས་ཁྲུང་ཁྲུང་སྐེ་ནག4དང་མཚོ་གླག་མཇུག་དཀར24དང་། རྒྱལ་ཁབ་ཀྱི་རིམ་པ་གཉིས་པའི་སྲུང་སྐྱོབ་བྱ་རིགས་རིགས8ལྟ་ཞིབ་ཚད་ལེན་བྱུང་བ་ནི་རིམ་པ་བཞིན་ངང་བ་དང་ངང་བ་མཆུ་དམར། ཨིར་མོ་མགོ་ཁྲ། ངང་ཁྲུང་གདོང་དཀར། ངང་ཁྲུང་། ཁྲུང་ཁྲུང་སྐྱ་བོ། འབིགས་ལེན་སྐེ་ནག མཐིང་རིལ་གྲོ་མོ་བཅས་ཡིན་པ་དང་། དེ་དག་གི་གྲངས་འབོར་ནི1784རེད། དེ་དང་ཆབས་ཅིག་མཚོ་སྔོན་ཞིང་ཆེན་མཚོ་ཤར་གྲོང་ཁྱེར་ཞུན་ཧྭ་རྫོང་གི་རྨ་ཆུའི་འབབ་རྒྱུད་ནས་མོང་གོལ་རྒྱལ་ཁབ་ཝུའུ་པུའུ་སུའུ་ཞིང་ཆེན་གྱི་གདུབ་རྟགས་བཀོད་པའི་ངང་བ1T83ཡང་བསྐྱར་ཟིན་ཐོར་བཀོད་ཅིང་། ད་ཐེངས་བརྩིས་ན་བསྟུད་མར་ལོ14ལ་ངང་བ་དེས་མཚོ་སྔོན་གྱི་རྨ་ཆུའི་འབབ་རྒྱུད་ནས་དགུན་སྒྲོལ་བ་ལྟ་ཞིབ་ཚད་ལེན་བྱུང་ཡོད་པ་རེད། “ང་ཚོས་ངང་བ30ལ་གནས་ངེས་རྗེས་འདེད་ཡོ་བྱད་བསྐོན་པ་དང་། ལྟ་ཞིབ་ཚད་ལེན་བརྒྱུད་མཚོ་སྔོན་ནས་དགུན་སྒྲོལ་བའི་ངང་བ་ནི་གཙོ་བོ་མོང་གོལ་རྒྱལ་ཁབ་དང་ཞིན་ཅང་པ་དབྱིན་གཙང་བོའི་འབབ་རྒྱུད་ནས་རྒྱུད་སྤེལ་བའི་ཁྱུ་ཚོགས་ཡིན་པ་ཕྱོགས་ཡོངས་ནས་རྒྱུས་ལོན་བྱུང་ཡོད”ཅེས་མཚོ་སྔོན་ཞིང་ཆེན་ནགས་ལས་དང་རྩྭ་ཐང་ཅུས་ཀྱི་རི་སྐྱེས་སྲོག་ཆགས་དང་རྩི་ཤིང་སྲུང་སྐྱོབ་ཁྲུའུ་ཡི་ཁྲུའུ་ཀྲང་ཀྲང་ཡུས་ཀྱིས་ངོ་སྤྲོད་བྱས། ཡོང་ཁུངས། མཚོ་སྔོན་བོད་ཡིག་ཚན་རྩལ་ཚགས་པར།
རྩོམ་སྒྲིག་འགན་ཁུར་བ། ཀླུ་མགོན་རྒྱལ།
ལྟ་སྐུལ་བ། གཡང་འབུམ་ཚེ་རིང་། ![]()
责编/冷公加
监制/杨本才让
投稿邮箱/3068276991@qq.com
བརྩམས་དབང་རྩོམ་མཁན་ལ་དབང་། དབང་གནོད་ཡོད་ཚེ་འཕྲལ་མར་ང་ཚོར་འབྲེལ་བ་གནང་རོགས།
版权归原作者所有，如有侵权请立即与我们联系
