༈ མིའི་སེམས།
❤️
ཆུང་ཆུང་དུས་སུ་མི་ཆེན་འགྱུར་ན་སྙམ། །
མི་ཆེན་དུས་སུ་ཆུང་དུས་ཡིད་སྨོན་བྱེད། །
ད་ལྟའི་དུས་སུ་མ་འོངས་མདུན་ལམ་སེམས། །
མ་འོངས་དུས་སུ་ད་ལྟ་ཕྱིར་དྲན་བྱེད། །
རང་ཡུལ་འདུག་དུས་མི་ཡུལ་འགྲིམ་སྙིང་འདོད། །
མི་ཡུལ་སླེབས་ཚེ་རང་གི་ཕ་ཡུལ་དྲན། །
ཡུན་རིང་གཤིབ་ཚེ་བཟའ་གྲོགས་ཡིད་ལ་གཟན། །
ཡུན་རིང་འབྲལ་ཚེ་བཟའ་གྲོགས་སེམས་ལ་འཁོར། །
རབ་བྱུང་ཡུན་སོང་ཁྱིམ་པའི་གནས་ལ་དད །
ཁྱིམ་པ་ཚེ་ཟད་རབ་བྱུང་འཚོ་བར་སྨོན། །
ལ་རྩེར་ལུས་དུས་ལུང་གཏིང་བབ་པར་འདོད། །
ལུང་གཏིང་འདུག་ཚེ་ལ་རྩེར་འཛེག་སྙིང་འདོད། །
གྲོང་ཁྱེར་བ་ཡིས་གྲོང་གསེབ་འཚོ་བར་སྨོན། །
གྲོང་གསེབ་པ་རྣམས་གྲོང་ཁྱེར་ལོངས་སྤྱོད་མོས། །
བོད་ཡུལ་བ་རྣམས་རྒྱ་ཡུལ་འཁྱམས་པར་འདོད། །
རྒྱ་ཡུལ་མི་རྣམས་བོད་ཡུལ་བསྐོར་སྙིང་འདོད། །
རང་ལ་མ་ཐོབ་རང་གི་ཆུང་མ་བཟང་། །
རང་ལ་ཐོབ་དུས་གཞན་གྱི་ཆུང་མ་བཟང་། །
དཀར་ཟས་ཟ་དུས་དམར་ཟས་འགྲམ་ཆུ་ལྡང་། །
དམར་ཟས་རགས་དུས་དུད་ཆང་ཨ་རག་དྲན། །
འདི་ནི་འགལ་འདུ་ཚོགས་པའི་མི་ཚེ་སྟེ། །
འདི་ལ་མཐའ་མེད་འདོད་པའི་མི་སེམས་ཟེར། །
འདི་ནི་འཁོར་བའི་སེམས་ཀྱི་ཆོས་ཉིད་སྟེ། །
འདི་ལ་རང་བྱུང་ཁམས་ཀྱི་སྒྲིགས་གཞི་ཟེར། །
རང་གིས་མ་བྱུང་ཇི་ལྟར་བྱས་ཀྱང་སྡུག །
རང་གིས་འཇོན་ན་གང་ལྟར་བྱས་ཀྱང་བདེ། །
མདོར་ན་རང་ཚོད་ཟིན་ན་ལེགས་མངོན་སྟེ། །
དབུ་མའི་ལམ་ཐིག་ཤེས་པ་མཆོག་ཏུ་གཅེས། །
རྣམ་མང་ཐོས་སྲས་དེས། ✍️
