ཁྲུང་ཁྲུང་ཁྱུ་ཡི་མ་གྲགས་འུར་སྒྲ་བཞིན། །
ས་ཟླའི་བོད་ཀྱི་མི་སྒྲུབ་ཆོས་སྒྲོགས་ཁྲོད། །
དུས་ཆེན་དེ་ཡང་ཤོར་བའི་འགྱོད་སེམས་ཀྱིས། །
ཕྱིར་དྲན་གཙང་མའི་སྨོན་པ་ཙམ་འདི་སྤེལ། །
༈ བར་ཐག།
མི་དང་མི་ཡི་བར་ཐག །
ཕྱི་ཤུབ་མི་ཚུགས་ཙམ་རེད། །
མི་དང་མི་ཡི་མི་ཚུགས། །
རྫུན་མའི་ཕྱི་ཚུལ་ཙམ་རེད། །
མི་དང་མི་ཡི་ཉེ་རིང་། །
སེམས་ཀྱི་བར་ཐག་ཙམ་རེད། །
སེམས་དང་སེམས་ཀྱི་བར་ཐག །
འདང་བརྩེའི་སྣང་བ་ཙམ་རེད། །
འདང་བརྩེ་ཉེ་བའི་མི་དེ། །
ཉེ་མོའི་དྲུང་ནས་བཀྲ་ཤིས། །
འདང་བརྩེ་རིང་བའི་མི་དེ། །
རིང་པོའི་རྒྱང་ནས་དོན་འགྲུབ། །
དགའ་སྤྲོས་ཡིད་ཁམས་གང་ཞིང་། །
དགོད་སྒྲས་ཡུལ་ཁམས་ཁྱབ་ཤོག །
སྐྱིད་པའི་ཉི་མ་འཆར་ཞིང་། །
བདེ་བའི་དུང་ཟླ་ཚེས་ཤོག །
སྨོན་པ་དེ་འདྲར་བྱས་ཤིང་། །
གསོལ་འདེབས་དེ་འདྲ་བྱས་ནས། །
མིག་ཆུང་དེ་འདྲས་ཟུམ་པས། །
དེ་འདྲར་དོན་ལ་གྱུར་ཅིག །
ཉི་མའི་བུ་མཆོག།
༈ སྨོན་པ།
སྙིང་པོའི་གནས་མཆོག་མཇལ་བའི་ཨ་སྐྱོ་དེས། །
སྙིང་ལྟར་གཅེས་པའི་ཕ་མ་སེམས་ཅན་ལ། །
སྙིང་ནས་མཆི་མ་འདྲེན་པའི་གསོལ་སྨོན་རེ། །
སྙིང་པོའི་དོན་ལ་ཕན་པའི་ཆེད་དུ་བྱས། །
གནམ་རྒྱ་ཡན།
༈ རྒྱང་གླུ།
འུད་སྒྲོག་ཆེ་མཐོའི་མིང་གིས་མིག་བསླད་པའི། །
ཡིན་སྣང་དགུང་ནས་ཤར་བའི་བོད་མིའི་ངོར། །
ནུས་མེད་འཁྱམས་པོའི་ཚུལ་བཟུང་མི་ཆུང་ང་། །
ཐམས་ཅད་ཁོང་དུ་ཆུད་པའི་འཇའ་པོ་ཡིན། །
ང་རྒྱལ་རི་བོ་གཞོམ་ཕྱིར་ས་མཐར་ཆས།།
འདོད་ཆགས་ཆུ་བོ་བྲི་ཕྱིར་ཡུལ་མཐའ་བསྐོར།།
ཞེ་སྡང་མེ་ཆེན་མཇིལ་ཕྱིར་རྒྱལ་ཁམས་འགྲིམ།།
གཏི་མུག་མུན་ཁང་གཏོར་ཕྱིར་ཕྱི་རོལ་འགྲོ།།
སེམས་ཀྱི་དམ་ཆོས་འཚོལ་ཕྱིར་ས་མཐའ་འཁྱར།།
ཆོས་ཀྱི་སྙིང་པོ་རྟོགས་ཕྱིར་ཡུལ་མཐའ་བསྐོར།།
རང་སེམས་དགེ་སྡིག་བལྟ་ཕྱིར་རྒྱལ་ཁམས་འགྲིམ།།
ཐམས་ཅད་རོ་སྙོམ་ནུས་ཕྱིར་ཕྱི་རོལ་འགྲོ།།
རྣམ་རྒྱལ།
༈ བལྟ་ཚུལ།
བལྟས་ན་མི་ཡག་མདོག་ངན་གོས་ངན་གྱི་ཚུལ་ལ། །
རྒྱུས་མེད་རྒྱ་གྲོང་ནང་གི་ཕྱི་ཚུལ་གྱི་མི་ཚོས། །
ཉེ་རྒྱང་ཀུན་ནས་བྱེད་པའི་མཐོང་ཆུང་གི་རྣམ་པ། །
ངེས་མེད་འཁྱར་པོ་བདག་ལ་ཉམས་སྣང་ཙམ་མི་འདུག །
ངལ་བསོས་བུས། ✍️
བཀྲ་ཤིས་བདེ་ལེགས།
