ཕུང་པོ་མི་གཙང་གདོས་བཅས་ཤ་ཁྲག་གི་ཆུ་བུར།།
བཟང་ངན་དྲག་ཞན་མཐོང་བ་བག་ཆགས་ཀྱི་ཁ་དོག།
བཅས་བཅས་བཅོས་བཅོས་མང་པོ་མི་ཆུས་ཀྱི་རྩེད་མོ།།
ཅིས་ཀྱང་དོན་མེད་བློ་ཡི་སྒྲོ་བཏགས་རེ་འདུག་པ།།
དགའ་སྐྱོ་ཆགས་སྡང་སྣ་ཚོགས་མི་སེམས་ཀྱི་རང་གཤིས།།
མི་ཡི་གྲལ་རིམ་ཟེར་བ་རྣམ་རྟོག་གི་བཟོ་ལྟ།།
ཟོབ་ཟོབ་འཆོས་འཆོས་མང་པོ་བོད་གླེན་གྱི་འགྲོ་ལུགས།།
ཅིས་ཀྱང་སྐྱོ་ཞིང་སུན་པའི་འཁྲབ་སྟོན་རེ་འདུག་པ།།
འདྲ་འདྲའི་ལུས་སེམས་གཉིས་ལྡན་མཐོ་རིས་ཀྱི་མི་ལ།།
མི་འདྲའི་བར་ཐག་མང་པོ་མེད་བཞིན་དུ་བཏགས་པ།།
མི་ལུགས་ཟེར་ཡང་རྨོངས་རླུན་འདྲེ་སྲིན་གྱི་སྲོལ་རྒྱུན།།
ཅིས་ཀྱང་རང་ཕྱོགས་རྒུད་པའི་རུལ་དྲི་རེ་འདུག་པ།།
ཕྱི་ནང་གང་ལ་བལྟས་ཀྱང་དགའ་སྐྱོ་ཡི་ཉམས་འགྱུར།།
ངེས་མེད་སྣང་བའི་ཡུལ་ལ་མི་མཐུན་གྱི་ངོས་མང་།།
མི་ཤར་དགུ་ཤར་སྣ་ཚོགས་འགྲོ་སེམས་ཀྱི་རང་གཤིས།།
ཅིས་ཀྱང་འགོག་ཐབས་མེད་པའི་སྣང་ཤས་རེ་འདུག་པ།།
ངལ་བསོས་བུ་རྣམ་མང་ཐོས་སྲས། ✍🏻
