༈ རང་གི་མཚང་འབྲུ།
དྲེད་པོའི་སྟ་གྲི།
ཞེས་བྱ་བ།
རང་གི་བདག་འཛིན་གདོང་ལེན་མི་ནུས་བཞིན། །
གཞན་བདག་འདུལ་བའི་ཚུགས་དེ་ཀུན་གྱིས་གཏོད། །
རང་ལ་འདིར་བརྒྱག་གདེང་ཚོད་མེད་བཞིན་དུ། །
གཞན་དག་འདྲེན་པའི་ཁ་ཕོ་ཚང་མས་བྱེད། །
ཀུན་ལ་སྨོན་ཀྱང་ཀུན་ཀྱང་མ་འགྲུབ་པའི། །
མི་ངན་བྱ་མང་བྱ་སྤུ་རླུང་ཁྱེར་འདྲའི། །
ཚེ་འདིར་འདི་འགྲུབ་སྙིང་པོ་དེ་གང་ཞེས། །
ད་གཅིག་བགྲང་དང་སུན་པ་མི་སྐྱེའམ། །
མ་བྱས་མ་ལས་པ་དེ་གཅིག་མེད་ཀྱང་། །
མི་འགྲུབ་རྟགས་ཀྱི་ཁྲམ་དམར་ཡུལ་ངོས་ནས། །
ལན་གཅིག་མིན་པ་མང་པོ་མ་མཐོང་ངམ། །
རང་ཚོད་ཟུང་ལ་ད་ནི་རང་མགོ་འདོན། །
རང་མགོ་ཐོན་པའི་དམ་ཆོས་མ་འགྲུབ་བཞིན། །
མི་མགོ་འདོན་པའི་འགྲོ་དོན་ཡོད་དོན་མེད། །
དེ་ཕྱིར་ཕྱི་རོལ་གང་ལའང་མི་བལྟ་བར། །
ད་ནི་ནང་ནས་རང་བསམ་བཏང་རན་ནོ། །
སྒྲུབ་སྒྲུབ་འདས་པའི་ཡུལ་ལ་ཕྱིར་བལྟས་ན། །
མ་འགྲུབ་རེ་ཐག་ཆོད་པའི་གཟུགས་བརྙན་དེ། །
རང་སེམས་མེ་ལོང་ངོགས་སུ་བཀྲ་བ་འདི། །
ཞིབ་པར་སོམས་ལ་ད་ནི་རང་ཉིད་ཐུལ། །
ད་ཙམ་གདམས་ཆོས་བརྒྱ་ཡི་སྙིང་པོའི་དོན། །
ཀུན་ལ་མི་བལྟ་རང་སེམས་ཁོ་ན་ཡི། །
དཀར་ནག་ཉིད་ལ་བལྟས་ཏེ་མ་འབད་ན། །
རང་མགོའི་ཚེ་ཐུང་ཉི་མ་ནུབ་ཏ་རེ། །
མི་ཚེ་མྱུར་དུ་ལྟུང་བའི་རྣམ་གཡེང་གི །
འཁྲུལ་འཁོར་ལག་འཕྲིན་ཉིད་ལ་གཡེང་བཞིན་དུ། །
འཆི་བདག་སྒོ་དྲུང་གོམ་ཁའི་རྡོག་འཆོལ་ཏེ། །
ལོག་འཚོའི་དམྱལ་ཟང་གཏིང་དུ་སླེབ་ཏ་རེ། །
རྣམ་ཤེས་ལག་འཕྲིན་ནང་དུ་ཤོར་ཟིན་པའི། །
མ་ཤིའི་རོ་ལང་འདི་རྣམས་སྙིང་རྗེའི་གནས། །
ཚེ་སྲོག་གཡེང་བའི་འཕྲུལ་གྱིས་འཕྲོག་ཟིན་པའི། །
མི་ལུས་ཤ་ཐོ་འདི་རྣམས་ཤ་རེ་ཚ། །
ཨ་ཁ་ཨ་ཁ་དེང་སང་དུས་ངན་གྱི། །
ང་དང་ང་འདྲའི་ཟོག་པོ་གྱོང་པོ་རྣམས། །
ཕན་ཚུན་དག་སྣང་སྤངས་བའི་ར་མཆུ་གཟེང་། །
མ་དག་ནང་གི་འདྲེ་ཆེན་དེང་སང་དར། །
སྔ་དྲོའི་ཆོས་བྱེད་དྲོ་ཆོས་ལོག་སྒྲུབ། །
ཉིན་ཀར་ལྷ་མཆོད་མཚན་མོ་འདྲེ་སྲིན་འབོད། །
ད་ནང་དད་ཕྱག་དོ་ནུབ་གཤེས་བསྐུར་འདེབས། །
དར་ལྕོག་འདྲ་བའི་མི་ཚོགས་དེང་སང་དར། །
རྒྱུ་མཚན་གནས་ལུགས་མགོ་ལ་རྡོག་བརྫིས་ཀྱིས། །
ཆེ་གྲགས་མཐོན་པོའི་རྗེས་སུ་ཁྱི་བཞིན་རྒྱུག། །
སེམས་རྒྱུད་ཌ་མ་རུ་བཞིན་གཡོ་ལྡོག་ཅན། །
གསོན་ཚེ་མི་ཡུལ་འདི་ནས་མང་དུ་མཐོང་། །
བསམ་པ་ཡོད་ཀྱང་ནུས་པའི་སྟོབས་ཞན་ཅིང་། །
ཤེས་པ་ཡོད་ཀྱང་སྒྲུབ་པའི་ཐབས་རྡུག་པ། །
མི་ནུས་མི་ཐོན་ཉམས་ཆུང་བདག་འདྲ་བས། །
རང་ཚོད་བཟུང་ལ་སྨོན་ལམ་བཟང་པོར་ཐོབ། །
ཆོས་ལྟར་བཅོས་པའི་ཆོས་གཟུགས་མང་པོ་ཡིས། །
ཆོས་དང་འགལ་བའི་ཆོས་བཤད་མང་པོ་དང་། །
ཆོས་ལས་ལྡོག་བའི་ཆོས་ལས་མང་པོ་ཡིས། །
ཆོས་འདི་གཏིང་ནས་བཅོམ་ཞིང་བརླགས་ལ་ལྟོས།
བླུན་པོའི་སྣ་ཁྲིད་མཁན་གྱི་ཕྱོགས་རིས་པ། །
བསྟན་པ་རིས་གཅོད་མཁན་གྱི་འཁྲིག་འཛིན་པ། །
མི་ཚེར་རྫུན་སྒྲུང་འཁྲབ་པའི་འཁྲབ་ཁྲིད་པ། །
ང་མིན་ང་འདྲའི་བསྟན་བཤིགས་རྒྱས་ལ་ལྟོས། །
ཕྱོགས་རྣམས་ཀུན་ཏུ་ཕྱོགས་ཞེན་མེ་དཔུང་འབར། །
ཡུལ་རྣམས་ཀུན་ཏུ་ཆགས་སྡང་ཆུ་ཀླུང་འཕྱུར། །
གནས་རྣམས་ཀུན་ཏུ་ཕྲག་དོགས་རླུང་དམར་ལྡང་། །
བསྟན་པ་ནང་ནས་འཇིགས་པའི་ལྟས་ལ་ལྟོས། །
ཤུ་བྷམ།
ལས་མེད་ངལ་བསོས་བུ། གནམ་རྒྱ་ཡན་པ།
