★ ༈ ན་ནིང་གི་སྟོན་ཁར། ☆
གྲོགས་མེད་འཁྱམས་པོའི་མི་ལ།
དགའ་སྐྱོའི་ཡུལ་སྣང་མང་ཞིང་། །
སྐྱིད་སྡུག་འཆར་ཆ་རྒོད་པས། །
མི་ཚེ་རིང་སྣང་ཤར་སོང་། །
བསིལ་བསིལ་རླུང་བུ་བུས་བ། །
ཡང་ཡང་ཡིད་ལ་ཐིམ་ཞིང་། །
ཟིམ་ཟིམ་ཆར་པ་བབ་པ། །
ཏག་ཏག་སེམས་ལ་རླན་བྱུང་།
རྒྱང་རིང་གནམ་ལ་བལྟས་ནས། །
སྐྱོ་གདུང་དབྱིངས་སུ་བཏང་ཡང་། །
སྐྱོ་བས་མཁའ་དབྱིངས་ཁྱབ་ཅིང་། །
དུང་བས་ས་གཞི་ཁེབས་སོང་། །
སྤྲིན་པ་མེད་པའི་ནམ་མཁའ། །
སེམས་པ་འདི་དང་མཚུངས་ཤིང་། །
དྲོད་ཁོལ་མེད་པའི་ས་གཞི། །
བྱང་ཁོག་དེ་དང་འདྲ་བ། །
ཤུར་ཤུར་ཆུ་མོ་གཞུར་བ། །
ང་ཡི་ཞེ་ནས་གཞུར་སོང་། །
སིལ་སིལ་ལོ་འདབ་འཐོར་བ། །
རང་གི་སེམས་ནས་འཐོར་སོང་། །
ཁྲ་ཁྲའི་འཇའ་ཚོན་ཡལ་བ། །
བདག་གི་ཡིད་ནས་ཡལ་སོང་། །
སང་སང་བར་སྣང་སྟོང་པ། །
རང་གི་སེམས་ནས་སྟོང་སོང་། །
ངལ་བསོས་བུ་རྣམ་རྒྱ་ཡན།
