ཞི་ཅིན་ཕིང་དང་པ་ཞིའི་ཙུང་ཐུང་ལུའུ་ལཱ་ཡིས་གྲོས་མོལ་གནང་བ།

体娱 2024-11-22 17:16 青海

ཞི་ཅིན་ཕིང་དང་པ་ཞིའི་ཙུང་ཐུང་ལུའུ་ལཱ་ཡིས་གྲོས་མོལ་གནང་བ།

ས་གནས་དེ་གའི་དུས་ཚོད་ཟླ11པའི་ཚེས20ཉིན་གྱི་སྔ་དྲོར།　རྒྱལ་ཁབ་ཀྱི་ཀྲུའུ་ཞི་ཞི་ཅིན་ཕིང་གིས་པ་ཞིའི་ལི་ཡའི་ཙུང་ཐུང་ལས་ཤག་གི་ལི་མིང་ཕོ་བྲང་དུ་པ་ཞིའི་ཙུང་ཐུང་ལུའུ་ལཱ་དང་གྲོས་མོལ་གནང་བ་རེད།　རྒྱལ་ཁབ་གཉིས་ཀྱི་གཙོ་བདག་གིས་ཀྲུང་པའི་འབྲེལ་བའི་ངེས་གནས་དེ་ལག་གདང་སྦྲེལ་ནས་དེ་བས་གཞུང་དྲང་གི་འཛམ་གླིང་དང་དེ་བས་རྒྱུན་མཐུད་ཐུབ་པའི་གོ་ལ་ཧྲིལ་པོའི་ཀྲུང་པའི་ལས་དབང་གཅིག་མཐུན་ཚོགས་པ་གཏོད་རྒྱུ་ཡིན་ཞེས་ཁྱབ་བསྒྲགས་གནང་བ་རེད།

དབྱར་ཟླ་དང་པོའི་སྐབས་ཀྱི་པ་ཞི་ལི་ཡའི་གནམ་གཤིས་ཧ་ཅང་དྭངས།　ལི་མིང་ཕོ་བྲང་དུ་སྤང་ལྗོངས་སྔོ་ཐིང་ངེར་གྱུར་བ་དང་།　རྔམ་བརྗིད་ཀྱི་གུས་དམག450གྲལ་འགྲིག་པོས་བསྒྲིགས་ཡོད།　སྐྱ་དམག120ཡི་སྐུ་སྲུང་འོག་ཞི་ཅིན་ཕིང་རླངས་འཁོར་ལ་བསྡད་དེ་ལི་མིང་ཕོ་བྲང་མདུན་གྱི་ཐང་ཆེན་དུ་འབྱོར།

ཙུང་ཐུང་ལུའུ་ལཱ་དང་ལྕམ་མོ་ལུའོ་སང་རེ་ལཱས་སྤྲོ་སེམས་འཁོལ་བའི་ངང་ཞི་ཅིན་ཕིང་ལ་བསུ་བ་ཞུས་པ་དང་འབྲེལ་ཞི་ཅིན་ཕིང་ལ་ཕེབས་བསུའི་མཛད་སྒོ་གཟབ་རྒྱས་འཚོགས་པ་རེད།

ས་གནས་དེ་གའི་དུས་ཚོད་ཟླ11པའི་ཚེས20ཉིན་གྱི་སྔ་དྲོར།　རྒྱལ་ཁབ་ཀྱི་ཀྲུའུ་ཞི་ཞི་ཅིན་ཕིང་གིས་པ་ཞིའི་ལི་ཡའི་ཙུང་ཐུང་ལས་ཤག་གི་ལི་མིང་ཕོ་བྲང་དུ་པ་ཞིའི་ཙུང་ཐུང་ལུའུ་ལཱ་དང་གྲོས་མོལ་གནང་།　གྲོས་མོལ་སྔོན་དུ།　ཙུང་ཐུང་ལུའུ་ལཱ་དང་ལྕམ་མོ་ལུའོ་སང་རེས་ལཱས་སྤྲོ་སེམས་འཁོལ་བའི་ངང་ཞི་ཅིན་ཕིང་བསུ་བ་ཞུས་པ་དང་འབྲེལ་ཞི་ཅིན་ཕིང་ལ་ཕེབས་བསུའི་མཛད་སྒོ་གཟབ་རྒྱས་འཚོགས།

དམག་མིའི་རོལ་ཆ་ཚོགས་པས་ཀྲུང་པ་རྒྱལ་ཁབ་གཉིས་ཀྱི་རྒྱལ་གླུ་དཀྲོལ།　རྒྱལ་ཁབ་གཉིས་ཀྱི་གཙོ་བདག་གིས་གཟབ་སྦྲེང་རུ་ཁག་གི་ཁག་བགོས་རྣམ་པར་ལྷན་དུ་གཟིགས་པ་རེད།　ཀྲུང་པ་རྒྱལ་ཁབ་གཉིས་ཀྱི་བྱིས་པས་རྒྱལ་ཁབ་གཉིས་ཀྱི་རྒྱལ་དར་འཁྱེར་ནས་ཞི་ཅིན་ཕིང་ལ་སྤྲོ་སེམས་འཁོལ་བའི་ངང་དགའ་བསུ་ཞུས།　པ་ཞིའི་སྒྱུ་རྩལ་མཁས་པས་རྒྱ་སྐད་ཐོག་ནས《ངའི་མེས་རྒྱལ》ཞེས་པའི་གླུ་གཞས་བཏང་།

རྒྱལ་ཁབ་གཉིས་ཀྱི་གཙོ་བདག་གིས་ཕར་ཕྱོགས་ཀྱི་ཕེབས་རོགས་མི་སྣ་དང་ཕྱག་འཇུ་གནང་།

ཕེབས་བསུའི་མཛད་སྒོ་མཇུག་སྒྲིལ་རྗེས་རྒྱལ་ཁབ་གཉིས་ཀྱི་གཙོ་བདག་གིས་གྲོས་མོལ་གནང་བ་རེད།

ཞི་ཅིན་ཕིང་གིས་བསྟན་དོན།　ཀྲུང་གོ་དང་པ་ཞིའི་བར་འབྲེལ་བ་བཙུགས་ནས་ལོ50འཁོར་བའི་དམིགས་བསལ་གྱི་དུས་སྐབས་འདི་འདྲ་ཞིག་ལ་ངས་པ་ཞི་རྒྱལ་ཁབ་ལ་འཚམས་འདྲི་བྱེད་ཐུབ་པར་ཧ་ཅང་དགའ་སྤྲོ་སྐྱེས་ཡོད།　ཙུང་ཐུང་ལུའུ་ལཱ་ཡིས་ང་ལ་གུས་ལུགས་ཆེས་མཐོ་བའི་སྒོ་ནས་དགའ་བསུ་ཞུ་བའི་མཛད་སྒོ་གཟབ་རྒྱས་ཤིག་བསྡུས་པ་དེའི་སྟེང་ནས།　ཀྲུང་གོ་དང་པ་ཞི་རྒྱལ་ཁབ་ཀྱི་འབྲེལ་བར་མཐོང་ཆེན་གང་ལེགས་བྱེད་ཀྱིན་པ་མཚོན་ཐུབ་ལ།　དེ་བཞིན་ཀྲུང་གོ་མི་དམངས་ལ་བརྩེ་སེམས་ཟབ་མོ་བཅངས་ཡོད་པ་མཚོན་ཐུབ་པས་ང་རང་སེམས་འགུལ་ཟབ་མོ་ཐེབས་བྱུང་།　ཀྲུང་གོ་དང་པ་ཞི་ནི་སའི་གོ་ལའི་ཕྱེད་ཤར་མ་དང་ནུབ་མའི་འཕེལ་རྒྱས་འགྲོ་བཞིན་པའི་རྒྱལ་ཁབ་གཉིས་ཡིན།　འདས་ཟིན་པའི་ལོ50ལ་ཕྱིར་མིག་ཅིག་བལྟས་ཚེ།　རྒྱལ་ཁབ་གཉིས་ཀའི་འབྲེལ་བ་དེ་རི་རབ་དང་རྒྱ་མཚོ་བརྒལ་ནས་འཕེལ་རྒྱས་འགྲོ་བཞིན་པའི་རྒྱལ་ཁབ་ཆེན་པོའི་བར་ཕན་ཚུན་བརྩི་འཇོག་དང་གཉིས་ཕན་མཛའ་མཐུན།　མཉམ་ལས་གཉིས་ཕན་བཅས་ཀྱི་ཡང་དག་པའི་མཉམ་གནས་ཀྱི་བགྲོད་ལམ་ཞིག་བཙལ་ནས་རྙེད་ཡོད་པ་རྟོགས་ཐུབ།　པ་ཞི་ནི་ཀྲུང་གོའི་བར་འཐབ་ཇུས་རོགས་རེས་འབྲེལ་བ་བཙུགས་པའི་རྒྱལ་ཁབ་ཐོག་མ་དང་།　ཀྲུང་གོའི་བར་ཁྱོན་ཡོངས་ཀྱི་འཐབ་ཇུས་རོགས་རེས་འབྲེལ་བ་བཙུགས་པའི་ལཱ་ཏིང་མེ་གླིང་གི་རྒྱལ་ཁབ་ཐོག་མའང་ཡིན།　ཉེ་བའི་ལོ་འདི་དག་གི་རིང་ལ།　ང་དང་ཙུང་ཐུང་ལུའུ་ལཱ་ཡི་འཐབ་ཇུས་སྣེ་ཁྲིད་འོག་ཏུ།　རྒྱལ་ཁབ་གཉིས་ཀ་ལས་དབང་གཅིག་མཐུན་གྱི་བློ་གཏད་ཆོག་པའི་གྲོགས་པོ་དང་ཞི་བདེའི་ལས་དོན་ལ་མཉམ་དུ་སྐུལ་མ་གཏོང་བའི་སྟོབས་ཤུགས་ཆེན་པོར་གྱུར་ཡོད།　རྒྱལ་ཁབ་གཉིས་ཀྱི་འབྲེལ་བ་དེ་ལོ་རྒྱུས་ཀྱི་དུས་སྐབས་ཡག་ཤོས་སུ་སླེབས་ནས།　རྒྱལ་ཁབ་གཉིས་ཀའི་མི་དམངས་ཀྱི་བདེ་སྐྱིད་ཆེ་རུ་ཕྱིན་པར་མ་ཟད།　རྒྱ་ཆེའི་འཕེལ་རྒྱས་འགྲོ་བཞིན་པའི་རྒྱལ་ཁབ་ཀྱི་ཐུན་མོང་གི་ཁེ་ཕན་ལའང་སྲུང་སྐྱོབ་བྱས་པ་དང་།　འཛམ་གླིང་ཧྲིལ་པོའི་ལྷོ་ཕྱོགས་ཀྱི་སྟོབས་ཤུགས་དང་བསམ་འདུན་མངོན་སུམ་གྱིས་ཆེ་རུ་ཕྱིན་ནས།　འཛམ་གླིང་གི་ཞི་བདེ་དང་བརྟན་བརླིང་གི་ཆེད་དུ་བྱས་རྗེས་མངོན་གསལ་བཞག་ཡོད།

ཞི་ཅིན་ཕིང་གིས་ནན་གྱིས་བསྟན་དོན།　དེ་རིང་ང་ཚོས་ཀྲུང་གོ་དང་པ་ཞིའི་འབྲེལ་བའི་ངེས་གནས་དེ་མཉམ་དུ་ལག་གདང་སྦྲེལ་ནས་སྔར་ལས་དྲང་གཞག་གི་འཛམ་གླིང་དང་སྔར་ལས་རྒྱུན་མཐུད་ཐུབ་པའི་འཛམ་གླིང་ཧྲིལ་པོའི་ཀྲུང་གོ་དང་པ་ཞི་ཡི་ལས་དབང་གཅིག་མཐུན་ཚོགས་པ་བསྐྲུན་པར་མཐོར་འདེགས་བྱེད་རྒྱུའི་ཐག་བཅད་པ་དང་ཆབས་ཅིག་ཏུ།　“རྒྱུད་གཅིག་ལམ་གཅིག”མཉམ་སྐྲུན་གྱི་གྲོས་གཞི་དེ་པ་ཞིའི་འཕེལ་རྒྱས་འཐབ་ཇུས་དང་སྦྲེལ་མཐུད་བྱ་རྒྱུ་ཡིན་ལ།　དེ་ནི་ཀྲུང་གོ་དང་པ་ཞིའི་འབྲེལ་བ་འཕེལ་རྒྱས་འགྲོ་བའི་ལོ་རྒྱུས་རང་བཞིན་གྱི་དུས་སྐབས་གཞན་ཞིག་ཡིན་པ་དང་།　རྒྱལ་ཁབ་གཉིས་ཀའི་འབྲེལ་བའི་འཛམ་གླིང་ཧྲིལ་པོའི་རང་བཞིན་དང་འཐབ་ཇུས་རང་བཞིན།　ཕུགས་ཕན་རང་བཞིན་བཅས་མངོན་ཐུབ་ལ།　རྒྱལ་ཁབ་གཉིས་ཀའི་མི་དམངས་ཀྱི་ཡོངས་ཁྱབ་ཀྱི་རེ་ལྟོས་དང་སྒོ་ཀུན་ནས་མཐུན་ཞིང་།　ཕྱོགས་གཉིས་ཀས་རང་རང་སོ་སོའི་དེང་རབས་ཅན་ལ་སྐུལ་འདེད་གཏོང་ཆེད་སྒུལ་ཤུགས་དང་འདེགས་སྐྱོར་མཁོ་འདོན་བྱེད་ཐུབ།　དུས་མཚུངས་སུ།　ཀྲུང་གོ་དང་པ་ཞིས་ལག་གདང་མཉམ་དུ་སྦྲེལ་ནས་རྒྱལ་སྤྱིའི་དྲང་གཞག་དྲང་བདེན་ལ་སྲུང་སྐྱོབ་དང་འཛམ་གླིང་གི་ཐུན་མོང་འཕེལ་རྒྱས་ལ་སྐུལ་འདེད་གཏོང་བའི་ཆོད་སེམས་ཀྱང་མངོན་ཡོད།　ཀྲུང་གོ་ཕྱོགས་ཀྱིས་པ་ཞི་ཕྱོགས་དང་མཉམ་དུ།　མིའི་རིགས་ཀྱི་མདུན་ལམ་ལ་བསམ་བློ་གཏོང་བ་དང་མི་དམངས་ཀྱི་བདེ་སྐྱིད་ལ་བསམ་བློ་བཏང་སྟེ།　དུས་རབས་གསར་པའི་ཀྲུང་གོ་དང་པ་ཞིའི་འབྲེལ་བའི་ནང་དོན་རྒྱུན་ཆད་མེད་པར་ཕུན་སུམ་ཇེ་ཚོགས་སུ་གཏོང་བ་དང་།　ཕན་ཚུན་བར་རྒྱབ་སྐྱོར་བྱེད་པའི“ལས་རོགས་ཡག་ཤོས”བྱས་ནས།　མིའི་རིགས་ཀྱི་ལས་དབང་གཅིག་མཐུན་ཚོགས་པ་སྐྲུན་པ་དང་སྔར་ལས་དྲང་གཞག་གི་འཛམ་གླིང་སྐྲུན་པ།　སྔར་ལས་རྒྱུན་མཐུད་ཐུབ་པའི་འཛམ་གླིང་ཧྲིལ་པོའི་དམིགས་འབེན་གྱི་ཕྱོགས་སུ་རྒྱུན་ཆད་མེད་པར་མདུན་སྐྱོད་བྱས་ཏེ།　མིའི་རིགས་ཀྱི་ཞི་བདེ་དང་ཡར་ཐོན་བྱ་གཞག་གི་ཆེད་དུ་བྱས་རྗེས་སྔར་ལས་ཆེན་པོ་འཇོག་འདོད་ཡོད།

ཞི་ཅིན་ཕིང་གིས་རྒྱལ་ཁབ་གཉིས་ཀའི་འབྲེལ་བའི་མ་འོངས་འཕེལ་རྒྱས་ཐད་གྲོས་གཞི་བཞི་བཏོན་ཡོད་དེ།　

གཅིག་ནི་ལས་དབང་གཅིག་ཏུ་འབྲེལ་བའི་དབང་གིས་འཐབ་ཇུས་ཀྱི་ཡིད་ཆེས་རྒྱུན་ཆད་མེད་པར་ཇེ་བརྟན་དུ་གཏོང་དགོས།　བདག་དབང་དང་བདེ་འཇགས།　མངའ་ཁོངས་ཆ་ཚང་སོགས་ཁེ་ཕན་གཙོ་བོ་དང་འབྲེལ་བའི་གནད་དོན་ཐད་ནས་ཕན་ཚུན་རྒྱབ་སྐྱོར་མཐའ་གཅིག་ཏུ་བྱས་ཏེ།　ཕན་ཚུན་ཡིད་ཆེས་བྱེད་པའི་འཐབ་ཇུས་ཟླ་གྲོགས་དང་།　འཛམ་གླིང་ཧྲིལ་པོའི་ལྷོ་ཕྱོགས་རྒྱལ་ཁབ་བར་གྱི་མཐུན་སྒྲིལ་མཉམ་ལས་དང་གཉིས་ཕན་མཉམ་རྒྱལ།　ཐུན་མོང་འཕེལ་རྒྱས་བཅས་ཀྱི་མིག་དཔེ་བྱེད་དགོས།　རིག་གནས་དང་སློབ་གསོ།　ན་གཞོན་སོགས་ཁྱབ་ཁོངས་ཀྱི་མི་གཞུང་རིག་གནས་བརྗེ་རེས་ལ་ཤུགས་བསྣན་ནས།　རྒྱལ་ཁབ་གཉིས་ཀའི་ལས་དབང་གཅིག་མཐུན་ཚོགས་པའི་དམངས་འདོད་རྨང་གཞི་སྔར་ལས་ཇེ་བརྟན་དུ་གཏོང་དགོས།　

གཉིས་ནི་མཉམ་དུ་འཕེལ་རྒྱས་ཡོང་བར་བྱས་ནས།　འཕེལ་རྒྱས་ཀྱི་འཐབ་ཇུས་འབྲེལ་འདྲིས་མུ་མཐུད་ཟབ་སྤེལ་གཏོང་དགོས།　“རྒྱུད་གཅིག་ལམ་གཅིག”མཉམ་སྐྲུན་གྱི་གྲོས་གཞི་དང་པ་ཞི་འཕེལ་རྒྱས་ཀྱི་འཐབ་ཇུས་སྦྲེལ་མཐུད་དང་འབྲེལ་བའི་ལོ་རྒྱུས་ཀྱི་གོ་སྐབས་དམ་འཛིན་བྱས་ནས།　དཔལ་འབྱོར་ཚོང་དོན་དང་རྨང་གཞིའི་སྒྲིག་ཆས།　དངུལ་རྩ།　ཚན་རྩལ།　ཁོར་ཡུག་སྲུང་སྐྱོབ་སོགས་གཙོ་གནད་ཁྱབ་ཁོངས་ཀྱི་མཉམ་ལས་ཟབ་སྤེལ་གཏོང་བ་དང་།　མཁའ་སྐྱོད་དང་ཞིང་ལས་ཚན་རྩལ།　ནུས་ཁུངས་གཙང་མ་སོགས་ཁྱབ་ཁོངས་ཀྱི་མཉམ་ལས་ལ་ཤུགས་སྣོན་དགོས།　ཀྲུང་གོ་ཕྱོགས་ཀྱིས་དབུལ་ཐར་མཁྲེགས་གཏོར་བྱ་རྒྱུ་དེ་རྒྱལ་སྲིད་སྐྱོང་ལུགས་སྐོར་གྱི་གནས་བབ་གལ་ཆེན་སྟེང་བཞག་ནས།　པ་ཞི་ཕྱོགས་ཀྱིས་བཏོན་པའི“བཀྲེས་ལྟོགས་མེད་པའི”འཆར་གཞིར་རྒྱབ་སྐྱོར་བྱེད་པ་དང་།　པ་ཞི་ཕྱོགས་དང་མཉམ་དུ།　དབུལ་སེལ་མཉམ་ལས་ལ་མུ་མཐུད་དུ་ཤུགས་བསྣན་ནས།　རྒྱལ་ཁབ་གཉིས་ཀའི་མི་དམངས་ཀྱིས་སྔར་ལས་བདེ་སྐྱིད་ལྡན་པའི་འཚོ་བ་སྐྱེལ་ཐུབ་པར་འབད་རྒྱུ་ཡིན།　

གསུམ་ནི་སྐྱིད་སྡུག་མཉམ་མྱོང་བྱས་ཏེ་འཛམ་གླིང་གི་ཞི་བདེ་དང་དྲང་བདེན་ལ་སྲུང་སྐྱོབ་བྱ་ཆེད་རྒྱལ་ཁབ་གཉིས་ཀྱི་སྟོབས་ཤུགས་མངོན་པར་བྱེད་དགོས།　ཕྱོགས་མང་རིང་ལུགས་ངོ་མ་ལག་བསྟར་བྱས་ནས་སྐད་ཆ་དྲང་མོར་བཤད་པ་དང་བྱ་བ་དྲང་གཞག་ངང་བསྒྲུབ་རྒྱུ་རྒྱུན་འཁྱོངས་བྱས་ཏེ།　འཛམ་གླིང་ཧྲིལ་པོའི་བཅོས་སྐྱོང་སྔར་ལས་དྲང་གཞག་དང་ལུགས་མཐུན་གྱི་ཕྱོགས་སུ་འཕེལ་རྒྱས་འགྲོ་རྒྱུར་སྐུལ་འདེད་གཏོང་དགོས།　ཀྲུང་གོ་ཕྱོགས་ཀྱིས་པ་ཞིའི་རྒྱལ་སྤྱིའི་གོ་གནས་དང་ཤུགས་རྐྱེན་ཐེབས་ཚད་ལ་སྔར་ལས་མཐོང་ཆེན་བྱེད་རྒྱུ་དང་།　རྒྱལ་སྤྱིའི་གར་སྟེགས་སྟེང་དུ་པ་ཞི་ཡིས་སྔར་ལས་ནུས་པ་ཆེན་པོ་འདོན་རྒྱུར་རྒྱབ་སྐྱོར་བྱེད་ཀྱིན་ཡོད།　པ་ཞི་ཕྱོགས་དང་མཉམ་དུ།　མཉམ་འབྲེལ་རྒྱལ་ཚོགས་དང་གསེར་གྱོམ་རྒྱལ་ཁབ་སོགས་ཕྱོགས་མང་ལམ་སྲོལ་ནང་གི་འབྲེལ་འདྲིས་མཐུན་སྦྱོར་ལ་ཤུགས་སྣོན་རྒྱུ་དང་།　པ་ཞི་ཡིས་སང་ལོའི་གསེར་གྱོམ་རྒྱལ་ཁབ་ཀྱི་ཀྲུའུ་ཞིའི་རྒྱལ་ཁབ་ཀྱི་འགན་འཁུར་རྒྱུར་རྒྱབ་སྐྱོར་བྱེད་པ།　“གསེར་གྱོམ་མཉམ་ལས་ཆེན་མོའི”སྤུས་ཚད་མཐོ་བའི་འཕེལ་རྒྱས་ལ་སྐུལ་འདེད་གཏོང་བ་བཅས་བྱས་ཏེ།　ཕྱོགས་མང་རིང་ལུགས་རྒྱུན་འཁྱོངས་དང་འཛམ་གླིང་ཧྲིལ་པོའི་བཅོས་སྐྱོང་འཐུས་ཚང་དུ་གཏོང་རྒྱུའི་ཐད་ནས་གསེར་གྱོམ་རྒྱལ་ཁབ་ཀྱི་སྐད་སྒྲ་སྔར་ལས་ཆེན་པོ་འདོན་འདོད་ཡོད།　

བཞི་ནི་སྐྱིད་སྡུག་མཉམ་མྱོང་བྱས་ནས་མིའི་རིགས་ཀྱི་ལས་དབང་གཅིག་མཐུན་ཚོགས་པ་བསྐྲུན་ཆེད་ཀྲུང་གོ་དང་པ་ཞི་ཡི་ལེགས་སྐྱེས་འབུལ་དགོས།　འཕེལ་རྒྱས་འགྲོ་བཞིན་པའི་རྒྱལ་ཁབ་ཆེན་པོ་ཞིག་ཡིན་པའི་ཀྲུང་གོ་དང་པ་ཞི་རྒྱལ་ཁབ་གཉིས་ཀས་ཀུན་གྱི་སྣེ་ཁྲིད་དེ།　མཉམ་གྲོས་མཉམ་ཞིབ་དང“མཉམ་དུ་ཕན་འབྲས”ཐོན་རྒྱུར་སྐུལ་འདེད་བཏང་ནས།　མིའི་རིགས་ཀྱི་མདུན་ལམ་དང་ལས་དབང་ལ་འབྲེལ་བའི་འཛམ་གླིང་ཧྲིལ་པོའི་རང་བཞིན་གྱི་འགྲན་སློང་ལ་ནུས་ཤུགས་ཡོད་རྒུས་ཁ་གཏད་འཇལ་དགོས།　ལྗང་མདོག་ཚུལ་སྒྱུར་དང་རྒྱུན་མཐུད་འཕེལ་རྒྱས།　གནམ་གཤིས་འགྱུར་ལྡོག་ལ་ཁ་གཏད་འཇལ་བ།　མི་ཐབས་རིག་ནུས་བཅོས་སྐྱོང་སོགས་ཀྱི་ཁྱབ་ཁོངས་ཀྱི་མཉམ་ལས་ལ་ཤུགས་སྣོན་དགོས།　ཀྲུང་གོ་ཕྱོགས་ཀྱིས་པ་ཞིའི《མཉམ་འབྲེལ་རྒྱལ་ཚོགས་ཀྱི་གནམ་གཤིས་འགྱུར་ལྡོག་སྒྲོམ་གཞིའི་སྤྱི་ཆིངས》འགོད་མཁན་ཕྱོགས་ཀྱི་ཚོགས་ཆེན་ཐེངས་སུམ་ཅུ་པ་ཡག་པོར་བསྡུ་རྒྱུར་རྒྱབ་སྐྱོར་བྱེད་འདོད་ཡོད།

ཞི་ཅིན་ཕིང་གིས་བསྟན་དོན།　ལོ་བཅུའི་སྔོན་ལ་ངས་པ་ཞི་ལི་ཡ་རུ།　ལཱ་ཏིང་མེ་གླིང་དང་ཅ་ལེ་པིའི་རྒྱལ་ཁབ་ཀྱི་འགོ་ཁྲིད་པ་དང་མཉམ་དུ།　ཀྲུང་གོ་དང་ལཱ་ཏིང་མེ་གླིང་གི་གླེང་སྟེགས་བཙུགས་པ་དངོས་སུ་ཁྱབ་བསྒྲགས་བྱས་ནས།　ཀྲུང་གོ་དང་ལཱ་ཏིང་མེ་གླིང་གི་འབྲེལ་བ་འདྲ་མཉམ་དང་གཉིས་ཕན།　གསར་གཏོད།　སྒོ་འབྱེད།　དམངས་ཕན་བཅས་ཀྱི་དུས་རབས་གསར་པར་སླེབས་རྒྱུར་སྐུལ་འདེད་བཏང་ཡོད།　ཀྲུང་གོ་ཕྱོགས་ཀྱིས་པ་ཞི་ཕྱོགས་དང་མཉམ་དུ།　ཀྲུང་གོ་དང་ལཱ་ཏིང་མེ་གླིང་གི་གླེང་སྟེགས་མུ་མཐུད་ཡག་པོར་གཉེར་ནས།　“རྒྱུད་གཅིག་ལམ་གཅིག”གི་གྲོས་གཞི་མཉམ་དུ་སྐྲུན་རྒྱུ་དེ་ལཱ་ཏིང་མེ་གླིང་དང་ཅ་ལེ་པིའི་ས་ཁུལ་གྱི་འཕེལ་རྒྱས་ཀྱི་ལེགས་ཆ་དང་དགོས་མཁོའི་བར་སྦྲེལ་མཐུད་སྔར་ལས་གང་ལེགས་བྱས་ཏེ།　ཀྲུང་གོ་དང་ལཱ་ཏིང་མེ་གླིང་གི་ལས་དབང་གཅིག་མཐུན་ཚོགས་པ་བསྐྲུན་རྒྱུར་གྲུབ་འབྲས་སྔར་ལས་མང་པོ་ཐོབ་རྒྱུར་སྐུལ་འདེད་གཏོང་འདོད་ཡོད།

ལུའུ་ལཱ་ཡིས་བསྟན་དོན།　པ་ཞི་ཕྱོགས་ཀྱིས་ཀྲུང་གོའི་བར་གྱི་ཕྱོགས་མང་མཉམ་ལས་མུ་མཐུད་ཟབ་སྤེལ་བཏང་ནས།　ཝུའུ་ཁི་ལན་གྱི་ཉམས་ཉེན་སོགས་ཀྱི་གནད་དོན་ཚ་ཤོས་ཞི་བའི་ངང་ཐག་གཅོད་བྱ་རྒྱུར་སྐུལ་འདེད་གཏོང་ཆེད་བྱས་རྗེས་འཇོག་འདོད་ཡོད།　ཀྲུའུ་ཞི་ཞི་ཅིན་ཕིང་གིས་ད་ཐེངས་འཚམས་འདྲི་གནང་བ་འདི་ནི་པ་ཞི་དང་ཀྲུང་གོའི་འབྲེལ་བའི་ལོ་རྒྱུས་སྟེང་གི་ལམ་ཚད་རྡོ་རིང་གསར་པ་ཞིག་ཏུ་གྱུར་ནས།　རྒྱལ་ཁབ་གཉིས་ཀྱིས་ལས་དབང་གཅིག་མཐུན་ཚོགས་པ་བསྐྲུན་པའི་ལེའུ་གསར་པ་བརྩམས་ཡོད།

གྲོས་མོལ་གནང་ཚར་རྗེས།　རྒྱལ་ཁབ་གཉིས་ཀའི་གཙོ་བདག་གིས《ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་དང་པ་ཞི་རྒྱལ་ཕྲན་མཉམ་འབྲེལ་སྤྱི་མཐུན་རྒྱལ་ཁབ་ཀྱིས་ལག་གདང་མཉམ་དུ་སྦྲེལ་ནས་སྔར་ལས་དྲང་གཞག་གི་འཛམ་གླིང་དང་སྔར་ལས་རྒྱུན་མཐུད་ཐུབ་པའི་འཛམ་གླིང་བསྐྲུན་པའི་སྐོར་གྱི་ཀྲུང་གོ་དང་པ་ཞིའི་ལས་དབང་གཅིག་མཐུན་ཚོགས་པ་བསྐྲུན་པའི་མཉམ་འབྲེལ་གསལ་བསྒྲགས》སྟེང་མཉམ་དུ་མཚན་བཀོད།

རྒྱལ་ཁབ་གཉིས་ཀའི་གཙོ་བདག་གིས《ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་སྲིད་གཞུང་དང་པ་ཞི་རྒྱལ་ཕྲན་མཉམ་འབྲེལ་སྤྱི་མཐུན་རྒྱལ་ཁབ་སྲིད་གཞུང་གི་“རྒྱུད་གཅིག་ལམ་གཅིག”མཉམ་སྐྲུན་གྱི་གྲོས་གཞི་དེ“མགྱོགས་མྱུར་འཕར་སྣོན་འཆར་གཞི”དང་།“པ་ཞིའི་བཟོ་ལས་གསར་པའི་འཆར་གཞི”།“སྐྱེ་ཁམས་ཚུལ་སྒྱུར་འཆར་གཞི”།　“ཨ་ཧྥེ་རི་ཁ་ལྷོ་མའི་གཞི་གཅིག་ཅན་གྱི་ལམ་ཕྱོགས་འཆར་གཞི”བཅས་ལ་སྦྲེལ་མཐུད་བྱེད་པའི་སྐོར་གྱི་མཉམ་ལས་འཆར་འགོད》བཀོད་པར་མཉམ་དུ་བདེན་དཔང་གནང་།

འཚམས་འདྲི་གནང་བའི་རིང་ལ།　ཕྱོགས་གཉིས་ཀས་ད་དུང་དཔལ་འབྱོར་ཚོང་དོན་དང་དངུལ་གཏོང་།　ཞིང་ལས།　གཞི་གྲངས་དཔལ་འབྱོར།　རྒྱུན་མཐུད་འཕེལ་རྒྱས།　ཚན་རྩལ།　མིས་ཐབས་རིག་ནུས།　འཛམ་གླིང་ཧྲིལ་པོའི་འཕེལ་རྒྱས་མཉམ་ལས་སོགས་ཁྱབ་ཁོངས་ཀྱི་ཕྱོགས་གཉིས་ཀའི་མཉམ་ལས་ཡིག་ཆ30ལྷག་བཀོད།

ཚའེ་ཆི་དང་ཝང་དབྱི་སོགས་གོང་གི་བྱེད་སྒོར་ཞུགས།　།

རྡོ་རྗེ་བསམ་འགྲུབ་ཀྱིས་བསྒྱུར།

རྩོམ་སྒྲིག་པ། སངས་རྒྱས་སྐྱབས།

རྩོམ་སྒྲིག་འགན་འཁུར་པ། མཁའ་འགྲོ་ཚེ་བརྟན།

ལྟ་སྐུལ་པ། རིག་འཛིན་ཚེ་རིང་།

སྤྱིའི་ལྟ་སྐུལ་པ། ཐུ་བོ་ཆེ།

http://mp.weixin.qq.com/s?__biz=MzA5NDkwMzE5OQ==&mid=2651859887&idx=1&sn=cc584e16af802b2d4c4b835723aaf87c

中国藏族网通

中国藏族网通官网：www.tibet3.com 及时发布藏区最新资讯，挖掘民间传统文化，分享精美视听盛宴。