ཝུའུ་ཞའོ་ཅུན་གྱིས་ཀྲུང་གོ་འཛུགས་སྐྲུན་སྡེ་ཚོགས་ཀྱི་སྤྱི་གཉེར་པ་ཝུན་པིན་འཁོར་དང་བཅས་པར་ཐུག་འཕྲད་གནང་བ།
ཟླ11པའི་ཚེས20ཉིན། མཚོ་སྔོན་ཞིང་ཆེན་ཏང་ཨུའི་ཧྲུའུ་ཅི་གཞོན་པའམ་ཧྲིན་ཀྲང་ཝུའུ་ཞའོ་ཅུན་གྱིས་ཟི་ལིང་དུ་ཀྲུང་གོ་འཛུགས་སྐྲུན་སྡེ་ཚོགས་ཀྱི་སྤྱི་གཉེར་པ་ཝུན་པིན་འཁོར་དང་བཅས་པར་ཐུག་འཕྲད་གནང་།
ཝུའུ་ཞའོ་ཅུན་གྱིས་ཞིང་ཆེན་ཏང་ཨུ་དང་ཞིང་ཆེན་སྲིད་གཞུང་གི་ཚབ་བྱས་ཏེ་ཝུན་པིན་སོགས་ལ་དགའ་བསུ་དང་ཀྲུང་གོ་འཛུགས་སྐྲུན་སྡེ་ཚོགས་ཀྱིས་མཚོ་སྔོན་ལ་རྒྱབ་སྐྱོར་ཆེན་པོ་བྱས་པར་བཀའ་དྲིན་ཞུས། ཁོས་བཤད་རྒྱུར། ད་ལྟའི་མཚོ་སྔོན་དེ་ཏང་གི་ཚོགས་ཆེན་ཉི་ཤུ་པའི་གྲོས་ཚོགས་ཐེངས་གསུམ་པའི་དགོངས་དོན་དང་སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་མཚོ་སྔོན་ལ་རྟོབ་ཞིབ་བྱེད་སྐབས་ཀྱི་གསུང་བཤད་གལ་ཆེན་གྱི་དགོངས་པ་སློབ་སྦྱོང་དང་ལག་བསྟར་གཏིང་ཟབ་བྱེད་པ་དང་སྐྱེ་ཁམས་དཔལ་ཡོན་གྱི་གནས་མཆོག་དང་ཐོན་ལས་ཀྱི་གནས་བཞི་འཛུགས་སྐྲུན་བྱེད་པར་གཞོལ་བ། དེང་རབས་ཅན་གྱི་མཚོ་སྔོན་འཛུགས་སྐྲུན་བྱེད་པར་སྐུལ་འདེད་མྱུར་མོ་གཏོང་པའི་དུས་སྐབས་ཡིན། ཕྱོགས་གཉིས་ཀྱིས་ད་ཡོད་ཀྱི་མཉམ་ལས་རྨང་གཞིའི་སྟེང་སྔར་ལས་ལྷག་པའི་སྒོ་ནས་གྲུབ་འབྲེལ་འཐུས་ཚང་དང་ཁྱབ་ཁོངས་རྒྱ་བསྐྱེད། རྣམ་པ་གསར་གཏོད་བྱས་ཏེ། འཛུགས་སྐྲུན་ལས་རིགས་ཀྱི་ལག་རྩལ་གསར་པ་དང་ལས་རྣམ་གསར་གཏོད་ལ་འབད་དེ་རྨང་གཞིའི་སྒྲིག་ཆས་བསྐྲུན་པ་དང་གྲོང་སྡེ་གསར་པའི་རྣམ་པ། གྲོང་གསེབ་དར་སྤེལ་ཁྱོན་ཡོངས་ཅན་དང་ལྗང་མདོག་རྩིས་ནུས་འཕེལ་རྒྱས་སོགས་ཀྱི་ཐད་ནས་མཉམ་འབྲེལ་གཏིང་ཟབ་ཏུ་བཏང་སྟེ་ས་བབ་མཐོ་བའི་ས་ཁུལ་གྱི་ཐཱན་ཉུང་སྒྲིག་སྦྱོར་ཀྱི་འཛུགས་སྐྲུན་ཁྱབ་བརྡལ་དང་ཉེར་སྤྱོད་བྱས་ཏེ་ཚད་ཐིག་རུང་བ་དང་དཔེ་སྟོན་རུང་བའི་བཟོ་སྐྲུན་སྐོར་ཅིག་བསྐྲུན་དགོས་ཞེས་བཤད།
ཝུན་པིན་གྱིས་ཀྲུང་གོ་འཛུགས་སྐྲུན་སྡེ་ཚོགས་ཁེ་ལས་ཀྱི་གནས་ཚུལ་རགས་བསྡུས་དང་མཚོ་སྔོན་དུ་འཕེལ་རྒྱས་གནས་ཚུལ་ངོ་སྤྲོད་བྱས།གོམ་གང་མདུན་སྤོས་ཀྱིས་མ་དངུལ་དང་ལག་རྩལ། འཇོན་མི། དོ་དམ་བཅས་ཀྱི་ལེགས་ཆར་བསྟེན་ནས་ད་ལྟའི་ལས་གཞི་དག་ལ་སྐུལ་འདེད་སྤུས་མཐོ་བྱེད་པ་དང་། མུ་མཐུད་དུ་ལས་གཞི་འཛུགས་སྐྲུན་དང་ཚན་རྩལ་གསར་གཏོད། ལས་ཞུགས་གསབ་སྦྱོང་སོགས་ཀྱི་ཐད་འབྲེལ་འདྲེས་ཟབ་མོ་བྱས་ཏེ། མཚོ་སྔོན་འཕེལ་རྒྱས་སྤུས་མཐོ་འགྲོ་བར་གཞོགས་འདེགས་བྱ་རྒྱུ་ཡིན་ཞེས་བསྟན།
