སངས་རྒྱས་རྒྱལ་གྱི་ཐང་གའི་ལས་གཏོད་ལམ་བུ།

བཅར་འདྲི་བྱེད་སྐབས་སངས་རྒྱས་རྒྱལ་གྱིས“ང་ཐང་གའི་སྒྱུ་རྩལ་ལ་དགའ་ཞིང་། དེས་ང་ལ་ཡང་གྲུབ་འབྲས་གནང་བྱུང”ཞེས་བཤད།

ཟླ10བའི་ཚེས24ཉིན། གསར་འགོད་པས་རྨ་ལྷོ་བོད་རིགས་རང་སྐྱོང་ཁུལ་རེབ་གོང་གྲོང་ཁྱེར་གྱི་རེབ་གོང་སངས་རྒྱས་ཐང་ག་རིག་གནས་སྒྱུ་རྩལ་བརྒྱུད་སྤེལ་ལྟེ་གནས་སུ་སྐྱོད་སྐབས། ཚོན་མདངས་རྣམ་པར་བཀྲ་བའི་ཐང་ག་དང་། འཚེམ་དྲུབ། འཇིམ་བཟོའི་བརྩམས་ཆོས་སོགས་འགྲེམས་སྟོན་ཚོམས་ཆེན་དུ་གྲལ་སྟར་འགྲིག་པོས་བཤམས་ནས་སྒྱུ་རྩལ་གྱི་ཉམས་འགྱུར་ཟབ་མོ་མངོན་བཞིན་འདུག་པ་མཐོང་།

སངས་རྒྱས་རྒྱལ་ནི་ཁྱབ་སྤེལ་ལྟེ་གནས་འཛུགས་མཁན་ཞིག་ཡིན་ཞིང་། ཁོང་གི་ཕ་མེས་ཡང་མེས་ནས་བཟུང་ཐང་གའི་སྒྱུ་རྩལ་སློབ་སྦྱོང་དང་། ཞིབ་འཇུག རྒྱུན་འཛིན་བཅས་བྱས་པ་ནས་ད་བར་སངས་རྒྱས་རྒྱལ་ནི་ཐང་གའི་སྒྱུ་རྩལ་གྱི་རྒྱུན་འཛིན་པ་མི་རབས་བརྒྱད་པ་དེ་ཡིན།

“ཆུང་དུས་ཁྱིམ་ཚང་དབུལ་བས་ཨ་ཕས་རྟག་ཏུ་སྡེ་བའི་གང་སར་ནས་ཐང་ག་ཉོས་རྗེས། དེ་དག་སྒལ་པར་འཁུར་ནས་གང་སར་བཙོང་གི་འགྲོ་བཞིན་ཡོད”ཅེས་སངས་རྒྱས་རྒྱལ་གྱིས་ཆུང་དུས་ཨ་ཕས་ཁྱིམ་ཚང་གང་བོར་སྐྱོང་ཕྱིར་འབད་བརྩོན་བྱས་པའི་སྐོར་དྲན་གསོ་བྱེད་བཞིན་དུ་བཤད། དུས་དེ་ནས་བཟུང་སངས་རྒྱས་རྒྱལ་གྱིས་ཐང་ག་ལ་ཡ་མཚན་དང་། ཐང་ག་ལ་དོ་ཁུར། ཐང་ག་ལ་སློབ་སྦྱོང་བཅས་བྱེད་འགོ་ཚུགས།

ལོ་ན8ལ་སླེབས་པའི་ལོ་དེར་སངས་རྒྱས་རྒྱལ་གྱིས་མི་ཚེའི་ཐང་གའི་བརྩམས་ཆོས་དང་པོ་སྟེ་ཤཱཀྱ་མུ་ནེའི་སྐུ་བརྙན་བཞེངས་པ་དང་། ཨ་ཕས་ཁོང་ལ་སྐུལ་མ་ཆེན་པོ་བྱས་པས། དུས་དེ་ནས་བཟུང་སངས་རྒྱས་རྒྱལ་གྱིས་སེམས་ཤུགས་ཐང་ག་བཞེངས་པའི་ལས་ལ་གཞོལ།

2008ལོའི་པེ་ཅིན་ཨའོ་རྩལ་འགྲན་ཚོགས་ཀྱི་སྔ་ནུབ་ཏུ་གྲོགས་པོ་ཞིག་གི་གདན་ཞུས་ལྟར་སངས་རྒྱས་རྒྱལ་གྱིས་དངུལ་སྨར་སྒོར5000གྲ་སྒྲིག་བྱས་པ་དང་སློབ་མ5འཁྲིད་དེ་པེ་ཅིན་དུ་ཀྲུང་གོའི་དམངས་ཁྲོད་སྒྱུ་རྩལ་འགྲེམས་སྟོན་གྱི་བྱེད་སྒོར་ཞུགས།　དེའི་རིང་དགེ་ཕྲུག་དྲུག་པོས་ཐང་ག་གཅིག་ལས་མ་བཙོངས་པར་ཡོང་འབབ་སྒོར1000ལས་མེད་པས། སངས་རྒྱས་རྒྱལ་གྱི་སེམས་པ་མི་སྐྱིད་ལ་ཚོར་སྣང་རབ་རིབ་ཡིན་པས་ཁོང་གིས་སེམས་ཐག་བཅད་ནས་སྒོར་ཁྲི40གཡར་ཏེ་པེ་ཅིན་དགའ་ལྡན་བྱིན་ཆགས་གླིང་གི་ཉེ་འགྲམ་དུ་སྨི་ངོས་གྲུ་བཞི་མ7ཡོད་པའི་ལས་དོན་ཁང་ཞིག་བོགས་མར་བླངས་ནས“རེབ་གོང་སེམས་རྒྱས་ཀྱི་ཐང་གའི་ཁྱིམ་གཞིས”ཞེས་མིང་བཏགས་ཏེ་ཐང་ག་འབྲི་ཞོར་དུ་ཚོང་ལམ་འཚོལ་རྒྱུའི་སེམས་ཐག་བཅད།

བརྩོན་འགྲུས་ཅན་ལ་རྒྱལ་ཁ་འཁོར་ཞེས་པ་ལྟར་ཉིན་ཞིག་པེ་ཅིན་དུ་བོད་ལུགས་གསོ་རིག་སྒོ་བསྟེན་སྨན་ཁང་གཉེར་མཁན་ཞིག་གིས་སངས་རྒྱས་རྒྱལ་དགེ་སློབ་ཀྱིས་ཐང་ག་བཞེངས་པའི་བརྒྱུད་རིམ་མཐོང་རྗེས། བོད་ཀྱི་གསོ་བ་རིག་པའི་རྒྱུན་འཛིན་གྱི་གོ་དོན་ལྡན་པའི་ཐང་ག་བཞེངས་འདོདོ་ཡོད་སྟབས་ཁོང་གིས་རིན་གོང་སྒོར་ཁྲི40སྤྲད་དེ་ཉོ་ཚོང་གི་གྲོས་མཐུན་བཞག　བརྩམས་ཆོས་དེ་གྲུབ་རྗེས་མཁོ་མཁན་བློ་ཡིད་ཧ་ཅང་ཚིམ་པོ་བྱུང་བ་དང་ཁོང་ལ་པེ་ཅིན་དུ་ལས་གཏོད་བྱེད་པར་བསྐྱོད་པའི་དངུལ་དང་པོ་དེ་རག་པ་རེད།　 དེ་རྗེས་ཁོང་ཚོས་དེ་བས་བློ་རྩེ་གཅིག་སྒྲིམ་གྱིས་ལག་རྩལ་སྦྱོང་བརྡར་དང་རྩལ་ནུས་ཆེ་རུ་བཏང་བས་ཁོང་ཚོའི་སྙན་གྲགས་ལ་ཡིད་སྨོན་བྱེད་པར་ཡོང་མཁན་ཇེ་མང་དུ་འགྲོ་བཞིན་ཡོད་པ་རེད།

2015ལོར་སངས་རྒྱས་རྒྱལ་གྱིས་ཕ་ཡུལ་དུ་ལོག་ནས་ལས་གཏོད་བྱེད་པ་དང་ཕ་ཡུལ་གྱི་ཡུལ་མི་དེ་བས་མང་བ་ཕྱུག་འགྱུར་ལ་རོགས་རམ་བྱེད་པའི་ཐོག་མའི་བསམ་འདུན་བཅངས་ཏེ་ཕ་ཡུལ་རྨ་ལྷོ་ཁུལ་རེབ་གོང་གྲོང་ཁྱེར་དུ་ཕྱིར་ལོག་བྱས།　2016ལོ་ནས་བཟུང་སངས་རྒྱས་རྒྱལ་གྱིས་སྔ་རྗེས་སུ་མ་དངུལ་སྒོར་ཁྲི1500བཏང་ནས་བརྒྱུད་སྤེལ་ལྟེ་གནས་དང་ཐང་གའི་ཐོན་སྐྱེད་འཁོར་ཁང་གྲབས་འཛུགས་བྱས་པ་དང་། རེབ་གོང་གྲོང་ཁྱེར་སྲིད་གཞུང་གི་ཆེད་དོན་མ་དངུལ་གྱི་རྒྱབ་སྐྱོར་འོག་མཁྲེགས་ཆས་སྒྲིག་བཀོད་སྔ་རྗེས་སུ་བསྐྲུན་ནས་ལས་གཉེར་བྱེད་འགོ་ཚུགས་ཡོད།

ད་ཆ་ཁྱབ་སྤེལ་ལྟེ་གནས་སུ་ལྷ་འབྲི་བ100ལྷག་ཡོད་པ་དང་ཁོང་ཚོའི་དཔུང་ཁག་སྟོབས་ཆེར་ཕྱིན་པ་མ་ཟད། རི་མོ་ཁང་གི་གཉེར་སྐྱོང་ཁེ་སྤོགས་ཀྱང་དེ་དང་ཆབས་ཅིག་འཕར་བཞིན་ཡོད་པ་རེད།

ཐང་ག་སྦྱོང་འདོད་ཡོད་པ་དང་གསར་གཏོད་ལས་གཏོད་ཀྱི་ཕུགས་འདུན་ལྡན་པའི་ཡུལ་མི་སྤུན་ཟླ་དེ་བས་མང་བར་རོགས་རམ་བྱ་ཆེད། སངས་རྒྱས་རྒྱལ་གྱིས་ཆེད་མངགས་འཇིམ་བཟོ་དང་།འཚེམ་དྲུབ། ཐང་གའི་དགེ་རྒན་བཅས་གདན་དྲངས་ནས་རིན་མི་དགོས་པར་གསོ་སྦྱོང་མཛུབ་ཁྲིད་བྱས་ཏེ་སྔ་རྗེས་སུ་དགེ་ཕྲུག300གསོ་སྦྱོང་བྱས་པ་དང་དཀའ་ངལ་ཡོད་པའི་ཁྱིམ་ཚང་གི་དགེ་ཕྲུག་ལ་དམིགས་ཏེ་ད་དུང་ཐོན་རྫས་ཉོ་སྒྲུབ་ཀྱི་གྲོས་མཐུན་བཞག་ནས་ཁོང་ཚོའི་ཐོན་རྫས་བྲིན་ཚོང་སོགས་ཀྱི་གནད་དོན་ཐག་གཅོད་བྱས་པ་རེད།

2021ལོའི་ཟླ10པར་རེབ་གོང་གྲོང་ཁྱེར་མི་དམངས་སྲིད་གཞུང་གིས་གྲོང་གསེབ་དར་རྒྱས་ཀྱི་ཆེད་དོན་མ་དངུལ་སྒོར་ཁྲི50བཏང་ནས་ཁྱབ་སྤེལ་ལྟེ་གནས་ཀྱིས“རིག་གནས་ཐོན་ལས་དང་། མངོན་མིན་རིག་གནས་ཤུལ་བཞག དབུལ་སྐྱོར”བཅས་ཟུང་དུ་འབྲེལ་བའི་རྣམ་པའི་ཐོག་ནས་ཁ་ཐོར་གྱི་རིག་གནས་ཁེ་ལས་དང་གསོ་སྦྱོང་ཐོན་ཁུངས་བསྡུ་སྒྲིལ་ནུས་ལྡན་བྱས་ཏེ་རིག་གནས་དབུལ་སྐྱོར་གྱི་ཐོན་ལས་རྟེན་གཞི་ནུས་ཤུགས་ཡོད་རྒུས་བཏོད་པ་དང་།ཐོ ན་ལས་འཕེལ་རྒྱས་ཀྱི་དཀའ་གནད་བསལ་བ །མི་རིགས་ཀྱི་སྲོལ་རྒྱུན་ལག་ཤེས་བཟོ་རྩལ་རྒྱུན་འཛིན་དང་གྲོང་གསེབ་ཀྱི་ཐོན་ལས་མཉམ་འདྲེས་འཕེལ་རྒྱས་ལ་སྐུལ་འདེད་གཏོང་བ་བཅས་བྱས་ཏེ་དབུལ་སྒྲོལ་དུད་ཚང་སྒོ་འགྲམ་དུ་ལས་ཞུགས་ཐུབ་པ་དང་མང་ཚོགས་ལ་འབབ་འཕར་ཕྱུག་འགྱུར་ཡོང་བའི་སྣེ་ཁྲིད་བྱས་པ་རེད།

ད་ཆ་སངས་རྒྱས་རྒྱལ་གྱིས་པེ་ཅིན་དང་། ཀོང་ཀྲོའུ། ཧྲེན་ཀྲེན། ཐའེ་ཡོན་སོགས་སུ་རིག་གནས་ཁེ་ལས་དང་ལོ་ལྟར་ཐང་ག་ཉོ་ཚོང་གི་གན་རྒྱ་བཞག་ཡོད།

“ཉ་སྟེར་བ་ལས་ཉ་འཛིན་སྟངས་བསླབས་ན་དགའ”ཞེས་པའི་དགེ་ཕྲུག་གསོ་སྐྱོང་གི་འདུ་ཤེས་སྐོར་གླེང་སྐབས་སངས་རྒྱས་རྒྱལ་གྱིས་ཁོང་གིས་ལག་རྩལ་སྣ་གཅིག་སྦྱངས་ཚེ་འབྱོར་ཕྱུག་གི་འཚོ་བ་སྐྱེལ་ཐུབ་པ་མ་ཟད། ད་དུང་མི་ཞིག་གི་ལས་དབང་ལའང་འགྱུར་ལྡོག་གཏོང་ཐུབ་བསམ་པ་དང་། སངས་རྒྱས་རྒྱལ་གྱི་སྣེ་ཁྲིད་འོག་དགེ་ཕྲུག་མང་པོ་ཞིག་གིས་རང་ཉིད་ལ་དབང་བའི་ཕྱུག་འགྱུར་ལམ་བུ་ཞིག་རྙེད་ཡོད།

དཔལ་ལྡན་ནི་སངས་རྒྱས་རྒྱལ་གྱི་དགེ་ཕྲུག་ཡིན་པ་དང་ཁོང་གི་རྗེས་འབྲངས་ནས་ཐང་གའི་ལག་རྩལ་སྦྱངས་ནས་ལོ་ངོ16ཕྱིན་ཡོད།　ད་ཆ་དཔལ་ལྡན་ཞིང་ཆེན་གྱི་རིམ་པ་གཉིས་པའི་བཟོ་རྩལ་མཛེས་རྩལ་ཆེ་མོ་བར་གཏན་འཁེལ་བྱས་པ་མ་ཟད། ད་དུང་རང་ཉིད་ཀྱི་ལས་དོན་ཁང་ཞིག་ཀྱང་ཐོ་འགོད་བྱས་ནས་བཙུགས་ཡོད།“དགེ་རྒན་དང་མཉམ་དུ་ཐང་ག་སྦྱངས་པས་ངའི་འཚོ་བའི་ཆ་རྐྱེན་ཧ་ཅང་ལེགས་སུ་གྱུར”ཞེས་དགེ་ཕྲུག་གཞན་པ་སྟག་ལྷ་ཐར་དང་ནང་མི་ཚོའི་བདེ་སྐྱིད་སྟོན་གྲངས་མངོན་གསལ་དོད་པོས་མཐོ་རུ་ཕྱིན་ཡོད།

ཆུ་ལ་འགོ་དང་མི་ལ་རྩ་བ་ཡོད།　སངས་རྒྱས་རྒྱལ་ཕྱུག་པོ་ཆགས་རྗེས་ཡུལ་མི་མི་བརྗེད་པར་གྲོང་གསེབ་དང་། རྒན་གསོ་ཁང་། སློབ་གྲྭ་བཅས་སུ་ཐེངས་མང་བསྐྱོད་དེ་དངུལ་དང་དངོས་ཟོག་ཞལ་འདེབས་རྒྱག་པའི་བྱེད་སྒོ་སྤེལ།　2000ལོ་ནས་ད་བར་སངས་རྒྱས་རྒྱལ་གྱིས་རིམ་རྩིས་བྱས་ན་དངུལ་སྨར་སྒོར་ཁྲི80ཞལ་འདེབས་བརྒྱབ་པ་མ་ཟད། སེང་གེ་གཤོང་སྡེ་བ་གོང་མའི་མཉམ་སྡེབ་ལ་གཏའ་མར་བཞག་མེད་པའི་དངུལ་སྒོར་ཁྲི30ལྷག་གཡར་ནས་སྡེ་བའི་ཐུན་མོང་དཔལ་འབྱོར་འཕེལ་རྒྱས་འགྲོ་རྒྱུར་རམ་འདེགས་བྱས་ཡོད།