2024ལོའི་མཚོ་བྱང་ཁུལ་གྱི་དགུན་དུས་ཡུལ་སྐོར་སྤེལ་མགོ་བརྩམས།
ཟླ11པའི་ཚེས15ཉིན། 2024ལོའི་མཚོ་བྱང་བོད་རིགས་རང་སྐྱོང་ཁུལ་གྱི་དགུན་དུས་ཡུལ་སྐོར་སྤེལ་མགོ་རྩོམ་པའི་མཛད་སྒོ་ཧེ་ཡན་རྫོང་མཚོ་སྔོན་པོ་མཐོན་པོ་སྒང་གི་ཕྱི་རོལ་རྟེན་གཞི་རུ་བསྡུས་པ་དང་། དེའི་དམིགས་ཡུལ་ནི“གྲང་བའི་ཐོན་ཁུངས”དེ“ཚ་བའི་ཐོན་ལས”སུ་བསྒྱུར་ནས། མཚོ་བྱང་གི་རྒྱལ་སྤྱིའི་སྐྱེ་ཁམས་ཡུལ་སྐོར་དམིགས་སའི་འཛུགས་སྐྲུན་ལ་སྐུལ་འདེད་གཏོང་རྒྱུ་དེ་རེད།
ད་ལོ་ནས་བཟུང་། མཚོ་བྱང་ཁུལ་གྱིས་འཕེལ་རྒྱས་གཏོང་སྟངས་རྒྱུན་མཐུད་སྒོས་གསར་གཏོད་དང་། ཡུལ་སྐོར་ཁོར་ཡུག་ཇེ་ལེགས་སུ་གཏོང་བ། ཁུལ་ནང་ཁུལ་གྱི་གངས་འཁྱག་ཡུལ་སྐོར་ཐོན་ཁུངས་སྤྱི་འདོམས་བཅས་བྱས་ཏེ། ཡུལ་སྐོར་ལ་བརྟེན་ནས་སྐུལ་ཁྲིད་དང་ལུས་རྩལ་ལ་བརྟེན་ནས་སྣེ་ཁྲིད། རིག་གནས་ལ་བརྟེན་ནས་ནུས་པ་སྤྲོད་པ་བཅས་བྱས་ཏེ། རིག་གནས་ལུས་རྩལ་གྱི་དམངས་ཕན་བྱ་འགུལ་དང་གངས་འཁྱག་རོལ་རྩེད་ལས་གཞི་རབ་དང་རིམ་པ་རྩ་འཛུགས་དང་ཇུས་འགོད་བྱས་ནས། ཁུལ་ཡོངས་ཀྱི་དགུན་དུས་ཡུལ་སྐོར་ལས་རིགས་རྣམ་པ་སྔར་ལས་ཕུན་སུམ་ཇེ་ཚོགས་སུ་གཏོང་བ་དང་། ཕྱོགས་ཡོངས་ནས་མཚོ་སྔོན་པོ་དང་མདོ་ལ་རིང་མོའི་དགུན་དུས་ཀྱི་ལྟ་ན་སྡུག་པའི་རང་བྱུང་མཛེས་ལྗོངས་མངོན་པར་བྱས་ཏེ། ཁྱད་ལྡན་གངས་འཁྱག་ཡུལ་སྐོར་བསྐྲུན་པར་སྐུལ་འདེད་བཏང་བ་དང་། ནུས་ཤུགས་ཡོད་རྒུས་མཚོ་བྱང་ཁུལ་གྱི་དགུན་དུས་ཡུལ་སྐོར་ལ་སྔར་ལས་འགུག་ཤུགས་ལྡན་པར་སྐུལ་འདེད་གཏོང་རྒྱུ་རེད། ཐུན་མོང་གིས་མཚོ་སྔོན་པོ་དང་མདོ་ལ་རིང་མོའི་མཛེས་ལྗོངས་དེ་དགུན་དུས་མཚོ་བྱང་ཡུལ་སྐོར་གྱི་བརྗོད་དོན་གཙོ་བོར་བརྩིས་ནས། མཉམ་དུ་མཚོ་བྱང་གི་དགུན་དུས་ཡུལ་སྐོར་འཕེལ་རྒྱས་ཀྱི་ལེའུ་གསར་པ་ཞིག་བཏོད་པ་དང་། ནུས་ཤུགས་ཡོད་རྒུས་མཚོ་སྔོན་གྱི་དགུན་དུས་ཡུལ་སྐོར་གྱི་བྱ་བ་ལེགས་པོར་སྒྲུབ་ནས། དགུན་དུས་ཡུལ་སྐོར་དེ་ཤུགས་རྐྱེན་ཆེན་པོ་ལྡན་པའི་ས་ཁོངས་རང་བཞིན་གྱི་ཡུལ་སྐོར་རིག་གནས་ཟོང་རྟགས་ཤིག་ཏུ་བསྐྲུན་རྒྱུ་རེད།
མཚོ་བྱང་ཁུལ་གྱི་རིག་གནས་གཏིང་ཟབ་ལ་རང་བྱུང་ཡུལ་ལྗོངས་ཁྱད་དུ་འཕགས་པ་དང་། དགུན་དུས་ཡུལ་སྐོར་ཐོན་ཁུངས་ཕུན་སུམ་ཚོགས་ལ། མཐོན་པོ་རི་བོ། སྟོང་སོ་རྒྱལ་ཁབ་ནགས་ཚལ་སྤྱི་གླིང་སོགས་དགུན་དུས་ཀྱི་ཡུལ་ལྗོངས་ལ་ཐུན་མོང་མ་ཡིན་པའི་ཁྱད་ཆོས་ལྡན་ཡོད། མཐོ་སྒང་གི་མུ་ཏིག་མཚོ་སྔོན་པོར་རླབས་ཕྲེང་གཡོ་ཞིང་ཡུལ་ལྗོངས་ལྟ་ན་སྡུག་པ་དང་། མུ་མཐའ་མེད་པའི་མདོ་ལ་རི་རྒྱུད་སྤྲིན་དཀར་གྱིས་གཡོགས་ཤིང་། མཛེས་པའི་ཡུལ་ལྗོངས་དེའི་མི་སེམས་འགུག་པར་བྱེད།
