ས་བཅུའི་སྨོན་ལམ་བཞུགས་སོ།།
སྟོན་པ་ཀུན་ཏུ་བཟང་པོ་འདས་པ་མི་མངའ་བ།། ཐུགས་རྗེ་ཀུན་གྱི་མགོན་ལ་ཕྱག་འཚལ་ལོ།། དུས་འདི་ནས་བཟུང་ནས་ཉོན་མོངས་པའི་སེམས་ཅན་རྣམས།། ས་གནས་ཁྱད་པར་ཅན་དུ་བགྲོད་བྱའི་ཕྱིར།། སེམས་བསྐྱེད་རྣམ་དག་སྨོན་ལམ་འདི་གདབ་སྟེ།། འཕྲུལ་བོན་གསང་བ་ངང་རིང་ཐུགས་རྗེ་ཡིས།། འཁོར་བའི་གནས་ངན་ཀུན་སྤངས་ནས།། དག་པའི་ས་ལམ་བགྲོད་པའི་ཕྱིར།། ས་དང་པོ་རབ་ཏུ་དགའ་བའི་ས།། རབ་ཏུ་དགའ་བའི་ས་ལ་ནི།། སེར་སྣའི་སྒྲིབ་པ་དག་བྱང་ནས།། སྦྱིན་པའི་ཚོགས་ཆེན་རབ་རྫོགས་ཏེ།། སྦྱིན་པ་བྱམས་མའི་ཞལ་མཐོང་ཤོག། གཉིས་པ་དྲི་མེད་ཤེལ་གྱི་ས།། དྲི་མེད་ཤེལ་གྱི་ས་ལ་ནི།། འཆལ་བའི་སྒྲིབ་པ་དག་བྱང་ནས།། ཚུལ་ཁྲིམས་ཚོགས་ཆེན་རབ་རྫོགས་ཏེ།། ཚུལ་ཁྲིམས་བྱམས་མའི་ཞལ་མཐོང་ཤོག། གསུམ་པ་འོད་ཟེར་འཕྲོ་བའི་ས།། འོད་ཟེར་འཕྲོ་བའི་ས་ལ་ནི།། བྱུང་ཚོར་སྒྲིབ་པ་དག་བྱང་ནས།། བཟོད་པའི་ཚོགས་ཆེན་རབ་རྫོགས་ཏེ།། བཟོད་པ་བྱམས་མའི་ཞལ་མཐོང་ཤོག། བཞི་བ་ཕྱག་རྒྱ་སྒྱུར་བའི་ས།། ཕྱག་རྒྱ་སྒྱུར་བའི་ས་ལ་ནི།། ལེ་ལོའི་སྒྲིབ་པ་དག་བྱང་ནས།། བརྩོན་འགྲུས་ཚོགས་ཆེན་རབ་རྫོགས་ཏེ།། བརྩོན་འགྲུས་བྱམས་མའི་ཞལ་མཐོང་ཤོག། ལྔ་བ་བོན་ཉིད་སྤྲིན་ཚོགས་ས། བོན་ཉིད་སྤྲིན་ཚོགས་ས་ལ་ནི།། གཡོ་རྩོལ་སྒྲིབ་པ་དག་བྱང་ནས།། བསམ་གཏན་ཚོགས་ཆེན་རབ་རྫོགས་ཏེ།། བསམ་གཏན་བྱམས་མའི་ཞལ་མཐོང་ཤོག།དྲུག་པ་བདེ་ལྡན་རྟོགས་པའི་ས།། བདེ་ལྡན་རྟོགས་པའི་ས་ལ་ནི།། མ་ནུས་སྦུངས་ཆུང་སྒྲིབ་པ་དག་བྱང་ནས།། སྟོབས་ཀྱི་ཚོགས་ཆེན་རབ་རྗོགས་ཏེ།། སྟོབས་ཀྱི་བྱམས་མའི་ཞལ་མཐོང་ཤོག། བདུན་པ་ཡིད་བཞིན་འགྲུབ་པའི་ས།། ཡིད་བཞིན་འགྲུབ་པའི་ས་ལ་ནི།། གདུག་སེམས་སྒྲིབ་པ་དག་བྱང་ནས།། སྙིང་རྗེའི་ཚོགས་ཆེན་རབ་རྫོགས་ཏེ།། སྙིང་རྗེ་བྱམས་མའི་ཞལ་མཐོང་ཤོག། བརྒྱད་པ་མ་ཆགས་དག་པའི་ས།། མ་ཆགས་དག་པའི་ས་ལ་ནི།། རེ་དོགས་སྒྲིབ་པ་དག་བྱང་ནས།། སྨོན་ལམ་ཚོགས་ཆེན་རབ་རྫོགས་ཏེ། སྨོན་ལམ་བྱམས་མའི་ཞལ་མཐོང་ཤོག། དགུ་བ་ཡི་གེ་འཁོར་ལོའི་ས།། ཡི་གེ་འཁོར་ལོའི་ས་ལ་ནི།། ཕྱིན་ཅི་ལོག་གི་སྒྲིབ་པ་དག་བྱང་ནས།། ཐབས་ཀྱི་ཚོགས་ཆེན་རབ་རྫོགས་ཏེ།། ཐབས་ཀྱི་བྱམས་མའི་ཞལ་མཐོང་ཤོག། བཅུ་པ་མི་འགྱུར་གཡུང་དྲུང་ས།། མི་འགྱུར་གཡུང་དྲུང་ས་ལ་ནི།། འཁྲུལ་རྨོངས་སྒྲིབ་པ་དག་བྱང་ནས།། ཤེས་རབ་ཚོགས་ཆེན་རབ་རྫོགས་ཏེ།། ཤེས་རབ་བྱམས་མའི་ཞལ་མཐོང་ཤོག། ས་ཏྲིག་ཨེར་སངས་ཞལ་མཐོང་ཤོག། ས་ཏྲིག་ཨེར་སངས་ཞལ་མཐོང་ནས།། བདག་དོན་ལྷུན་གྱིས་གྲུབ་པར་ཤོག། བདག་དོན་ལྷུན་གྱིས་གྲུབ་ནས་ཀྱང་། གཞན་དོན་མཐའ་རུ་ཕྱིན་པར་ཤོག། གཞན་དོན་མཐའ་རུ་ཕྱིན་ནས་ཀྱང་།། སེམས་ཅན་དོན་ཀུན་སྨིན་པར་ཤོག། སེམས་ཅན་དོན་ཀུན་སྨིན་ནས་ཀྱང་།། ཀུན་ཏུ་འོད་ཀྱི་ས་ནོན་ཤོག། ཀུན་ཏུ་འོད་ཀྱི་ས་ནོན་ནས།། བདེ་ཆེན་བོན་གྱི་ས་ལ་ནི།། ཅིར་ཡང་བརྗོད་དུ་མེད་པ་ལ།། མི་གཡོ་མཉམ་གསལ་སྐུ་གསུམ་རྫོགས་པར་ཤོག། མི་གཡོ་མཉམ་གསལ་སྐུ་གསུམ་རྫོགས་ནས་ཀྱང་།། ད་མོ་དག་ལ་རྫུས་ཏེ་སྐྱེ་བར་ཤོག། པད་མོ་དག་ལ་རྫུས་ཏེ་སྐྱེས་ནས་ཀྱང་།། སེམས་ཅན་དོན་ཀུན་མཐའ་རུ་ཕྱིན་པར་ཤོག།
ཅེས་ས་བཅུ་ལམ་བགྲོད་ཀྱི་སྨོན་ལམ་འདི་ཁྲི་རྗེ་མདོ་མང་ལས་བྱུང་བ་རྫོགས་སོ།།
