阿拉老底子每天呈送精彩文章一组
打开尘封的记忆，寻觅往昔的岁月
叙老底子事 忆老底子人
诉老底子情
以市区人举例（本地人弗算），绝大部分80年代中期前，基本上全像众牲一样高密度住在市中心，鼻祖级长工，三四代同堂大流，人均4平俯仰皆是，2平特困户一大帮。
要体会具体情形到老城厢去参观好来，再弗去以后估计看弗见哉。
无么空可以看纪录片，弗多描述，反正我小辰光一户人家困觉房间是在楼梯下头个。个咾真正个上海历来是小来死，高密度历来主旋律。伯伯办公室里也无几化人，随便寻就好寻得出一个住小南门、一个住小东门搭一个住老西门，还有一个文庙，算上伯伯住小北门，单单老城厢轻松就五个了，弄弗好我搭伊拉小辰光路上向碰着过。
80年代后期开始到90年代后期，开始一轮大动迁，以阿拉南市为例，交关人就是搬到南市个浦东部分去了——伊歇阿拉屋里动迁根本无么浦东新区，还仍旧算南市区（黄浦搭杨浦情况类似，是细长条，即今天耀华路+浦东南路+浦东大道沿江地带），乃么住工人新村个人越来越多，五到七层，条件稍许好眼，迭个也就是后来外地人俗称个“老破小”（但搭今朝外地人看到外观两样，现在看见个迭种叫平改坡润色版，从前基本是一片灰，世博前夕大概觉着中国顶大城市，弄弄么迭种住房条件，实在坍台，个咾开始要面孔了），单位效益好么还好喫喫福利分房，交关老高层其实就是单位自家造个，不过侬弗要觉着啥普遍来死，分房迭排事体领导优先。即使到今朝，仍旧有海量户籍人口住在迭排房子里向，其组成自然是三口之家或者再加祖辈。
个咾此类主流上海家庭之后翻身靠啥？并弗是主要靠啥拆迁，拆迁前前后后真正翻身个一塌刮子只有几年，噱倒噱进弗弗少少（只是侬觉着会得有大规模报道伐），惠及个市区人更是寥寥无几，主要是世博会周期里向个，实质上也是透支未来人群个利益。举只老简单个例子，浦东世博周边上南地区，假使侬手上有十年以前个照片，会发觉此地实际上住人个地方根本就无么啥个卵变化可言。翻身靠个就是在踏准时机轧进买房，买对么的的刮刮好少奋斗几十年，甚至还有条件再多买套；买晏了么，放低要求去来套层高合适个老工房将来替父母养老还是可以；再晏么，就是原地踏步，继续三口之家一套，仅此而已，结束。穷搭弗穷，对于大流上海家庭，看个就是迭只环节。
上车及时个人是非常高瞻远瞩还是啥，倒真讲弗出，交关是结婚刚需上车（譬如子女75-80后左右的，尤其儿子）；或者改善居住条件想法邪气强烈（譬如阿拉小阿姨，原先住在陆家浜路附近，房子比阿拉屋里还蹩脚，碰着额角头，顶合适个几年里向问兄弟姊妹爷娘借眼铜钿，孤注一掷买着今朝肇家浜路附近某高层，外加足够大。伊拉老宅几时动迁？就是2020年，畀侬两选一，要么滚远郊，要么畀侬300多万，300多万有卵用，好买肇嘉浜路？）；
甚至有稀里糊涂跟风上车，搭个点在股市里赔光个人无啥本质上区别，只是历史只选一边罢了。至于当时房价收入比看似比今朝合理交关，伊个年代，买房对于当时普通家庭是否真正轻轻松松，侬去问问长辈，问问伊拉当时面对个经济开支状况哪能，饭碗头能弗能够保牢也是问题。
转自知乎（文字已吴化）
来源：句鱼
我知道你在看哟~
